5-08-2024, 16:06
Vakansiya seçimində 17 mindən artıq namizəd iştirak edib
Vakansiya seçimində 17 mindən artıq namizəd iştirak edib. Sistemdə belə bir məqam var ki, namizəd vakant yeri seçərkən həmin yeri seçən ən yüksək ballı namizədi görə bilir.
Bu barədə İnsan Resursları Mərkəzinin şöbə müdiri Muxtar Hacıyev deyib.
Onun sözlərinə görə, bu zaman artıq namizəd seçdiyi yeri sonradan dəyişə bilir:
“Burada müəllim özü sistemə daxil olmalı, prosesləri emal etməli və uyğun şəkildə seçim etməlidir. Elektron qayda ən müsbət yoldur. Burada müəllim özü girib istənilən yerdəki vakanasiyaları görür və seçə bilir. Bizə görə bu elektron qaydanın verdiyi üstünlüklərdən biridir. Müəllim özü istədiyi yeri seçir və orada fəaliyyətini davam etdirə bilir”.
5-08-2024, 15:32
Rezidenturaya qəbul imtahanının nəticələri
Rezidenturaya qəbul imtahanının II mərhələsinin nəticələri elan olunub.
Bu barədə Dövlət İmtahan Mərkəzi (DİM) məlumat yayıb.
Bildirilib ki, imtahanda iştirak etmiş hər bir namizəd DİM-in internet saytına daxil olaraq imtahan nəticələri və cavab kartının qrafik təsviri ilə tanış ola bilər.
Namizədlər imtahan nəticələri barədə məlumatı, həmçinin mobil telefonla iş nömrələrini 7727 nömrəsinə göndərməklə də öyrənə bilərlər.
İmtahanda iştirakı gözlənilən 894 namizəddən 5 nəfər imtahana gəlməyib. Namizədlərdən 666 nəfər müsabiqə şərtini (ixtisas fənləri üzrə topladığı test balı 50 və daha yuxarı) ödəyərək ixtisaslaşma seçiminə buraxılıb.
Qeyd olunub ki, rezidenturaya qəbul olmaq üçün ixtisas seçimi avqustun 8-dən 13-dək aparılacaq. Müsabiqə şərtini ödəyən namizədlər bu müddət ərzində elektron ərizələrinə daxil olaraq baza ali tibb təhsili üzrə uyğun (bitirdiyi fakültəyə müvafiq olan) ixtisasları “Rezidentura” jurnalının 3-cü nömrəsində dərc olunmuş “Rezidenturaya qəbul aparılan ixtisaslar” bölümündən seçib təsdiq etməlidirlər.
İmtahan nəticələri ilə əlaqədar müraciətlərə baxılması üçün onlayn qaydada Apellyasiya komissiyası fəaliyyət göstərəcək. Namizədlər Apellyasiya komissiyasına 6 avqust saat 10:00-dan 7 avqust saat 17:00-dək apelyasiya.dim.gov.az saytı vasitəsilə müraciət edə bilərlər.
5-08-2024, 15:13
Qarabağ Universitetində yataqxanalar neçə nəfərlik olacaq?
Bu il Qarabağ Universitetində təhsil alacaq tələbələr yataxana ilə təmin ediləcək.
Universitetin bütün tələbələri üçün pulsuz yataqxana nəzərdə tutulub.
Ali təhsil ocağından bildirilib ki, mənzil tipli yataqxana 2 və 3 nəfərlik otaqlardan ibarət olacaq.
Qeyd edək ki, Qarabağ Universitetində daimi əsaslarla işləyən müəllimlər, o cümlədən digər əməkdaşlar da tədris ilinin əvvəlindən başlayaraq işlədikləri müddətdə mənzil tipli yataqxanalarla təmin olunacaqlar.
Xatırladaq ki, Qarabağ Universiteti Azərbaycan Prezidentinin 28 noyabr 2023-cü il tarixli sərəncamı ilə yaradılıb. Ali təhsil müəssisəsində 1200 tələbə təhsil alacaq.
2024/2025-ci tədris ili üçün ümumilikdə 27 ixtisas üzrə tələbə qəbulu həyata keçiriləcək.
İlkin mərhələdə Qarabağ Universitetində kadr hazırlığı 6 fakültədə aparılacaq: Pedaqoji, İncəsənət, Humanitar və sosial elmlər, İqtisadiyyat, Mühəndislik və Turizm.
Pedaqoji fakültədə “Riyaziyyat müəllimliyi”, “İbtidai sinif müəllimliyi”, “Xarici dil müəllimliyi (ingilis dili)”, “Azərbaycan dili və ədəbiyyatı müəllimliyi” ixtisasları üzrə tədris həyata keçiriləcək. İncəsənət fakültəsi “Musiqi müəllimliyi”, “Dekorativ-tətbiqi sənət”, “Dizayn”, “İnstrumental ifaçılıq” və “Vokal sənəti” ixtisaslarını əhatə edir. Humanitar və sosial elmlər fakültəsində “Beynəlxalq münasibətlər”, “Hüquqşünaslıq”, “Tarix” və “Psixologiya” ixtisasları üzrə kadr hazırlığı təşkil ediləcək. İqtisadiyyat fakültəsində “Beynəlxalq ticarət və logistika”, “İqtisadiyyat”, “Maliyyə”, “Menecment”, “Mühasibat”, “Dövlət və bələdiyyə idarəetməsi” ixtisasları tədris olunacaq. Mühəndislik fakültəsində “Elektrik və elektronika mühəndisliyi”, “İnşaat mühəndisliyi”, “Kompüter mühəndisliyi”, “Logistika və nəqliyyat texnologiyaları mühəndisliyi”, “Mexatronika və robototexnika mühəndisliyi” ixtisasları üzrə kadr hazırlığı nəzərdə tutulub. Turizm fakültəsində isə “Turizm işinin təşkili ixtisası” üzrə yüksək ixtisaslı mütəxəssis hazırlığına başlanılacaq.
4-08-2024, 13:17
Jurnalist olmaq istəyənlər qabiliyyət imtahanı veriblər
Dövlət İmtahan Mərkəzi (DİM) avqustun 4-də ali təhsil müəssisələrinin bakalavriat səviyyəsinin jurnalistika ixtisasına qəbul olmaq istəyən abituriyentlər üçün qabiliyyət imtahanı keçirib.
Bu barədə DİM-dən bildirilib.
Bu mərhələdə III ixtisas qrupu üzrə test imtahanı verərək müsabiqə şərtini ödəyən və jurnalistika ixtisasına qəbul olmaq üçün internet vasitəsilə anket dolduraraq qeydiyyatdan keçən abituriyentlər iştirak ediblər.
İmtahan Bakı şəhərində və DİM-in regional bölmələrinin yerləşdiyi Naxçıvan, Gəncə, Lənkəran, Şəki, Bərdə, Göyçay, Şirvan, Xaçmaz şəhərlərində təşkil olunub. İmtahanın keçirilməsinə 9 imtahan binası, 32 zal, 12 imtahan rəhbəri, 70 nəzarətçi cəlb olunub.
İmtahan bütün binalarda saat 10:00-da başlanıb və 2 saat 30 dəqiqə davam edib.
DİM-in elektron imtahanlar korpusunda imtahanın başlanmasından bir neçə dəqiqə əvvəl Mətbuat Şurasının və KİV nümayəndələrinin iştirakı ilə təklif olunan 238 mövzu arasından 3 mövzu seçilib və videobağlantı vasitəsilə imtahan mərkəzlərinə çatdırılıb. Abituriyentlər təqdim olunmuş mövzulardan biri üzrə inşa (esse) yazıblar.
İmtahan nəticələri yazı işlərinin yoxlanılması prosesi başa çatdıqdan sonra 4-5 gün ərzində elan olunacaq.
Məqbul qiymət alan abituriyentlər ixtisas seçimi zamanı jurnalistika ixtisasını ərizələrində qeyd edə biləcəklər.
2-08-2024, 14:23
893 abituriyent jurnalistika ixtisası üzrə qabiliyyət imtahanı verəcək
Dövlət İmtahan Mərkəzi (DİM) avqustun 4-də ali təhsil müəssisələrinin bakalavriat səviyyəsinin jurnalistika ixtisasına qəbul olmaq istəyən abituriyentlər üçün qabiliyyət imtahanı keçirəcək.
DİM-dən bildirilib ki, bu imtahanda jurnalistika ixtisasına qəbul olmaq üçün internet vasitəsilə anket dolduraraq qeydiyyatdan keçmiş və III ixtisas qrupu üzrə test imtahanı verərək müsabiqə şərtini ödəyən abituriyentlər iştirak edə biləcəklər.
Bakıda və DİM-in regional bölmələrinin yerləşdiyi Naxçıvan, Gəncə, Lənkəran, Şəki, Bərdə, Göyçay, Şirvan, Xaçmaz şəhərlərində təşkil olunacaq imtahanda ümumilikdə 893 abituriyentin iştirakı nəzərdə tutulur.
Abituriyentlər imtahana buraxılış vərəqəsini DİM-in internet saytından çap edirlər. Buraxılış vərəqəsində imtahanın keçiriləcəyi şəhər (rayon), bina, zal, başlanma vaxtı və abituriyentin imtahan binasına gəlmə vaxtı qeyd olunub. Buraxılış vərəqəsi ilə yanaşı, abituriyentlərə “Yaddaş kitabçası”ndan çıxarış da təqdim olunur. Burada abituriyentlərə imtahan prosesi ilə bağlı vacib tövsiyələr, onların əməl etməli olduqları qaydalar və digər zəruri məlumatlar çatdırılır.
İmtahan saat 10:00-da başlanır və 2 saat 30 dəqiqə davam edəcək.
İmtahanların başlanmasına 15 dəqiqə qalmış – saat 09:45-də buraxılış rejimi başa çatır. Bundan sonra gələn iştirakçılar imtahan binasına buraxılmır.
İştirakçıların imtahan binasına rahat şəkildə daxil olması üçün binaya müxtəlif gəlmə vaxtları müəyyən edilib və imtahan iştirakçısının buraxılış vərəqəsində həmin vaxt göstərilib. Ona görə də imtahan binasına buraxılış vərəqəsində qeyd olunan vaxtda gəlmək tövsiyə olunur.
Abituriyentlər imtahana aşağıda qeyd olunan sənədləri gətirməlidirlər:
- İmtahana buraxılış vərəqəsi;
- Şəxsiyyəti təsdiq edən sənədin əsli:
a) Azərbaycan Respublikasının vətəndaşları (16 yaşı tamam olmayan iştirakçılar da daxil olmaqla) şəxsiyyət vəsiqəsini;
b) əcnəbilər və vətəndaşlığı olmayan şəxslər Dövlət Miqrasiya Xidməti tərəfindən verilmiş icazə vəsiqələrini, qaçqın statusu almış xarici vətəndaşlar və onların ailə üzvləri isə qaçqın vəsiqələrini;
- Şəxsiyyət vəsiqəsində şəkli olmayan iştirakçılar digər sənədlərlə yanaşı, təhsil müəssisəsi tərəfindən verilmiş və fotoşəkilləri yapışdırılmış arayışı (arayışa iştirakçının 3x4sm ölçülü şəkli yapışdırılır və şəkil möhürlə təsdiqlənir).
İmtahanın məzmunu haqqında
Qabiliyyət imtahanında mövzular imtahanın başlanmasından bir neçə dəqiqə əvvəl Mətbuat Şurasının və media nümayəndələrinin iştirakı ilə seçiləcək və videobağlantı vasitəsilə imtahan mərkəzlərinə çatdırılacaq. Abituriyentlər təqdim olunmuş mövzulardan biri üzrə inşa (esse) yazacaqlar. Yazı işi abituriyentin imtahan verdiyi bölmədən asılı olaraq Azərbaycan və ya rus dilində yerinə yetirilməlidir.
İnşa (esse) abituriyentin seçmiş mövzu üzrə öz nöqteyi-nəzərini əsaslandırılmış şəkildə ifadə etdiyi müstəqil, yaradıcı yazı işidir. Abituriyentlərə ictimai-siyasi, iqtisadi, mədəni həyat sahələrinə aid, həmçinin respublikamız, görkəmli şəxsiyyətlər, təhsil, ətraf mühit, mənəviyyat və eləcə də bütün bəşəriyyəti düşündürən qlobal problemlər haqqında müstəqil mühakimə yürütmək və əsaslandırmaq bacarığını nümayiş etdirməyə imkan verən sərbəst mövzular təklif olunur.
İnşanı (esseni) yazarkən abituriyent:
-səliqəli, oxunaqlı və aydın xətlə yazmalı;
-öz fikirlərini aydın və savadlı şəkildə ifadə etməli;
-mövzunun mahiyyətini açmalı və dolğun əhatə etməli;
-yazının tərkib hissələri (giriş, əsas hissə və nəticə) arasında məntiqi rabitə yaratmalı, abzaslarla fərqləndirməli və fikirlərini məntiqi ardıcıllıqla ifadə etməli;
-ictimai-siyasi problemlərə yaxşı bələd olduğunu nümayiş etdirməli;
-ictimai-siyasi problemləri təhliletmə, ümumiləşdirmə və məntiqi nəticə çıxara bilmək qabiliyyətini nümayiş etdirməli;
-fikir və düşüncələrini anlaşıqlı, məntiqli, rabitəli və aydın surətdə, ədəbi dilin normalarına, o cümlədən qrammatika, orfoqrafiya, durğu işarələrinin işlənməsi qaydalarına uyğun olaraq ifadə etməli, öz fikir və mühakimələrini əsaslandırmaq üçün bir neçə (3 və daha çox) müvafiq sitat, iqtibas, nümunə və faktlardan (tarixi hadisə, bədii parçalar, həyat hadisələri və s.) istifadə etməlidir.
Yazı işinin qiymətləndirilməsi zamanı inşanın məzmununu, yazı savadı və aşağıdakı meyarlar nəzərə alınır:
-inşa yazı (esse) 2–4 səhifə (ən azı 2 səhifə və ya 420 söz) həcmində olmalıdır.
-verilmiş mövzunun başa düşülməsi, mövzu üzrə material, əsas fakt və hadisələr haqqında məlumata malik olunması;
-abituriyentin mövzuya orijinal yanaşması, öz nöqteyi-nəzərini əsaslandırılmış şəkildə ifadə etmək bacarığı, mövzunun əhatə olunma səviyyəsi, fikirlərin aydın və anlaşıqlı ifadə olunması;
-çıxarılan nəticələrin məntiqli və əsaslandırılmış olması;
-yazı üslubunun orijinallığı, dilin zənginliyi, obrazlılığı və səlisliyi, savadlılıq səviyyəsi;
-yazı işinin ədəbi dilin fonetik (orfoqrafiya və durğu işarələri), qrammatik və leksik normalarına tam riayət edilməklə yazılması.
Yazı işi yuxarıdakı meyarlar nəzərə alınmaqla “məqbul” və ya “qeyri-məqbul”la qiymətləndirilir.
“Qeyri-məqbul” qiyməti mövzunun zəif əhatə olunduğu və ya heç əhatə olunmadığı, abituriyentin mövzunu səthi bildiyini və ya heç bilmədiyini aşkara çıxaran, başqa mövzuda yazılmış, mətnin hissələri arasında məntiqi əlaqənin pozulduğu, abituriyentin özü haqqında hər hansı məlumat yazdığı və ya özünü tanıtmaq məqsədilə hər hansı bir işarə vurduğu, 8 və daha çox fonetik, qrammatik və leksik səhvi olan yazılara verilir.
Yazı işində abituriyentlərin özləri haqqında hər hansı məlumat (ad, soyad, ata adı, baba adı, məktəb adı, müəllim adı, yaşayış yeri və s.) yazması və ya özlərini tanıtmaqla bağlı hər hansı işarə vurması qadağandır. Belə hala yol vermiş abituriyentlərin yazı işləri “sıfır” balla qiymətləndirilir. Seçdiyi mövzudan fərqli mövzuda, həmçinin 1 səhifədən (190 sözdən) az həcmdə yazılmış inşalar da “sıfır” balla qiymətləndirilir.
Qeyd edək ki, inşa mövzularına aid nümunələr DİM-in internet saytında yerləşdirilib.
1-08-2024, 19:24
Tələbələrin köçürülməsi prosesi başa çatdı
Tələbələrin gəlməsi üçün müraciətlərin qəbulu başa çatır.
Bu barədə Elm və Ali Təhsil üzrə Dövlət Agentliyindən məlumat verilib.
Bildirilib ki, müraciətlərin qəbulu 25 iyul-1 avqust tarixlərindəportal.edu.azaparılıb. Ümumilikdə 2575 tələbə təhsil müəssisəsini, ixtisasını və təhsilalma formasını dəyişmək üçün müraciət edib.
"Növbəti olduğu halda cavab verməmək üçün müraciət edən şəxs şəxsi kabinetə müraciət edərək statusu barədə şəxsi kabinetə göndərilməlidir. “İmtina etmək lazımdır”.
1-08-2024, 15:52
İxtisas seçimi: Təhsil haqqı aşağı olan universitetlərə axın var
Gələn həftədən qəbul imtahanlarında iştirak edən abituriyentlər üçün ixtisas seçimi başlayır. Proses avqustun 19-a qədər davam edəcək.
Azərbaycanda 2024/2025-ci tədris ilində ali təhsil müəssisələrində təxminən 60 min plan yerləri ayrılıb ki, bunun yarısı dövlət sifarişlidir. Yəni, tələbə adını qazanacaq təxminən 30 min nəfər ödənişli əsaslarla təhsil alacaq.
İxtisas seçimində müəyyən çətinliklərlə üzləşən abituriyentlər indi həm də təhsil haqlaının artırılması dərdi ilə qarşı-qarşıya qalıblar. Və müşahidələr göstərir ki, abituriyentlərin üz tutacaqları universitetlər təhsil haqqları aşağı olan ali təhsil müəssisələri olacaq.
Ekspertlər keçid ballarının artacağını proqnizlaşdırır, bu, onu deməyə əsas verir ki, dövlət sifarişli ixtisaslar uğrunda rəqabət olduqca sərt keçəcək.
Son həftələrdə qəbul imtahanlarında iştirak edən abituriyentlərin müzakirə etdiyi əsas mövzulardan biri təhsil haqlarıdır.
Modern.az Azərbaycanda fəaliyyət göstərən ali təhsil müəssisələrinin illik təhsil haqları ilə bağlı universitetlər üzrə müqayisəli araşdırma aparıb.
Ölkənin ən prestijli universitetlərindən hesab edilən Azərbaycan Dövlət İqtisad Universitetində (UNEC) yeni tədris ili üçün illik təhsil haqları 2000-2500 manat arasında dəyişəcək.
Bu ali təhsil müəssisəsində “İqtisadiyyat” və “menecment” ixtisalarının illik təhsil haqqı 2300 manatdır.
Müqayisə üçün qeyd edək ki, Bakı Dövlət Universiteti (BDU) və Azərbaycan Dövlət Neft və Sənaye Universiteti (ADNSU) kimi ali təhsil müəssisələrində həmin ixtisasın illik təhsil haqqı 3000 manatdır.
Özəl universitetlərdən Xəzərdə “iqtisadiyyat” ixtisasın illik təhsil haqqı 4000 manat, “menecment” ixtisasının isə 3000 manat olacaq. Qərbi Kaspi Universində hər iki ixtisasın qiyməti 2300 manatdır.
“Dünya iqtisadiyyatı” ixtisasının illik təhsil haqqı UNEC-də 2500 manat, BDU-da isə 3000 manat təşkil edir.
“Dizayn” ixtisasını isə UNEC-də ödənişli əsaslarla illik 2000 manata oxumaq mümkün olacaq.
Azərbaycan Memarlıq və İnşaat Universitetində bu ixtisasın illik təhsil haqqı 2300 manat, Qərbi Kaspi və Odlar Yurdu universitetlərində isə 2500 manatdır.
UNEC-də “Qida məhsulları mühəndisliyi”, “Metrologiya, standartlaşdırma və sertifikasiya mühəndisliyi” ixtisaslarının da illik təhsil haqqı 2000 manat olacaq.
“İstehlak mallarının ekspertizası və marketinqi” və “Ekologiya” ixtisasları da UNEC-də 2000 manat olacaq. Bakı Dövlət Universitetində isə bu ixtisasların qiyməti 200 manat artıq, 2200 manat təşkil edəcək.
Son dövrlər gənclərin ən çox üz tutduğu ixtisaslardan biri də marketinqdir. Bu ixtisasın illik təhsil haqqı UNEC-də 2200 manat, ADNSU-da 3000 manat, Azərbaycan Memarlıq və İnşaat Universitetində isə 2200 manatdır.
Biznesin idarə edilməsi, Dövlət və bələdiyyə idarəetməsi, Kompüter elmləri ixtisasları ADNSU-da 3000 manat olacaq. UNEC-də isə bu ixtisasların qiyməti müvafiq olaraq 2500, 2200, 2200 manat olacaq.
II ixtisas qrupunda ən çox maraq göstərilən ixtisaslardan “Statistika” ixtisasını UNEC-də ödənişli əsaslarla 2000 manata oxumaq mümkün olacaq. Sənayenin təşkili və idarə olunması ixtisasının illik təhsil haqqı isə İqtisad Universitetində 2200 manat, Azərbaycan Texniki Universitetində 2200 manat, Azərbaycan Memarlıq və İnşaat Universitetində 2300 manat, Bakı Mühəndislik Universitetində 2300 manat olacaq.
İnformasiya əsrinin ən çox müraciət olunan ixtisaslarından hesab edilən İnformasiya texnologiyaları və sistemləri mühəndisliyini UNEC-də 2200 manata, ADNSU-da 2500 manata, Azərbaycan Texniki Universitetində 2200 manata, Azərbaycan Memarlıq və İnşaat Universitetində 2300 manata, Qərbi Kaspi Universitetində 2400 manata. Milli Aviasiya Akademiyasında 2500 manata oxuya bilərsiniz.
1-08-2024, 15:30
Qarabağ Universitetində yeni təyinat
ABŞ-nin Corc Vaşinqton Universiteti (CVU) ilə Azərbaycan Dövlət Pedaqoji Universiteti (ADPU) arasındakı ikili diplom proqramının məzunu Abdulxaliq Məmmədli Qarabağ Universitetinin Mükəmməllik mərkəzinə direktor təyin olunub.
Bu barədə Universitetdən məlumat verilib.
Abdulxaliq Məmmədli İstanbul Universitetində ingilis dili müəllimliyi ixtisası üzrə bakalavriat, Azərbaycan Dövlət Pedaqoji Universitetində (ADPU) təhsilin təşkili və idarə olunması ixtisası üzrə magistratura səviyyələrində təhsil alıb. Sonra ABŞ-nin Corc Vaşinqton Universiteti (CVU) ilə ADPU arasındakı ikili diplom proqramında təhsil siyasəti və idarəetməsi ixtisası üzrə ikinci dəfə magistratura təhsili alıb. Bundan əlavə, Azərbaycan Respublikası Təhsil İnstitutunda təhsilin təşkili və planlaşdırılması ixtisası üzrə doktorantura səviyyəsini bitirib.
Abdulxaliq Məmmədli 2012–2017-ci illərdə Qafqaz Universitetində (indiki Bakı Mühəndislik Universiteti) müəllim, Test mərkəzinin rəhbəri və ingilis dili üzrə metodbirləşmə rəhbəri vəzifələrində çalışıb.
1-08-2024, 11:59
COP29 zamanı məktəblər bağlanacaq - Baş nazirdən qərar
Nazirlər Kabineti “Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29), Kioto Protokolunun Tərəflər Görüşünün 19-cu sessiyasının və Paris Sazişinin Tərəflər Görüşünün 6-cı sessiyasının keçiriləcəyi dövrdə Azərbaycan Respublikasının ərazisində fəaliyyət göstərən təhsil müəssisələrinin fəaliyyətinin təşkilinə dair əlavə tədbirlər barədə” qərar verib. Qərarı Baş nazir Əli Əsədov imzalayıb.
Qərara əsasən, Azərbaycan Respublikasının ərazisində fəaliyyət göstərən təhsil müəssisələrində (xüsusi təhsil müəssisələri istisna olmaqla) təhsilin pillələri üzrə tədris və təlim-tərbiyə prosesinin aşağıdakı qaydada təşkili təmin ediləcək:
- ümumi təhsil pilləsi üzrə -2024-cü il noyabrın 12-dən 22-dək payız tətili;
- peşə, orta ixtisas və ali təhsil pillələri üzrə - Bakı və Sumqayıt şəhərlərində, Abşeron rayonunda 2024-cü il noyabrın 12-dən 22-dək distant (məsafədən) formada təhsil.
Elm və Təhsil Nazirliyi yuxarıda qeyd edilənlər nəzərə alınmaqla təhsil proqramlarının təhsil alanlar tərəfindən tam mənimsənilməsini təmin etmək məqsədilə müvafiq tədbirlər həyata keçirməlidir.
31-07-2024, 16:22
400-ə yaxın müəllim alternativ işlə təmin olunacaq
400-ə yaxın müəllimin tədrisdənkənar alternativ işlərlə təmin olunması prosesi gedir.
Bunu Məktəbəqədər və Ümumi Təhsil üzrə Dövlət Agentliyinin (MÜTDA) Ümumi təhsilin təşkili şöbəsinin müdir müavini Nurlan İsmayılbəyli jurnalistlərə açıqlamasında deyib.
N.İsmayılbəyli bildirib ki, işdən azad olunmuş müəllimlərlə əlaqədar komissiyalar yaradılıb və onların həssaslığı nəzərə alınaraq, alternativ işlərlə təmin edilməsi üçün çalışmalar davam etdirilir:
"Həssas təbəqədən olan müəllimlərin sertifikasiya müsabiqəsindən keçməməsinə və işdən uzaqlaşdırılmasına baxmayaraq, onların sosial həssaslığı araşdırılır. Bu hal təsdiqlənərsə, həmin müəllimlər müxtəlif işlərlə təmin olunacaq".
O bildirib ki, bu sıraya məktəblər təhsil müəssisələrindəki vakansiyalar, sosial pedaqoq, nizam-intizam prossesinin təşkili və sair işlər daxildir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!