11-02-2026, 21:25
Hakim etiraz etdi: “Atanı qolu qandallı göstərməyin uşağa”
"Bakı Apellyasiya Məhkəməsində iştirak etdiyim cinayət işi üzrə bir iclasda unudulmaz bir an yaşadım".
Bunu vəkil Zaur Saadov bildirib.
O qeyd edib ki, bu gün iştirak etdiyi məhkəmə prosesindən birinə təqsirləndirilən şəxsin azyaşlı qızı da gəlib. Hakim Əli Məmmədov bunu görən kimi valideynə irad bildirib və uşağın zaldan çıxarılmasını tələb edib.
"Sonda isə hakim elə bir cümlə dedi ki, vəkillik fəaliyyətimdə eşitdiyim ən təsirli sözlərdən biri oldu. O dedi: "Hər ata övladı üçün bir qəhrəmandır. Atanı qolu qandallı uşağa göstərməklə onun qəhrəmanını öldürməyin"", - Z.Saadov qeyd edib.
"Bəzən biz hüquqşünaslar qanunlar arasında insan faktorunu unuduruq. Amma unutmayaq ki, məhkəmə zalında təkcə təqsirləndirilən, zərərçəkmiş və vəkil olmur, orada bir ailə, bir övladın dünyası, bir uşağın gələcək psixologiyası da olur. Qanun ədaləti təmin etməlidir. Amma ədalət yalnız cəza ilə ölçülmür. Ədalət bəzən bir uşağın qəlbini də qorumaqdan ibarətdir. Bir daha anladım ki, hakim kürsüsündə oturmaq təkcə hüquqi bilik deyil, həm də vicdan məsuliyyətidir", - deyə vəkil əlavə edib.
11-02-2026, 21:16
Rusiya müharibədə 1,3 milyon hərbçi itirib
Rusiya Ukraynaya qarşı genişmiqyaslı müharibə başlayandan bəri təxminən 1,3 milyon hərbçi itirib. Onlardan 350 minə yaxını həlak olub.
Bu rəqəmlər fevralın 11-də Brüsseldə, NATO-nun mənzil-qərargahında keçirilən brifinqdə açıqlanıb.
Rəsmisinin iddiasına görə, təkcə 2025-ci ildə Rusiya ordusu 400 minə yaxın ölü və yaralı verib.
NATO nümayəndəsi rus itkiləri arasında həlak olanların payının qeyri-adi dərəcədə yüksək olduğunu bildirib. Onun sözlərinə görə, bu, döyüş əməliyyatlarında pilotsuz uçuş aparatlarının geniş tətbiqi, cəbhədə tibbi təminatın zəifliyi və böyük canlı qüvvə itkisi tələb edən taktikalardan istifadə ilə bağlıdır.
Rəsmi Ukrayna ordusunun itkilərinə dair konkret rəqəm açıqlamayıb. Lakin ümumilikdə münaqişədə ölən və yaralananların sayının 2,2 milyondan çox olduğunu deyib.
Hazırda cəbhə xəttində Rusiyanın təxminən 700 min, Ukraynanın isə 400 min hərbçisi olduğu qeyd edilib. NATO nümayəndəsi bildirib ki, 7-nin 4-ə nisbəti genişmiqyaslı hücum üçün ənənəvi hesab olunan 3-ün 1-ə nisbətindən uzaqdır.
Eyni zamanda vurğulanıb ki, Ukrayna şəxsi heyətin səfərbər olunması və saxlanması baxımından çətinliklər yaşayır. Rusiya isə hələ də cəbhəyə göndərə biləcəyi daha geniş insan resurslarına malikdir.
Digər yüksək vəzifəli NATO rəsmisi bildirib ki, Rusiya ordusuna Baxmutdan Pokrovska qədər 50 kilometrdən az məsafəni qət etmək üçün 20 aydan çox vaxt lazım olub. Bu, gündə 100 metrdən də az irəliləyiş deməkdir və həmin müddətdə Rusiya 300 min ölü və yaralı verib.
Alyans yaxın bir il yarım ərzində Donetsk vilayətində cəbhə xəttinin çökməsini gözləmir. Bununla belə, rəsmilər daha uzaq perspektiv üçün proqnoz verməyin çətin olduğunu bildiriblər.
11-02-2026, 21:02
Türkiyənin Ermənistanla sərhəddində 3 nəfər ölüb
Türkiyənin Ermənistanla sərhəddə yerləşən Amasya vilayətinin Suluova bölgəsində yerləşən bioqaz zavodunda çalışan üç işçi metan qazından zəhərlənib.
Bu barədə Türkiyənin Fəlakətlərin İdarə olunması və Təcili Yardım İdarəsi (AFAD) məlumat yayıb.
Onlar xəstəxanaya çatdırılsa da, həyatlarını xilas etmək mümkün olmayıb.
Hadisə ilə bağlı araşdırma başlanıb.
11-02-2026, 20:54
Azərbaycan Prezidenti nüfuzlu dünya lideridir - VENS
Azərbaycana səfər etdiyim üçün çox şadam.
Bunu Azərbaycana səfərini başa vuran ABŞ-ın Vitse-prezidenti Ceyms Devid Vens aeroportda jurnalistlərə açıqlamasında bildirib.
O, Azərbaycan Prezidenti ilə bir sıra əhəmiyyətli məsələləri müzakirə etdiyini diqqətə çatdırıb.
Vens ABŞ Prezidenti Donald Trampın liderliyi sayəsində Cənubi Qafqazda müharibə əvəzinə əmin-amanlığın olacağına, ticarətin aparılacağına diqqət çəkib.
ABŞ-ın Vitse-prezidenti Azərbaycana səfərini möhtəşəm adlandırıb və bunun üçün Prezident İlham Əliyevə təşəkkür edib.
Azərbaycan Prezidentini nüfuzlu dünya lideri adlandıran Vens dövlət başçısı ilə regional və qlobal məsələləri, eyni zamanda, terrorla mübarizəni müzakirə etdiyini vurğulayıb.
“Beləliklə, bu, əla bir səfər idi”, - Vens əlavə edib.
11-02-2026, 20:51
Lənkəranda dəhşətli hadisə: "Yalvarsa da zərbələri davam etdirdim"
Lənkəran rayonunda 1976-cı il təvəllüdlü Sərhad həyat yoldaşı Leylanı (adlar şərti verilib - red.) öldürməyə cəhd edib.
2004-cü ildə o, rəsmi nikaha girərək birgə yaşadığı, 2023-cü ilin iyun ayından isə faktiki ayrı qaldığı arvadı Leylanın barışmamasını və onu evə buraxmamasını özü üçün qəbuledilməz sayıb, qadını öldürmək qərarına gəlib.
Niyyətini həyata keçirmək üçün Sərhad 2025-ci il fevralın 5-də saat 23:30-da Leylanın yaşadığı evin qarşısına gəlib, onun işə getmək üçün evdən çıxmasını gözləyib. Fevralın 6-da gecə saat 00:30-da qadın evdən çıxaraq gecə növbəsinə işə gedən vaxt ona yaxınlaşıb və bıçaqla zərbələr vurub.
Ümumilikdə altı zərbə alan qadının hərəkətsiz vəziyyətdə yerdə qalmasını görən ər onun öldüyünü zənn edib və hadisə yerindən uzaqlaşıb.
Leyla qonşular tərəfindən Lənkəran rayon mərkəzi xəstəxanasına çatdırılıb, ona ixtisaslı tibbi yardım göstərilməsi nəticəsində həyatı xilas olub.
İstintaq orqanı tərəfindən Sərhadın barəsində Cinayət Məcəlləsinin 29,120.2.2 (xuliqanlıq niyyəti ilə adam öldürməyə cəhd), 29,120.2.4 (xüsusi amansızlıqla və ya təhlükəli üsulla adam öldürməyə cəhd) və 134-cü (öldürməklə və ya sağlamlığa ağır zərər vurmaqla hədələmə) maddələri ilə ittiham elan edilib.
Sərhad ittiham üzrə özünü qismən təqsirli bilib. İfadəsində göstərib ki, 2004-cü ildə bibisi qızı Leyla ilə rəsmi qaydada nikaha daxil olub:
"Mən ustalıq etməklə və müxtəlif fərdi işlərlə məşğul olmaqla pul qazanıb ailəmi dolandırmışam. 2023-cü ilin yay aylarında ailəmdə yaranmış narazılıqlar ucbatından Lənkəran rayonunun kəndindəki evimdən çıxdım. Usta kimi gah Bakı, gah Lənkəran şəhərində, gah da Rusiyaya gedərək işləmişəm".
Təqsirləndirilən şəxs qeyd edib ki, məlum hadisədən 1 ay 15 gün əvvəl Rusiyadan qayıdıb:
"Lənkəran şəhərində əvvəllər birlikdə işlədiyim usta tanışım Elməddinin yanında kirayədə qalmağa başladım. Kənddə özüm tikdiyim və arvadımın adına olan evə qayıtmaq istədim. Hadisədən təxminən bir həftə əvvəl evə gedərək ondan məni bağışlamasını və evimə buraxmasını xahiş elədim. O, məni görmək istəmədiyini bildirdi. Mən də məcbur qalaraq axşam yatmaq üçün dostum Elməddinin evinə gedirdim. Bu vəziyyətdən əsəbiləşirdim".
Sərhadın ifadəsinə görə, sonuncu dəfə fevralın 5-də evinin qarşısına gəlib və gözləməyə başlayıb: "Özümlə mətbəx bıçağı da götürmüşdüm. Leylanın çörək zavodunda işlədiyini və gecəyarısı işə getdiyini bilirdim. Saat 23:30-da ailəmin yaşadığı evin yaxınlığında küçədə gözləməyə başladım.
Fevralın 6-da gecə saat 00:15-də Leyla evdən çıxdı. Bıçaqla Leylanın qarın nahiyəsinə bir zərbə endirdim. O əyildi, bu zaman bel və kürək nahiyələrinə daha bir neçə zərbə endirdim. Ona "bu həyatı yaşamağımızı istəyirdin?" dedim. Leyla onu öldürməməyim üçün yalvarsa da, zərbələri davam etdirdim. Onun yerdə hərəkətsiz qaldığını görəndə öldüyünə əmin oldum və hadisə yerindən uzaqlaşdım".
Təqsirləndirilən şəxs qeyd edib ki, səhər saatlarına kimi Lənkəran şəhərində küçələrdə gəzib, nə etdiyini anlaya bilməyib:
"Səhər açılanda Elməddinlə birgə qaldığım evə getdim. Orada heç kim yox idi. Gecə bərk yağış yağdığından üstüm tamam islanmışdı. Sobanın yanında paltarlarımı qurutduqdan sonra Lənkəran şəhərinə çıxdım. Çayxanada çay içdim, yemək yedim. Fevralın 7-də Yardımlı rayonuna, doğulduğum kəndə getdim, ora çatdıqda anamın və qardaşımın artıq Leylanı bıçaqladığımı bildiklərini öyrəndim. Yuyunub əynimi dəyişəndən sonra polis əməkdaşları məni Yardımlı Rayon Polis Şöbəsinə çağırdılar. Lənkəran Şəhər Polis Şöbəsinin əməkdaşları isə məni oradan Lənkərana gətirdilər".
Zərərçəkmiş Leylanın sözlərinə görə, dayısı oğlu Sərhadla evlilikdən iki övladı var:
"Sərhadla qohumluğum olduğuna görə onun mənə və ailəmə göstərdiyi şiddətə göz yummuşam. 2023-cü ilin iyun ayında polisə müraciət etdim. Sərhad həmin hadisədən sonra evdən getdi. O, bir neçə dəfə barışmaq üçün evə gəlsə də, mən bununla razılaşmadım. Çünki Sərhadın xasiyyətinin düzələn olmadığını bilirdim.
Hadisədən təxminən on gün əvvəl yaşadığımız evə gəlib həyətdə torpaq bellədi. Mən yenə də onu dindirmədim".
Zərərçəkmiş qeyd edib ki, Sərhad yenə də evə qayıtmasına razılıq istəyib: "Mən isə uşaqların ondan qorxduqlarını dedim. Fevralın 6-da gecə evdən çıxaraq çörək zavoduna tərəf getməyə başladım. Qapıdan çıxarkən Sərhadı evimizin qarşısında görmüşdüm. Bu səbəbdən yolumu dəyişərək kəndin içindəki küçə ilə getməyə başladım. Evdən bir qədər uzaqlaşandan sonra geriyə baxanda gördüm ki, Sərhad arxamca gəlir. O yaxınlaşanda "məndən qaçırsan?" deyib cibindən bıçaq çıxardı, qarnıma bir zərbə endirdi. Sol əlimi bıçağa atdım, əlimin içərisi kəsildi. Sərhad daha iki dəfə qarnıma bıçaqla zərbə endirdi, sonra oradan qaçdı.
Qışqırıq səsimə atamın əmisi oğlu Eldar, onun övladı Fuad və qonşuluqda yaşayan Şaiq gəldilər. Onlar yoldan keçən taksini saxlatdılar və məni Lənkəran Rayon Mərkəzi Xəstəxanasına gətirdilər".
Lənkəran Ağır Cinayətlər Məhkəməsinin hökmü ilə Sərhad 15 il müddətə azadlıqdan məhrum edilib.
Təqsirləndirilən şəxsin müdafiəçisi hökmdən apellyasiya şikayəti verib.
Şirvan Apellyasiya Məhkəməsinin qərarı ilə təqsirləndirilən şəxsin cəzası 10 il 6 aya endirilib.
11-02-2026, 20:40
Zelenski ABŞ-la Rusiya arasında yeni danışıqları təsdiqləyib
Ukrayna Prezidenti Volodimir Zelenski ABŞ-ın münaqişənin həlli üçün Rusiya ilə danışıqların növbəti mərhələsini təşkil etmək təklifini qəbul etdiyini açıqlayıb.
Yeni müzakirələr gələn həftənin əvvəlində — fevralın 17-si və ya 18-i baş tuta bilər.
Gündəmdə əsas məsələ ABŞ-ın Donbas ərazisində azad iqtisadi zona yaradılması təşəbbüsü olacaq. Zelenski bildirib ki, həm Kiyev, həm də Moskva bu ideyaya ehtiyatla yanaşır.
“Tərəflərdən heç biri azad iqtisadi zona ideyasını tam dəstəkləmir — nə ruslar, nə də biz. Fikir ayrılıqlarımız var,” — deyə Ukrayna lideri əlavə edib.
Hazırda Rusiyanın ABŞ-a nümayəndə göndərib-göndərməyəcəyi hələ dəqiq məlum deyil. Ötən mərhələdəki məsləhətləşmələr BƏƏ-də həyata keçirilib.
11-02-2026, 20:16
Gəncədə 20 yaşlı oğlanı döyüb, kəsici alətlə xəsarət yetiriblər
Gəncə sakininə kəsici-deşici alətlə xəsarət yetirilib.
Hadisə şəhər ərazisində qeydə alınıb.
Belə ki, 2006-cı il təvəllüdlü C. Əliyev kəsici alətdən aldığı yara ilə xəstəxanaya çatdırılıb.
Ona ilkin tibbi yardım edilib, vəziyyətinin orta-ağır olduğu bildirilir.
Məlumata görə, C.Əliyev döyülüb, daha sonra kəsici-deşici alətə ona xəsarət yetirilib.
Hadisənin hansı səbəbdən baş verdiyi məlum deyil.
Faktla bağlı araşdırma aparılır.
11-02-2026, 19:47
Sosial şəbəkələrdə hədə-qorxu ilə pul tələb edən şəxs saxlanılıb
Sosial şəbəkələrdə hədə-qorxu ilə pul tələb edən şəxs saxlanılıb.
Qaradağ rayonunda 38 yaşlı qadın polisə müraciət edərək sosial şəbəkələrdə tanış olduğu şəxsin onun barəsində rüsvayedici məlumatlar yayacağı ilə hədə-qorxu gəldiyini və müxtəlif vaxtlarda ondan 800 manatı aldığını bildirib.
Qaradağ Rayon Polis İdarəsinin əməkdaşlarının keçirdikləri tədbirlərlə hədə-qorxu yolu ilə tələb etməkdə şübhəli bilinən 23 yaşlı E.Quluzadə müəyyən olunaraq saxlanılıb.
Faktla bağlı araşdırma aparılır.
11-02-2026, 19:19
İlhamə Elşadqızı barəsində olan hökmdən şikayət etdi
Sosial şəbəkələrdə özünü şairə kimi təqdim edən və barəsində cinayət məcəlləsinin 234.1.1-ci (satış məqsədi olmadan külli miqdarda qanunsuz narkotik vasitələr və ya psixotrop maddələri saxlama və ya daşıma) maddəsi ilə ittiham edilərək barəsində hökm çıxarılan İlhamə Elşadqızı birinci instansiya m əhkəməsinin qərarından kassasiya şikayəti verib.
Kassasiya şikayətinə Ali Məhkəmədə hakim Hafiz Nəsibovun sədrliyi ilə keçirilən prosesdə baxılacaq.
Məhkəmənin ilk hazırlıq iclası fevralın 20-də keçiriləcək.
Qeyd edək ki, İlhamə Elşadqızı Bakı Ağır Cinayətlər Məhkəməsinin hakimi Anar Sadıqovun sədrliyi ilə yekun prosesdə 3 il müddətinə azadlıqdan məhrum edilmişdi.
Birinci instansiyanın qərarından apellyasiya şikayəti verilsə də, Bakı Apellyasiya Məhkəməsi Bakı Ağır Cinayətlər Məhkəməsinin hökmünü qüvvədə saxlamışdı.
Xatırladaq ki, İlhamə Elşadqızı "TikTok" əməliyyatları çərçivəsində saxlanılaraq barəsində həbs qətimkan tədbiri seçilib. O, aparıcı Azər Zahid tərəfindən "TikToker"lərin iştirakı ilə təşkil olunan yarışmalarda iştirakçı olub.
11-02-2026, 19:11
Paşinyan: "Metsamor AES-in istismar müddəti 2046-cı ilə qədər uzadıla bilər"
“Hazırda Ermənistan Metsamor Atom Elektrik Stansiyasının istismar müddətinin 2036-cı ilə qədər uzadılması prosesindədir. Bundan sonra isə onun fəaliyyət müddətinin daha 10 il artırılması gözlənilir”.
Bunu hökumət saatı çərçivəsində parlamentdə çıxışı zamanı Ermənistanın Baş naziri Nikol Paşinyan bildirib.
“Hazırda biz Metsamor Atom Elektrik Stansiyasının istismar müddətinin 2036-cı ilə qədər uzadılması prosesindəyik. Bundan sonra isə onun fəaliyyət müddətinin daha 10 il – yəni 2046-cı ilə qədər uzadılması nəzərdə tutulur”, – deyə Paşinyan qeyd edib.
Onun sözlərinə görə, bu müddət ərzində hökumət yeni atom elektrik stansiyasının tikintisi ilə bağlı qərar qəbul etməlidir. Ermənistan yeni nüvə reaktoru məsələsini Rusiya, ABŞ, Fransa, Çin və Cənubi Koreya ilə müzakirə edir.
“Biz bu məsələni bütün tərəfdaşlarımızla müzakirə edirik. Bu qərar strateji əhəmiyyət daşıyır. Qərar qəbul edərkən əmin olmalıyıq ki, hansı təklif Ermənistan Respublikasının maraqlarına daha uyğundur”, – deyə baş nazir vurğulayıb.
Onun sözlərinə görə, atom energetikası bazarının keyfiyyətli və dəqiq araşdırılması problemi mövcuddur. Hazırda Metsamor AES-də istehsal olunan elektrik enerjisinin tarifi Ermənistanın enerji sistemində ən aşağı səviyyədədir.
Qlobal tendensiyalara toxunan Paşinyan bildirib:
“Mövcud qiymətləndirmələrə görə, hazırda məlum olan nüvə yanacağı ehtiyatları təxminən 70 il üçün kifayətdir. Bu isə o deməkdir ki, 40 ildən sonra atom enerjisinin 1 kVt·saatının neçəyə başa gələcəyini hesablamaq lazımdır. Burada iqtisadi məqsədəuyğunluq məsələsi də ortaya çıxır. Sual ondan ibarətdir ki, qiymət necə olacaq?”
O vurğulayıb ki, atom elektrik stansiyasının tikintisi üçün qoyulan investisiyaların geri qaytarılmasını təmin edən iqtisadi-maliyyə modeli hazırlanmalıdır. Ermənistanı qərarın tez qəbuluna təşviq edən tərəfdaşlar da var.
“Bütün hörmətlə yanaşı, biz bütün bu məqamları dərindən anlamalıyıq. Tutaq ki, 4–6 milyard dollar sərmayə qoyduq, atom elektrik stansiyası tikdik və uranın qiyməti 4–5, hətta 10 dəfə artdı. Nüvə yanacağının qiyməti yüksəlməyə başlasa, bu, layihənin iqtisadi səmərəliliyinə necə təsir edəcək?” – deyə Paşinyan bildirib.
Baş nazir qeyd edib ki, bunlar geniş və detallı müzakirə tələb edən ciddi məsələlərdir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!