Bu gün aprel döyüşlərində şəhid olan polkovnik - leytenant Raquf Orucovun doğum günüdür.

Raquf Orucov 1972-ci il 12 iyulda Ağdam rayonunun Cinli kəndində Raya və İbrahim Orucovların ailəsində anadan olub. Ailənin birinci övladı olan Raqufun üç qardaşı və bir bacısı var idi. 1990-cı ildə Sovet Qoşunlarında xidmət edən Raquf Orucov bir müddət sonra ordudan ayrıldı və Azərbaycan Ordusunun sıralarına qoşuldu. Elə həmin günlərdə ermənilərin Ağdam rayonunu atəşə tutmasıyla Raquf Orucovun dayısı Azər Rəhimov şəhid oldu. 1993-cü ilin 12 iyununda rus-erməni ordusu Ağdam rayonunun Cinli kəndini işğal etdi. İşğal nəticəsində beş övlad anası olan Raya xanım düşmən gülləsindən şəhid oldu. Elə həmin ildə Raquf Orucov sənədlərini Bakı Ali Hərbi Ümumqoşun Komandirləri Məktəbinə verdi, amma məktəbə qəbul ola bilmədi. Buna baxmayaraq o, ruhdan düşmədi və həmin məktəbə qəbul oldu. Anasının qisasını ermənilərdən alacağı ümidilədə onun şərəfli hərbçi həyatı başladı.



Raquf 1996-cı ildə Murovdakı “N” saylı hərbi hissədə kəşfiyyat bölüyünün komandiri olub. Qaynar nöqtələrdə kəşfiyyat qruplarının düşmən arxasında həyata keçirdiyi uğurlu əməliyyatların əsas təşkilatçılarından olub. o, yalnız təşkilatçı deyil, həm də o döyüşlərdə əsas iştirakçılardan olub.


Aprel döyüşlərində qəhrəmancasına şəhid oldu polkovnik-leytenant. Mayın 5 - də Sumqayıt Şəhidlər Xiyabanında keçirilən vida mərasimində 10 000-dən çox insan, Müdafiə Nazirliyinin yüksək rütbəli zabitləri, deputatlar və ictimaiyyət nümayəndələri iştirak edib.

Polkovnik-leytenant R.Orucov ölümündən sonra "İgidliyə görə" medalı ilə təltif edilib.