26-02-2026, 23:53
Körpə 10-cu mərtəbədən yıxıldı, sağ qaldı
Sankt-Peterburq şəhərində yaşayış binasının 10-cu mərtəbəsindən yıxılan 18 aylıq körpə ətrafdakı şəxslərin cəld reaksiyası sayəsində xilas edilib.
Hadisə zamanı pəncərəyə çıxan körpənin yıxılmaq üzrə olduğunu görən sakinlər binanın qarşısına toplaşıb. Onlardan biri montunu açaraq körpənin yerə sərt çırpılmasının qarşısını alıb. Körpə xəstəxanaya yerləşdirilib və nəzarət altındadır.
İlkin məlumata görə, hadisə baş verən vaxt ana hamamda olub, evdəki digər uşaq isə kompüterdə oyun oynayırmış. Faktla bağlı araşdırma başlanıb.
26-02-2026, 23:50
Epşteynin şəbəkəsinin İngiltərə bağlantıları
ABŞ-li milyarderin qurduğu və azyaşlı qızların cəlb olunduğu fahişəlik şəbəkəsi ilə əlaqəli qadınların, onun 2019-cu ildə həbsinədək Böyük Britaniya hava limanlarından istifadə edərək müxtəlif ölkələrə səfər etdikləri müəyyənləşib.
Bu barədə The Times uçuş qeydlərinə əsasən məlumat yayıb.
Məlumata görə, Epşteynin şəxsi təyyarəsi 60-dan çox Britaniya hava limanına eniş edib. O, pedofiliya ittihamı ilə saxlanılanadək şəbəkədə yer alan qadınların Böyük Britaniya üzərindən müntəzəm reyslərlə uçuşlarını təşkil edib.
Qeyd olunan məntəqələr arasında Londranın qərbində yerləşən RAF Northolt hərbi hava bazası da var. Faktlarla bağlı altı müxtəlif polis qurumu araşdırma aparıb.
Bildirilib ki, 2019-cu ilin iyulunda bir rus qadın London–Nyu-York marşrutu üzrə uçuş həyata keçirib və onun üçün Epsteinin köməkçisi Lesli Qeff tərəfindən ləğv edilə bilən otel rezervasiyası edilib.
Epşteynin şəxsi təyyarəsinin 2015-ci ilin mayında Northolt bazasına enərək yanacaq götürdüyü, onun Londona əsasən London Luton Airport vasitəsilə daxil olduğu qeyd olunur.
26-02-2026, 23:12
İsrail “Hizbullah” mövqelərini vurdu
İsrail ordusu Livan ərazisində “Hizbullah”ın Radvan Xüsusi Təyinatlı Qüvvələrinə aid olduğu bildirilən səkkiz hərbi düşərgəni hədəf alıb.
Bu barədə İsrail ordusunun Mətbuat Xidməti açıqlama yayıb.
Məlumata görə, zərbələr Baalbek bölgəsində endirilib. Bildirilir ki, hədəfə alınan düşərgələrdə “Hizbullah”a məxsus raketlər də daxil olmaqla xeyli sayda silah-sursat saxlanılıb. İsrail tərəfi iddia edir ki, Radvan qüvvələri həmin məntəqələrdən təlim, döyüş hazırlığı və həm hərbçilərə, həm də mülki şəxslərə qarşı hücumların planlaşdırılması məqsədilə istifadə edib.
26-02-2026, 23:02
Ramazanın 9-cu gününün duası - İmsak və iftar vaxtları
Sabah Ramazan ayının doqquzuncu günüdür.
İmsak vaxtı 05:53-ə, iftar isə 18:43-ə təyin olunub.
Doqquzuncu günün imsak duası:
“Allahumməc-əl li fihi nəsibən min rəhmətikəl-vasiə. Vəhdini fihi libərahinikəs-satiə. Və xuz binasiyəti ila mərzatikəl-camiə. Biməhəbbətikə ya əmələl- müştaqin”.
Tərcüməsi:
“İlahi, bu gün öz bol rəhmətini mənə nəsib et. Məni öz parlaq dəlillərinlə istiqamətləndir. Məni sənin razılığına bais olan və hər cür xeyri özündə cəm edən əməllərə doğru çək. Məhəbbətinə and verirəm, ey şövqlülərin istəyi!”
İftar duası:
“Allahummə ləkə sumtu və əla rizqikə əftərtu və əleykə təvəkkəltu. Bismillahir-Rəhmanir-Rəhim. Ya vasiəl-məğfirəti iğfirli”.
Tərcüməsi:
“İlahi, səndən ötrü oruc tutdum, sənin verdiyin ruzi ilə iftar açdım və sənə təvəkkül etdim. Bağışlayan və mehriban Allahın adı ilə. Ey hüdudsuz bağışlama sahibi, mənim günahlarımı bağışla!”
Allah orucunuzu qəbul etsin!
26-02-2026, 22:53
Sərhəddə əməliyyat: 22 Taliban üzvü öldürüldü - YENİLƏNİB
Pakistan–Əfqanıstan sərhədində baş verən qarşıdurmalar nəticəsində azı 22 “Taliban” üzvü zərərsizləşdirilib.
Geo News hüquq-mühafizə orqanlarındakı mənbələrə istinadən bildirib ki, Pakistan təhlükəsizlik qüvvələri sərhəddə Talibanın başladığı əməliyyata cavab olaraq “Ghazab-lil-haqq” adlı əməliyyata start verib.
Mənbələrin sözlərinə görə, əməliyyat zamanı silahlılar arasında itkilər qeydə alınıb.
22:10
Pakistan və Əfqanıstan hərbçiləri arasında sərhəddə silahlı insidentlər baş verib.
Qarşıdurmalar Əfqanıstanın Pakistanla həmsərhəd olan Nanqarhar, Nuristan, Kunar, Xost, Paktia və Paktika əyalətlərində qeydə alınıb. Atışmaların əsasən Durand xətti ətrafında davam etdiyi bildirilir.
Hadisə ilə bağlı tərəflərdən mümkün itkilər barədə hələlik rəsmi açıqlama verilməyib.
26-02-2026, 22:26
Direktorların işə qəbulu üzrə elektron qeydiyyat başlayır
27 fevral 2026-cı il saat 11:00-dan etibarən direktor vəzifəsi vakant olan 69 dövlət ümumi təhsil müəssisələrinə direktorların işə qəbulu prosesinin elektron sənəd qəbulu mərhələsinə start veriləcək. Namizədlər 6 mart 2026-cı il saat 17:00-dək //miq.edu.az/direktor linkinə daxil olaraq elektron qeydiyyatdan keçə bilərlər.
Bu barədə Məktəbəqədər və Ümumi Təhsil üzrə Dövlət Agentliyi məlumat yayıb.
Bildirilib ki, proses Elm və Təhsil Nazirliyi tərəfindən mərkəzləşdirilmiş qaydada proqram təminatı vasitəsilə müsabiqə yolu ilə həyata keçirilir. Müsabiqə seçim və müsahibə mərhələsindən ibarət olacaq.
Seçim mərhələsində namizədlərin təqdim etdiyi məlumatlar və sənədlərin düzgünlüyü yoxlanıldıqdan sonra namizədlər müsabiqənin müsahibə mərhələsinə buraxılacaqlar. Sistem üzərindən təqdim edilən vakant yerlər 20.02.2026-cı il tarixinə olan məlumatlara istinad edir.
Namizədlər müsahibə mərhələsinə qaydalara müvafiq olaraq ardıcıllıq əsasında dəvət olunacaqlar.
Müsahibə mərhələsi Elm və Təhsil Nazirliyi tərəfindən yaradılmış müvafiq komissiyalar tərəfindən keçiriləcək.
Namizədlər müsahibədə liderlik və strateji idarəetmə, pedaqoji və tədris, idarəçilik və təşkilatçılıq, ünsiyyət və əlaqə, problemlərin həlli və qərarvermə, rəqəmsal və texnoloji, eləcə də sosial və emosional bacarıqları üzrə qiymətləndiriləcəklər.
Hər bir namizəd nəticələrlə “Şəxsi səhifə” vasitəsilə tanış ola biləcək.
Müsabiqədən müvəffəqiyyətlə keçmiş namizədlərlə əmək münasibətləri qanunvericilikdə müəyyən olunmuş qaydada rəsmiləşdiriləcək.
26-02-2026, 21:32
Tələbələrin şəkillərini yayan şəxs SAXLANILIB
Tələbələrin fotolarını yayan şəxsi Kibercinayətkarlıqla Mübarizə Baş İdarəsinin saxladı.
Bu barədə Daxili İşlər Nazirliyinin Mətbuat Xidməti məlumat yayıb.
Bildirilib ki, BDU-nun hüquq fakültəsinin tələbələrinin görüntülərindən istifadə edilərək hazırlanmış təhqiramiz foto və videomaterialları sosial şəbəkələrdə yayan şəxs DİN-in Kibercinayətkarlıqla Mübarizə Baş İdarəsinin (KMBİ) əməkdaşları tərəfindən keçirilən tədbirlərlə müəyyən edilərək saxlanılıb.
26-02-2026, 21:12
Cəriməsi olana kredit verilməyəcək?
Son dövrlərdə maliyyə intizamı ilə yanaşı, vətəndaşların ümumi davranış göstəricilərinin də kredit riskinin qiymətləndirilməsində nəzərə alınması məsələsi gündəmə gəlir. Xüsusilə yol hərəkəti qaydalarını davamlı şəkildə pozan sürücülərin bank xidmətlərinə çıxışının məhdudlaşdırılması ideyası müzakirə mövzusudur.
Bu barədə iqtisadçı Natiq Cəfərli təşəbbüsün tamamilə əsassız yanaşma olduğunu deyib.
“Yol hərəkəti qaydalarının pozulmasının kredit almaqla nə əlaqəsi var? Bunlar tamamilə fərqli sahələrdir. Dünyanın heç bir ölkəsində bank-maliyyə münasibətləri inzibati xətalarla bu formada əlaqələndirilmir. Kredit verilməsi maliyyə intizamı və öhdəliklərin icrası ilə bağlı məsələdir. Bankdan kredit götürməyin əsas və yeganə meyarı kredit tarixçəsidir. Əgər şəxsin əvvəlki öhdəlikləri vaxtında yerinə yetirilibsə, gecikmələr yoxdursa və maliyyə intizamı yüksəkdirsə, ona kredit verilməsi üçün əsas var. Əksinə, kredit tarixçəsi zəif olan şəxslər üçün risk dərəcəsi artır və banklar bunu nəzərə alır. Bir çox xarici ölkələrdə yaxşı kredit tarixçəsinə malik şəxslərə daha aşağı faiz dərəcələri, daha uzunmüddətli ödəniş imkanları və əlavə güzəştlər təqdim olunur. Yəni maliyyə bazarında fərqləndirici amil yol hərəkəti qaydaları deyil, məhz maliyyə davranışıdır”.
İqtisadçı Natiq Cəfərli yol hərəkəti qaydalarını pozan sürücülərə kredit verilməməsi təklifinə sərt reaksiya verib. O bildirib ki, sürücünün intizamı ilə bank öhdəlikləri arasında heç bir məntiqi əlaqə yoxdur. Ekspertin fikrincə bankların əsas meyarı vətəndaşın maliyyə tarixçəsi olmalıdır.
Dünya təcrübəsində də belə bir yanaşmanın olmadığını deyən Natiq Cəfərli vurğulayıb ki, inzibati xətalarla maliyyə münasibətlərini qarışdırmaq yanlışdır. O qeyd edib ki, əsas meyar vətəndaşın əvvəlki borclarını necə ödəməsidir və bu qayda beynəlxalq praktikaya uyğun olaraq saxlanılmalıdır.
“Əgər məqsəd vətəndaşların məsuliyyətini artırmaqdırsa, bunun üçün ayrıca hüquqi mexanizmlər mövcuddur. Kredit sistemini digər sahələrlə qarışdırmaq düzgün deyil. Hesab edirəm ki, ölkəmizdə də beynəlxalq praktikaya uyğun olaraq kredit tarixçəsi əsas meyar kimi qalmalıdır”, – deyə o əlavə edib.
26-02-2026, 20:55
Zelenski Hersoqla sanksiyaları müzakirə etdi
Ukrayna Prezidenti Volodimir Zelenski İsrail Prezidenti İsxak Hersoq ilə təhlükəsizlik zəmanətləri və İrana qarşı sanksiyalar məsələsini müzakirə edib.
Zelenski BMT Baş Assambleyasında Rusiyanın genişmiqyaslı hücumunun dördüncü ildönümü ilə bağlı qətnaməyə görə İsrailə təşəkkür edib və müharibənin dayandırılması, Ukraynaya etibarlı təhlükəsizlik zəmanətlərinin verilməsinin vacibliyini vurğulayıb.
O bildirib ki, terrora dəstək verən heç bir qüvvə cəzasız qalmamalıdır. Zelenski İranın Rusiyaya “Shahed” tipli pilotsuz uçuş aparatları verməsini xatırladaraq, rəsmi Tehranın addımlarını diqqətlə izlədiklərini qeyd edib.
26-02-2026, 20:26
ABŞ-nin İrana qarşı əsas tələbləri AÇIQLANDI
ABŞ-ın İrana Cenevrə danışıqlarında irəli sürdüyü tələblər məlum olub.
“The Wall Street Journal” nəşrinin amerikalı rəsmilərə istinadən yaydığı məlumata görə, Vaşinqton Tehrandan Fordo, Natanz və İsfahan şəhərlərində yerləşən üç əsas nüvə obyektinin ləğvini tələb edir. Bundan əlavə, ABŞ İranın zənginləşdirilmiş uran ehtiyatlarının tam şəkildə Amerika nəzarətinə verilməsində israrlıdır.
Məlumata əsasən, ABŞ tərəfi uranın sıfır səviyyədə zənginləşdirilməsi prinsipini əsas şərt kimi irəli sürüb. Bununla yanaşı, danışıqlar aparan nümayəndə heyəti tibbi məqsədlər üçün aşağı səviyyəli zənginləşdirmə aparılması məqsədilə Tehrandakı reaktorun yenidən işə salınmasını müzakirə etməyə hazır olduğunu bildirib.
Vaşinqton mümkün razılaşmanın müddətsiz olmasını istəyir. Sanksiyaların isə ilkin mərhələdə minimal şəkildə yumşaldılması, sonradan isə əlavə güzəştlərin mümkünlüyü nəzərdə tutulur.
WSJ yazır ki, İran tərəfi uranın zənginləşdirilməsinin uzunmüddətli dayandırılmasını və ya prosesin ərəb–İran konsorsiumu vasitəsilə həyata keçirilməsini istisna etmir. Bu model ABŞ üçün əlavə nəzarət mexanizmi yarada bilər.
Qeyd edək ki, bu gün Cenevrədə ABŞ və İran arasında nüvə sazişi ilə bağlı danışıqların üçüncü raundu başlayıb. Bundan əvvəlki görüş fevralın 17-də keçirilib. İranın xarici işlər naziri Abbas Əraqçi əvvəlki görüşdən sonra tərəflərin əsas məsələlər üzrə razılıq əldə etdiyini və detallara keçməyə hazır olduqlarını bildirmişdi.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!