Hazırkı mərhələdə region üçün ən böyük təhlükə mənbəyi Ermənistandakı "Metsamor" Atom-Elektrik Stansiyasıdır.

Azərbaycanda fəaliyyət göstərən bəzi QHT rəhbərləri ilə söhbətimizdə təklifin reallaşması üçün geniş imkanların və bütün bunların fonunda istəklərin olduğunu bildirdilər.(sesqazeti.az)

"Şəmsi Əsədullayev" Xeyriyyə İctimai Birliyinin nümayəndəsi Cəsarət Hüseynzadə:

- Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, deputat Azay Quliyevin "Metsamor" AES-in bağlanması üçün Beynəlxalq Koalisiyasının yaradılması təklifinə ölkədaxili və xaricdə olan QHT-lərdən dərhal dəstək gəldi. "Metsamor" AES-in doğurduğu təhlükə yalnız Ermənistanın deyil, bütün region üçün təhlükəsi nəzərə alınarsa, koalisiyanın tərkibinin Azərbaycan, Gürcüstan, Türkiyə və İran QHT-ləri ilə məhdudlaşmayacağına əmin olmaq olar. Fikrimcə, formalaşan Beynəlxalq Koalisiya rəsmi tədbirlərlə yanaşı, başqa effekti təbliğat üsullarından da istifadə etməklə, problemi dünya ictimaiyyətinə, beynəlxalq təşkilatların nəzərinə çatdırmalıdır. Bildiyimiz kimi, ilk növbədə petisiya təşkil edilib. Bundan başqa, sosial çarxların hazırlanması, xarici ölkələrdə flaşmobların keçirilməsi, "Çernobıl", "Fukusima-1" faciələrinin yenidən gündəmə gətirilməsi labüddür. Koalisiya formalaşdırdıqdan sonra dərhal Azərbaycan, Gürcüstan, Türkiyə və İranda paralel təbliğat işləri aparılmalıdır. Vətəndaş cəmiyyəti nümayəndələri olaraq, biz bu istiqamətdə səylərimizi birləşdirməliyik və hər bir təşkilat üzərinə düşən məsuliyyəti dərk edərək, regionun xilas olunmasında iştirak etməlidir.

Korrupsiyaya qarşı Mübarizə Fondunun icraçı direktoru Vasif Mövsümov:

- Region üçün ən böyük təhlükə mənbəyi olan Ermənistandakı "Mesamor" Atom-Elektrik Stansiyasının təhlükəsinin qarşısının alınması üçün təkcə qonşu ölkələr deyil, o cümlədən Rusiya da maraqlı olmalıdır. Ümumiyyətlə, dünya ölkələri və beynəlxalq təşkilatlar da bu təhlükənin qarşısının alınması işində maraqlı olmalı və bu istiqamətdə sərt addımlar atmalıdırlar. Çünki uzun illərdir ki, istismarda olan stansiya artıq köhnəlib, ciddi nasazıqlarlala üzləşib. Nəzərə almaq lazımdır ki, istismara verildiyi 1976-cı ildən bu günə qədər stansiyada dəfələrlə qəzalar baş verib. Növbəti qəza isə nəticəsi təsəvvür edilməyən dəhşətli faciələr deməkdir. S.Sarkisyan rejimi bunun fərqini başa düşməli və ya ona başa salınmalıdır. Bir sözlə, region ciddi təhlükə qarşısındadır və bu təhlükənin qarşı isə vaxtında alınmalıdır.
Butov.az