Azərbaycanlılar “Traxtur”un çempionluqdan məhrum edilməsindən sonra kampaniyaya başlayıb: “Yalan və ayrı-seçkiliyə qırmızı kart”
Güneyli internet istifadəçiləri sosial şəbəkələrdə “yalan və ayrı-seçkiliyə qırmızı kart” kampaniyası başladıblar. Kampaniya Təbrizin “Traxtur” futbol komandasını super liqa çempionluğundan məhrum edilməsindən sonra başlayıb.
Kampaniyaya qatılan güneylilər sosial şəbəkələrdə qırmızı kart şəkilləri paylaşaraq “Traxtur” komandasına verilən yalan məlumat məsələsinə diqqət çəkməklə yanaşı “hakimiyyətin Azərbaycana verdiyi yalan vədlər, ədalətsizlik, asimilasyon və türk düşmənliyinə” qırmızı kart verdiklərini yazırlar.
Xatırladaq ki, mayın 15-də (ordibeheştin 25-də) keçirilən “Traxtur-Neft” müsabiqəsinin nəticəsi İranın bu ilki super liqa rəqabətlərinin çempionunu müəyyənləşdirməli idi. Və bu müsabiqədə “Traxtur” çempion oldu, lakin oyunun sonlarında Futbol Federasiyası tərəfindən “Traxtur”un baş məşqçisi və oyunçularına deyilən yalan məlumat “Traxtur” oyunçularını hücumdan müdafiəyə yönəltdi. Oyunun birinci hissəsi 2:1 hesabı ilə “Traxtur”un xeyirinə başa çatdı. İkinci hissədə isə durum dəyişdi və müsabiqə 3:3 hesabı ilə sona çatdı. Müsabiqə sona çatınca “Traxtur” tərəfdarları meydançaya daxil olub və öz sevinclərini paylaşdılar. Lakin oyunun sonuna 8 dəqiqə qalmış yayılan şayiə yalan çıxdı və bildirildi ki, İsfahanda “Sepahan-Saypa” müsabiqəsi deyilən kimi 2:2 deyil, 2:0 hesabı ilə “Sepahan”ın xeyirinə yekunlaşıb və nəticə etibarı ilə “Sepahan” super liqanın çempionu olub. Bu xəbəri təəccüblə qarşılayan “Traxtur” tərəfdarları artıq planı anlayıb və etirazlara başladılar. Bir neçə dəqiqə ərzində etirazlar stadiondan şəhər daxilinə qədər genişləndi və Təbrizin müxtəlif məntəqələrini bürüdü. Etiraz yığıncaqlarında bir çox soydaşımız təhlükəsizlik qüvvələri tərəfindən döyülüb və yaralandı, onlardan bir neçəsinin yaxalandığı məlum oldu.