Avropa İttifaqı səfiri Azay Quliyevlə görüşdü.
Malena Mard:"Bu il təhsil sahəsində fəaliyyət göstərən QHT-lərin layihələrini maliyyələşdirməyi nəzərdə tuturuq"

Bu gün Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasında Avropa İttifaqının (Aİ) ölkəmizdəki səfiri xanım Malena Mardla görüş keçirilib.
Avropa İttifaqı ilə ölkəmiz arasında dinamik şəkildə inkişaf edən münasibətlərin mövcudluğundan danışan səfir Aİ-nın ölkəmizdəki nümayəndəliyinin fəaliyyəti haqqında məlumat verib. Xanım Malena Mard Aİ-nın müxtəlif institutlarının ölkəmizdəki müvafiq qurumlarla əməkdaşlığının genişləndirilməsinə çalışdıqlarını deyib. Səfir eyni zamanda Şuranın dəstəyi ilə 2016-cı ildə təhsil sahəsində fəaliyyət göstərən QHT-lərlə daha yaxından işləməyi və onların layihələrinin maliyələşdirilməsini nəzərdə tutduqlarını qeyd edib. M.Mard regionlardakı QHT-lərin instusional inkişafı sahəsində də Şura ilə əməkdaşlıqda maraqlı olduqlarını vurğulayıb.
Şura sədri Azay Quliyev vətəndaş cəmiyyətinin inkişafı istiqamətində Şuranın 2016-cı ildə regionlarda həyata keçirdiyi təlim və seminarlar haqqında səfirə ətraflı məlumat verib. Azay Quliyev Aİ ilə ikitərəfli münasibətlərin inkişafında QHT-lərin mühüm rola malik olduğunu və qarşılıqlı maraq doğuran sahələrdə əməkdaşlığın davam etdirilməsinin vacibliyini bildirib.
Görüş müxtəlif mövzular ətrafında müzakirələrlə davam etdirilib.