Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən icra olunan sosial xarakterli “Ailə Biznesinə ASAN Dəstək” – ABAD pilot layihəsi çərçivəsində 2017-ci ildə Balakən rayonunda “ABAD park” kompleksinin yaradılması nəzərdə tutulur. Artıq bu istiqamətdə hazırlıq işlərinə başlanılıb.

Butov.az xəbər verir ki, bu barədə AZƏRTAC-a Balakən 2 saylı ABAD Mərkəzinin direktoru Amil Musayev məlumat verib.

Onun sözlərinə görə, layihənin təqdimatından qısa müddət keçməsinə baxmayaraq, artıq bu layihəyə qoşulmaq üçün 100-dən çox balakənli ailə müraciət edib. Bu ailələrin arasından ilkin olaraq daha geniş təsərrüfat bazasına malik və istehsal prosesində təcrübəsi olan 12 ailə seçilib və onlar üçün 12 konteyner sifariş verilib. Bu konteynerlərdən 9-u meyvə məhsullarının konservləşdirilməsi, həmçinin cem, mürəbbə və kompot istehsalı üçün, 2-si süd məhsullarının hazırlanması, biri isə kolbasa və sosiska istehsalı üçün nəzərdə tutulub. Yaxın vaxtlarda gətirilməsi planlaşdırılan bu konteynerlər ailələrin təsərrüfatlarında yerləşdiriləcək. Konteynerlərdə xaricdə istehsal olunan müasir texnoloji avadanlıq quraşdırılacaq.

Bundan əlavə, mərkəz tərəfindən sənətkarlıq fəaliyyəti ilə məşğul olan vətəndaşların əl işlərinin satışının təşkil edilməsi istiqamətində də işlər görülür.