11-02-2026, 23:53
Körpələrin ölümündə təqsirləndirilən mərkəz direktoru: "493 nəfərin əvəzinə işləməli deyildim"
Respublika Perinatal Mərkəzində yeddi körpənin öldüyü yanğınla bağlı ittiham olunan direktor və şöbə rəislərinin cinayət işi üzrə məhkəmənin növbəti iclası keçirilib.
Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə davam etdirilən proses zamanı iki zərərçəkənin ərizəsinin məhkəməyə daxil olduğu bildirilib.
Həmin zərərçəkənlərdən biri bütün təqsirləndirilənlərə qarşı, digəri isə yalnız müttəhim Mehriban Abasquliyevaya münasibətdə şikayət və tələbinin olmadığını bildiriblər.
Mehriban Abasquliyeva ifadəsi zamanı deyib ki, 27 dekabr 2022-ci ildə mərkəzə direktor təyin edilib:
"Mərkəzdə yanğın baş verənə qədər vəzifədə olmuşam. Hadisə baş verən gecə təcili yardım şöbəsindən zəng elədilər, alovlanma olduğunu bildirdilər. Mən də hadisə barədə TƏBİB-in icraçı direktoruna və yanğınsöndürənlərə zəng etmişəm. Əraziyə yanğınsöndürülənlərin cəlb olunduğunu dedilər. Mən ora çatandan xəstələrin və əməkdaşların təxliyəsi ilə məşğul olmuşuq. TƏBİB-in icraçı direktoru da orada idi. Prokurorluq əməkdaşları hadisə yerinə gələrək məndən sənədləri, sonra isə istintaq idarəsinə gəlməyimi tələb etdilər. Mən və mərkəzin 15-ə yaxın əməkdaşı Baş Prokurorluğun İstintaq İdarəsinə ifadə verməyə getdik. Hadisə zamanı keçirdiyim stress və yorğunluq səbəbindən ifadə verə bilməmişəm, təqdim olunan sənədlərə imza atmışam. Həmçinin orada olan zaman vəkillərimlə də əlaqə saxlaya bilməmişəm".
Mehriban Abasquliyevanın sözlərinə görə, daha sonra yenidən Baş Prokurorluğun İstintaq İdarəsinə çağırılıb və ona dövlət hesabına vəkillə təmin edildiyi bildirilib:
"Öz vəsaitimlə vəkil tutmağa imkanım olsa da, dövlət hesabına vəkillə təmin etdilər. Sonra cinayət məsuliyyətinə cəlb olundum. O zaman səhhətim yaxşı deyildi, ona görə təqdim edilən hər bir sənədə imza atmışam. 30 il səhiyyə sistemində çalışmışam. Barəmdə seçilən ev dustaqlığı və vəzifədən kənarlaşdırma tədbirlərindən sonra şəxsi hesabıma tutduğum vəkillərlə əlaqə saxlaya bilmişəm".
M.Abasquliyeva daha sonra əlavə edib ki, yanğının elektrik yuvasından deyil, küvəzdən başladığı da otaqda olan kameradan aydın görünüb:
"Küvəzlərə mütəxəssislər baxış keçirməyiblər. Nasazlıq üç ay əvvəl də, üç saat əvvəl də baş verə bilər. Evimdə olan zaman küvəzdə nasazlığın baş verdiyini haradan bilim? Yeni doğulmuşların intensiv terapiya şöbəsində həkimlər xüsusi geyimlərdən istifadə edirlər, mən isə mərkəzdə adi formada olurdum. 439 nəfərin əvəzinə yalnız mən işləməli deyildim. Mənə qarşı irəli sürülən ittihamda deyilir ki, yanğının söndürülməsində iştirak edən dörd nəfərin sağlamlığına yüngül zərər vurulub. Qeyd edim ki, ehtiyatsızlıqdan şəxsin sağlamlığına yüngül zərər vurulması ilə bağlı cinayət məsuliyyətinə cəlb olunma tətbiq edilmir".
M.Abasquliyevanın sözlərinə görə, yanğın təhlükəsziliyi ilə bağlı hər hansı bir öhdəliyi olmasa da, Respublika Perinatal Mərkəzində bu məsələdən irəli gələn problemləri də aradan qaldırıb:
"Məryəm Rzayevanın direktor olduğu vaxtda təxliyə pilləkəni zibil yeri kimi istifadə olunurdu və oraya yanan materiallar yığılmışdı. Mən vəzifəyə təyin ediləndə həmin yeri təmizlətdirmişəm".
Növbəti proses fevralın 25-nə təyin edilib.
Qeyd edək ki, 2024-cü il yanvarın 9-da Respublika Perinatal Mərkəzində baş vermiş yanğınla bağlı Cinayət Məcəlləsinin müxtəlif maddələri ilə cinayət işi başlanıb, ibtidai istintaqın aparılması Baş Prokurorluğun İstintaq İdarəsinə tapşırılıb.
Araşdırmalar zamanı müəyyən olunub ki, Mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında baş vermiş yanğın nəticəsində yeddi yeni doğulmuş körpə ölüb, dörd nəfər xəsarət alıb, müəssisəyə isə ümumilikdə 361 min manat məbləğində maddi ziyan vurulub.
Mərkəzin direktoru vəzifəsində işləmiş Mehriban Abasquliyeva Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri, həmin mərkəzin şöbə rəisləri vəzifəsində işləmiş Hamlet Mustafayev və Elnur Əhmədli isə 225.3-cü maddəsi ilə təqsirləndirilən şəxs qismində mühakimə olunurlar.
11-02-2026, 23:42
İlqar Kamil şəhid Murad Nağıyevə həsr etdiyi kitabını təqdim edib
Azərbaycan Milli Kitabxanasında F.Köçərli adına Respublika Uşaq Kitabxanasının təşkilatçılığı ilə yazıçı İlqar Kamilin “9-cu mərtəbə” adlı sənədli romanının təqdimatı keçirilib. Qeyd edək ki, roman 44-günlük Vətən müharibəsi şəhidi, tank komandiri, leytenant Murad Nağıyevin həyatı, döyüş yolu və məktubları əsasında qələmə alınıb.
Tədbir torpaqlarımızın müstəqilliyi uğrunda canlarını fəda etmiş şəhidlərimizin xatirəsinin bir dəqiqəlik sükutla yad edilməsi ilə başlayıb, sonra Azərbaycan Respublikasının Dövlət Himni səsləndirilib. Daha sonra Murad Nağıyevin həyatı, hərbi təhsili, döyüş yolu və vətən müharibəsində göstərdiyi şücaətlər haqqında məlumat verilib. Çıxışlarda Muradın həm cəsur zabit, həm də həssas qəlbli, istedadlı bir insan, şair olduğu xüsusi vurğulanıb.
Təqdimatda kitabın müəllifi yazıçı İlqar Kamil, şəhidin qardaşı Orxan Nağıyev, Yazıçılar Birliyinin Gənclər Şurasının sədri Fərid Hüseyn, “Respublika Xatirə Kitabı” redaksiyasının baş redaktoru Nəzakət Məmmədova və Uşaq-Gənclər İnkişaf Mərkəzinin üzvü Əli Zeynallı çıxış edərək kitabdan Murad Nağıyevin məktublarını səsləndiriblər. Onu da deyək ki, bu məktublar şəhidin Vətənə, anasına, dostuna, sevdiyinə və şəhidlik zirvəsinə həsr olunub.
Çıxışlarda həmçinin Muradın qəhrəmanlığı, özünəməxsus xarakteri və şeirləri haqqında fikirlər səsləndirilib. Müəllifin əsərdə Muradın həyatı və şəxsiyyətinə səmimi yanaşması xüsusi qeyd olunub.
Tədbirdə şəhidimizə həsr edilmiş videoçarx da nümayiş etdirilib.
Yazıçılar Birliyinin katibi, yazıçı, tərcüməçi Səlim Babullaoğlu və professor İlham Pirməmmədov da kitab haqqında düşüncələrini paylaşıblar. Onlar şəhidimizin vətənpərvərlik ruhunu və ədəbi irsini gənclərə çatdırmağın əhəmiyyətini vurğulayıblar.
3 saylı UGİM-in “Çiçəyim” uşaq teatrının və “Azəri inciləri” vokal qrupunun gənc istedadları şeir və musiqi nömrələri ilə tədbirdə iştirak ediblər. Sonda Respublika Uşaq Kitabxanasının direktoru Şəhla Qəmbərova şəhid Murad Nağıyevin ailə üzvləri, şəhid ailələri və tədbirdə iştirak edən digər qonaqlara göstərdikləri diqqət və iştiraka görə minnətdarlığını bildirib.
Sonra müəllif oxucular üçün kitabını imzalayıb.
Mina RƏŞİD
11-02-2026, 23:21
“Azərbaycanın hərb tarixi”
proqramı çap olunub
“Azərbaycanın hərb tarixi” proqramı işıq üzü görüb. Ölkəmizin ali, humanitar və xüsusi təyinatlı ali təhsil müəssisələri üçün nəzərdə tutulan proqram Milli Müdafiə Universitetinin Hərbi Elmi Tədqiqat İnstitutunda hazırlanıb. Proqramın tərtibatçıları həmin institutun professoru, tarix elmləri doktoru Nurulla Əliyev və tarix üzrə fəlsəfə doktoru Nərminə Əmirbəyova, elmi redaktor tarix üzrə fəlsəfə doktoru Səbuhi Əhmədov, redaktor isə siyasi elmlər üzrə fəlsəfə doktoru Qaşqay Ramazanovdur.
Bu barədə AZƏRTAC-a Milli Müdafiə Universitetindən məlumat verilib.
Bildirilib ki, proqramın məqsədi Milli Müdafiə Universitetində “Azərbaycanın hərb tarixi” fənninin tədrisi zamanı qədim, orta və yeni dövrlərdə Azərbaycanda hərb işinin inkişaf mərhələlərini, Silahlı Qüvvələrimizin yaradılması və formalaşması prosesini, respublikamızın müstəqilliyinin elan edilməsini, eləcə də hərb sənəti sahəsində dünyagörüşünü genişləndirən, döyüş taktikasının inkişafının əsas mərhələlərini və müasir ümumqoşun döyüşünün əsaslarını bilən, bölmələrin döyüş hazırlığının təkmilləşdirilməsi üçün praktiki nəticələri təhlil və tətbiq etməyi bacaran peşəkar zabit kadrlarının hazırlanmasıdır.
Bu proqramda milli təhlükəsizliyin təmin olunmasında və Azərbaycan Silahlı Qüvvələrinin quruculuğunda Ulu Öndər Heydər Əliyevin fəaliyyəti, o cümlədən çoxpilləli hərbi təhsil sisteminin yaranmasının əsas istiqamətləri, peşəkar zabit kadrların hazırlığı işinin təşkili ilə bağlı ölkənin tədqiqatçılarının dərc edilən monoqrafiya və elmi məqalələr yer alıb. Həmçinin təqdim olunan tədqiqatlarda Prezident İlham Əliyevin apardığı xarici siyasət kursunda milli təhlükəsizlik konsepsiyasından irəli gələn prinsipial əsaslar və təcrübədə ondan geniş istifadənin əhəmiyyəti şərh edilib. Eyni zamanda, son illər Azərbaycanın milli təhlükəsizliyinin və Silahlı Qüvvələrdəki quruculuğun həyata keçirilməsi məsələləri, peşəkar zabit kadrların hazırlığı sahəsində yeni tələblərin işlənməsi və təşkili qeyd olunub.
Ümumilikdə proqramda Azərbaycan ərazisində üç minillik dövrdə baş vermiş əsas hərbi-tarixi hadisələr ilk dəfə kompleks şəkildə əhatə edilib.
11-02-2026, 23:20
Ukraynanın bu il üçün 60 milyard avro yardıma ehtiyac var
Ukraynanın bu il öz maliyyə ehtiyaclarını ödəmək üçün 60 milyard avro həcmində xarici yardıma ehtiyacı olduğu bildirilib.
Bu açıqlamanı Almaniyanın müdafiə naziri Boris Pistorius Brüsseldə Avropa İttifaqı (Aİ) ölkələrinin müdafiə nazirlərinin görüşündə verib.
Pistorius deyib: "Bu il Ukraynanın ehtiyaclarını qarşılamaq üçün xarici dəstək tələb olunur və hər iki mənbədən gələn hər bir milyard əhəmiyyətlidir – həm milli, həm də Avropa mənbələrindən."
O, əlavə edib ki, Ukraynaya kredit ayrıldıqdan sonra Aİ ölkələrinə daha çox vəsait lazım olacaq: "Bizə əlavə maliyyə vəsaitinə ehtiyac var."
Qeyd edək ki, Aİ-nin 27 ölkəsindən 24-ü (Çexiya, Macarıstan və Slovakiya istisna olmaqla) dekabrda Ukrayna üçün 2026–2027-ci illəri əhatə edən 90 milyard avroluq maliyyələşdirmə mexanizmini təsdiqləyib. Bu məbləğin üçdə biri Ukraynanın dövlət büdcəsinə, qalan üçdə ikisi isə silah tədarükünə yönəldiləcək. Aİ ölkələri bu vəsaitləri maliyyə bazarlarından borc götürərək təmin edəcək, faiz ödənişləri isə Avropa Komissiyası tərəfindən Aİ büdcəsindən həyata keçiriləcək.
11-02-2026, 22:56
Ata mülkünə görə xəstə qardaşını amansızlıqla döydü
Masallıda kişi ata mülkünə görə xəstə qardaşını döyüb.
Hadisə rayonun Kubin kəndində, yol kənarında qeydə alınıb.
Kənd sakini 50 yaşlı Natiq Muradov (ad və soyad şərtidir) ağac parçası ilə qardaşının baş. əl və bədəninin müxtəlif nahiyələrinə vuraraq, ona xəsarətlər yetirib. Nəticədə Natiq saxlanılıb və barəsində cinayət işi açılıb.
Təqsirləndirilən şəxs ifadəsində bildirib ki, mal-qaranı örüşdən gətirmək üçün gedib. Yolda xəstə qardaşını görüb və məlum hadisə baş verib. Onun sözlərinə görə, bu hadisədən əvvəl də zərərçəkən digər qardaşı ilə birləşib onu döyüblər. Aralarında illərdir ata mülkünü bölmək üstündə ədavət yaranıb. Natiq Muradov əməlindən peşman olduğunu deyərək məhkəmədən barəsində amnistiya aktının tətbiq olunmasını xahiş edib.
Masallı rayon Məhkəməsinin qərarı ilə N. Muradov barəsində amnistiya aktı tətbiq olunub və o, məsuliyyətdən azad olunub.
11-02-2026, 22:18
Olimpiya çempionlarımız "Böyük Dəbilqə" turnirində yarışacaq
Özbəkistanın paytaxtı Daşkənd şəhərində keçiriləcək "Böyük Dəbilqə" turnirində iştirak edəcək Azərbaycan cüdoçularının adları açıqlanıb.
Bbu barədə Beynəlxalq Cüdo Federasiyasının (IJF) rəsmi saytında məlumat paylaşılıb.
Bu yarışda cüdo üzrə Azərbaycan millisinin 10 çəki dərəsində 20 cüdoçusu (13 kişi, 7 qadın) mübarizə aparacaq.
Kişilərin mübarizəsində Yusif Əhmədov, Balabəy Ağayev, Turan Bayramov (hamısı 60 kiloqram), Nizami İmranov (66 kiloqram), Kamran Süleymanov, Hidayət Heydərov (hər ikisi 73 kiloqram), Zelim Tçkayev, Ömər Rəcəbli (hər ikisi 81 kiloqram), Murad Fətiyev, Zelim Kotsoyev (hər ikisi 90 kiloqram) qüvvəsini sınayacaqlar.
Qadınlarda isə Könül Əliyev, Şəfəq Həmidova, Leyla Əliyeva (hamısı 48 kiloqram), Aydan Vəliyeva (52 kiloqram), Fidan Əlizadə (57 kiloqram), Südabə Ağayeva (70 kiloqram) və Mədinə Xaysinova (+78 kiloqram) tatamiyə çıxacaqlar.
Qeyd edək ki, turnir fevralın 27-dən martın 1-dək təşkil olunacaq.
11-02-2026, 22:02
Məşhur salonlar şəbəkəsinin rəhbəri bloqerin 150 minini mənimsəyib?
Tanınmış influenser Fidan Zeyn “Beautytime” salonlar şəbəkəsinin rəhbəri Könül Həmzəyeva tərəfindən dələduzluğa məruz qaldığını iddia edib.
Bu barədə bloger sosial media hesabında Baş Prokurorluq və Daxili İşlər Nazirliyinə müraciət ünvanlayıb:
“Beautytime” salonlar şəbəkəsinin rəhbəri Könül Həmzəyeva tərəfindən mən və Azerina etibarımızdan sui istifadə edilərək aldadılmışıq, nəticədə çox böyük maddi və mənəvi zərər görmüşük. 2 aydır ki, Xətai Polis İdarəsi tərəfindən araşdırılma aparılmasına baxmayaraq ciddi tədbir görülməyib, mənə vurulmuş ziyan hələ də ödənilməyib. İş üzrə obyektiv araşdırmanın aparılmasını xahiş edirik. Haqq-ədalət artıq öz yerini tapsın”.
Bloqer açıqlamasında bildirib ki, K.Həmzəyeva ilə ortaq biznes qurub:
“Könül Həmzəyeva ilə ortaq biznes qurmuşduq. Bu işə inanaraq həyətyanı sahəmi və avtomobilimi satdım, əldə etdiyim vəsaiti biznesə yatırdım. Amma sonda onun tərəfindən aldadıldım. 150 min manat vəsaitim mənimsənilib”.
DİN-in Mətbuat Xidmətinin əməkdaşı polis leytenantı Elbrus İbrahimov bildirib ki, Xətai RPİ-də istintaq araşdırmaları aparılır:
“Araşdırmalarla əmələ hüquqi qiymət veriləcəkdir”.
11-02-2026, 21:42
Birinci Qarabağ müharibəsində itkin düşmüş şəhidin nəşi 34 il sonra tapıldı
Sabirabadın Qaratəpə kənd sakini, I Qarabağ müharibəsi zamanı itkin düşən şəhid Rəsul Ağayevin nəşi tapılıb.
Şəhid R. Ağayev 1992-cı ildən etibarən itkin hesab olunurdu.
34 il sonra nəşi tapılan şəhidimiz evli idi, bir qız övladı yadigar qalmışdı. Hazırda şəhidimizin adın daşıyan Rəsul adında nəvəsi var.
Şəhid R. Ağayevin nəşinin gələn həftə doğulduğu Qaratəpə kənd qəbirstanlığında dəfn olunacağı gözlənilir.
11-02-2026, 21:34
Azərbaycanda ana 40 günlük körpəsindən İMTİNA EDİB
Gəncədə ana 40 günlük körpəsindən imtina edib.
Cinsiyyəti qız olan körpəni anası Gəncə 2 nömrəli Birləşmiş Uşaq Xəstəxanasına gətirib və ondan imtina etdiyini, körpənin körpələr evinə verilməsini istəyib.
Hazırda körpə Uşaq Xəstəxanasındadır.
11-02-2026, 21:31
Türkiyədə gözlənilməz kadr dəyişikliyi - MHP nazirdən narazı idi
Türkiyə Böyük Millət Məclisinin bugünkü iclasında Prezident Rəcəb Tayyib Ərdoğan tərəfindən imzalanmış sərəncam oxunub. Sərəncama əsasən, İstanbulun baş prokuroru Akın Gürlək ədliyyə naziri, Ərzurum valisi Mustafa Çiftçi isə daxili işlər naziri təyin olunub.
Parlament sədrinin müavini Bekir Bozdağ yeni hökumət üzvlərini and içmək üçün tribunaya dəvət edib. Lakin müxalif Cümhuriyyət Xalq Partiyası (CHP) deputatları Akın Gürləkin təyinatının Türkiyə Konstitusiyasına zidd olduğunu bildiriblər. Onların iddiasına görə, Gürlək hələ də İstanbulun baş prokuroru vəzifəsini icra edir.
Akın Gürlək and içmək üçün tribunaya yaxınlaşarkən CHP deputatları tribunaya çıxışın qarşısını almağa cəhd göstəriblər. Hakim Ədalət və İnkişaf Partiyası (AK Parti) deputatları buna mane olub. Nəticədə parlament üzvləri arasında qarşıdurma və itələşmə baş verib. Daha sonra hakim partiyanın deputatları tribunaya zəncirvari düzülərək andiçmə prosesinin davam etməsini təmin ediblər.
Xatırladaq ki, fevralın 10-da imzalanmış prezident sərəncamına əsasən, Yılmaz Tunçun yerinə Akın Gürlək ədliyyə naziri, Əli Yerlikayanın yerinə isə Mustafa Çiftçi daxili işlər naziri təyin edilib. Sərəncamda Tunç və Yerlikayanın öz istəkləri ilə istefa verdiyi bildirilsə də, kabinetdə dəyişikliklər siyasi kursda mümkün yenilənmələrlə bağlı müzakirələri gücləndirib.
CHP bəyan edib ki, hər iki yeni nazir “sərt xətt” tərəfdarı kimi tanınır və prezidentin qərarına etiraz edib. Xüsusilə Akın Gürlək 2024-cü ilin oktyabrında İstanbul prokuroru təyin olunduqdan sonra CHP-nin nəzarətində olan bələdiyyələrə, o cümlədən İstanbul meri Ekrem İmamoğluya qarşı korrupsiya araşdırmalarına başlamışdı. O, həmçinin çirkli pulların yuyulması, maliyyə cinayətləri, narkotik və fahişəlik şəbəkələri ilə bağlı əməliyyatlarla gündəmə gəlmişdi. Daha əvvəl onun Ərdoğanla görüşdüyü və ədliyyə naziri postuna təyinatının zaman məsələsi olduğu bildirilirdi.
Siyasi dairələrdə daxili işlər naziri vəzifəsinə mümkün namizədlər arasında İstanbul valisi Davud Gülün adı çəkilsə də, nəticədə Ərzurum valisi Mustafa Çiftçi təyin olunub. "Haqqin.az" saytında dərc edilən xəbərdə bildirilir ki, əvvəlki daxili işlər naziri Əli Yerlikayanın fəaliyyəti Milliyətçi Hərəkat Partiyasının (MHP) rəhbərliyini tam qane etmirdi. Xüsusilə nazirlik daxilində aparılan kadr dəyişiklikləri narazılıq doğurmuşdu. Mətbuatda yayılan məlumatlarda bildirilirdi ki, Yerlikaya strukturlarda MHP-yə yaxın hesab olunan bəzi bürokratları vəzifədən uzaqlaşdırıb və ya onların təsir imkanlarını məhdudlaşdırıb. Bu isə koalisiya daxilində gərginlik yaradıb.
MHP-nin bir hissəsinin keçmiş daxili işlər naziri Süleyman Soylunun yenidən bu posta qayıtmasını istədiyi barədə də iddialar səslənirdi. Soylu MHP elektoratı və milliyyətçi çevrələr arasında sərt təhlükəsizlik siyasəti ilə tanınır və partiya bazasında müəyyən simpatiyaya malikdir. Lakin siyasi reallıqlar və Prezidentin qərarı nəticəsində bu ssenari baş tutmayıb.
Nəticədə Ərzurum valisi Mustafa Çiftçinin namizədliyi üzərində dayanılıb. Məlumatlara görə, MHP Çiftçinin təyinatına açıq etiraz etməyib və onu qəbulolunan kompromis fiqur kimi dəyərləndirib. Mustafa Çiftçi Ankara Universitetinin siyasi elmlər fakültəsinin məzunudur və konservativ mövqeyi ilə tanınır. O, Türkiyə Respublikasının ilk illərində mübahisəli İstiqlal Məhkəmələrinin qərarı ilə edam edilmiş İskilipli Atıf Hocanın anım mərasimində iştirakı səbəbilə kemalist dairələrin tənqidinə məruz qalmışdı.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!