“Azərbaycan torpağını fitnəkarlıqla başqalarına təqdim etməyə icazə verməyəcəyik”
Təbrizin milli-mədəni fəalları Qərbi Azərbaycan əhalisinin vali təyinatına olan etirazlarını dəstəkləyib. Milli-mədəni fəallar bu barədə bəyanat yayaraq İran rejiminə xəbərdarlıq ediblər ki, kürd millətçisi sayılan Firidun Hümmətini Qərbi Azərbaycana vali təyin etsə, Təbrizin də küçə və xiyabanları Qərbi Azərbaycan şəhərlərinin xiyabanları kimi əhalinin kütləvi etirazlarına meydan olacaq. Bəyanatın bir hissəsində deyilir: “Keçən həftə Azərbaycanın qərbində bir çox fəallarının bu əyalətə kürdün vali təyin edilməsinə qarşı etirazla dolu fəaliyyətinin şahidi olduq. Aldığımız məlumata görə, ermənilərin və kürdlərin qətliam törətməsini hələ də unutmayan əhali ayağa qalxıb və yerli olmayan kürdün vali təyin edilməsinə öz etirazını bildiriblər. Onların etirazı hətta dövlət dairələrinə, İslami İnqilabı Keşikçilər Korpusu (SEPAH) və Bəsic orqanlarına da çatıb. Biz təbrizli milli fəallar olaraq Urmu gölü böhranı və Qaradağ zəlzələsində öz qardaşlarımızı tək qoymadığımız kimi, elan edirik ki, Azərbaycanın qərbindəki bacı-qardaşlarımızı da tək qoymayacağıq. Lazım gəlsə Təbrizin xiyabanları Urmiyə, Sulduz, Xoy, Salmas və başqa şəhərlərimizin xiyabanına çevriləcək və Azərbaycan torpağını fitnəkarlıqla başqalarına təqdim etməyə icazə verməyəcəyik”.

Urmu gölünün suyunun quruması probleminə həsr olunan konfransda Azərbaycan şəhərlərinin əhalidən boşalacağı da dilə gətirilib. Tədbirdə Mustafa Qənbəri deyib ki, Urmu gölü quruduqda 8 milyard ton duz, zəhərli və ağır metallar yerdə qalacaq və bunun mənfi təsirinin 100 kilometr radiusuna qədər qarşısını almaq mümkünsüz olacaq. Bu duz və zəhərli maddələr şəhərləri, kəndləri və əkin ərazilərini məhv edəcək. Nəticədə Təbriz, Qoşaçay, Binab, Sayınqala, Məlikan, Marağa, Bostanabad, Sərəskəndi, Mərənd və s. şəhərlər yaşamağa münasib olmayacaq və əhali bu şəhərləri tərk etməyə məcbur olacaq.

Bu arada Beynəlxalq Əfv Təşkilatının məsulu Drewery Dyke bəyan edib ki, “Ruhaninin iranlıların vətəndaş haqları barəsində verdiyi vədlər, söz həddində qalıb və insan haqları ilə bağlı heç bir dəyişiklik müşahidə olunmayıb”.