Bu gün Cəlilabad rayonunda Qarabağ uğrunda döyüşlərdə şəhid olmuş Azərbaycan Ordusunun zabiti Fərid Əhmədovun həyat yolundan bəhs edən filmin təqdimatı keçirilib.



Butov.az saytı APA-ya istinadla xəbər verir ki, təqdimat mərasimində Cəlilabad RİH başçısının müavini Asif Əzizov Azərbaycan torpaqları uğrunda şəhid olan əsgər və zabitlərin xatirəsini əziz tutduğuna görə filimin yaradıcı kollektivinə rayon sakinləri, o cümlədən şəhid zabitin ailəsi adından təşəkkürünü bildirdikdən sonra Fərid Əhmədovun uşaqlıq, gənclik və hərbi xidmətdə olduğu illəri əks etdirən film nümayiş etdirilib. Şəhid haqqında onun dostlarının, yaxınlarının və müəllimlərinin xatirələri canlandırılıb .
Fərid Əhmədovun anası Nərgiz xanım filmin ssenari müəllifi Kəmalə Mirzəyevaya, Fərid rolunun ifaçısı Elvin Qasımova və yaradıcı kollektivə təşəkkürünü çatdırıb.






Xatırladaq ki, Azərbaycan Ordusunun zabiti Fərid Güloğlan oğlu Əhmədov 1986-cı il yanvarın 19-da Cəlilabad rayonunda anadan olub. 2003-cü ildə orta məktəbi bitirərək Heydər Əliyev adına Ali Hərbi Məktəbə daxil olub. 2007-ci ildə oranı bitirib, 2007-2008- ci illərdə Təlim-Tədris Mərkəzində leytenant rütbəsi almaq üçün kurs keçib. 2008-2009-cu illərdə Gəncədə xidmət edib. 2009-cu ildə öz ərizəsi ilə Tərtərə - döyüş bölgəsinə təyinat alıb, uğurlu xidmətinə görə tez bir zamanda baş leytenant rütbəsi alaraq kəşfiyyat bölük komandiri olub. 2010-cu il Sentyabrın 4-də cəbhənin Tərtər istiqamətində Çiləbürt kəndi yaxınlığında ermənilərin hücumunu dəf edərkən qəhrəmancasına həlak olub.
Azərbaycan Prezidentinin 7 noyabr 2010-cu il tarixli sərəncamı ilə “İgidliyə görə” medalı ilə təltif edilib.