Bu il Azərbaycanda seysmik aktiv olan zonaların adları açıqlanıb.
Butov.az xəbər verir ki, Azərbaycan Milli Elmlər Akademiyasının (AMEA) Respublika Seysmoloji Xidmət Mərkəzinin baş direktoru Qurban Yetirmişli APA-ya bildirib ki, ən aktiv seysmik zonalar Şamaxı, İsmayıllı, Daşkəsən, Gədəbəy, Qəbələ rayonlarındadır. O deyib ki, cari ilin 3 ayı ərzində seysmogen ərazilərdə fon səviyyədə zəif təkanlar, mütəmadi zəlzələlər baş verib.

Q. Yetirmişli qeyd edib ki, həmin ərazilərdə maqnitudası 2-3-dən yuxarı olan zəlzələlər qeydə alınsa da, onlar hiss edilməyib: “Bu gün Qəbələdə maqnitudası zəif olan 5-6 xırda təkanlar olub. Amma ümumilikdə götürsək, bu il Azərbaycanda seysmik aktivlik fon səviyyəsindədir, hiss olunan zəlzələlər baş verməyib. Xəzər dənizində də gülü potensial gücə malik zəlzələ ocaqları var. Bu ocaqlar Azəri-Günəşli-Çıraq zonasında, Abşeronun cənubunda, dənizin cənubda, eləcə də şimalda yerləşir. Amma bu il ərzində həmin ərazilərdə zəlzələlər də zəif olub və güclü aktivləşmə yoxdur”.

Baş direktor əlavə edib ki, zəlzələlər tektonik qırılmalar nəticəsində litosferdə gedən blokların hərəkəti nəticəsində baş verir. Onun sözlərinə görə, xırda təkanların hamısı qırılmaların təmas zonasında qeydə alınıb: “Bir blokun hərəkəti digərinə nisbətən müəyyən qədər fərqlənir. Məsələn, il ərzində arxada olan blokun sürəti il ərzində 10 milli metrdisə, qarşıdakı blokun sürəti ondan biraz aşağı olur. Nəticədə bloklar bir-birini sıxır və parçalanmalar olur. Nəticədə təkanlar dalğa formasında qeydə alınır və güclü olanda hiss edilir”.