8-11-2022, 16:01
Türkiyənin gücü Azərbaycanın gücüdür - Akar
Türkiyə Silahlı Qüvvələrinin Hərbi Akademiyasında Azərbaycanın Türkiyədəki Səfirliyinin və Səfirlik nəzdindəki Hərbi Attaşeliyin təşkilatçılığı ilə 44 günlük Vətən Müharibəsində qazanılmış Zəfərin 2-ci ildönümünə həsr olunmuş rəsmi qəbul və konsert keçirilib. Azərbaycan və Türkiyənin dövlət rəsmilərinin, millət vəkillərinin, şəhid ailələrinin və qazilərin iştirak etdiyi tədbir şəhidlərin əziz xatirəsinə bir dəqiqəlik sükut və iki ölkənin dövlət himnləri ilə başlayıb. Azərbaycanın şanlı müstəqillik tarixini əks etdirən "Tarix yazan Ordu" filminin nümayişindən sonra açılış çıxışları edilib. Türkiyənin milli müdafiə naziri Hulusi Akar çıxışında Azərbaycan -Türkiyə qardaşlığının, birliyinin əbədiliyinə diqqət çəkib. Nazir Türkiyə ilə Azərbaycanı eyni gördüklərini, Türkiyənin gücünün Azərbaycanın gücü, Azərbaycanın gücünün Türkiyənin gücü olduğunu qeyd edib. Nazir Azərbaycan torpaqları 30 ilə yaxın işğalda olduğu müddətdə, yüz minlərcə azərbaycanlı torpaqlarından məcburi köçkün olduğu, Xocalı faciəsi törədildiyi zaman səsini çıxarmayanların indi ortaya çıxmasının xüsusi diqqət çəkdiyini vurğulayıb. Bildirib ki, 44 günlük müharibə türkün gücünü dünyaya göstərdi. Bundan sonra da Azərbaycan və Türkiyə birlikdə hərəkət etməyə davam edəcəklər. Azərbaycan - Türkiyə Parlamentlərarası Əməkdaşlıq qrupunun sədri Əhliman Əmiraslanovun və Azərbaycan Respublikası Prezidentinin köməkçisi Hikmət Hacıyevin çıxışlarında 44 günlük Vətən müharibəsində Türkiyənin Azərbaycana verdiyi mənəvi, siyasi dəstəyə toxunulub, Şuşa Bəyannaməsi ilə ikitərəfli münasibətlərimizin müttəfiqlik səviyyəsinə yüksəldiyi xüsusi qeyd olunub. Tədbirin bədii hissəsində Azərbaycan və Türkiyənin sevilən sənətçilərinin ifaları iştirakçılar tərəfindən maraqla qarşılanıb. Zəfər tədbiri Türkiyənin aparıcı mətbuat orqanları tərəfindən geniş işıqlandırılıb.
8-11-2022, 15:57
Sabah da yağış yağacaq
Noyabrın 9-da Bakıda və Abşeron yarımadasında hava şəraitinin dəyişkən buludlu olacağı, arabir tutulacağı gözlənilir. Milli Hidrometeorologiya Xidmətindən verilən məlumata görə, gecə və səhər bəzi yerlərdə duman olacağı, çiskinli yağış yağacağı ehtimalı var. Cənub-şərq küləyi əsəcək. Havanın temperaturu gecə 8-10° isti, gündüz 12-15° isti olacaq. Bakıda gecə 8-10° isti, gündüz 12-14° isti olacaq. Atmosfer təzyiqi 768 mm civə sütunu olacaq. Nisbi rütubət 60-70 % olacaq. Azərbaycanın rayonlarında əsasən yağmursuz olacaq. Bəzi yerlərdə duman olacaq. Şərq küləyi əsəcək. Havanın temperaturu gecə 4-8° isti, gündüz 13-17° isti, dağlarda gecə 0-5° şaxta, gündüz 4-8° isti olacaq.
8-11-2022, 15:55
Zəfərlərin daim olsun, Can Azərbaycan! - Çavuşoğlu
Türkiyənin xarici işlər naziri Mövlud Çavuşoğlu 8 Noyabr – Zəfər Günü münasibətilə paylaşım edib. Türkiyə XİN rəhbərinin “Twitter“ hesabında paylaşdığı təbrikdə deyilir:“İşğal altındakı torpaqlarını qəhrəman bir mübarizə nəticəsində azad edən və beləliklə bölgədə barış və sabitliyin təmin edilməsinə vəsilə olan Azərbaycanın Zəfər Günü qutlu olsun. Zəfərlərin daim olsun, Can Azərbaycan!”, - Çavuşoğlu yazıb.
8-11-2022, 15:53
"Sovetski"də kompensasiya bazar qiymətlərinə uyğun veriləcək
2014-2019-cü illərdə Bakı şəhəri, Yasamal rayonu, "Sovetski" məhəlləsindən 6 mindən çox ailə köçürülüb. Bunu açıqlamasında Yasamal Rayon İcra Hakimiyyətinin başçısı Elşad Həsənov deyib. Elşad Həsənov bildirib ki, birinci və ikinci mərhələdə köçürülən ailələrə müvafiq qaydada kompensasiyaların ödənilməsi təmin edilib. Elşad Həsənovun sözlərinə görə, 2019-cu ildən "Sovetski" dən ailələrin köçürülmə prosesi müəyyən səbəblərə görə dayandırılıb. Həmin ərazidə tikilmiş Mərkəzi parkda isə tikinti işləri davam etdirilir və yaxın vaxtlarda növbəti hissəsinin açılışı gözlənilir. "Sovetski" məhəlləsində köçürülmə işlərinin üçüncü mərhələsinə gəlincə icra başçısı qeyd edib ki, bir sıra məsələlər araşdırıldıqdan sonra növbəti mərhələyə başlanılacaq. "Üçüncü mərhələdə ailələrə veriləcək kompensasiya isə bazar qiymətlərinə uyğun olaraq müəyyən ediləcək və bu ailələrlə razılaşdırılacaq", - deyə icra başçısı əlavə edib.
8-11-2022, 15:51
Vardanyan Xankəndidə özünə komanda formalaşdırır
Noyabrın 5-də Qarabağ separatçılarının “dövlət naziri” kimi qondarma vəzifənin icrasına başlayan Rusiyanın erməni əsilli milyarderi Ruben Vardanyan Xankəndidə özünə komanda formalaşdırır. Bu barədə Vardanyanın özü Telegram kanalında bildirib. O qeyd edib ki, komandasına keçmiş separatçıların “dövlət nazirləri” Artak Beqlaryan və Qriqori Martirosyan, “Artsaxın keçmiş mədəniyyət və təhsil naziri” Narine Aqabalyan, Ermənistanın keçmiş sosial təminat naziri Mesrop Arakelyan və iş adamı Arman Hakobcanyan müşavir kimi daxil olacaqlar. Ruben Vardanyan komanda işini özlərinə prioritet məqsəd qoyan və buna nail olmaq üçün hər şeyi etməyə hazır olan belə insanların komandasına cəlb olunmasını son dərəcə vacib hesab edir. Vardanyanın yaxın günlərdə separatçıların “hökumətində” yeni təyinatalara imza atacağı gözlənilir.
8-11-2022, 15:49
Generallar İkinci Şəhidlər xiyabanında
Zəfər Günü münasibətilə noyabrın 8-də Müdafiə Nazirliyin rəhbər heyəti İkinci Şəhidlər xiyabanını ziyarət edib. Bu barədə nazirlikdən məlumat verilib. Bildirilib ki, ölkəmizin müstəqilliyi və ərazi bütövlüyü uğrunda şəhid olan qəhrəman Vətən övladlarının xatirəsi ehtiramla yad edilərək məzarları üzərinə gül dəstələri qoyulub, ruhlarına dualar oxunub.
8-11-2022, 15:46
DİN-dən Zəfər paylaşımı
Daxili İşlər Nazirliyi (DİN) Zəfər Günü ilə bağlı paylaşım edib. Butov.az-ın məlumatına görə, paylaşımda deyilir:
"8 Noyabr – Azərbaycanın dilbər guşəsi, Qarabağın mirvarisi Şuşanın işğaldan azad olunduğu gün, həm də Zəfər Günüdür! Daxili İşlər Nazirliyinin kollektivi adından bu münasibətlə qalib xalqımızı təbrik edir".
8-11-2022, 15:43
Zelenski Rusiya ilə danışıqların şərtlərini açıqladı
Ukrayna prezidenti Volodimir Zelenski Qərb mediasının Kiyevin Rusiya ilə dialoqa sövq edilməsi barədə xəbərlərindən sonra Ukraynanın dialoqa başlamaq üçün şərtlərini açıqlayıb. Bu barədə RİA Novosti məlumat yayıb. Bundan əvvəl Zelenski bəyan etmişdi ki, Putin prezident olduğu müddətdə Ukrayna Rusiya ilə heç bir danışıqlar aparmayacaq. Ukrayna prezidenti Volodimir Zelenski bu gün Telegram kanalında Kiyevin şərtlərini yazıb: "Bir daha qeyd edirəm: Ukraynanın ərazi bütövlüyünün bərpası, BMT Nizamnaməsinə hörmət, müharibənin vurduğu bütün zərərin ödənilməsi, hər bir hərbi cinayətkarın cəzalandırılması və bunun bir daha təkrar olunmayacağına zəmanət... Bunlar tamamilə başa düşülən şərtlərdir", - deyə Zelenski bildirib. Xatırladaq ki, “Vashington Post” qəzeti daha əvvəl yazmışdı ki, ABŞ prezidenti Co Baydenin administrasiyası Ukrayna rəhbərliyindən Rusiya ilə danışıqlara açıqlıq nümayiş etdirməyi özəl olaraq xahiş edib. Amerikanın “The Wall Street Journal” qəzeti isə öz mənbələrinə istinadən xəbər verib ki, ABŞ-ın milli təhlükəsizlik müşaviri Ceyk Sallivan son aylarda Rusiya prezidentinin beynəlxalq məsələlər üzrə köməkçisi Yuri Uşakov və Rusiya Təhlükəsizlik Şurasının katibi Nikolay Patruşevlə konfidensial danışıqlar aparıb. Nəşrin mənbələrinin məlumatına görə, danışıqların məqsədi Ukraynada münaqişənin gərginləşməsinin, o cümlədən nüvə silahından istifadə təhlükəsinin qarşısını almaq, həmçinin iki ölkə arasında açıq rabitə kanallarını saxlamaq olub. Rusiya prezidentinin sözçüsü Dmitri Peskov bazar ertəsi bildirib ki, Rusiya Federasiyası Ukrayna ilə danışıqlara açıq qalır, lakin hazırda onları davam etdirmək üçün heç bir yol yoxdur, çünki Rusiya tərəfi ilə hər hansı danışıqların mümkünsüzlüyü Kiyevdə qanuna çevrilib.
8-11-2022, 15:36
Ədliyyə Nazirliyinin hərbi hissəsində Zəfər Günü qeyd edildi
Ədliyyə Nazirliyinin Penitensiar xidmətinin Mühafizə Alayının N saylı hərbi hissəsində Zəfər Günü münasibəti ilə tədbir keçirilib. Azərbaycan Respublikasının himni səslədirildikdən sonra şəhidlərimizin xatirəsi bir dəqiqəlik sükutla yad edilib. “Zəfər Yolu” İB-in sədri, şair, publisist Pərvanə Abdullayeva əsgərləri Zəfər bayramı münasibəti ilə təbrik edərək, Ali Baş Komandan İlham Əliyevin sərkərdəliyi ilə Vətənimizi qalibiyyətə çatdıran igidlərimizin rəşadətindən soz açıb. Tədbirdə iştirak edən millət vəkili Jalə Əhmədova düşmən üzərində tarixi qələbəmizin əhəmiyyətindən danışaraq deyib ki, bu zəfəri bizə bəxş edən başda Prezident İlham Əliyev olmaqla ordumuza, şəhidlərimizə və qazilərimizə borcluyuq. 44 günlük Vətən Müharibəsinin şəhidi Elmar Nəbiyevin anası, təqaüddə olan ədliyyə mayoru Çiçək Biləndərli deyib ki, məhz şəhidlərimizin və qazilərimizin sayəsindəm qələbə qazandıq. “Bu Zəfərdə mənim də balamın payı var. Oğlum şəhid olsa da, erməni vandallarının tapdağı altında olan, vətən torpaqlarını xilas edənlərdən, bayrağımızı daha da ucalara qaldıranlardan oldu. Mənə şəhid anası kimi oğul itirmək çox ağırdır, lakin şəhid anası kimi belə bir oğulun anası olduğumza görə qürurluyam. Həm də bu Zəfər bayramında cənab Prezidentin sərəncamı ilə mənim oğlum Elmar Nəbiyev də yenidən təltif olunanlar sırasındadır. “Üçüncü dərəcəli vətənə xidmət” ordeni ilə təltif edilib. Oğlumun bundan əlavə də 4 medalı da var. Biz bu qayğını hər gün hiss edirik”. Tədbirdə iştirak edən araşdırmaçı jurnalist Aida Eyvazlı Göytürk 2016-cı ilin aprel ayında Vətən torpaqlarını düşməndən azad edən şəhid və qazilərin qəhrəmanlığına həsr etdiyi “Qalibiyyət: şahidlər və şəhidlər”, eləcə də türk düünyasının tarixindən bəxş edən kitablarını hərbi hissənin əsgərlərinə hədiyyə edib. O öz çıxışında qeyd edib ki, Türk Dövlətlərinin Birliyinin yolu Qarabağdan və Zəngəzurdan keçir. Azərbaycan oğullarının qazandığı Zəfər bütünləşən türk dünyasının zəfəridir. Bu zəfəri qoruyan, bu Vətəni qoruyan əsgərlərimiz xoşbəxtdirlər. Daha sonra əməkdar jurnalist Elnarə Dərziyeva 44 günlük Vətən müharibəsində jurnalist həmkarlarının və özünün də informasiya müharibəsindəki rolundan danışıb. Ədliyyə mayoru, Ədliyyə Nazirliyinin Pentensiar Xidmətinin Mühafizə Alayının “N” saylı hərbi hissəsinin komandiri Kamran Quliyev Ali Baş komandan İlham Əliyevin rəhbərliyi altında mənfur düşmənlərimizi məğlub edərək 30 ilə yaxın işğalda olan torpaqlarımızı azad edən qəhrəmanlarımızın qanları ilə tarixə yazdıqları Zəfər günündən, hərbi hissənin əsgərlərinin hər zaman Vətənin müdafisəində şərəflə və vicdanla dayandıqlarından danışıb. İncəsənət və mədəniyyıt xadimlərimizin ifasında musiqi nömrələri səsləndirilib və əsgərlərimiz bayram əhval ruhiyyəsində rəqslərə qoşulublar.
8-11-2022, 15:30
Bakıda Zəfər yürüşü
Bakıda 8 Noyabr - Zəfər Günü münasibətilə hərbi orkestrlərin müşayiəti ilə Zəfər yürüşü keçirilib. Yürüşdən əvvəl şəhidlərin xatirəsi 1 dəqiqəlik sükutla yad edilib. Yürüş Şəhidlər xiyabanından başlayaraq Alov Qüllələri kompleksi, İçərişəhər metrostansiyası, İstiqlaliyyət küçəsi, Azneft dairəsi, Bəhram Gurun abidəsinə qədər davam edib. Qeyd edək ki, yürüşlər 3 marşrut üzrə keçirilib:
- Heydər Əliyev sarayı - Bülbül prospekti - Nizami Kino Mərkəzi - Neftçilər prospekti - Azadlıq meydanı;
- Şəhidlər Xiyabanı - "Alov qüllələri" kompleksi - "İçərişəhər" metrosu - İstiqlaliyyət küçəsi - Azneft dairəsi - Bəhram Gur heykəli;
- Hüseyn Cavid parkı - Hüseyn Cavid prospekti - Parlament prospekti - Şəhidlər Xiyabanı;
Şuşa şəhəri.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!