9-02-2026, 23:50
Pezeşkianla dövlət televiziyası arasında gərginlik: canlı yayım kəsildi
Tehranda keçirilən tədbir zamanı İran Prezidenti Məsud Pezeşkianla IRIB dövlət televiziyası arasında canlı yayım zamanı gərginlik yaranıb.
Mühüm layihələrin təqdimatı məqsədilə kürsüyə çıxan Pezeşkian çıxışı zamanı dövlət televiziyasının müxbirinin müdaxiləsi ilə üzləşib.
Müxbirin “canlı yayımdayıq, vaxtı düzgün idarə etsəniz, yaxşı olar” məzmunlu xəbərdarlığı zaldakı ab-havanı daha da gərginləşdirib. Bu müdaxiləyə sərt reaksiya verən Pezeşkian çıxışını yarımçıq saxlayaraq “yayımlamayın, vacib deyil, biz işimizi görərik” deyib.
Bundan sonra İran dövlət televiziyası açılış mərasiminin canlı yayımını dayandırıb və efir qaraldılıb.
9-02-2026, 23:07
İsraildə İran agentləri ilə əlaqədə şübhəli bilinən şəxs saxlanılıb
İsrailin Ümumi Təhlükəsizlik Xidməti və polis əməkdaşları İran agentləri ilə əlaqədə olmaqda şübhəli bilinən bir jurnalisti saxlayıblar.
Şübhəli şəxs yanvar ayının sonunda naməlum şəxslərin onunla əlaqə saxlaması barədə polisin kiberşöbəsinə müraciət etdikdən bir neçə gün sonra həbs olunub.
Bildirilib ki, jurnalistlə sosial şəbəkələr üzərindən əlaqə yaradılıb və ondan pul qarşılığında etiraz aksiyalarında iştirak etmək, həmçinin Qüdsün mərkəzi küçələrinin fotolarını çəkmək xahiş edilib. O, əvvəlcə bu təkliflərə şübhə ilə yanaşmayıb, çünki peşə fəaliyyəti çərçivəsində oxşar müraciətlər aldığını bildirib. Daha sonra isə kibertəhlükəsizlik şöbəsi ilə əlaqə saxlayaraq məsələ barədə məlumat verib.
Hüquq-mühafizə orqanları onun həbs müddətinin uzadılmasını istəsələr də, apellyasiya məhkəməsi bu müraciəti təmin etməyib. Bildirilib ki, hazırda şübhəli şəxs ev dustaqlığına buraxılıb.
9-02-2026, 22:38
Bakıda nazirin başına iş gəldi - 60 min dollarlıq QALMAQAL
Avstraliyada iqlim və energetika naziri Kris Bouenin Bakıya səfəri zamanı etdiyi telefon zəngləri ciddi qalmaqala yol açıb.
Yerli medianın yazdığına görə, nazir 2024-cü ilin noyabrında Bakıda keçirilən COP29 çərçivəsində iki həftə Azərbaycanda olub və bu müddətdə etdiyi telefon zənglərinə görə ona 62 min Avstraliya dolları (təxminən 43 min ABŞ dolları) məbləğində hesab təqdim edilib.
Nazir bu məbləği həddindən artıq yüksək adlandırsa da, ödənişi etməyə məcbur qalıb. Daha sonra nazirliyin etirazlarından sonra telekommunikasiya şirkəti hesabın 30 min dollarını geri qaytarıb. Məhz bu addım Avstraliya ictimaiyyətində və siyasi dairələrdə suallar doğurub.
Məsələ ictimailəşdikdən sonra Avstraliya Senatı İqlim və Energetika Nazirliyindən rəsmi izahat tələb edib. Senat dinləmələrində bildirilib ki, Kris Bouen Bakıya səfəri zamanı telefonunun beynəlxalq rouminqə qoşulduğundan xəbərsiz olub və yüksək məbləğdə borc da məhz bu səbəbdən yaranıb.
Nazirliyin baş katibi Mayk Kayzer Senatın maliyyə və dövlət idarəçiliyi üzrə komitəsinin üzvü Sara Hendersonun suallarını cavablandırarkən qeyd edib ki, bu vəziyyət nazirliyin öz səhvi nəticəsində baş verib. Onun sözlərinə görə, nə nazir, nə də onun komandası 2024-cü ilin noyabrında Azərbaycana səfər zamanı beynəlxalq rouminq tariflərinin tətbiq olunduğundan xəbərdar olub. Kayzer əlavə edib ki, nazirlik xarici səfərlər zamanı düzgün tariflərin tətbiqi məsələsində lazımi diqqəti göstərməyib.
Nazirliyin nümayəndəsi telekommunikasiya şirkətinin adını açıqlamasa da, bu məlumat artıq mətbuatda yayılıb. Senator Sara Henderson 30 min dolların geri qaytarılmasını “olduqca qəribə addım” adlandırıb və bildirib ki, əgər sadə vətəndaşlar da səhv etdiklərinə görə telefon xərclərini geri ala bilsəydilər, bu, ideal olardı. O, eyni zamanda, şirkətin çoxmilyonlu dövlət müqaviləsini qorumaq üçün nazirliyə güzəşt etdiyini də istisna etməyib.
Dinləmələr zamanı məlum olub ki, İqlim və Energetika Nazirliyi son altı ay ərzində ezamiyyət xərcləri üçün 9,6 milyon dollar vəsait sərf edib. Mayk Kayzer bu xərcləri əsaslandıraraq bildirib ki, nazirlik Avstraliyanın maraqlarını beynəlxalq səviyyədə təmsil etmək üçün müxtəlif iqlim sammitlərində və konfranslarda iştirak etməyə məcburdur.
9-02-2026, 22:12
Bakıda restoranda qorxulu anlar: Müştərilər içəridə olarkən obyekti yandırdılar
Bakının Qaradağ rayonunun Qobustan qəsəbəsində yerləşən "Şeyx Lounge" restoranı yandırılıb.
Hadisə ötən gün saat 23 radələrində baş verib.
Yanğının baş verməsinə ilkin səbəb olaraq iki nəfər arasında yaranmış mübahisə göstərilir. Belə ki, mübahisə davaya çevrildikdən sonra tərəflərdən biri benzini adıçəkilən obyektə tökərək yanğın törədib, ardınca isə müştərilərin hadisə yerini tərk edə bilməməsi üçün qapını arxadan bağlayıb. İnsidenti törədənin Cavid adlı şəxs olduğu bildirilir.
Müştərilərin həyatını isə iaşə obyektinin mətbəx bölməsinin arxa qapısı xilas edib. Hadisə nəticəsində bir nəfərin ayaq nahiyəsindən yanıq xəsarəti aldığı və xəstəxanaya yerləşdirildiyi məlum olub. Hazırda başqa xəsarət alanlarla bağlı məlumat yoxdur.
Qeyd olunub ki, Nazir Qədirli və Cahangir Qədirovun idarəetməsində olan iaşə obyektinə ümumilikdə 120 min manat məbləğində ziyan dəyib. Əlavə olaraq, müştərilərə 20 mindən çox maddi ziyan dəydiyi bildirilir.
Hadisə ilə bağlı Fövqəladə Hallar Nazirliyinin yaydığı məlumatda isə bildirilib ki, Bakı şəhərinin Qaradağ rayonunda bir dam altında tikilən, ümumi sahəsi 600 m² olan birmərtəbəli müxtəlif təyinatlı obyektlərdən (kafe, avtomoblil ehtiyat hissələrinin satışı mağazası və avtomobil təmiri sexləri) sahəsi 250 m² olan kafenin yanar konstruksiyaları yanıb.
Daxili İşlər Nazirliyinin Mətbuat Xidmətindən hadisə ilə bağlı bildirib ki, qeyd olunan iaşə obyektinin qəsdən yandırılması ilə bağlı polisə məlumat daxil olub. Yanğını törətməkdə şübhəli bilinən iki nəfər müəyyən olunaraq saxlanılıb. Fakt üzrə araşdırmalar davam etdirilir.
9-02-2026, 21:55
Fəzail Ağamalı hoteldə vəfat edibmiş: Nəşi Azərbaycana gətiriləcək
Milli Məclisin sabiq deputatı, Ana Vətən Partiyasının keçmiş sədri Fəzail Ağamalı Türkiyənin paytaxtı Ankarada vəfat edib.
Bu barədə onun yaxınları məlumat verib.
Onların bildirdiyinə görə, F.Ağamalı qızı Günay Ağamalı ilə müayinə və müalicə üçün Türkiyəyə gedibmiş. O, bu gün səhər qaldığı hoteldə ürək çatışmazlığından dünyasını dəyişib.
F.Ağamalı uzun müddət idi xərçəng xəstəliyindən əziyyət çəkirdi.
9-02-2026, 21:17
"Köçürmənin qarşısını almaq üçün yeni addımlar atılacaq" - DİM sədri açıqladı
“İmtahanlarda qayda pozuntusu halları yəqin ki, həmişə olacaq. Bu vəziyyət virus–antivirus modelinə bənzəyir. Yeni virus yaranan kimi ona qarşı antivirus proqramı hazırlanır, virus yayılarsa, peyvənd tapılır. Amma biz bu istiqamətdə bir addım qabaqdayıq. Bu il də imtahanlarda təhlükəsizliyi təmin etmək üçün yeni addımlar atılacaq”.
Bu fikirləri Dövlət İmtahan Mərkəzinin (DİM) İdarə Heyətinin sədri Məleykə Abbaszadə deyib.
DİM sədri hazırda həmin tədbirlər barədə məlumat verməyin məqsədəuyğun olmadığını deyib: “Çünki təhlükəsizlik tədbirləri məhz ona görə tətbiq olunur ki, prosesdə iştirak edən şəxslər hansı mərhələdə yenidən yoxlanılacaqlarını bilməsinlər. İmtahanın bünövrəsini qoyanda əsas prinsip nəticələrin intellektual səviyyədə müdafiə olunmasıdır. Statistik təhlillər zamanı imtahanın təşkili prosesində, istərsə də köçürmə hallarının aşkarlanması ilə bağlı kimin harada və hansı səhvi etdiyini görürük. İmtahanlarda köçürmə etmək istəyən şəxs heç zaman imtahanda uğur qazana bilməyəcək”.
9-02-2026, 21:00
Taksi qiymətləri BAHALAŞDI
"Bolt" taksi şirkəti Azərbaycanda qiymətləri 10 faiz artırıb.
Artıq bununla bağlı sürücülərə bildirişlər də göndərilib.
Məsələ ilə bağlı "Bolt"-dan bildirilib ki, "Bolt" platforması üzərindən göstərilən taksi xidmətlərində gedişhaqqı bir sıra amillər əsasında formalaşır. Qeyd olunub ki, bu amillərə yol hərəkətinin sıxlığı, sifarişə olan tələbat və mövcud avtomobillərin sayı, marşrutun məsafəsi, yanacaq xərclərinin artması, eləcə də tənzimləyici mühitdə baş verən dəyişikliklər daxildir.
Verilən məlumata görə, hazırda tətbiq olunan qiymət yenilənməsi ümumilikdə 10 faizə qədər təşkil edir və regiondan asılı olaraq 5-10 faiz arasında dəyişə bilər:
"Qeyd edək ki, bu dəyişikliklər bütün şəhərlərə şamil edilmir və yalnız müvafiq şəhərlərdə fəaliyyət göstərən sürücülər bu barədə tətbiq daxilində bildirişlər alıblar. Qiymət dəyişiklikləri mövcud qanunvericiliyin tələblərinə uyğun şəkildə həyata keçirilir".
9-02-2026, 18:43
Erməni idmançıların “Arsax” adlı musiqidən istifadə etməsinə qarşı tədbir görülüb
Azərbaycan Milli Olimpiya Komitəsinin erməni idmançıları Karina Akopova və Nikita Raxmaninin fiqurlu konkisürmə üzrə qısa proqramda “Arsax” adlı musiqidən istifadə etməsinə qarşı ciddi etirazı ilə bağlı tədbir görülüb.
Bu barədə Milli Olimpiya Komitəsi məlumat yayıb.
Bildirilib ki, MOK-un haqlı narazılığına Beynəlxalq Olimpiya Komitəsi (BOK) və Beynəlxalq Konkisürmə Birliyinin (ISU) rəsmi nümayəndələri münasibət bildiriblər.
Erməni idmançılarının bu seçiminin Olimpiya Xartiyasının siyasi neytrallıq prinsiplərinə zidd olduğu nəzərə çatdırılıb və yarış vaxtı erməni idmançılarının istifadə edəcəyi musiqinin adının dəyişdirilməsi barədə məlumat verilib.
Qeyd edək ki, XXV Qış Olimpiya Oyunlarına fevralın 22-də yekun vurulacaq.
9-02-2026, 18:20
Vensin Paşinyanla görüşü başladı
İrəvanda ABŞ-nin vitse-prezidenti Cey Di Vens və Ermənistanın Baş naziri Nikol Paşinyanın danışıqları başlayıb.
Bu barədə "Armenpress" məlumat yayıb.
Cey Di Vens Ermənistan Baş nazirinin iqamətgahına gəlib, onu Nikol Paşinyan qarşılayıb. Danışıqlar təkbətək formatda, qapalı şəkildə keçirilir.
Qeyd edək ki, Vens və xanımı Uşanın fevralın 9-da Ermənistana rəsmi səfəri başlayıb. Onun daha əvvəl fevralın 9-10-u Ermənistana, fevralın 10-11-i isə Azərbaycana səfər edəcəyi bildirilmişdi.
9-02-2026, 18:16
Ukrayna ordusu əks-hücuma keçdi - kənd azad edildi
Ukrayna Silahlı Qüvvələrinin Dnepropetrovsk və Zaporojye vilayətlərinin sərhədində əks-hücum əməliyyatlarına başladığı bildirilir.
Bu barədə Rusiya hərbi teleqram kanalları məlumat yayıb.
Məlumata görə, Ukrayna qüvvələri Zaporojyenin şərqində Rusiya qoşunlarının sağ cinahına qarşı əks-zərbələr endirir. Hücumların Pokrovske və Velikaya Mixaylovka istiqamətindən həyata keçirildiyi, məqsədin isə Rusiya qüvvələrini parçalamaq və onların arxa mövqelərinə çıxmaq olduğu qeyd olunur.
Rusiya mənbələri əməliyyatların bir neçə istiqamətdə aparıldığını bildirir. Hücumların dumanlı hava şəraitində başladığı, bunun da mövqelərdən yan keçməyi və arxaya sızmanı asanlaşdırdığı vurğulanır.
Rusiya tərəfi hücumların dəf edildiyini, Ukrayna piyada bölmələrinin dronlarla vurulduğunu iddia etsə də, eyni zamanda Ukrayna qüvvələrinin Ternovatoye yaşayış məntəqəsinə daxil olduğunu təsdiqləyir. Hazırda burada şiddətli döyüşlərin getdiyi bildirilir. Ukrayna komandanlığı isə hələ bir gün əvvəl bu yaşayış məntəqəsinin tam nəzarətə götürüldüyünü açıqlamışdı. Almaniyanın “Bild” nəşri isə qonşu Pridorojnoye kəndinin də azad edildiyini yazıb.
Cəbhədə vəziyyətin sürətlə dəyişdiyi qeyd olunur. Rusiya hərbi kanallarının əks-hücumu fəal şəkildə işıqlandırması Moskvanın bu istiqamətdə Ukrayna irəliləyişini dayandırmaq üçün ehtiyat qüvvələr cəlb edə biləcəyinə işarə kimi qiymətləndirilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!