5-7 noyabr tarixlərində iki illik aradan sonra cüdo üzrə “Böyük Dəbilqə” turniri Bakıda keçiriləcək.

Bütöv.az-ın xəbərinə görə, bu yarışda meydan sahibi olduğumuzdan, Azərbaycanı ən çox idmançı təmsil edəcək.

Belə ki, 33 cüdoçunun adı turnir üçün sifariş olunub. Bunlardan 25-i kişi, 8-i qadın cüdoçulardır.

Heyətdə dəyişikliklər var. Məsələn, kişilərdə Kəramət Hüseynov (-60 kq), Murad Fətiyev (-81 kq), Zelim Kotsoyev (-100 kq) müəyyən səbəblərdən yığmaya çağırılmayıb. Davud Məmmədsoy (-60 kq) və Elmar Qasımov (-100 kq) isə yığmadan uzaqlaşdırılıb.

Qadın millimizdə Leyla Əliyeva (-48 kq) və Gültac Məmmədəliyevanın (-52 kq) çağırılmaması diqqət çəkir. Son Olimpiadada cüdo üzrə yeganə mükafatçımız İrina Kindzerskayanın (+78 kq) iştirak etməməsi yarışda bu çəkidə təmsilçimizin olmamasına işarə edir. Ən diqqətçəkən məqam isə uzun fasilədən sonra Monqolustan əsilli cüdoçumuz İçinxorloo Munxtsedevin yığmaya qayıdışıdır.

Kişilər: Balabəy Ağayev, Rövşən Əliyev, Əhməd Yusifov, Turan Bayramov (hamısı -60 kq), İbrahim Əliyev, Orxan Səfərov, İsmayıl İbrahimov, Tofiq Məmmədov (hamısı -66 kq), Hidayət Heydərov, Rüstəm Orucov, Telman Vəliyev, Rüfət Məmmədov (hamısı -73 kq), Elcan Hacıyev, Ömər Rəcəbli, Kərim Məmmədov, Hasil Cəfərov (hamısı -81 kq), Rüfət İsmayılov, Vüqar Talıbov, Məmmədəli Mehdiyev (hər üçü -90 kq), Adil Kərimli, Ruslan Nəsirli, Kənan Abdullaxanlı (hər üçü -100 kq), Uşanqi Kokauri, Camal Feyziyev, Hüseyn Məmmədov (hər üçü +100 kq)

Qadınlar: Aişə Qurbanlı, Şəfəq Həmidova (hər ikisi -48 kq), Zeynəb Məmmədova, Ülviyyə Bayramova (hər ikisi -52 kq), İçinxorloo Munxtsedev (-57 kq), Aytac Qardaşxanlı (-63 kq), Günel Həsənli, Südabə Ağayeva (hər ikisi -70 kq)

Qeyd edək ki, bu yarışda 31 ölkədən 208 cüdoçu (137 kişi və 71 qadın) mübarizə aparacaq. Yarış iştirakçılarından ən reytinqliləri Vaja Marqvelaşvili (Gürcüstan) və Tsoqtbaatar Tsend-Oçirdir (Monqolustan).

Qətlə görə 10 il azadlıqdan məhrum edilən general-leytenantın fəxri adının saxlanması və rütbəsindən məhrum olunmaması gələcəkdə əfvə salınması üçün rol oynaya bilər; vəkil və polkovnikdən ilginc mövqe

Məlum olduğu kimi, Bakı Hərbi Məhkəməsində sabiq birlik komandiri, general-leytenant Rövşən Əkbərovun cinayət işi üzrə məhkəmə prosesi başa çatdı və 10 il müddətinə azadlıqdan məhrum edildi. R.Əkbərov 20 il öncə Kiyevdə azərbaycanlı iş adamı Elçin Əliyevi qətlə yetirməkdə təqsirli bilinib. Ukrayna prokurorluğu hələ 2003-cü ildə Azərbaycan Baş Prokurorluğuna məktub göndərərək 29 yaşlı Əliyevin qətlində generalın iştirakını təsdiqləyən sübutların olduğunu yazırdı. Həmin sübutlar da daxil olmaqla, cinayət işinin materialları istintaqın davam etdirilməsi üçün Azərbaycana göndərilmişdi. İş əvvəlcə Hərbi Prokurorluqda, daha sonra Baş Prokurorluğun Ağır Cinayətlərə Dair İşlər üzrə İstintaq idarəsində araşdırılsa da, bir müddət sonra icraat dayandırılmışdı.

Maraqlıdır ki, məhkəmə R.Əkbərovun hərbi rütbəsinin və fəxri adlarının alınmasını zəruri hesab etməyib. Buna səbəb işdə hərbi rütbənin alınması ilə bağlı təqdimat olmadığı göstərilib. Bunu R.Əkbərova qarşı bir jest kimi qiymətləndirmək olar.

İndiyədək bir sıra şəxslər, məsələn, Rasim Əkbərov Milli Qəhrəman və “Azərbaycan Bayrağı” ordenindən məhrum edilib. R.Əkbərov dövlət çevrilişinə cəhddə günahlandırılıb və 15 illik həbs cəzası alıb. Surət Hüseynov da eyni aqibəti yaşayıb. 1994-cü il oktyabrın 14-də Milli Məclis onun cinayət məsuliyyətinə cəlb olunmasına, barəsində həbs-qətimkan tədbiri seçilməsinə razılıq verilməsi və Milli Qəhrəmanı adından məhrum edilməsi barədə qərar qəbul edib. Habelə, Naxçıvanın həbs edilən sabiq daxili işlər naziri Əhməd Əhmədov da daxili xidmət general-mayoru, polis general-leytenantı ali-xüsusi rütbəsindən, general-leytenant ali hərbi rütbəsindən və “Azərbaycan Bayrağı” ordenindən mərhum edilib. Amma Rövşən Əkbərovun fəxri adları əllərindən alınmayıb. Bu qərar onun həbs müddəti başa çatmazdan əvvəl azadlığa buraxılmasında rol oynayacaqmı? Qanun nə deyir, o, fəxri ad və rütbədən məhrum olunmalıydımı?

Əsabəli Mustafayev

Hüquqşünas Əsabəli Mustafayevin bildirdiyinə görə, Müdafiə Nazirliyi tərəfindən məhkəməyə təqdimat verilməliydi. Onun fikrincə, əgər təqdimat verilməyibsə, bu göstərir ki, R.Əkbərovu təqsirli saymayanlar da var, yaxud günahkar sayırlar, sadəcə, şəxsiyyətinə və Milli Qəhrəman adı almasına görə cəzasının ağır olmasını istəmirlər. “Onsuz da Rövşən Əkbərova çox ağır cəza verilməyib. Onun ”OMON"çuların işində iştirakı olub, indi deyə bilmərəm ki, bu məsələ nə dərəcədə rol oynayıb, lakin görünür ki, ümumi razılaşma var, Rövşən Əkbərovu tam batırmaq istəmirlər. Digər tərəfdən, özü də başa düşsün ki, ona müəyyən üstünlük saxlanılıb. Hər halda, general-leytenantdır", - deyə Ə.Mustafayev qeyd etdi. Vəkil hesab edir ki, fəxri adın saxlanması və rütbəsindən məhrum olunmaması R.Əkbərovun gələcəkdə əfvə salınması üçün rol oynaya bilər: “Onun döyüş yoldaşları, yaxın şəxslər, yaxud özü əfvə düşməsi üçün müraciət edə bilər. Mənə elə gəlir ki, bir neçə il sonra onun əfvi mümkündür”.

Üzeyir Cəfərov

Polkovnik Üzeyir Cəfərovun sözlərinə görə, R.Əkbərov təcrübəli general olub: “Füzuli istiqamətində döyüşlərdə bərabər olmuşuq. Rövşən Əkbərov Azərbaycan Ordusu üçün hərbçi kimi bacarıqlı generallardan biridir. Onun keçmiş Baş Qərargah rəisi ilə münasibətləri gərgin olub, bəzi qərarlarla razılaşmayıb. Bir hərbçi kimi Əfqanıstanda döyüşüb, Qarabağ döyüşlərində xidmətləri olub. Yəni mən ona bir hərbçi kimi qiymət verə bilərəm”. Ü.Cəfərov R.Əkbərovun göstərilən müddəti axıra qədər həbsdə qalacağını düşünmür və əfvini istisna etmir: “Yaxınları əfv üçün müraciət edə bilərlər”.

Qeyd edək ki, 56 yaşlı general-leytenant Rövşən Əkbərov Bakı və Şəmkir korpuslarının komandiri olub. O, 2021-ci ilin fevralının əvvəllərində müdafiə nazirinin əmri ilə ehtiyata göndərilib. R.Əkbərov Bakıdakı 42 saylı orta məktəbdə, daha sonra Cəmşid Naxçıvanski adına hərbi məktəbdə təhsil alıb. 1982-ci ildə Kiyev Ali Ümumqoşun Komandirləri Məktəbinə daxil olub. 1986-cı ildə təyinatla Zaqafqaziya hərbi dairəsi komandanlığının sərəncamına göndərilib. Bir il sonra xidmət etdiyi ordunun tərkibində Əfqanıstana ezam olunub. 1988-ci ildə Zaqafqaziya Hərbi Dairəsinə qayıdan R.Əkbərov 1989-cu ildə xidmət etdiyi alayda bölük komandiri vəzifəsinə təyin edilib.

Birinci Qarabağ müharibəsində iştirak edən Rövşən Əkbərov 1995-ci il mart hadisələri zamanı Xüsusi Təyinatlı Polis Dəstəsinin zərərsizləşdirilməsində iştirak edib. O, 1999-cu ildə Bakı Ali Hərbi Dənizçilik Məktəbinin, 2002-ci ildə isə Ukrayna Hərbi Akademiyasının müdavimi olub. 2002-ci ildən general-leytenantdır. Azərbaycan Prezidentinin 5 oktyabr 1994-cü il tarixli fərmanı ilə Azərbaycanın Milli Qəhrəmanı adına layiq görülüb.(musavat.com)

Bütöv.az

Bu gün Türkiyədə Cümhuriyyət bayramı qeyd olunur.

Bu bayram 1923-cü ildə Türkiyə Böyük Millət Məclisinin (TBMM) qərarı ilə Osmanlı dövlətinin ləğv edilərək Türkiyə Cümhuriyyətinin elan olunması münasibəti ilə qeyd edilir.

Mustafa Kamal Paşanın rəhbərliyində TBMM-də elan edilən respublikanın ilk prezidenti də Mustafa Kamal (Atatürk) özü olur. 1924-cü ildən etibarən keçirilməyə başlayan bayram Türkiyənin bütün şəhərlərində, Şimali Kipr Türk Respublikasında (KKTC) və dünyanın bütün ölkələrindəki Türkiyə səfirliklərində qeyd edilir.

Ərazisi 783 562,4 km² olan Türkiyənin 3 faizi Avropa, 97 faizi Asiya qitəsindədir. Ölkə 7 coğrafi ərazi və 81 vilayətdən ibarətdir. Əhalisi təxminən 73 milyon 722 min 988 nəfər, paytaxtı Ankara şəhəridir. Parlament üsulu ilə idarə olunan ölkənin bayrağı qırmızı parça üstündə ağ rəngli aypara və beş guşəli ulduzdan ibarətdir. Türkiyənin rəsmi dili türk dilidir.

Bütöv.az

2020-ci il 10 noyabr bəyanatından sonra Azərbaycan dövləti Prezident İlham Əliyevin rəhbərliyi altında diplomatik, hərbi, siyasi sahədə bir sıra üstünlük qazandıran addımlar atdı.

Postmüharibə dövrünün özünəməxsus riskləri olduğu üçün bu addımlar Azərbaycana lazım idi.

Milli Məclisin deputatı Rüfət Quliyev Oxu.Az-a açıqlamasında deyib ki, Prezident İlham Əliyevin siyasətini çox müsbət qiymətləndirir.

“Prezident Şərqi Zəngəzur və Qarabağ iqtisadi rayonlarını yaratdı. İndi həmin bölgələrdə böyük quruculuq işləri gedir. Füzuli Beynəlxalq Hava Limanı istifadəyə verildi. İşğaldan azad edilmiş digər ərazilərdə də aeroportlar tikilir”, - deyə R.Quliyev əlavə edib.

Onun sözlərinə görə, Azərbaycanın yeni layihələrə başlamasına dünya ölkələri müsbət qiymət verir və hazırda işğaldan azad edilən ərazilərin minalardan təmizlənməsi Azərbaycanın prioritetlərinə daxildir.

Millət vəkili qeyd edib ki, verilən qərarlar, atılan addımlar Azərbaycan dövlətinin işğaldan azad olunmuş ərazilərə ciddi şəkildə diqqət ayırmasının göstəricisidir.

“Artıq işğaldan azad edilmiş ərazilərə xarici investorlar da cəlb olunub. Onlar təklif edir ki, investisiya qoyduqdan sonra məhsullarını həm dünya, həm də Azərbaycan bazarında satsınlar. Beynəlxalq Valyuta Fondu da Azərbaycana yenidənqurma üçün pul ayırmaq niyyətindədir. Bu onun göstəricisidir ki, beynəlxalq maliyyə qurumları Azərbaycana, onun iqtisadiyyatına, manatın məzənnəsinin sabitliyinə inanır”, - deyə R.Quliyev söyləyib.

Deputatın fikrincə, Prezident İlham Əliyevin siyasətini dünya azərbaycanlıları da dəstəkləyir: “Onlar da Azərbaycanın haqq səsinə səs verir. Bu gün ABŞ da, Avropa Birliyi də, Çin də işğaldan azad edilmiş ərazilərdə fəaliyyət göstərmək istəyir. İnanıram ki, biz qısa bir zamanda işğaldan azad edilmiş ərazilərdə böyük işlər görəcəyik”, - deyə R.Quliyev fikrini yekunlaşdırıb.

Bütöv.az

Koronavirusun yayılmasına görə distant təhsilə keçən Bakıdakı 245 nömrəli tam orta məktəbdə əyani dərslər bərpa olunub.

Bakı Şəhəri üzrə Təhsil İdarəsindən verilən məlumata görə, məktəb kontingenti üçün Gigiyena və Epidemiologiya Mərkəzinin rəyi əsasında müəyyənləşdirilmiş 14 günlük karantin müddəti oktyabrın 29-da başa çatıb.

Qeyd olunub ki, təhsil müəssisələrində koronavirus infeksiyasına qarşı şagirdlərin və məktəbin pedaqoji heyətinin daha etibarlı qorunması üçün sanitar-epidemioloji vəziyyətdən irəli gələn tələblərə ciddi əməl olunur.

Bütöv.az

Dünya bazarında neft qiymətləri artıb

WTI markalı neftin dekabr fyuçersləri 0,04 % bahalaşaraq, bir bareli 82,84 ABŞ dolları təşkil edib.

“Brent” markalı neftin dekabr fyuçersləri 0,13 % bahalaşaraq, bir bareli 84,43 ABŞ dolları olub.

Mənbə: Bloomberg

Bütöv.az

Şəlalə MƏHYƏDDİNQIZI
Azərbaycan radiosunun "Xəbərlər" redaksiyasının redaktoru

AZƏRBAYCAN RADİOSUNUN TALIŞ KƏNDİNDƏN VƏ SUQOVUŞANDAN YAYIMI
Torpaqlarımızın işğal altında olduğu 30 ilə yaxın müddətdə elə gün, elə bir saat olmadı ki, biz yurd həsrətindən söz açmayaq, o yerləri xatırlamayaq. Mikrofonu kimə sarı tuturduqsa əzəli-əbədi torpaqlarımızın azad olunması arzusunu dilə gətirirdi. Elin hər bir nümayəndəsi, fərqi yoxdur qaçqın, köçkün olsun, beynəlxalq yarışlardan vətənə qayıtsın, yaxud hansısa günün aktual mövzusundan danışsın, yaşının fərqinə varmadan, müxtəlif proqramlarda, ictimai-siyasi mövzularda, ədəbi verilişlərdə xalqın istəyini qabardır, Ali Baş Komandandan əmr gözlədiyini söyləyirdi. Hər çıxışın sonunda ümummilli problemi dilə gətirir, "gün o gün olsun azad olunan yerlərimizdən canlı yayımlanasınız" deyib ana radioya arzularını bildirir və inamla o yerlərə qayıdacağımızı deyirdilər. Artıq səbirləri tükənənlər də vardı. Az qala bəziləri inamını itirməyə başlamış, sanki ümidsizliyə qapanmış, depressiya halını yaşayırdı. Açığını etiraf edim ki, hərdən özümün də içinə təşviş düşür, Qarabağın taleyindən nigaran köçmək, olacaqlardan xəbərsiz ölmək qorxusu canımı üşüdürdü.

Bir dəfə ustad müəllimim, jurnalistikanın elmi simalarından və dəyərli nümayəndələrindən biri olan professor Cahangir Məmmədlidən efir üçün müsahibə alırdım. Söhbətimiz zamanı həmişəki kimi onun qəlbini incidən ən yaralı yeri, doğulduğu Ağdamın Novruzlu kəndini yenə də yada salmalı oldum. İstənilən sahədə jurnalistikanın rolundan həvəslə danışan alim Novruzludan söz düşəndə uşaq kimi kövrəlib, səsi nazilir, qəhər içində sanki bükülüb bir yumağa dönürdü. Birdən sual verdim ki, "o torpaqlara qayıdacağımıza inanırsınızmı"? Elə ürəkdən, bərkdən "bəli, adım kimi əminəm, gün kimi inanıram" dedi və səbəbini əsaslandırdı. Prezidentin çıxışlarından, ölkədə gedən ordu quruculuğundan, Müdafiə Sənayesi Nazirliyinin istehsal etdiyi yeni nəsil silahlardan, dünyanın güc dövlətlərinin qadir olduğu hərbi sənaye səviyyəsinə çatmaq üçün ölkəmizin əldə etdiyi müxtəlif təyinatlı hərbi sursatların çeşidindən, beynəlxalq tədbirlərdə, sərgilərdə nümayiş olunan məhsullarımızdan, hərbi sənayedə ilbəil qazanılan nailiyyətlərdən və Ali Baş Komandanın xalqa verdiyi vədlərdən söz açdı. Tək məni yox, dinləyiciləri qəti əmin etdi ki, yaxın zamanlarda Azərbyacan Ordusu öz sözünü deyəcək. Jurnalistikada deyilən söz həqiqidir və onu deyən qələmi ilə, sözünün dəyəri ilə həm də özünü, imzasını təsdiqləyir. Cahangir müəllim kimi bir ziyalıdan, söz ustadından bunları eşitmək daxili təlatümə sanki nöqtə qoydu, qəlbimdə bir rahatlıq yaratdı. Müsahibimdən ayrılanda və həmin materialı efirə hazırlayanda qeyri-adi hisslər keçirirdim. Yəni doğrudanmı o gün uzaqda deyildi...

Nəhayət o gün, gözlənilən məqam yetişdi. Azərbaycan Ordusu "Dəmir Yumruğ"unu işə saldı. Düşməni iti qovan kimi torpaqlarımızdan qovdu. İlk qələbə xəbəri yetişən kimi yadıma Cahangir müəllim düşdü.
Qazanılan qələbə sədaları, oğullarımızın dillərə dastan olan qəhrəmanlıqları sayəsində cəbhədəki irəliləyişlərimiz, düşmənin istehkam qurğularının, hərbi texnikasının bir an içində külə döndərilməsi anlarının çəkilişləri, intiqam hissi ilə yaşadığımız uzun illərin gərginliyindən sonra qısa müddət ərzində ardıcıl eşitdiyimiz torpaqların azad edilməsi ilə bağlı xəbərlər həssas insanların qəlbini daha da çırpındırır, sanki ürək möhtəşəm anları yaşamağa Allahdan güc istəyir, köksümüz sevincdən partlayırdı.
Bəli, arzular gerçəyə döndü və Azərbaycan radiosu indi o torpaqlarda da yayımlanır, o yerlərin özündən danışır, vətəni vəsflə tərənnüm edir, həmişəki kimi ədəbi aləmin ən müqəddəs mövzusu olan Ana - Vətən kəlməsini ucalardan təlqin edir.
95 illik yubileyi ərəfəsində ölkə başçısının, Ali Baş Komandan İlham Əliyevin Zəngilandan Azərbaycan radiosunu dinləməsi, bəstəkar Elza İbrahimovanın şair Dəmir Gədəbəylinin sözlərinə bəstələdiyi "Ey Vətən" (Nəğmə dolu bir ürəyəm) mahnısına qulaq asması, musiqi sədaları altında hündürlükdən azadlığa qovuşan torpağı qürurla seyr etməsi, ağappaq bulud topalarının altından görünən göy üzünün aydın səması yurdumuzun səhər çağı əsrarəngiz gözəlliyinin nümayişi idi. Oktyabrın 20-də gündüz saat 12-yə işləmiş Azərbaycan radiosunda vətənpərvərlik nəğmələri səslənirdi. Bir-birindən dəyərli sənət əsərləri, bəstəkar nəğmələri dinləyicilərə təqdim edilir, musiqinin dili ilə yurdumuz vəsf olunurdu. Həmin saatda efirimizə qulaq asanlar arasında Prezidentimiz də vardı və Birinci vitse-prezident Mehriban xanımla, həyat yoldaşı ilə birlikdə radiomuzu dinləyirdilər. Bu, həm də Azərbaycan efirinin taleyinə yazılan maraqlı məqamlardan, tarixi faktlardan biri oldu. Axı danılmaz həqiqətdir ki, müstəqil ölkəmizin ilk radiosunun, ilk informasiya vasitəsinin 95 il ərzində xalqın ana dilinin mükəmməl səviyyəyə yetişməsində, insanların maariflənməsində, ədəbi-bədii yaradıcılığın genişlənməsində, milli musiqinin təbliğində xüsusi xidmətləri olub. Fasiləsiz yayımlanan, rəqəmsal üstünlükləri ilə dünyanın hər yerində eşidilən Azərbaycan radiosunun əməkdaşları vətəni sevənlərdən ürəkdolusu danışır, ziyalısını sevdirməyə çalışır, milli məfkurəmizin saflaşması yoluna işıq tutaraq könüldən-könülə körpülər salır.

Azərbaycan radiosu üçün möhtəşəm hadisələrdən biri də odur ki, əməkdaşlarımız tez-tez işğaldan azad olunan ərazilərə səfər edir, Ağdamdan, Şuşadan, düşmən caynağından qurtulan bölgələrimizin bərpasından danışır.
Növbəti səfərimiz isə Talış kəndinə, Suqovuşana oldu. Bu dəfə isə iki nəfər, Azərbaycan Radiosunun "Xəbərlər" redaksiyanın əməkdaşları kimi şəxsiyyətinə böyük hörmət bəslədiyim, "Bütöv Azərbaycan" arzusu ilə yaşayan, teleradiomuzda öz imzası və dəsti-xətti olan Tamxil Ziyəddinoğlu ilə birlikdə Milli Televiziya və Radio Şurasının təşkilatçılığıyla 26 radiojurnalist arasında Azərbaycan əsgərininin azad etdiyi ərazilərə baş çəkdik.
Gecə yarı saat 3-də Bakıdan üzü Tərtərə sarı yola çıxdıq. Həmkarlarımızla deyilən yerdə, nəzərdə tutulan vaxtda görüşdük. Hərbi postun önündə görüşdüyümüz bələdçi vasitəsi ilə ərazilərə qədəm basdıq. Əvvəlcə Talış kəndinə baş çəkdik. Kənddəki Alban kilsəsində olduq, tarixin yaddaş səhifələrinə müdaxilə etməyə çalışan ermənilərin abidəni xaçlaşdırmaq istəyini gözümüzlə gördük. Abidənin sütunlarına sonradan həkk etmək istədikləri yamaqlar, xaç nişanələri, əməlləri onları gülünc vəziyyətə salmışdır.

Daha sonra Azərbacan Ordusunun strateji üstünlüyə malik olan bu kəndin geri qaytarılması üçün uğurlu əməliyyatlara başladığı istiqamətləri bizə göstərdilər. Kəndin relyefi elədir ki, hündürlükdə olan ermənilər hər tərəfi aydın nəzarətdə saxladıqları üçün buraları geri qaytarmaq igidlərimizə asan başa gəlməyib. Ancaq dəyanətləri ilə düşmənə meydan oxuyan oğulların qanı hesabına, şəhadətləri sayəsində bu yüksəklikləri düşməndan azad eləmək mümkünə çevrilib. Ərazi hələ minalardan tamamilə təmizlənməyib. Ona görə də bələdçinin ardınca şütüyən maşın karvanı işarə qoyulmuş sahələrdən ehtiyatla irəliləyirdi. Jurnalistlərimizin Azərbaycan Prezidentinin üçrəngli bayrağımızı zirvəyə qaldırdığı yerdə şəkil çəkdirməsi, müharibənin dəhşətli görüntülərini, yurd yerlərimizin xarabalığa çevrilmiş görkəmini tarixi dəlil kimi yaddaşlara köçürməsi Vətən müharibəsinin tarixinə işıq salan məqamların aydın əksidir.
Talış kəndindən sonra isə Suqovuşan su anbarında ayaq saxladıq. Radio jurnalistləri ərazidən canlı yayımlar edir, süjetlər hazırlayır, öz efirlərində səfərlə bağlı təəssüratlarını bölüşürdülər.
Azərbaycan radiosunda Talış kəndindən ilk söhbətimiz Televiziya və Radio şurasının əməkdaşı, səfərin təşkilatçısı Fikrət Xudatzadə ilə oldu. Söhbət əsnasında işğaldan azad edilən bölgələrdə yayımlanan teleradioların fəaliyyətinə toxunuldu.
[center]
Daha sonra isə Suqovuşanda gedən tikinti quruculuq işlərində çalışan işçilərin söhbətlərini eşitmək istəyilə onlara yaxınlaşdım və bir-bir onları Azərbaycan radiosunun dinləyicilərinə tanıtdım. Müsahiblərim gördükləri işdən həvəslə danışır, bərpa prosesinə qatıldıqları üçün özlərini xoşbəxt sayır, bu yerlərə həyatın qayıdışı üçün əllərindən gələni əsirgəmirdilər. Sanki sarı rəngdə xüsusi geyimli bu insanlar tikanların arasında bitən çiçəklərə bənzəyirdi. Viranə qoyulmuş yurda yeni can gətirən və təbiətin görkəmini qaytarmağa çalışan vətən övladları ilə görüşümüz, təəssüratlarımız yadda qalan oldu.

Sonda isə Suqovuşanda düşmənin hərbi qulluqçularının məskən saldıqları binalarda olduq. Azərbaycan əsgərinin dərmədeşik, gülləbaran etdiyi yerlərə baxdıq. Dağıdılmış, güllələnmiş erməni maşınları qalaq-qalaq yığılmış, üstündən bir il keçməsinə baxmayaraq, hər şey olduğu kimi qalmışdı. Elə bil müharibə dünən olmuşdu. Binadakı bütün əşyalar yerə səpələnmişdi. Ayağımız altındakı əşyalardan məlum olurdu ki, onlar özləri üçün burda gözəl həyat qurmağa çalışmışdılar. Bahalı əşyalar almış, zəngin ev-eşik düzəltmişdilər. Ancaq Azərbaycan əsgəri qənimləri oldu və bir gün "bizim diyarda nə işiniz var" deyib haqq-hesab sordu. Bu məqamda Azərbaycan Prezidentinin "əgər erməni əsgəri ölmək istəmirsə, rədd olsun Azərbaycan torpaqlarından!" sözlərini xatırladım. Hər əşya nəyisə xatırladırdı. Qalın bir qeyd kitabını ayağımla vərəqlədim. Özgə torpağında lövbər salan, rahatlıq axtaran bir hərbçinin mənfur niyyəti onun qələminin mürəkkəbində belə aydın sezilirdi. İkrah hissi ilə baxdığım geyimlər arasında təzə uşaq gödəkçəsi isə məni xəyalən Xocalıya qaytardı. Qar üstündə işgəncəli meyiti qalan Azərbaycan balası... Ehhh, erməni yarası ürəyimizdə o qədər dərindir ki, hələ də intiqam hissi ilə yaşayırıq. Səfərimiz yekunlaşır və geri qayıdırıq. Yol boyu qarşımıza yüzlərlə yol işçisi çıxır, müxtəlif istiqamətlərdə yol çəkdiklərinin şahidi oluruq. Həmin yollarla bərpa olunmuş, yeni həyat qurulmuş əraziyə yenidən qayıtmaq arzusu ilə üzü Bakıya gəlirik.

P.S.Əziz oxucular, Suqovuşandan, Talış kəndindən, erməni faşistlərinin sinəsinə çalın-çarpaz dağ çəkdiyi sıra dağlarımızdan reportaj verən Şəlalə Məhyəddinqızının şəklini həmkarları çəkib. Amma Qarabağımıza doğan günəşi və o İstiqlal Günəşinə doğru yürüyən əsgərlərimizin qoyduğu Zəfər izini Şəlalə xanımın özü lentə alıb.
Butov.az

Azərbaycanda son sutkada koronavirus (COVID-19) əleyhinə 49 294 vaksin vurulub.

Bu barədə Nazirlər Kabineti yanında Operativ Qərargahdan məlumat verilib.

Məlumata görə, bir gündə birinci mərhələ üzrə vaksinasiya olunanların sayı 35 859, ikinci mərhələ üzrə vaksinasiya olunanların sayı 13 435 nəfərdir.

Ölkədə vurulan vaksinlərin ümumi sayı 9 518 912, birinci mərhələ üzrə vaksinasiya olunanların ümumi sayı 5 154 936, ikinci mərhələ üzrə vaksinasiya olunanların sayı isə 4 363 976 təşkil edir.

Bütöv.az

44 günlük müharibə zamanı Azərbaycan ordusu Ali Baş Komandan İlham Əliyevin liderliyi ilə işğala son qoydu, regionu separatizmdən təmizlədi, terrorçulara layiq olduqları cəzanı verdi. Beləliklə, dövlətimiz tərəfindən keyfiyyətcə yeni mərhələnin, yeni reallıqlar kontekstində sürətli inkişaf və quruculuq dövrünün təməli atıldı.

Prezident İlham Əliyevin yürütdüyü uzaqgörən siyasət, uzun illər ərzində atılmış strateji addımlar qələbəmizi şərtləndirməklə bərabər post-konflikt dövründə Azərbaycanın zəruri həmlələri yerinə yetirə bilməsi üçün dövlətimizin iqtisadi qüdrətini də artırdı.

Odur ki, bu gün bütün dünyanın gözü qarşısında Azərbaycan dövlətinin ortaya qoyduğu qüdrəti, Qarabağda ildırımsürətli bərpa və quruculuq işlərinin təməli hələ müharibədən uzun illər əvvəl böyük məharətlə konsepsiya şəklinə salınmış siyasi xəttin təzahürü olaraq qarşımıza çıxdı.

Ancaq bütün bunlar təsadüf deyil. Çünki Azərbaycan ordusunun döyüş meydanındakı şanlı qələbəsinin də, regionumuzdakı yeni reallıqların da müəllifi eynidir: Ali Baş Komandan İlham Əliyev və onun liderlik keyfiyyətləri, sərkərdəlik fəaliyyəti, diplomatik məharəti, dəqiq hesablanmış strateji və taktiki qərarları.

Müharibənin başa çatması ilə birlikdə Azərbaycan dövlətinin qarşısında dayanan prioritet məsələlərdə də dəyişiklik oldu. Bir vaxtlar bir nömrəli hədəf ərazi bütövlüyümüzün bərpası idisə, hazırda bu məqsədə nail olan Azərbaycan dövləti bütün diqqətini Qarabağ və Şərqi Zəngəzurun sürətlə dirçəlməsinə yönəldib. Üstəlik bu addımlar yalnız cari şəraitə uyğun yox, gələcək planlar nəzərə alınmaqla yerinə yetirilir.

Haqlı olaraq deyə bilərik ki, Azərbaycan Prezidenti İlham Əliyevin öndərliyi ilə Qarabağ və Şərqi Zəngəzurun bütöv Azərbaycanla birgə gələcəyi sağlam əsaslar üzərində qurulur. İlham Əliyevin son səfərlərinə diqqət yetirsək görərik ki, son bir ay ərzində işğaldan azad edilmiş ərazilərə (Tərtərin Suqovuşan və Talış kəndləri, Cəbrayıl, Xocavənd, Füzuli, Zəngilan, Qubadlı) səkkiz səfər edib. Bundan başqa, Vətən müharibəsi dövründə ciddi dağıntılara məruz qalmış Bərdə və Tərtərin müxtəlif yaşayış məntəqələrində olub. Buna səbəb isə İlham Əliyevin memarı olduğu Qarabağ və Şərqi Zəngəzurun yeni mənzərəsinin formalaşması prosesinə şəxsən nəzarət etməsidir.

Müharibədən sonrakı dövrdə qısa zaman ərzində ölkəmizin imkanları hesabına, dost ölkələrin nüfuzlu şirkətlərini cəlb etməklə bir beynəlxalq hava limanının tikilib istifadəyə verilməsi, yaxın perspektivdə daha iki hava limanının tikintisinin nəzərdə tutulması, işğaldan azad olunmuş əraziləri bir-birinə bağlayan müasir yol-nəqliyyat infrastrukturunun yaradılması, Azərbaycanın əsas hissəsini Naxçıvan və daha sonra qardaş Türkiyə ilə bağlayacaq Zəngəzur dəhlizinin əsasının qoyulması və son nəticədə bölgənin beynəlxalq logistika mərkəzinə çevrilməsi potensialının yaradılması, habelə enerji təminatı məsələlərinin həll edilməsi, ən qabaqcıl texnologiyalar əsasında yaşayış məskənlərinin və istehsal obyektlərinin yaradılması istiqamətində görülən işlər İlham Əliyevin formalaşdırdığı yeni reallığın konturlarını aydın göstərir.

Bu reallığın müəllifi olan Prezident İlham Əliyevin post-konflikt dövründə əsas məqsədi işğaldan azad olunmuş əraziləri ən müasir standartlara uyğun bərpa etməklə yanaşı, yaranmış geniş imkanları həm də Azərbaycanın regionda yeni strateji maraqlarının təmin edilməsi üçün səfərbər etməkdir.

İşğal illərində törədilmiş vəhşilikləri, dağıntıları aradan qaldırmaq üçün görülən işlər sözügedən regiona qısa vaxt ərzində dinc həyatın qayıtması, regionun iqtisadi potensialının formalaşdırılmasına xidmət edir. Qarabağın və Şərqi Zəngəzurun yeni yaranan mənzərəsi təkcə quruculuq işləri ilə kifayətlənmir, həm də sonradan regionun özünün inkişaf zəncirinin ən mühüm həlqələrindən birinə çevrilməsini ehtiva edir.

Sözsüz ki, bu prosesdə ən mühüm məqamlardan biri dövlət başçısının Türkiyə Prezidenti Rəcəb Tayyib Ərdoğanla birlikdə əsasını qoyduğu Zəngəzur dəhlizidir. İstər bu dəhliz, istərsə də Qarabağ və Şərqi Zəngəzurda həyata keçirilməsi planlaşdırılan digər nəqliyyat və kommunikasiya layihələri yekun nəticədə bu gün demək olar ki, sıfırdan qurulan bölgənin gələcəkdə bütün Cənubi Qafqazda tərəqqi və inkişafın lokomotivinə çevrilməsini hədəfləyir.

Göründüyü kimi İlham Əliyevin rəhbərliyi ilə Azərbaycan dövləti bu gün işğaldan azad olunmuş ərazilərdə, əslində bütün regionumuzun parlaq gələcəyini çox həssaslıqla inşa edir. Bu işdə dövlət başçısı hər zaman olduğu kimi Azərbaycan dövlətinin maraqlarını və doğma xalqının rifahını özünə rəhbər tutur.

Görülən işlər eyni zamanda Azərbaycanın beynəlxalq miqyasda nüfuzuna da müsbət mənada təsir göstərir. Çünki təcavüzkar Ermənistanın fəaliyyətinin nəticəsi olan xarabalıqlar, yerlə-yeksan edilmiş yaşayış məntəqələri yenidən yaradılır, Azərbaycan dövləti beynəlxalq arenada məhz regionun tərəqqisinin bayraqdarı funksiyasını yerinə yetirən bir dövlət kimi tanınmağa başlayır.

Prezidentin müəllifi olduğu yeni reallıqlar və Qarabağla Şərqi Zəngəzurda ortaya çıxan son mənzərə Azərbaycanın uğurlu inkişaf modelini bütün ölkələr üçün nümunəyə çevirir. Bütün dünya bir daha görür ki, uzaqgörən siyasət, vaxtında atılmış strateji vacib addımlar, ən əsası xalqın və dövlətin maraqlarını hər şeydən üstün tutan bir anlayış yekunda bütün cəbhələrdə qələbə qazanır. Elə bir qələbə ki, sonradan sürətli inkişafın və tərəqqinin təməlinə çevrilir.

Bütöv.az

Vətən müharibəsi şəhidi polkovnik Babək Səmidlinin adından “Instagram” sosial şəbəkəsində saxta hesab açıb insanların etibarından sui-istifadə edərək pul yığılması ilə bağlı Daxili İşlər Nazirliyinə edilən çoxsaylı müraciətlər əsasında araşdırmalara başlanılıb.

Bu barədə Daxili İşlər Nazirliyi məlumat yayıb.

Bununla əlaqədar həyata keçirilən əməliyyat-texniki tədbirlər nəticəsində müəyyən edilib ki, həmin səhifə Bərdə rayon sakini, yetkinlik yaşına çatmadığına görə şərti adı Amal Şirinzadə olan şəxs tərəfindən yaradılıb. Saxlanılaraq baş idarəyə gətirilən həmin şəxs “Instagram” sosial şəbəkəsində “sehid_polkovnik_babek_semidli” adlı səhifə yaratdığını etiraf edib.

Araşdırma zamanı müəyyən edilib ki, həmin şəxs səhifədə şəhidlərin adına ehsan veriləcəyi ilə bağlı elan yerləşdirərək izləyicilərdən pul toplayıb. Amal Şirinzadə yardım məqsədi ilə ona müraciət edən sosial şəbəkə istifadəçilərinə bank kartı göndərərək pulun ora köçürülməsini tələb edib. Daha sonra o, pulları kartdan çıxararaq nağdlaşdırıb və şəxsi istifadəsi üçün xərcləyib. Amal Şirinzadənin yaşadığı mənzilə baxış keçirilən zamanı iş üzrə əhəmiyyət kəsb edən elektron məlumatlar, istifadəsində olan mobil telefon, həmçinin digər məlumat daşıyıcıları aşkar olunaraq götürülüb.

Qeyd olunan faktın tam, hərtərəfli araşdırılması istiqamətində araşdırmalar davam etdirilir.





Bütöv.az