"London başa düşür ki, Azərbaycanın Ermənistan tərəfindən işğal olunmuş Dağlıq Qarabağ bölgəsinə turist səfərləri təşkil etmək beynəlxalq qanunlara ziddir və belə addım atmaq olmaz”. Bu sözləri SİA-ya açıqlamasında politoloq Rüstəm Məmmədov deyib. O bildirib ki, Böyük Britaniya Azərbaycanın ərazi bütövlüyünə hörmət etməli və belə addımlara yol verməməlidir: “Böyük Britaniyanın turizm şirkətinin bu addımını təxribat kimi qiymətləndirmək lazımdır. Ola bilər ki, Azərbaycanın siyasəti Böyük Britaniyaya sərf etmir. Ona görə onlar belə addımlarla təxribata əl atırlar”.

Qeyd edək ki, Böyük Britaniyanın Azərbaycandakı səfirliyi bildirib ki, bu ölkənin xarici siyasət idarəsi tur operatorları da daxil olmaqla, hər kəsə Dağlıq Qarabağ və hərbi işğal altında olan ətraf ərazilərə səfər etməməyi tövsiyə edib. Tövsiyədə qeyd olunub ki, Azərbaycan hakimiyyətinin icazəsi olmadan Dağlıq Qarabağa səfər edən istənilən şəxsin Azərbaycana girişi qadağan ediləcək.

Xatırladaq ki, Böyük Britaniyanın Bristol şəhərində yerləşən “Regent Holiday” turizm şirkəti Dağlıq Qarabağa qanunsuz səfərlər həyata keçirməyi planlaşdırır. Şirkət Dağlıq Qarabağa qrup səfərlərinin gələn il mayın 6-dan başlayacağının anonsunu verib. Səfər Ermənistandan başlayacaq və 11 günlük olacaq. Növbəti səfər isə 28 avqusta planlaşdırılır. Turistlərə İrəvandan başlayaraq Dağlıq Qarabağda Şuşa və Xankəndi şəhərlərinə səfər təklif edilir. Şirkətin saytında Dağlıq Qarabağ "1992-ci ildə müstəqilik qazanmış, Azərbaycan daxilindəki erməni anklavı" kimi göstərilib və onun müstəqilliyinin heç bir dövlət tərəfindən tanınmadığı diqqətə çatdırılıb.