8-02-2026, 21:38
Göygöldə 40 yaşlı kişini öldürüb dərəyə atan şəxs saxlanılıb
Göygöldə 40 yaşlı kişini bıçaqlayaraq öldürüb dərəyə atan şəxs saxlanılıb.
Rayon polis şöbəsinin əməkdaşlarının keçirdikləri əməliyyat-axtarış tədbirləri nəticəsində hadisənin törətməkdə şübhəli bilinən Göygöl rayon Mollacəlilli kənd sakini 41 yaşlı Rasim Quliyev saxlanılaraq istintaqa təhvil verilib.
Hazırda faktla bağlı Göygöl Rayon Prokurorluğunda araşdırma aparılır.
8-02-2026, 21:27
"Sabah"ın baş məşqçisi: "Ölkədə təkcə "Qarabağ" yox, başqa komandalar da var"
"Mən buraya gəlmişəm ki, "Sabah" haqda suallara cavab verim. Nəyə görə daim "Qarabağ" haqda suallar verirsiniz? Bu məsələyə də münasibət bildirmək istəmirəm".
Bu sözləri "Sabah"- "Araz-Naxçıvan" matçından sonra keçirilən mətbuat konfransında Bakı klubunun baş məşqçisi Valdas Dambrauskas "Neftçi" - "Qarabağ" matçının təxirə salınması ehtimalı ilə bağlı suala cavab verərkən söyləyib.
"Qarabağ" haqda soruşmaq istəyirsinizsə, onların oyununa gedib, baş məşqçisinə sual verə bilərsiniz. "Sabah"ın oyununa gəlirsiniz və mənə "Qarabağ" haqda sual verirsiniz. Bu, haradasa hörmətsizlikdir. Siz bizə də hörmətlə yanaşın, bu ölkədə təkcə "Qarabağ" mövcud deyil, başqa komandalar da var. Mən "Qarabağ"a, gördükləri işə böyük hörmətlə yanaşıram", - deyə baş məşqçi vurğulayıb.
Qeyd edək ki, Misli Premyer Liqasında XIX turun ilk qarşılaşmasında "Sabah" evdə "Araz-Naxçıvan"ı 4:1 hesabla məğlub edib.
8-02-2026, 21:24
Tramp Azərbaycanı Vaşinqtona dəvət etdi
ABŞ prezidenti Donald Trampın təşəbbüsü ilə yaradılan “Sülh Şurası”nın ilk tammiqyaslı sammitinin 19 fevralda Vaşinqtonda keçirilməsi planlaşdırılır.
“Axios” nəşrinin məlumatına görə, tədbirə Azərbaycan, Ermənistan, Qazaxıstan və Özbəkistan liderləri dəvət olunub və rəsmi Bakının sammitdə yüksək səviyyədə təmsil olunacağı gözlənilir.
Amerikalı rəsmilər görüşü formal olaraq Qəzza sektorunun bərpası üçün humanitar vəsait toplama platforması kimi təqdim etsələr də, proses Tramp administrasiyasının müharibədən sonrakı nizamlanma üçün öz siyasi mexanizmini qurmaq cəhdi kimi qiymətləndirilir.
ABŞ-ın planına əsasən, “Sülh Şurası” Qəzzada atəşkəsə nəzarət etməli, idarəetmə və bərpa proseslərini koordinasiya etməlidir. Qeyri-rəsmi olaraq üzv ölkələr üçün təxminən 23 milyon dollarlıq “standart” töhfə, daimi üzvlük üçün isə bir milyard dollar səviyyəsində ödəniş nəzərdə tutulur.
Sammit ABŞ-ın “United States Institute of Peace” binasında keçiriləcək. Qurum yaxın vaxtlarda rəsmi şəkildə “Donald Tramp adına Sülh İnstitutu” adlandırılıb və bu addım institutun ekspert mərkəzindən siyasi brend elementinə çevrildiyi kimi dəyərləndirilir. Görüş, eyni zamanda, ABŞ-ın Qəzza planının ikinci mərhələsinin müzakirə olunduğu bir vaxta təsadüf edir.
Sammitdən bir gün əvvəl, 18 fevralda İsrailin baş naziri Benyamin Netanyahunun Donald Trampla Ağ Evdə görüşü planlaşdırılır. Bu danışıqların nəticəsinin “Sülh Şurası” təşəbbüsünün gələcək taleyinə ciddi təsir göstərə biləcəyi bildirilir. ABŞ-ın müsəlman ölkələrindən stabilləşdirici qüvvələr yaratmaq ideyasında Azərbaycanın adı çəkilsə də, rəsmi Bakı riskli hərbi missiyalarda iştirak etməyə hazır olmadığını bəyan edib.
8-02-2026, 20:40
Suriyada daşqınlar: Üç nəfər ölüb, ikisi uşaqdır
Suriyanın şimal-qərbində güclü yağışların yaratdığı daşqınlar insan tələfatına yol açıb.
Latakiya, İdlib və Hama əyalətlərində müşahidə olunan intensiv yağıntılar nəticəsində biri humanitar təşkilatın könüllüsü, ikisi uşaq olmaqla üç nəfər həyatını itirib.
Suriya Qızıl Aypara Cəmiyyəti bildirib ki, Latakiyanın kənd ərazilərində xilasetmə işləri aparan könüllü əməliyyat zamanı faciəvi şəkildə ölüb. Hadisə zamanı daha dörd nəfər müxtəlif dərəcəli xəsarətlər alıb.
Agentliyin yazdığına görə, Latakiyanın şimalında yerləşən Ayn-İssa bölgəsində isə daşqınlar iki uşağın ölümünə səbəb olub. Güclü yağışlar yaşayış məntəqələri ilə yanaşı, qaçqın düşərgələrinə də ciddi ziyan vurub, onlarla ailə təhlükəsizlik məqsədilə evlərindən və çadırlardan təxliyə edilib.
Hazırda bölgədə axtarış-xilasetmə işləri davam etdirilir. Sinoptiklər yağıntıların yaxın günlərdə də davam edəcəyini bildirərək, əhaliyə ehtiyatlı olmağı tövsiyə ediblər.
8-02-2026, 20:26
Əsədin son günləri: Reallıqdan qopmuş, videooyunlara aludə lider
ABŞ-ın "The Atlantic" jurnalı Suriyanın keçmiş prezidenti Bəşər Əsədin hakimiyyətdən getməsinin son günlərinə dair geniş araşdırma yayımlayıb.
Məqalənin müəllifi, jurnalist Robert Uort yazını onlarla mənbə, keçmiş yüksəkvəzifəli suriyalı məmurlar, prezident sarayının ətrafı, “Hizbullah” nümayəndələri və israilli sabiq təhlükəsizlik rəsmiləri ilə söhbətlər əsasında hazırlayıb.
Yazıda bildirilir ki, 2024-cü il dekabrın 7-də üsyançı qüvvələr Dəməşqi mühasirəyə alarkən Əsəd yaxın çevrəsini sakitləşdirir, qələbənin yaxın olduğunu deyirdi. Lakin az sonra o, demək olar ki, heç kəsə xəbər vermədən Rusiya təyyarəsi ilə gecə vaxtı ölkəni tərk edib. Bu addım onun tərəfdarları arasında “xəyanət” kimi qiymətləndirilib və bir çox yaxın adamı Suriyanı tələsik yollarla tərk etməyə məcbur olub.
Uortun mənbələri Əsədi “reallıqdan qopmuş, seks və videooyunlara aludə, təkəbbürlü lider” kimi təsvir edirlər. Məqalədə vurğulanır ki, region ölkələri son günlərdə ona müxtəlif siyasi razılaşmalar təklif etsələr də, Əsəd prezident postunu tərk etməyi nəzərdə tutan bu çağırışlara cavab verməyib. Müəllif bunu Əsədin 2015-ci ildə Rusiya prezidenti Vladimir Putinin hərbi müdaxiləsi ilə hakimiyyətdə qalmasından sonra yaranan saxta güvən hissi ilə əlaqələndirir.
Araşdırmada qeyd olunur ki, Suriyanın iqtisadiyyatı faktiki olaraq çökmüş, ölkənin suverenliyi isə qismən Rusiya və İranın təsiri altına düşmüşdü. Əsədin Hizbullah lideri Həsən Nəsrullaha və “müqavimət oxu”nun İsrailə həlledici zərbə vuracağına dair təbliğata həddindən artıq inanması da onun yanlış hesablamaları sırasında göstərilir.
Məqalədə Əsədin yaxın müşaviri Luna əş-Şibl barədə də qalmaqallı iddialar yer alır. Bildirilir ki, o, Əsədin qeyri-rəsmi sevgilisi olub və 2024-cü ilin yayında şübhəli şəraitdə ölü tapılıb. Uort, israilli sabiq məmura istinadən, əş-Şiblin eyni zamanda Rusiya üçün məlumat ötürə biləcəyini yazır.
Yazıda Türkiyə prezidenti Rəcəb Tayyib Ərdoğanın Əsədi siyasi barışığa və qaçqınların geri dönüşünə imkan verən danışıqlara çağırdığı, lakin Dəməşqin bu təklifləri rədd etdiyi də xatırladılır. Digər mənbələr, o cümlədən Reuters, Əsədin qaçışdan əvvəl yüz minlərlə dollar nağd pul və məxfi materialları ölkədən çıxardığını bildirir.
8-02-2026, 20:17
Gəncədə iki avtomobil toqquşdu, piyada xəsarət aldı
Gəncədə iki avtomobil toqquşub, piyada xəsarət alıb.
Hadisə şəhər ərazisində qeydə alınıb.
Hərəkətdə olan “Niva” ilə digər minik avtomobili toqquşub. Qəzadan sonra avtomobillərdən biri yolun kənarında dayanan piyadanı vurub. Xəsarət alan piyada xəstəxanaya yerləşdirilib, vəziyyətinin kafi olduğu bildirilir.
Hadisə yerinə polis əməkdaşları cəlb edilib.
Faktla bağlı araşdırma aparılır.
8-02-2026, 19:56
Zelim Tçkayev Paris “Böyük Dəbilqə”sində finala yüksəldi
Azərbaycan cüdoçusu Zelim Tçkayev Parisdə keçirilən “Böyük Dəbilqə” turnirində finala vəsiqə qazanıb.
İdmançı yarımfinalda qazaxıstanlı Abilayxan Jubanazarı qızıl xalla məğlub edib.
Qeyd edək ki, ötən gün Balabəy Ağayev (60 kq) qızıl mükafata sahib çıxıb. Ruslan Paşayev (66 kq) isə bürünc medal qazanıb.
Xatırladaq ki, “Böyük Dəbilqə” bu gün başa çatacaq. Azərbaycan yarışda səkkiz cüdoçu ilə təmsil olunur.
8-02-2026, 19:32
Sabahdan Türkiyədən toyuq məhsullarının ixracı dayandırılacaq
Türkiyədə fevralın 9-dan başlayaraq toyuq məhsullarının ixracı müvəqqəti olaraq dayandırılacaq.
Qərarın əsas məqsədi daxili bazarda qiymət artımının qarşısını almaqdır.
Bildirilib ki, Ramazan ayı ərəfəsində ölkədə toyuq istehsalçıları və satıcıları qiymətləri təxminən 15 faiz yüksəldiblər. Bunun ardınca Türkiyənin Ticarət Nazirliyi ixracın sabahdan etibarən dayandırılacağını açıqlayıb.
8-02-2026, 19:13
Qubada bir ailənin 8 üzvü qonaqlıqda qidadan zəhərlənib
Quba rayonunda səkkiz nəfər qidadan zəhərlənib.
Rayonun Xucbala kəndində qonaqlıq zamanı - 1953-cü il təvəllüdlü N.Şabutov, 1953-cü il təvəllüdlü H.Şabutova, 1986-ci il təvəllüdlü A.Şabutova, 2003-cü il təvəllüdlü A.Şabutova, 2003-cü il N.Şabutova, 2010-cu il D.Şabutov, 2025-ci il təvəllüdlü G.Şabutova və 1978-ci il təvəllüdlü D.Məmmədova qida zəhərlənməsi diaqnozu ilə Qusar Rayon Mərkəzi Xəstəxanasına aparılıblar.
Onların paytaxt salatından zəhərləndikləri ehtimal olunur. Faktla bağlı araşdırma aparılır.
8-02-2026, 19:10
Bakı-Sumqayıt yolunda təmir işlərinin bitəcəyi vaxt açıqlandı
Bakı-Sumqayıt yolunun Sulutəpə dairəsi istiqamətində asfalt örtüyünün dəyişdirilməsi ilə əlaqədar aparılan təmir işləri bu gün axşam saatlarında başa çatacaq.
Bu barədə Azərbaycan Avtomobil Yolları Dövlət Agentliyindən (AAYDA) məlumat yayıb.
Bildirilib ki təmir işləri yekunlaşdıqdan sonra yol nəqliyyatın hərəkəti üçün açılacaq.
Qeyd edək ki, təmir işləri ilə əlaqədar bir sıra küçə və yollarda avtomobillərin hərəkətinə məhdudiyyət qoyulub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!