Azərbaycanda təbii şirə istehsal edən bir çox iri şirkətlər var.

Marketlərdə alıcılara müxtəlif növ meyvələrdən hazırlanmış, üzərində qatqısız olduğu yazılan şirələr təqdim olunur.

Butov.az Gün.Az-a istinadən xəbər verir ki, əhalinin maddi durumunun nisbətən pisləşməsi şirə satışında da özünü göstərib.

Bir çox marketlərdə apardığımız sorğu zamanı satıcılar əvvəlki dövrlərə nisbətən alıcılıq qabiliyyətinin zəifləməsini təsdiq edirlər. Onların sözlərinə görə, bu şirə satışına da öz təsirini göstərib.

Əldə etdiyimiz bəzi məlumata görə, vitrinlərdə qalan və vaxtı keçmiş şirələr yenidən şirkətə qayıdır və təkrar istehsal olunur.

Bu faktı təqdim edən mənbə də təsdiq edir ki, buna səbəb məhz alıcılıq qabiliyyətinin aşağı düşməsidir. Sahibkar isə artıq ziyana düşməmək üçün bu yola əl atır.

Azad İstehlakçılar Birliyinin (AİB) sədri Eyyub Hüseynov məsələ ilə bağlı Gün.Az-a bildirib ki, ölkədə qida təhlükəsizliyi haqqında qanun yoxdur. Eyni zamanda satışdan çıxarılan malların məhvetmə proseduru mövcud deyil.

Onun sözlərinə görə, bir çox dövlət orqanları monitorinqlər aparıb, malı satışdan çıxarıb aktla satıcıya təhvil verir.

“O da cəriməsini qoyur, saxta sənəd gətirir. 20 ildə mən cəmi 2 dəfə görmüşəm ki, malları məhv etsinlər. Yəni ölkədə şəffaf məhvolma proseduru yoxdur. İstisna olunmur ki, mallar qaytarıldıqdan sonra yenidən istehsal olunub, satışa çıxarılır”.

E.Hüseynov əlavə edib ki, təkcə pivədən başqa bütün məhsulların təkrar istehsalı mümkündür:

“Çünki pivə qıcqırır və bir litr pivəni bir tona qarışdırsan onu da xarab edər”.

Ekspert şirənin təkrar istehsalının insanlarda mədə-bağırsaq, xərçəng xəstəliyi əmələ gətirə biləcəyini deyib. Əlavə edib ki, bu cür istehsal zamanı məhsulun tərkibinə kimyəvi məhlullar, mənşəyi bilinməyən maddələr vurulur.