Jurnalistlərin Həmkarlar İttifaqının sədri, Mətbuat Şurasının sədr müavini Müşfiq Ələsgərli Bakı Şəhər İcra Hakimiyyətinin başçısı Hacıbala Abutalıbovun jurnalistlərlə bağlı səsləndirdiyi qalmaqallı fikirlərə münasibət bildirib

Butov.az xəbər verir ki, M.Ələsgərli Ölkə.Az-a açıqlamasında deyib ki, əslində jurnalistin işi yazmaqdır:

“Jurnalist, harada problem varsa, onu yazmalıdır. Əslində bu özü də böyük köməkdir. Jurnalistlər bunu yazmasalar, bu problemlər bilinməz və onun həllinə nail olmaq olmaz. Amma burada bir məsələ də var. Hacıbala müəllim karyerası boyu daimi zarafatları ilə yadda qalır. Biz Hacıbala müəllimin jurnalistikanın nə olması barədə anlayışı olmadığını düşünmürük. O, bunu düşünülmüş şəkildə deyir. Sadəcə hesab edirik ki, onun dedikləri zarafatdır və onun karyerasında bu cür hallar tez-tez olur”.

Xatırladaq ki, Bakı Şəhər İcra Hakimiyyətinin başçısı Hacıbala Abutalıbov növbəti dəfə qeyri-adi açıqlama ilə gündəmə gəlib. Bakı meri ATV-nin “Son xəbər” proqramına müsahibəsində Nərimanov rayonunda aparılacaq abadlıq işlərindən danışarkən KİV nümayəndələrinə qarşı növbəti qərəzli münasibət ortaya qoyub. Belə ki, Bakının Binəqədi və Zabrat qəsəbələrini yağış yağması nəticəsində su basdığını xatırladan H.Abutalıbov jurnalistləri qurutma işlərinə mane olmaqda qınayıb:

“Gedib o gölməçələri videoya çəkməkdənsə, yaxşı olardı jurnalistlər arx açardı ki, su axıb getsin”.