Göranboyda çörək məhsullarının istehsalı və satışı ilə məşğul olan sexdə reyd keçirilib.

APA-nın məlumatına görə, Standartlaşdırma, Metrologiya və Patent üzrə Dövlət Komitəsinin Gəncə Ərazi İdarəsi tərəfindən aparılan reyd zamanı Dəliməmməd şəhər sakini Cümşüd Cabbarova məxsus çörək bişirmə sexində xeyli nöqsan müəyyən edilib.

Qurumun məsləhətçisi Fərid Namazovun verdiyi məlumata görə, reydin keçirilməsində əsas məqsəd fərdi vətəndaşlara məxsus çörəkbişirmə sexləri və xüsusi üsulla hazırlanan çörəkbişirmə yerlərindəki vəziyyəti müşahidə etmək və mövcud problemləri aradan qaldırmaqdır. Müsahib yoxlamalar zamanı istehsal obyektində antisanitar vəziyyət və standartların tələblərinin kobud şəkildə pozulması hallarına rast gəlindiyini bildirib. Yoxlamalar zamanı sexdən çörəyin bişirilməsində avtomobil mühərriki üçün nəzərdə tutulan yağlardan istifadə olunduğu üzə çıxıb.
Bundan başqa, sexdə istismar müddəti başa çatmış avadanlıqlarla çörək bişirilmə hallarına da rast gəlinib. Sanitariya norma və qaydalarına məhəl qoyulmadan işləyən müəssisə texnoloji təlimat və reseptura olmadan fəaliyyət göstərir, məhsulların gigiyenik və uyğunluq sertifikatları da yoxdur.