Dünya miqyasına nəzər salanda görürük ki, neçə-neçə böyük, balaca dövlətlər mövcuddur. Bu dövlətlərdə də insanlar zaman-zaman çalışmışlar ki, sivil cəmiyyət qursunlar. Lakin çox təəssüflər olsun ki, böyük dövlətlər belə cəmiyyətlər qura bilməmişlər. Yenə zorakılıqlara, müharibələrə, işsizliyə, yoxsulluğa, qanlı cinayətlər və neqativ hallara təsadüf edilir. Bu da ona dəlalət edir ki, cəhalət yer üzərində xərçəng xəstəliyindən də qorxulu bir bəladır. Əgər xəstəlikdən insanlar sonda ölürlərsə, cahillikdən onlar həm özlərini, həm də bəşəriyyəti məhvə məhkum edirlər. Dünyanı xaosa çəkən də elə cahillikdir.
Bəllidir ik, dünyadakı cəhaləti aradan qaldırmaq üçün ona qarşı müxtəlif metodlardan istifadə etmək, mübarizə üsulları axtarmaq gərəkdir. Bunun üçün ilk növbədə insanlar maarifləndirilməli, savadlarını, intellektlərini inkişaf etdirməlidirlər. Əgər dünyadakı cahilliyə son qoyularsa, bəşəriyyəti böyük bəlalardan xilas etmək asanlaşar. Nəticə etibarilə dünyada sivil cəmiyyətlər bərqərar olar.
Sivil cəmiyyətlərin qurulmasında sivil ailələr müstəsna rol oynayırlar. Sivil ailə faktoru bu amilin tərkib hissəsidir. Çünki hər bir ailənin özünə məxsus adət-ənənəsi, xarici-daxili siyasəti, sosial-mədəni əhatəsi var. Bu meyarlar sivilliyin əsas atributlarıdır. Ən əsası da, bu istiqamətdə gənc aillərin aktivliyinə zəmin yaratmaq lazımdır.
Şübhəsiz nəsillərin inkişafını ləngidən başlıca səbəblərdən biri də narkomaniyadır. Bütün dünyanın bu bəlaya qarşı mübarizə aparması mütləqdir. Təəssüf ki, hələlik bu yöndə müsbət heç nə yoxdur. Açığı, sivil cəmiyyətlərin tam qurula bilməməsində bu bəla da başlıca rollardan birini oynayır.
Xülasə, bütün dünyanın sivil cəmiyyətlərə ehtiyacı var.

Zaur Əliyev