29-10-2021, 23:03
Donbasda vəziyyət qəfil niyə gərginləşib? Məsələ burasındadır ki, bizdə olduğu kimi bu problemlə bağlı da “Minsk formatı” mövcuddur.
Ancaq bu bizim nümunəmizdə olduğu kimi mənasız formatdır, Ukrayna torpaqlarının işğalını uzadır. Vladimir Zelenski prezident seçiləndə müharibə istəmirdi. Ancaq sonda o da anladı ki, güc olmadan problem ölü nöqtədən tərpənməyəcək. Ukrayna ordusu son illərdə güclənib, yeni və modern hərbi texnika ilə təhciz olunub.
İkinci tərəfdən Azərbaycanın İkinci Qarabağ müharibəsindəki qələbəsi də Ukrayna hakimiyyətini, siyasi elitasını və cəmiyyətini yaxşı mənada ruhlandırıb. Ancaq Azərbaycanın arxasında Türkiyə var idi, təzyiqləri neytrallaşdırır, hərbi təcrübəsiylə bölüşürdü. Ukraynanı isə sözdə dəstəkləyənlər olsa da, əməldə Qərbdən Kiyevə real dəstək azdır. Tam əksinə, Ukraynanın bu ağır günündə Paris və Berlin açıqlama veriblər ki, “Sən niyə separatçılara qarşı “Bayraqdar” pilotsuz uçuş aparatlarından istifadə etmisən?”. Bu açıqlama ilə Paris və Berlin Moskvanın əlinə yağ sürtüblər, o biri tərəfdən bu iki paytaxtı Ukrayna-Türkiyə tərəfdaşlığı narahat edir. Bir sözlə, Ukraynaya çətin olacaq, ancaq boş danışıqdansa Ukraynanın Azərbaycan kimi irəli getməkdən başqa alternativ yoxdur.
29-10-2021, 18:13
Xəbər verdiyimiz kimi, Serbiyanın paytaxtı Belqradda boks üzrə dünya çempionatı keçirilir.
Bütöv.az-ın xəbərinə görə, bu yarışda 2013-cü ildə dünya çempionu olmuş Cavid Çələbiyevin iştirak etməməsi təəccüblə qarşılanmışdı.
Biz federasiya vasitəsilə dəqiqləşdirmişdik ki, 63,5 kq çəki dərəcəsində onun yerinə Malik Həsənovun aparılması səbəbsiz deyil. Belə ki, həmin idmançı sparrinq görüşündə həmkarına uduzub. Lakin 29 yaşlı Cavid saytımıza bir neçə gün əvvəlki açıqlamasında heç kimə uduzmadığını, sadəcə “para” kimi Maliklə döyüşdüyünü və yenə də özünü bir nömrə saydığını bildirmişdi.
Məsələ ilə bağlı Oxu.Az Cavid Çələbiyevin yalanını üzə çıxarıb. Videoda görünür ki, milli məşqçiləri hər iki idmançı üçün sparrinq döyüş keçirdir və burada Malik Həsənov qalib gəlir.
Həmin videonu təqdim edirik:
29-10-2021, 17:34
Son günlər ölkəmizdə koronavirusa yoluxanların sayında artım müşahidə olunur. Mütəxəssislər tərəfindən yumşaldılmalardan sonra yoluxmalarda artım olacağı ilə bağlı proqnoz verilmişdi.
Pandemiyanın ilk vaxtlarından fərqli olaraq indi əhali arasında viurusla mübarizə təcrübəsi daha da artıb. Demək olar hər kəs koronavirusa yoluxanda hansı dərmanlardan istifadə etmək, hansı analizləri vermək lazım olduğunu bilir. Koronavirusa yoluxanların minimum nə qədər xərci çıxır bu barədə hesablama aparmağa çalışdıq.
Bütöv.az bildirir ki, yeniavaz.com müalicə üçün istifadə olunan dərmanların, analizlərin və tibb xidmətlərinin qiymətlərini araşdırıb.
Əvvəlcə COVID-19-a yoluxmuş şəxslərin evdə müalicəsi ilə bağlı TƏBİB-in məlumatları ilə tanış olaq.
COVID-19 xəstələrin evdə müalicə sxemi belədir:
Arbidol 200 mg x 3 dəfə 10 gün – qiyməti 13 manat
Vit C tablet 1000 mg x 4 dəfə 10 gün – qiyməti 15 manat
Vit D 20 mg/2000 günaşırı 2 ay – qiyməti 15 manat
Zink 25 mg 1 dəfə 10 gün – qiyməti 10 manat
Asetilsistein 600 mg gündə 1 dəfə; - qiyməti 15 manat
Temperatur ≥37.5 olarsa:
Azitromisin 500 mg x 1 dəfə ilk gün, 250 mg gündə 1 dəfə 4 gün; - qiyməti 8 manat
Paracetamol 500 mg gündə maximum 4 dəfə (hərarət olduqda) – qiyməti 4 manat
Və xəstələrə vurulan “sistem” və antibiotiklər – qiyməti 120 manat
Bundan başqa demək olar bütün xəstələr KT-yə (Kompüter Tomoqrafiyası) müraciət edir. KT-nin qiyməti 100 manat arasında dəyişir.
Tibb xidmətinin xərci isə əsasən tibb bacılarının xidmətinə görə verilir. Paytaxtda vurulan “sistem”in qiyməti 30 manat civarındadır. Bir xəstə minimum 20 “sistem” vurulursa, bunun qiyməti 600 manat edir.
Yuxarıda yuvarlaq yazdığımız qiymətlərin toplamı 900 manat edir.
Qeyd edək ki, dərmanlar, "sistem", antibiotiklərin sayı və qiyməti ilə bağlı rəqəmlər ümumi hesablanmışdır.
29-10-2021, 17:18
Azərbaycan Mərkəzi Bankı (AMB) manatın məzənnəsi, ölkədə yenidən devalvasiya olacağı barədə fikirlərə münasibət bildirib.
Bütöv.az Report-a istinadən xəbər verir ki, bu barədə qurumun sədri Elman Rüstəmov keçirdiyi mətbuat konfrasında danışıb.
"Biz medianı izləyirik. Mənə də maraqlıdır ki, belə başlıqlarla yazılan xəbərlər haradan yaranır. Bu iddiaların heç biri peşəkar şəxslərin deyil. Mövcud makroiqtisadi şərait iqtisadi inkişafı dəstəkləyir. Biz tədiyyə balansında əhəmiyyətli profisit gözləyirik. Bildiyiniz kimi, beynəlxalq təşkilatlar neftin qiyməti proqnozunu əhəmiyyətli dərəcədə qaldırıb. Bu gün Milli Məclisdəki sənədlər İqtisadi Şurada müzakirə olunub. Manatın məzənnəsinə heç bir təhdid və təzyiq yoxdur. Əksinə, manatın məzənnəsinin möhkəmlənməsinin əhəmiyyətli təzyiqi var. Bu, bizim iqtisadi strategiyamıza uyğun deyil. Ona görə də ilin sonuna qədər bu təzyiqin azalması gözlənilir. Əhalini belə qeyri-professional yazılarla həyəcanlandırmaq lazım deyil. Mən hamını ciddi sosial məsuliyyətə dəvət edirəm", - o qeyd edib.
"Təxminən 5-6 ildir ki, manatın məzənnəsi ilə bağlı belə proqnozlar verilir. Adətən ilin sonunda və ya əvvəlində belə şaiyələr yayılır. Hesab edirəm ki, biz insanları qorumalıyıq. Ötən ilin yanvarında yayılmış şaiyələrin hesabına insanlar koronavirusun ən yüksək vaxtında bankların qarşısında dayandılar. İnsanlar öz planlarını müsbət proqnoz üzərində qurmalıdır. Mən arzu edirəm ki, peşəkar iqtisadçı jurnalistikamız olsun. Son zamanlar bu proses getməkdərir. Siz analiz edin ki, son 5 ildə belə iddialar yayılıb və nəticəsi nə olub. Açıq deyim ki, hökumətlə, AMB ilə münasibətlərin də öz etik həddi var. Əgər hansısa qərar olsa qurum özü məlumat yayar", - E.Rüstəmov əlavə edib.
29-10-2021, 17:15
Daxili İşlər Nazirliyi tərəfindən bank kartlarından pul vəsaitlərinin oğurlanması və elektron məlumatların onlayn yolla ələ keçirilməsi barədə vətəndaşlardan daxil olan şikayətlər əsasında əməliyyatlar davam etdirilir.
DİN-dən Bütöv.az-a verilən məlumata görə, nazirliyin Baş Mütəşəkkil Cinayətkarlıqla Mübarizə İdarəsinin əməkdaşlarının həyata keçirdikləri növbəti əməliyyat-texniki tədbirlər nəticəsində müəyyən edilib ki, paytaxt sakini, yetkinlik yaşına çatmadığına görə şərti adı Əlizamin İslamov olan şəxs müxtəlif kibercinayətkarlıq üsullarından istifadə edərək İnstaqram sosial şəbəkəsində “baxıcı_falcı_arzu” adlı saxta səhifə yaradıb.
O, guya internet üzərindən falçılıq xidmətləri təklif etməklə müraciət edən vətəndaşlara ödənişin onlayn qaydada olduğunu bildirib. Əlizamin İslamov səhifəyə müraciət edən şəxslərə müxtəlif bank və ödəniş saytlarının rəsmi prototiplərinə uyğun özünün hazırladığı saxta nümunələri təqdim etməklə zərərçəkənlərin kart məlumatlarını ələ keçirib. Araşdırma zamanı müəyyən edilib ki, adıçəkilən şəxs fəaliyyət göstərdiyi 5 ay ərzində ona müraciət edən 300-ə yaxın vətəndaşa məxsus kart məlumatlarını ələ keçirərək həmin hesablardan vəsaitləri açdığı elektron pul kisələrinə köçürüb.
Daha sonra şəxsi məqsədləri üçün həmin vəsaitlərlə onlayn alış-veriş edərək pulları nağdlaşdırıb. Əlizamin İslamov bu müddət ərzində vətəndaşların hesablarından 100 min manata yaxın pulu çıxararaq xüsusi proqramlar vasitə ilə ələ keçirib. Bundan əlavə Əlizamin İslamov öz qanunsuz əməllərinin miqyasını genişləndirmək, daha çox pul vəsaiti ələ keçirmək və virtual mütəşəkkil cinayətkar dəstə yaratmaq məqsədi ilə Teleqram ani mesajlaşma tətbiqində özünə məxsus kanal yaradıb. Orada həmin şəxs kart məlumatlarını ələ keçirmək üçün kibercinayət üsulları barədə kanalın izləyicilərinə müxtəlif onlayn təlimlər keçib.
Saxlanıldıqdan sonra onun yaşadığı mənzilə baxış keçirilən zamanı iş üzrə xüsusi əhəmiyyət kəsb edən elektron məlumatlar, istifadəsində olan mobil telefonlar, həmçinin digər məlumat daşıyıcılarından vətəndaşlara onlayn yolla göndərdiyi mesajlar və digər sübutlar aşkar olunaraq götürülüb.
Saxlanılan şəxs təkzibedilməz faktlar və sübutlar qarşısında törətdiyi əməlləri etiraf edib. Qeyd olunan xüsusatların tam, hərtərəfli araşdırılması istiqamətində əməliyyat-texniki və əməliyyat-istintaq tədbirləri davam etdirilir.
Bir daha vətəndaşlara müraciət edərək bildiririk ki, şəxsi anket və bank kartlarındakı məlumatları heç bir halda tanmadıqları şəxslərə göndərməsinlər. Bu cür hallarla üzləşdikləri təqdirdə isə dərhal polis əməkdaşlarına, həmçinin Nazirliyin sosial şəbəkələrdəki rəsmi səhifələrinə məlumat versinlər.
29-10-2021, 17:11
2021-ci ilin döyüş hazırlığı planına əsasən Azərbaycan Ordusunda “Ən yaxşı artilleriya divizionu” adı uğrunda yarış keçirilir.
Bu barədə Müdafiə Nazirliyi məlumat yayıb.
Bildirilib ki, yarışa cəlb olunan divizionların tədris-material bazası və şəxsi heyətin təchizatına baxıldıqdan sonra hərbi qulluqçuların hazırlıq səviyyəsi yoxlanılaraq fərdi və qrup şəklində normativlər qəbul edilir.
Daimi dislokasiya məntəqələrini həyəcan siqnalı ilə tərk edən bölmələr təyin olunmuş marşrutlarla hərəkət edərək atəş mövqelərini tutur.
Yarışın tələblərinə uyğun olaraq müəyyən olunmuş vaxt çərçivəsində artilleriya qurğuları atəş vəziyyətinə gətirilir, planlı və plandankənar hədəflərə döyüş atışları yerinə yetirilir.
Bütöv.az
29-10-2021, 16:38
Prezident İlham Əliyev Zəngəzur dəhlizi ilə bağlı rəsmi “Twitter” hesabında paylaşım edib.
Paylaşımda deyilir:
“Şərqi Zəngəzur bölgəsində yerləşən Zəngilandan keçən Zəngəzur dəhlizi bütün türk dünyasını birləşdirəcək. Həm Azərbaycan, həm Türkiyə Zəngəzur dəhlizinin gerçəkləşməsi üçün əməli addımlar atır. Əminəm ki, bu addımlar yaxın gələcəkdə öz bəhrəsini verəcək”.
Bütöv.az
29-10-2021, 14:06
Prezident İlham Əliyev ""Azərbaycan Sənaye Korporasiyası” Açıq Səhmdar Cəmiyyətinin bəzi müəssisələrinin və balansında olan obyektlərin özəlləşdirilməsi haqqında" sərəncam imzalayıb.
Axar.az xəbər verir ki, Sərəncam dövlətin idarəetməsində olan müəssisələrin inkişaf etdirilməsi, onların fəaliyyətinin səmərəliliyinin artırılması və özəl investisiyalar hesabına canlandırılması məqsədilə qərara alınıb.
Sərəncama əsasən, “Azərbaycan Sənaye Korporasiyası” Açıq Səhmdar Cəmiyyətinin aşağıdakı müəssisələri və balansında olan obyektlər özəlləşdirilməyə açıq elan ediliblər:
- bu Sərəncamın əlavəsində göstərilən hüquqi şəxslər;
- siyahısı Azərbaycan Respublikasının İqtisadiyyat Nazirliyi tərəfindən Cəmiyyətlə razılaşdırılmaqla müəyyən edilən əmlak kompleksləri və qeyri-yaşayış binaları (torpaq sahələri ilə birlikdə), qeyri-yaşayış sahələri.
Müəyyən edilib ki, bu Sərəncamın 1-ci hissəsi ilə özəlləşdirilməyə açıq elan edilmiş müəssisə və obyektlərin:
- özəlləşdirilməsi üsulları barədə qərarları, onların xüsusiyyətləri nəzərə alınmaqla, Azərbaycan Respublikası Prezidentinin 2000-ci il 10 avqust tarixli 383 nömrəli Fərmanı ilə təsdiq edilmiş “Azərbaycan Respublikasında dövlət əmlakının özəlləşdirilməsinin II Dövlət Proqramı”nın (bundan sonra – Dövlət Proqramı) 4.1-ci bəndinə uyğun olaraq Azərbaycan Respublikasının İqtisadiyyat Nazirliyi qəbul edir;
- özəlləşdirilməsində yerli investorlarla yanaşı xarici investorların da iştirakına icazə verilir.
İqtisadiyyat Nazirliyi müəssisə və obyektlərin özəlləşdirilməsini Dövlət Proqramına uyğun olaraq həyata keçirməlidir.
Nazirlik özəlləşdirmə prosesində müəssisə və obyektlərin investorlar üçün cəlbediciliyinin artırılması məqsədilə məsləhətçi və qiymətləndirici şirkətlər cəlb etməklə onların restrukturizasiyasını (birləşdirilməsi, bölünməsi və digər səmərəli formada yenidən təşkili) təmin etsin, habelə borclarının restrukturizasiyasına və ya silinməsinə (dondurulmasına) dair təkliflərini Nazirlər Kabinetinə təqdim etməlidir.
Həmçinin bu Sərəncamdan irəli gələn digər məsələləri həll etməlidir.
Cəmiyyət isə müəssisə və obyektlər özəlləşdirilənədək onların idarə olunmasını və əmlakının qorunub saxlanılmasını təmin etməli və bu Sərəncamdan irəli gələn digər məsələləri həll etməlidir.
Nazirlər Kabineti bu Sərəncamdan irəli gələn məsələləri həll etməlidir.
Cəmiyyətin özəlləşdirilməyə açıq elan edilən müəssisələrinin siyahısı aşağıdakılardır:
1. “ASK Şüşə” Məhdud Məsuliyyətli Cəmiyyəti;
2. “ASK Ayaqqabı Fabriki” Məhdud Məsuliyyətli Cəmiyyəti;
3. “Azəripək” Məhdud Məsuliyyətli Cəmiyyəti;
4. “ASK Tekstil” Məhdud Məsuliyyətli Cəmiyyəti;
5. “ASK İzolit” Məhdud Məsuliyyətli Cəmiyyəti;
6. “ASK Şəki SES” Məhdud Məsuliyyətli Cəmiyyəti;
7. “ASK Şəki Şərab” Məhdud Məsuliyyətli Cəmiyyəti.
29-10-2021, 12:20
5-7 noyabr tarixlərində iki illik aradan sonra cüdo üzrə “Böyük Dəbilqə” turniri Bakıda keçiriləcək.
Bütöv.az-ın xəbərinə görə, bu yarışda meydan sahibi olduğumuzdan, Azərbaycanı ən çox idmançı təmsil edəcək.
Belə ki, 33 cüdoçunun adı turnir üçün sifariş olunub. Bunlardan 25-i kişi, 8-i qadın cüdoçulardır.
Heyətdə dəyişikliklər var. Məsələn, kişilərdə Kəramət Hüseynov (-60 kq), Murad Fətiyev (-81 kq), Zelim Kotsoyev (-100 kq) müəyyən səbəblərdən yığmaya çağırılmayıb. Davud Məmmədsoy (-60 kq) və Elmar Qasımov (-100 kq) isə yığmadan uzaqlaşdırılıb.
Qadın millimizdə Leyla Əliyeva (-48 kq) və Gültac Məmmədəliyevanın (-52 kq) çağırılmaması diqqət çəkir. Son Olimpiadada cüdo üzrə yeganə mükafatçımız İrina Kindzerskayanın (+78 kq) iştirak etməməsi yarışda bu çəkidə təmsilçimizin olmamasına işarə edir. Ən diqqətçəkən məqam isə uzun fasilədən sonra Monqolustan əsilli cüdoçumuz İçinxorloo Munxtsedevin yığmaya qayıdışıdır.
Kişilər: Balabəy Ağayev, Rövşən Əliyev, Əhməd Yusifov, Turan Bayramov (hamısı -60 kq), İbrahim Əliyev, Orxan Səfərov, İsmayıl İbrahimov, Tofiq Məmmədov (hamısı -66 kq), Hidayət Heydərov, Rüstəm Orucov, Telman Vəliyev, Rüfət Məmmədov (hamısı -73 kq), Elcan Hacıyev, Ömər Rəcəbli, Kərim Məmmədov, Hasil Cəfərov (hamısı -81 kq), Rüfət İsmayılov, Vüqar Talıbov, Məmmədəli Mehdiyev (hər üçü -90 kq), Adil Kərimli, Ruslan Nəsirli, Kənan Abdullaxanlı (hər üçü -100 kq), Uşanqi Kokauri, Camal Feyziyev, Hüseyn Məmmədov (hər üçü +100 kq)
Qadınlar: Aişə Qurbanlı, Şəfəq Həmidova (hər ikisi -48 kq), Zeynəb Məmmədova, Ülviyyə Bayramova (hər ikisi -52 kq), İçinxorloo Munxtsedev (-57 kq), Aytac Qardaşxanlı (-63 kq), Günel Həsənli, Südabə Ağayeva (hər ikisi -70 kq)
Qeyd edək ki, bu yarışda 31 ölkədən 208 cüdoçu (137 kişi və 71 qadın) mübarizə aparacaq. Yarış iştirakçılarından ən reytinqliləri Vaja Marqvelaşvili (Gürcüstan) və Tsoqtbaatar Tsend-Oçirdir (Monqolustan).
29-10-2021, 11:47
Qətlə görə 10 il azadlıqdan məhrum edilən general-leytenantın fəxri adının saxlanması və rütbəsindən məhrum olunmaması gələcəkdə əfvə salınması üçün rol oynaya bilər; vəkil və polkovnikdən ilginc mövqe
Məlum olduğu kimi, Bakı Hərbi Məhkəməsində sabiq birlik komandiri, general-leytenant Rövşən Əkbərovun cinayət işi üzrə məhkəmə prosesi başa çatdı və 10 il müddətinə azadlıqdan məhrum edildi. R.Əkbərov 20 il öncə Kiyevdə azərbaycanlı iş adamı Elçin Əliyevi qətlə yetirməkdə təqsirli bilinib. Ukrayna prokurorluğu hələ 2003-cü ildə Azərbaycan Baş Prokurorluğuna məktub göndərərək 29 yaşlı Əliyevin qətlində generalın iştirakını təsdiqləyən sübutların olduğunu yazırdı. Həmin sübutlar da daxil olmaqla, cinayət işinin materialları istintaqın davam etdirilməsi üçün Azərbaycana göndərilmişdi. İş əvvəlcə Hərbi Prokurorluqda, daha sonra Baş Prokurorluğun Ağır Cinayətlərə Dair İşlər üzrə İstintaq idarəsində araşdırılsa da, bir müddət sonra icraat dayandırılmışdı.
Maraqlıdır ki, məhkəmə R.Əkbərovun hərbi rütbəsinin və fəxri adlarının alınmasını zəruri hesab etməyib. Buna səbəb işdə hərbi rütbənin alınması ilə bağlı təqdimat olmadığı göstərilib. Bunu R.Əkbərova qarşı bir jest kimi qiymətləndirmək olar.
İndiyədək bir sıra şəxslər, məsələn, Rasim Əkbərov Milli Qəhrəman və “Azərbaycan Bayrağı” ordenindən məhrum edilib. R.Əkbərov dövlət çevrilişinə cəhddə günahlandırılıb və 15 illik həbs cəzası alıb. Surət Hüseynov da eyni aqibəti yaşayıb. 1994-cü il oktyabrın 14-də Milli Məclis onun cinayət məsuliyyətinə cəlb olunmasına, barəsində həbs-qətimkan tədbiri seçilməsinə razılıq verilməsi və Milli Qəhrəmanı adından məhrum edilməsi barədə qərar qəbul edib. Habelə, Naxçıvanın həbs edilən sabiq daxili işlər naziri Əhməd Əhmədov da daxili xidmət general-mayoru, polis general-leytenantı ali-xüsusi rütbəsindən, general-leytenant ali hərbi rütbəsindən və “Azərbaycan Bayrağı” ordenindən mərhum edilib. Amma Rövşən Əkbərovun fəxri adları əllərindən alınmayıb. Bu qərar onun həbs müddəti başa çatmazdan əvvəl azadlığa buraxılmasında rol oynayacaqmı? Qanun nə deyir, o, fəxri ad və rütbədən məhrum olunmalıydımı?
Əsabəli Mustafayev
Hüquqşünas Əsabəli Mustafayevin bildirdiyinə görə, Müdafiə Nazirliyi tərəfindən məhkəməyə təqdimat verilməliydi. Onun fikrincə, əgər təqdimat verilməyibsə, bu göstərir ki, R.Əkbərovu təqsirli saymayanlar da var, yaxud günahkar sayırlar, sadəcə, şəxsiyyətinə və Milli Qəhrəman adı almasına görə cəzasının ağır olmasını istəmirlər. “Onsuz da Rövşən Əkbərova çox ağır cəza verilməyib. Onun ”OMON"çuların işində iştirakı olub, indi deyə bilmərəm ki, bu məsələ nə dərəcədə rol oynayıb, lakin görünür ki, ümumi razılaşma var, Rövşən Əkbərovu tam batırmaq istəmirlər. Digər tərəfdən, özü də başa düşsün ki, ona müəyyən üstünlük saxlanılıb. Hər halda, general-leytenantdır", - deyə Ə.Mustafayev qeyd etdi. Vəkil hesab edir ki, fəxri adın saxlanması və rütbəsindən məhrum olunmaması R.Əkbərovun gələcəkdə əfvə salınması üçün rol oynaya bilər: “Onun döyüş yoldaşları, yaxın şəxslər, yaxud özü əfvə düşməsi üçün müraciət edə bilər. Mənə elə gəlir ki, bir neçə il sonra onun əfvi mümkündür”.
Üzeyir Cəfərov
Polkovnik Üzeyir Cəfərovun sözlərinə görə, R.Əkbərov təcrübəli general olub: “Füzuli istiqamətində döyüşlərdə bərabər olmuşuq. Rövşən Əkbərov Azərbaycan Ordusu üçün hərbçi kimi bacarıqlı generallardan biridir. Onun keçmiş Baş Qərargah rəisi ilə münasibətləri gərgin olub, bəzi qərarlarla razılaşmayıb. Bir hərbçi kimi Əfqanıstanda döyüşüb, Qarabağ döyüşlərində xidmətləri olub. Yəni mən ona bir hərbçi kimi qiymət verə bilərəm”. Ü.Cəfərov R.Əkbərovun göstərilən müddəti axıra qədər həbsdə qalacağını düşünmür və əfvini istisna etmir: “Yaxınları əfv üçün müraciət edə bilərlər”.
Qeyd edək ki, 56 yaşlı general-leytenant Rövşən Əkbərov Bakı və Şəmkir korpuslarının komandiri olub. O, 2021-ci ilin fevralının əvvəllərində müdafiə nazirinin əmri ilə ehtiyata göndərilib. R.Əkbərov Bakıdakı 42 saylı orta məktəbdə, daha sonra Cəmşid Naxçıvanski adına hərbi məktəbdə təhsil alıb. 1982-ci ildə Kiyev Ali Ümumqoşun Komandirləri Məktəbinə daxil olub. 1986-cı ildə təyinatla Zaqafqaziya hərbi dairəsi komandanlığının sərəncamına göndərilib. Bir il sonra xidmət etdiyi ordunun tərkibində Əfqanıstana ezam olunub. 1988-ci ildə Zaqafqaziya Hərbi Dairəsinə qayıdan R.Əkbərov 1989-cu ildə xidmət etdiyi alayda bölük komandiri vəzifəsinə təyin edilib.
Birinci Qarabağ müharibəsində iştirak edən Rövşən Əkbərov 1995-ci il mart hadisələri zamanı Xüsusi Təyinatlı Polis Dəstəsinin zərərsizləşdirilməsində iştirak edib. O, 1999-cu ildə Bakı Ali Hərbi Dənizçilik Məktəbinin, 2002-ci ildə isə Ukrayna Hərbi Akademiyasının müdavimi olub. 2002-ci ildən general-leytenantdır. Azərbaycan Prezidentinin 5 oktyabr 1994-cü il tarixli fərmanı ilə Azərbaycanın Milli Qəhrəmanı adına layiq görülüb.(musavat.com)
Bütöv.az
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!