18-08-2023, 19:09
Dövlət Sərhəd Xidmətinin 104-cü ildönümü qeyd edildi
Avqustun 18-də Dövlət Sərhəd Xidmətinin rəhbərliyi və şəxsi heyəti Azərbaycanın Sərhəd Mühafizəsinin 104-cü ildönümü münasibətilə Fəxri Xiyabanda Ulu Öndər Heydər Əliyevin əziz xatirəsini ehtiramla anıb, məzarı önünə əklil və gül dəstələri qoyublar.
Dövlət Sərhəd Xidmətinin Mətbuat Mərkəzindən verilən xəbərə görə, görkəmli oftalmoloq-alim, akademik Zərifə xanım Əliyevanın xatirəsi hörmətlə yad edilib.
II Fəxri Xiyabanda və Şəhidlər Xiyabanında Azərbaycanın müstəqilliyi və ərazi bütövlüyü uğrunda mübarizədə həlak olmuş igid oğulların xatirəsi anılaraq “Əbədi məşəl” abidəsinin önünə əklil qoyulub.
Sonra Dövlət Sərhəd Xidmətinin “Sərhədçi” Mədəniyyət Mərkəzində təntənəli mərasim keçirilib.
Azərbaycan Respublikasının Dövlət Himninin səsləndirilməsi ilə başlayan tədbirdə Dövlət Sərhəd Xidmətinin rəisi general-polkovnik Elçin Quliyev çıxış edərək Azərbaycanın Sərhəd Mühafizəsinin 104-cü ildönümü münasibətilə şəxsi heyəti təbrik edib.
Çıxışda 44 Günlük Vətən müharibəsində ölkəmizin ərazi bütövlüyünün bərpa olunduğu, 12-13 sentyabr 2022-ci il tarixlərində Ermənistan Silahlı Qüvvələrinin bölmələrinin Azərbaycan-Ermənistan dövlət sərhədinin Zəngilan rayonu istiqamətində geniş miqyaslı təxribatlarının qarşısının alınması zamanı Dövlət Sərhəd Xidmətinin qarşısında qoyulmuş döyüş tapşırıqlarının layiqincə icra edildiyi, Azərbaycan sərhədçilərinin igidlik dastanı yazdıqları, dövlət başçısının tapşırığı əsasında Ermənistan-Azərbaycan dövlət sərhədində, Laçın-Xankəndi yolunun başlanğıcında, Həkəri çayı üzərindəki körpünün üstündə dövlət sərhədindən buraxılış məntəqəsinin qurulması, fəxarət rəmzimiz olan üç rəngli Dövlət bayrağımızın ucaldılması ilə sərhədlərimizin bütövlüyünün təmin edilməsi xüsusi vurğulanıb.
Dövlət sərhədinin toxunulmazlığının təmin edilməsi kimi müqəddəs vəzifə ilə fəxr edən, üçrəngli dövlət bayrağımız altında milli maraqlarımızı ən yüksək səviyyədə qorumaqdan qürur duyan sərhədçilərin gələcəyə inamla baxdıqları, bu inamın Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin müdrik siyasəti və onun rəhbərliyi altında əldə edilən qələbələrdən qaynaqlandığı qeyd edilib.
Tədbir zamanı Azərbaycan Respublikasının Prezidenti cənab İlham Əliyevin 17 avqust 2023-cü il tarixli sərəncamları şəxsi heyətə elan edilib, zabitlərə ali hərbi rütbələr təqdim olunub, xidməti-döyüş fəaliyyətində fərqlənən hərbi qulluqçular orden və medallarla təltifləndirilib.
Tədbirin rəsmi hissəsindən sonra şəxsi heyət Dövlət Sərhəd Xidmətinin Mədəniyyət Mərkəzinin yaradıcı kollektivinin əlamətdar gün münasibətilə hazırladığı bayram konsertini izləyib, tədbir iştirakçılarına Azərbaycan Sərhəd Mühafizəsinin xidməti-döyüş fəaliyyətini özündə tərənnüm edən “Şərə qarşı” sənədli filmi nümayiş olunub.
18-08-2023, 18:44
Füzuli şəhərinə yola salınan 23 ailə mənzil başına çatdı
Bu gün Bakıdan Füzuli şəhərinə yola salınan ilk köç - 90 nəfərdən ibarət 23 ailə mənzil başına çatıb.
İndiyədək Bakı, Sumqayıt şəhərlərində və Abşeron rayonunda müvəqqəti məskunlaşmış bu ailələr bundan sonra öz doğma şəhərlərində - Füzulidə yaşamağa başlayacaq.
Qarabağ iqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəsi Emin Hüseynov sakinləri yenidən öz doğma şəhərinə qayıdışı münasibətilə təbrik edib.
Daha sonra evlərin açarları sakinlərə təqdim olunub.
Qeyd edək ki, birinci mərhələdə Füzuli şəhərinə ümumilikdə 144 ailənin köçürülməsi nəzərdə tutulur.
Avqustun 5-də Qaçqınların və Məcburi Köçkünlərin İşləri üzrə Dövlət Komitəsi Füzuli şəhərinə köçürüləcək ailələr arasında püşkatma keçirib.
Püşkatmada 144 ailə (509 nəfər) iştirak edib. Ailə tərkibinə uyğun olaraq, onlardan 51-nə ikiotaqlı, 76-na üçotaqlı, 17-nə dördotaqlı mənzil verilib.
Həmin ailələr indiyədək Bakı və Sumqayıt şəhərlərində, Abşeron rayonu ərazisində müvəqqəti məskunlaşma yerlərində yaşayıb.
Keçmiş məcburi köçkünlərin Füzuli şəhərinə qayıdışı qarşıdakı günlərdə davam edəcək.
18-08-2023, 17:47
Kəlbəcərdə saxlanılan erməni hərbiçi həbs olundu
Xəbər verildiyi kimi avqustun 16-da Azərbaycan-Ermənistan dövlət sərhədinin Kəlbəcər rayonu ərazisindən keçən hissəsində Ermənistan Silahlı Qüvvələrinin kəşfiyyat-diversiya qrupu tərəfindən terror-təxribat əməliyyatları həyata keçirmək məqsədilə Azərbaycan Respublikasının dövlət sərhədinin pozulması faktı ilə bağlı Baş Prokurorluq tərəfindən cinayət işi başlanaraq ibtidai istintaq aparılır.
Bu barədə Baş Prokurorluğun mətbuat xidmətindən məlumat verilib.
Qeyd olunan qanunsuz əməllərin qarşısı alınan zaman saxlanılmış Ermənistan silahlı birləşmələrinin üzvü Voskanyan Qaqik Aşoti Cinayət Məcəlləsinin 206.3.2 (qabaqcadan əlbir olan bir qrup şəxs tərəfindən odlu silah və döyüş sursatının qaçaqmalçılığı), 214.2.1, 214.2.3 (qabaqcadan əlbir olan bir qrup şəxs tərəfindən odlu silahdan istifadə etməklə terrorçuluq), 228.2.1 (qabaqcadan əlbir olan bir qrup şəxs tərəfindən qanunsuz olaraq odlu silah əldə etmə, daşıma, saxlama), 283.2.1 (zor tətbiq etməklə milli düşmənçiliyin salınmasına aşkar surətdə yönələn hərəkətlər etmə) və 318.2-ci (qabaqcadan əlbir olan bir qrup şəxs tərəfindən zor tətbiq etməklə Azərbaycan Respublikasının dövlət sərhədini qanunsuz olaraq keçmə) maddələri ilə təqsirləndirilən şəxs qismində cəlb edilməklə barəsində məhkəmənin qərarı ilə həbs qətimkan tədbiri seçilib.
Hazırda ibtidai istintaq davam etdrilir, nəticəsi barədə ictimaiyyətə ətraflı məlumat veriləcəkdir.
18-08-2023, 17:16
Gürcüstanda yaşayan soydaşlarımız BMT-nin ofisi qarşısında aksiya keçirdilər
Gürcüstanda yaşayan Azərbaycan icmasının nümayəndələri BMT-nin Tbilisidəki ofisi qarşısında dinc aksiya keçiriblər.
Aksiya iştirakçıları BMT-dən Ermənistanın Azərbaycana qarşı etdiyi haqsızlıqlara, ekoloji terror, mina təhlükəsi və digər cinayətlərə münasibət bildirməyi tələb ediblər.
Aksiyada "Gürcüstan Azərbaycanlılarının İnteqrasiya Mərkəzi"nin, "Alyans" Gənclər Mərkəzinin, "Azərbaycan Evi"nin rəhbərliyi və üzvləri, eləcə də, ictimai fəallar iştirak ediblər.
"Gürcüstan Azərbaycanlılarının İnteqrasiya Mərkəzi"nin direktoru Murad Muradov deyib ki, Gürcüstanda yaşayan Azərbaycan icmasının nümayəndələri bu ölkəyə qarşı hər hansı bir təxribat, təhrik və cinayətlərə biganə deyillər. Aksiya iştirakçıları bu cür məsələlərlə bağlı narahatlıqlarını bildirib və BMT kimi nüfuzlu təşkilatın Azərbaycanı narahat edən bütün məsələlərə ədalətli, balanslı reaksiya verməsini tələb ediblər.
Aksiya iştirakçıları bildiriblər ki, Ermənistanın ətraf mühitə vurduğu ziyan təkcə Azərbaycan üçün deyil, bütövlükdə insanlıq əleyhinə törədilən cinayətdir. BMT bu cür qlobal məsələləri diqqət mərkəzində saxlamalıdır. Çünki erməni vəhşiliyi nəticəsində Qarabağ və Şərqi Zəngəzur iqtisadi rayonlarında təbii sərvətlərimiz istismar olunub və bunun nəticəsində ətraf mühitə ciddi ziyan dəyib. Yüz min hektara yaxın meşə fondu dağıdılıb, qiymətli meşəlik ərazilər tükənib, çaylarımız isə hələ də çirkləndirilir ki, bu da yerli fauna üçün ciddi təhlükə yaradır.
Aksiya iştirakçıları Azərbaycanın işğaldan azad edilmiş ərazilərinin minalarla çirklənməsi məsələsinə də diqqət çəkiblər.
Qeyd edilib ki, 2020-ci ildə münaqişə başa çatdıqdan sonra Azərbaycanda mina qurbanlarının sayı 303 nəfəri ötüb. Torpaqların minalarla çirkləndirilməsi təkcə insanların həyatını təhlükə altına salmır, həm də vətəndaşlarımızın öz dədə-baba torpaqlarına qayıtmasına mane olur.
Erməni KİV-lərində Azərbaycan əsgərlərinə qarşı pis rəftarla bağlı narahatedici sübutların ortaya çıxması və BMT-nin digər beynəlxalq təşkilatlar kimi baş verənlərə susması da icma üzvlərini narahat edən məsələlər sırasında olub.
18-08-2023, 16:48
Füzulidə tələ-mina aşkarlandı
Füzuli rayonu ərazisində qəbiristanlıqda tələ-mina aşkar edilib.
Bu barədə Azərbaycan Respublikasının Minatəmizləmə Agentliyindən (ANAMA) məlumat verilib.
Bildirilib ki, Agentliyin apardığı təmizləmə əməliyyatları zamanı mütəmadi olaraq tələ-minalar, ölüm ehtimalını artıran mina-sürprizlərə rast gəlinir. Belə ki, Füzuli rayonunun Qorqan kənd qəbiristanlığında 1 ədəd TM-62M tank əleyhinə minasının üzərinə 1 ədəd Ermənistan istehsalı olan piyada əleyhinə PMN-Э minasının, eləcə də partlayış gücünün artırılması məqsədilə qeyd olunan iki minanın arasına TNT (partlayıcı) yerləşdirilməsi faktına rast gəlinib.
Qeyd edək ki, tərkibində 7 kq partlayıcı maddə olan tank əleyhinə mina texnikanın sıradan çıxarılması üçün nəzərdə tutulub. Aşkar olunan tank və piyada əleyhinə minalar, həmçinin yüksək tərkibli partlayıcıdan ibarət üst-üstə qoyulan tələ-minası mexaniki vasitələrin, eləcə də insanların kütləvi şəkildə məhv edilməsi məqsədilə yerləşdirilib.
Agentlik tərəfindən icra edilən minatəmizləmə əməliyyatları zamanı mülki təyinatlı sahələrdə və ətraf ərazilərində dəfələrlə rast gəlinən bu kimi tələ-minaların quraşdılırması dinc əhaliyə, insanlığa qarşı törədilmiş terrorun təzahürüdür.
Müharibədən sonrakı dövrdə 180 mina insidentindən 128-i keçmiş təmas xəttindən kənarda yerləşən ərazilərdə qeydə alınıb. Cari ilin 18 avqust tarixinədək baş verən mina hadisələrində zərərçəkən 303 nəfərdən 217-si məhz bu ərazilərdə mina partlayışından həlak olub və ya xəsarət alıb.
Qeyd olunmuş faktları nəzərə alaraq, ANAMA bir daha vətəndaşlara müraciət edərək təhlükəsizliyinə əmin olmadıqları ərazilərə daxil olmamağa çağırır.
18-08-2023, 16:31
Kütləvi məzarlıqlarda tapılan 15 nəfərin kimliyi müəyyənləşdi
Kütləvi məzarlıqlarda tapılan qalıqlar üzərində aparılan tədqiqatlar nəticəsində şəxsiyyəti müəyyən edilən itkin düşənlərin siyahısı açıqlanıb.
Bu barədə Əsir və itkin düşmüş, girov götürülmüş vətəndaşlarla əlaqədar Dövlət Komissiyasının İşçi Qrupunun rəhbəri İsmayıl Axundov itkin düşmüş şəxslərlə bağlı keçirilən brifinqdə məlumat verib.
O bildirib ki, artıq 15 nəfər itkin düşmüş şəxsin aqibətinə aydınlıq gətirilib:
"4000 itkinin müqabilində bu rəqəm azdır. Amma bu başlanğıcdır. Proses davam etdirilir. 11 nəfəri hərbçi, 4 nəfəri mülki şəxsdir". Kimliyi müəyyən edilənlərin siyahısını təqdim edirik:
İbrahimov Vəliyyəddin Səhləb oğlu
Abdullayev Nurəli Hacıbaba oğlu
Qurbanov Nofəl Nəriman oğlu
Rüstəmov Araz Bağır oğlu
Abbasov Məhərrəm Abbas oğlu
Niftəliyev Adil Kamal oğlu
Qarayev Qafar Qənbər oğlu
Hüseynov Əli Heydər oğlu
Hüseynov Gülverdi Ağahüseyn oğlu
Mikayılov Baba Balakişi oğlu
İsayeva Sənəm Həsən qızı
Əzizov Yusif İsmayıl oğlu
Musayev Mehman Kamal oğlu
Allahverdiyev Şəmsəddin Əvəz oğlu
Məmmədov Əsəd Məmməd oğlu
18-08-2023, 16:08
İranın XİN Başçısı vəliəhd şahzadəsi ilə görüşdü
İranın xarici işlər naziri Hüseyn Əmir Abdullahian Ciddədə Səudiyyə Ərəbistanının vəliəhd şəhzadəsi Məhəmməd bin Salman Əl Səud ilə görüşüb.
Bu barədə IRNA informasiya agentliyi məlumat yayıb.
Bu, iki ölkə arasında münasibətlərin normallaşmasından sonra İran rəsmisinin Səudiyyə Ərəbistanı taxt-tacının varisi ilə ilk görüşü hesab olunur.
Qeyd edək ki, Abdullahian cümə axşamı səudiyyəli həmkarı Feysəl bin Fərhan ilə də görüşüb və birgə mətbuat konfransı keçirib.
18-08-2023, 15:29
İranda saxlanılan tələbəmizin məhkəməsi keçirildi
İranda casusluq ittihamı ilə saxlanılan azərbaycanlı tələbə Fərid Səfərlinin məkməsi keçirilib.
Bu barədə Fərid Səfərlinin anası Dilarə Əsgərova məlumat verib.
Tələbənin anası qeyd edib ki, oğlu ilə dünən telefonla danışıb. O bildirib ki, məhkəmə Fərid haqqında 2 il həbs qərarı çıxarıb. Hakim azərbaycanlı tələbəyə son söz verməyib.
“Fərid artıq qərarı məktub şəklində alıb. Fərid qərarla barışmır, heç bir sübut olmadan bu cəzanın verilməsini qəbul edə bilmir”, - Dilarə Əsgərova vurğulayıb.
Qeyd edək ki, Almaniyanın Yena Universitetinin tələbəsi 1997-ci il təvəllüdlü Fərid Qabil oğlu Səfərli bu il fevralın 20-də İrana səfər edib. Martın 4-dən bəri isə ondan xəbər almaq mümkün olmayıb. Sonradan məlum olub ki, Fərid Səfərli İranda həbs olunub.
19 iyul tarixində keçirilmiş məhkəmə iclası zamanı Fərid Səfərliyə qarşı irəli sürülmüş “casusluq” ittihamı “casusluq etmək niyyəti” ittihamı ilə əvəz olunub.
18-08-2023, 15:05
200-dən çox bal toplayanlar ali məktəblərə qəbul ola biləcək
"I qrup üzrə 200 baldan yuxarı nəticə göstərən hər bir abituriyent ali məktəblərə qəbul ola biləcək".
Bunu Dövlət İmtahan Mərkəzinin Direktorlar Şurasının sədri Məleykə Abbaszadə Mərkəzin "YouTube" kanalında canlı yayım zamanı deyib.
Mərkəz sədrinin sözlərinə görə, 270 baldan yuxarı nəticə göstərənlər dövlət sifarişli yerlərə qəbul ola bilərlər.
"I qrupda keçən illə müqayisədə 23 faiz artım müşahidə olunur. Bu o deməkdir ki, keçən illə müqayisədə 2000 mindən çox insan I qrup ixtisasları üzrə ali təhsil ala biləcək. Bu qrupda 537 ixtisas kodu təqdim olunub, lakin cəmi 64 ixtisasdır. Eyni ixtisaslar müxtəlif universitetlərdə var. Siyahı ilə tanış olanda görmək olar ki, əmək bazarında hansı ixtisaslara daha çox tələbat var", - Məleykə Abbaszadə bildirib.
Qeyd olunub ki, I qrupda plan yerlərinin ümumi sayı 18 min 386-dır. Bunlardan 13348-i dövlət sifarişlidir. Bundan əlavə bu ixtisas qrupunda RK altqrupu üzrə plan yerlərinin sayı 12246-dır. Bundan 8398-i dövlət sifarişlidir. Rİ altqrupunda plan yerinin sayı 6140, ondan 4950-si dövlət sifarişli yerdir.
18-08-2023, 14:14
Hərbiçimizin özünü güllələmə səbəbi bəlli oldu
Hərbçimiz, kiçik çavuş Abbasov Asim Hamail oğlunun özünü öldürməsinin ilkin səbəbi məlum olub.
Hadisə ailə-məişət zəminində baş verib.
Hadisənin hərbi xidmətlə əlaqəli olmadığı bildirilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!