Standartlaşdırma, Metrologiya və Patent üzrə Dövlət Komitəsi Bakıda (Bakıxanov qəsəbəsi, Şəfəq küçəsi, 1) fiziki şəxs Təranə Quliyevaya məxsus şirniyyat sexində dövlət nəzarəti həyata keçirib:

- Araşdırma zamanı müəyyən olunub ki, sanitariya norma və qaydalarına məhəl qoyulmadan işləyən müəssisə texnoloji prosesi reqlamentləşdirən texnoloji təlimat və resepturasız fəaliyyət göstərir, şirniyyat məhsulları gigiyenik və uyğunluq sertifikatları olmadan istehsal olunur, məhsulların sınaqları aparılmır, istismar olunan ölçmə vasitələri müqayisəli dövlət yoxlanışından keçirilmir.

İstehsal zamanı mənşəyi məlum olmayan, istifadəyə yararsız ərzaq məhsullarından istifadə olunduğu da bilinib. Belə ki, un kisələrinin içində külli miqdarda ziyanverici həşərat aşkarlanıb, hazır məhsulların sobadan çıxdığı an natəmiz şəraitdə soyudulduğu, ümumilikdə antisanitariya vəziyyətinin hökm sürdüyü müəyyən olunub.

Aşkar olunmuş bu və digər nöqsanlarla əlaqədar olaraq inzibati protokol tərtib edilib, müəssisədə şərq şirniyyatlarının istehsalı və satışı qadağan edilib.

Məlumatı “Media forum” saytına dövlət komitəsinin mətbuat xidməti göndərib.

"Media forum"