Rusiya helikopterlərinə

zərbə endirildi

Ukrayna hərbçiləri pilotsuz uçuş aparatları vasitəsilə Rusiyanın Voronej vilayətində yerləşdirilmiş “Mi-28” və “Mi-17” döyüş helikopterlərinə zərbə endirib.
Bu barədə Ukrayna Silahlı Qüvvələrinin Pilotsuz Sistemlər Qüvvələrinin komandanı Robert “Madyar” Brovdin məlumat yayıb.
Onun sözlərinə görə, zərbə 4 ədəd “Mi-28” və “Mi-17” helikopterinin yerləşdiyi eniş-qalxış meydançasına endirilib.
Pilotsuz Sistemlər Qüvvələrinin bölmələri Rusiyanın Voronej vilayətində, təmas xəttindən 150 kilometr məsafədə yerləşən ərazidə iki “Mi-28” və “Mi-17” helikopterini vurub. Həmin ərazidə helikopterlər yanacaqla təmin olunur, həmçinin uçuşlararası texniki baxış keçirilirdi. Zərbələr əsas pərləri yan keçərək mühərrik bölməsinin arxa mərkəzi hissəsinə endirilib”, – deyə komandan dəqiqləşdirib.
Hücum nəticəsində helikopterlərə xidmət göstərən mütəxəssislərdən azı biri həlak olub.
Qeyd edək ki, Rusiyanın “Mi-28” zərbə helikopteri zirehli texnikanın, canlı qüvvənin və aşağı hündürlükdə uçan hava hədəflərinin məhv edilməsi üçün nəzərdə tutulub. O top silahları və idarəolunan raketlərlə təchiz edilib, həmçinin günün istənilən vaxtında və mürəkkəb hava şəraitində tapşırıqları yerinə yetirə bilir.
“Mi-28” helikopterlərindən Rusiya qoşunları döyüş əməliyyatları zamanı, o cümlədən quru əməliyyatlarına dəstək məqsədilə fəal istifadə edir. “Mi-17” nəqliyyat helikopteri isə şəxsi heyətin və yüklərin daşınması, həmçinin təxliyə əməliyyatlarının icrası üçün istifadə olunur.

İsrail ordusu İran

sərhədinə yeridildi

Artıq İsrail ordusu Birləşmiş Ərəb Əmirliklərindədir. Ya koalisiya İranı vuracaq, ya da İran Dubayı...
Bu barədə politoloq Turab Rzayev məlumat yayıb. O iddia edib ki, İsrail xüsusi təyinatlıları, desantı artıq BƏƏ-nin ərazisindədir, ABŞ silahlı qüvvələri ilə birgə:
“ABŞ 20 min canlı qüvvəsini bu işğala cəlb edib. İsrail isə 1500 hərbiçisini göndərib. Əsas hədəf İranın sahilyanı neft-qaz infrastrukturunu və dəniz limanlarını ələ keçirməkdir. Müəyyən sayda xüsusi təyinatlılar isə İranın dərinliklərində işləyəcək və onların əsas hədəfi İranın nüvə sənayesini partladaraq tamamilə sıradan çıxarmaq olacaq.
Təbii ki, bütün İranı, onun iri şəhərlərini heç kim işğal etmək niyyətində deyil”.

Müharibə 25 milyarda başa gəlib

Pentaqonun məlumatına görə, İrana qarşı hərbi əməliyyat ABŞ-yə 25 milyard dollara başa gəlib.
"Reuters" xəbər verir ki, bu barədə Pentaqon rəhbərinin maliyyə məsələləri üzrə köməkçisi vəzifəsini icra edən Culs Hörst Nümayəndələr Palatasındakı dinləmələrdə bildirib.
Onun sözlərinə görə, bu vəsaitlərin böyük hissəsi döyüş sursatlarına yönəldilib.

VƏTƏNƏ SƏDAQƏT

NÜMUNƏSİ...

Dünya hərb tarixinə qızıl hərflərlə yazılan böyük zəfərlər sırasına xalqımızın adını öz qanları, canları, sağlamlıqları hesabına həkk etdirən oğullarımızın şücaəti qarşısında baş əyərək, bir yazar olaraq çiyinlərimdəki yükü qismən də olsa azaltmaq istədim...

* * *
Vətən müharibəsi yenicə başlayanda təkcə Azərbaycan mətbuatında deyil, başqa ölkələrin nüfuzlu mətbuat orqanlarında da manşetlərə belə bir xəbər çıxdı: “Türkiyədə çalışan 45 azərbaycanlı həkim hərbçilərimizə tibbi yardım göstərmək üçün Azərbaycana yola düşüb”.
Azərbaycanlı həkim heyəti 2020-ci il oktyabrın 10-da Ankaranın Esenboğa Hava Limanından yola salınmışdı.
Həkim soydaşlarımızın belə ağır, taleyüklü gündə Vətənimizə dönməsi Türkiyədəki Azərbaycanlı Həkimlər Dərnəyinin təşkilatçılığı və Azərbaycanın Ankaradakı səfirliyinin dəstəyi ilə həyata keçirilmişdi. Onların təşəbbüsü ilə qardaş ölkədə toplanan 2 tona yaxın tibbi ləvazimat da ölkəmizə gətirilmişdi.
Gənc həkimlərimiz Azərbaycana döndüklərini üçrəngli bayrağımıza bürünərək Esenboğa Hava Limanında nümayiş etdirmişdilər.
* * *
Bu yazıda haqqında bəhs edəcəyim qəhrəmanım 44 günlük Vətən müharibəsində könüllü olaraq böyük fədakarlıq göstərən, Türkiyədəki işini yarımçıq qoyub Vətənin dar gününə özünü çatdırmağı oğul borcu bilən həmin həkimlərdən biridir. O mənim əziz müəllimlərim Kamil müəllim və Kifayət müəllimənin yeganə oğul övladı, Lor-cərrah doktor Bəhruz Kamil oğlu Əhmədovdur.
Bəhruz Azərbaycan Tibb Universitetini bitirərək rezidentura təhsili almış və onu Türkiyədə tanıdan ilk Azərbaycanlı həkimdir.
Orada yaxşı işi-gücü, dostları vardı... Elə orada yüksəlişə doğru həyatına davam edə bilərdi...
2020-ci il 27 sentyabr tarixində xalqımızın Qarabağ torpaqlarının azad edilməsi yolunda savaşa qalxması Bəhruzun da damarlarında qanını coşdurdu.
Bəhruz Vətən ağrısını öz canında daşıyaraq böyüyən uşaqlardan idi. 6 yaşında dədə-baba yurdu Qubadlının Diləli Müskanlı kəndini məcburi tərk etmişdi.
Babaları isə Qərbi Azərbaycandan daşnakların xəyanəti nəticəsində bu kəndə gəlib yurd salanlardan olmuşdular. Bu ağrı böyüdükcə onu daha da göynədirdi. Və nəhayət gözlədiyi gün gəlib çatdı. Heç kəslə məsləhətləşmədən, valideynlərinə belə xəbərdarlıq etmədən qərarını verdi. Vətənpərvər həkim dostları ilə birlikdə Türkiyədəki Azərbaycanlı Həkimlər Dərnəyinin təşkilatçılığı və Azərbaycanın Ankaradakı səfirliyinin dəstəyi ilə Azərbaycana qayıdıb Vətən müharibəsində döyüşən əsgərlərimizə könüllü tibbi yardım göstərmək qərarına gəldilər.
Heç kəsə sirr deyil, bu o zamanlar idi ki, əksər imkanlı valideynlər öz övladlarını xarici dövlətlərə “təhsil, iş, müalicə” adıyla göndərərək, bu tarixi-məsuliyyətdən yaxalarını kənara çəkmişdilər. Nə xoş ki, xalqımızın Zəfər tarixinə öz adlarını ləyaqətlə yazdıran oğullar içərisində bizim dəyərli Bəhruz Əhmədov, Elçin Yəhyayev, İsmayıl Mustafazadə, Orxan Əlizadə və minlərlə belə oğullarımız var və bir ömür boyu başıuca-üzüağ gəzmək haqqını öz fədakarlıqları ilə qazanıblar.
“Qaynarinfo.az saytında bizi Böyük Zəfərimizə doğru aparan qanlı-qadalı döyüşlərin canlı şahidləri və iştirakçıları olan doktor Bəhruz Əhmədovun və anestezioloq Elçin Yəhyayevin xatirələri əsasında hazırlanan bir material oxumuşdum. Müəllif onları “tibb kəşfiyyatçıları” adlandırmaqda haqlı idi.
Cəbhənin dörd bir tərəfində qızğın döyüş getdiyi bir zamanda geyim, ərzaq və tibbi yardıma ehtiyacı olan döyüşçülərə gecə ay işığında həyatlarını təhlükəyə ataraq yardıma tələsən həkimlər həqiqətən kəşfiyyatçı idilər.
Könüllü həkim briqadasına təhlükəsizlik baxımından qaynar nöqtələrə getməyə icazə verilmədiyi üçün onlar əvvəl Füzuli şəhər xəstəxanasında fəaliyyət göstərirlər. Sonra isə inadkarlıq göstərərək, müvafiq qurumlara dəfələrlə müraciət edib Şuşada döyüş bölgəsinə ən yaxın ərazidə yerləşməyə nail olurlar. Qarajlardan birini tibb məntəqəsinə çevirib fəaliyyətə başlayırlar. Burada hər gün ən azı 30-40 yaralıya tibbi yardım göstərirlər.
Dövlətin və yerli həkimlərin də dəstəyindən yararlanaraq fəaliyyətlərini daha da genişləndirib Füzuli, Zəngilan, Qubadlı, Hadrut, Şuşa uğrunda döyüşlər zamanı ən qaynar nöqtələrə gizli yollarla gedərək yardımlarını əsirgəmirlər.
Bəhruzun və həmkarlarının ön cəbhədəki şərəfli peşə fəaliyyətləri 2020-ci il noyabrın 14-dək davam edir...
* * *
Ən çox təsirləndiyim hadisə çox böyük risk tələb edən bir addımları olmuşdu. Qubadlı rayonunun azadlığı uğrunda gedən döyüşlərdə Milli Qəhrəmanımız Əliyar Əliyevin oğlu Emin Əliyevin dəstəsinə isti geyim, dərman və tibbi ləvazimatlar apararkən düşmənin qırıcıları tərəfindən atılan bombalar yaxınlıqlarına düşsə də, xoşbəxtlikdən xəsarət almamış və yardımı çox çətinliklə çatdıra bilmişlər.
Bəhruz doktor doğulub doyunca yaşaya bilmədiyi Diləli Müskanlı kəndinə gedib evlərini, kəndi ziyarət etməyə də fürsət tapmışdı. Onu da qeyd edim ki, Bəhruz 30 il işğal altında, bizimçün əlçatmaz olan kəndimizə gedib oradan məlumatlar gətirib paylaşımlar edən ilk sakinimizdir. Ora ayaq basanda hansı hissləri keçirdiyini təsəvvür edirəm, lakin 6 yaşlı bir uşağın yaddaşına bu kəndin, evin necə həkk olunması məni çox kövrəltdi... Bu, ailədən qaynaqlanan bir örnəkdir, irsən keçən yurda bağlılıq hissidir. Əhsən belə övlad tərbiyə edən valideynlərə!..

* * *
Bəhruz doktorun atası Kamil müəllim təkcə Qubadlı rayonunun deyil, respublikamızın adlı-sanlı riyaziyyat müəllimlərindəndir. Onun zəhməti sayəsində rayonumuzda böyük bir riyaziyyatçı ordusu yetişib desəm, səhv etmərəm. Neçələri Respublika olimpiadalarının qalibi olublar.
Uzun illər Qubadlı Rayon Təhsil Şöbəsində çalışan Kamil müəllim müdrik insan, gözəl ziyalı olmaqla yanaşı, kəndin sayılıb-seçilən ağsaqqallarındandır. Kifayət müəllimə ilə birgə Vətənimizə layiqli üç ağıllı-kamallı övlad böyüdüb tərbiyə ediblər. Artıq nənə-baba kimi nəvə sevincini yaşayırlar.

* * *
Bəhruz doktor həm də imkansızlara əl tutmaqdan mənəvi zövq alaraq rahatlıq tapan, bunu qətiyyən dilinə gətirib nümayiş elətdirməyi xoşlamayan xeyirxah bir insandır. Dəfələrlə respublikamızdakı uşaq evlərinə, müharibədən əziyyət çəkən Qəzza bölgəsindəki kimsəsiz uşaqlara yardımlar göstərmişdir və bu gün də xeyirxahlıq missiyasını davam etdirməkdədir...
Hazırda Bəhruz doktor öz ixtisası üzrə respublikamızda yetərincə tanınır. Onun vətənpərvərliyi, eləcə də peşəsi ilə bağlı müxtəlif saytlarda və kütləvi informasiya vasitələrində müəyyən qədər yazılar verilmişdir. Bir çox təltiflərə - Heydər Əliyev Fondu, Azərbaycanın Türkiyədəki Səfirliyi, 707 saylı Hərbi hissə rəhbərliyi, TƏBİB, Azərbaycan Otorinolarinqologiya Cəmiyyəti tərəfindən Təşəkkürnamə və Fəxri Fərmanlara layiq görülmüşdür. Lakin bunu təəssüflə vurğulamağı özümə borc bilirəm: görünür, bu cür oğullarımızın fədakar əməyi biz qələm adamları tərəfindən layiqincə təbliğ olunmayıb ki, dövlət qurumlarının diqqətindən kənarda qalıblar. Nəinki layiqincə qiymətləndirilməyiblər, heç Vətən müharibəsi iştirakçısı statusları belə yoxdur. Axı bu, onların halal haqqıdır. İllər sonra nəvələrinin, nəticələrinin babalarının fədakarlığı ilə qürur duymaq və bu yolu seçmək haqqıdır...
Bəlkə də bu fikirlərim Bəhruz doktorun və həmkarlarının xoşuna gəlməz. Çünki onları bura çəkib gətirən Vətən eşqi idi, heç bir təmənna düşünməmişdilər... Lakin mənə elə gəlir, gələcək nəsillərə örnək olan bu oğulların hər biri öz layiqli qiymətini almalıdır ki, qəhrəmanlıq məktəbimizin yetirmələri tükənməsin. Gənclərimizin milli ruhda yetişməsinə bu addımımızla böyük töhfə vermiş olarıq.
Bu fədakarlıqlar tarixi və bədii ədəbiyyatlarımıza salınıb, dərs vəsaitləri şəklində məktəblərimizdə təbliğ olunmalıdır. Unutmamalıyıq ki, bugünkü qəhrəmanlarımız tarixi qəhrəmanlarımızın xələfləridir. Qarabağımızı 44 günə azad edib dünyanı heyrətə gətirən bu oğulların – Şəhidlərimizin, qazilərimizin, əsgər və zabitlərimizin, könüllü həkimlərimizin qanını coşduran da məhz tarixən Vətən uğrunda göz qırpmadan canını fəda edən və etməyə hazır olan vətən oğullarının şücaəti olmuşdur.
* * *

İllər keçəcək, lakin həyatlarının ən gözəl çağlarında özlərini odun-alovun içərisinə atmaqdan çəkinməyən bu fədakar həkimlər ağrının şiddətindən inildəyən, arxada qoyub gəldikləri körpələrini, xəstə, yaşlı valideynlərini, gözü yolda qalan sevdiklərini bircə dəfə görmək arzusu ilə son ümid yeri kimi onların üzünə baxıb imdad diləyən igid döyüşçülərimizin simasını daim xatırlayacaq, hər dəfə xatırladıqca da o anlara qayıdıb həmin dəhşətləri bir daha xəyallarında “yaşamalı” olacaqlar...
Qələbə alınmır, qələbə qazanılır. Lakin belə qazanılır... İtirilmiş oğulların, itirilmiş sağlamlığın, acı göz yaşlarını içinə sıxıb göynəyən anaların, bacıların, ömür-gün yoldaşlarının, xoşbəxt olmaq arzusu çilik-çilik olmuş gənc qızlarımızın, göz yaşı saqqalından süzülən babaların, ataların, “atamı istəyirəm” deyib hıçqıran körpələrin sayəsində!
* * *
Bizim üzərimizə düşən budur ki, belə oğullarımızın Vətənin azadlığı yolunda xidmətlərini yaddaşlara, yazılı ədəbiyyatlara həkk edək, gələcək nəsillərə nümunə olaraq ötürək.
Çünki düşmən bu rüsvayçı məğlubiyyətdən elə sarsılıb ki, hələ də barışmaq istəmirlər bu vəziyyətlə. Ulu babalarımız necə demişdilər: “Bizim qılıncımız hər zaman başımızın altında olmalıdır”... Müharibə etmək üçün yox, yadellilərə dərs vermək üçün...

Aliyə QABİLQIZI,
tədqiqatçı

Təlim üçün Türkiyəyə yola düşdülər

Türkiyə Respublikasının İstanbul və İzmir şəhərlərində keçirilən “EFES - 2026” çoxmillətli təlimin növbəti mərhələsinə hazırlıq prosesi davam edir.
Müdafiə Nazirliyindən verilən məlumata görə, təlimin döyüş atışlı praktiki məşqlərinə cəlb edilən Azərbaycan Ordusunun bir qrup hərbi qulluqçusu qardaş ölkəyə yola düşüb. Hərbi qulluqçularımız Türkiyə Respublikasının Çiğli Hava Bazasında qarşılanıblar.
Qeyd edək ki, “EFES - 2026” çoxmillətli təlimin əsas məqsədi iştirakçı ölkələrin bölmələri arasında genişmiqyaslı əməliyyatların keçirilməsi zamanı koordinasiyanın gücləndirilməsi, döyüş hazırlığı səviyyəsinin yüksəldilməsi və praktiki vərdişlərin təkmilləşdirilməsidir.

Şərəfli Yapon Komutanı
Qafqaz cəbhəsində rusların əsir götürdüyü 1012 türk əsgəri Sibirdən İstanbula göndərilərkən Yunanıstan donanması tərəfindən dayandırılıb və ələ keçirilməsi istənilib. Lakin yapon komandiri Yukiçi Tsumura bu tələbi rədd edərək türk əsgərlərini Yunanıstana təhvil verməyib.
"Türklər üçün canımı verərəm" deyən Yaponiya komandiri
Yarbay Yukiçi Tsumura bütün təzyiqlərə baxmayaraq qərarından əl çəkmədi.
Bu münasibət türk məhbusların qorunmasını təmin etmiş və Türkiyə-Yapon münasibətləri baxımından mühüm nümunə kimi qeydə alınmışdır.

SEPAH quru müharibəsi ssenarisini hazırlayır

Gunaz TV-nin məlumatına görə, SEPAH (İran İslam İnqilabı Keşikçiləri Korpusu) son bəyanatında sərt və təhdidedici tonla bildirib ki, “düşmən”lə qarşılaşma üçün hətta əsir düşərgələri belə əvvəlcədən hazırlanıb.
Bəyanatda deyilir: “SEPAH-ın əməliyyat və müdafiə planlarının qiymətləndirilməsi və proqnozlaşdırılması düşmənin müxtəlif addımları, o cümlədən quru əməliyyatları ilə üzləşmək səviyyəsindədir ki, hətta mümkün təcavüzkarları qəbul etmək üçün əsir düşərgələri də hazırlanıb.”
Bu iddia regionda gərginliyin misli görünməmiş şəkildə artdığı bir vaxtda səsləndirilib və İranın hərbi strukturları genişmiqyaslı müharibə ssenarilərini gündəmə gətirərək qarşıdurma ritorikasını gücləndirir.
SEPAH-ın son açıqlamaları yalnız bu qurumun aqressiv və təbliğat xarakterli yanaşmasını deyil, həm də artan hərbi və siyasi təzyiqlər fonunda güc nümayişi cəhdi kimi qiymətləndirilir.
Müşahidəçilərin fikrincə, bu cür bəyanatlar real hərbi hazırlıqdan çox psixoloji müharibənin bir hissəsi olmaqla ictimai rəyə və regional balanslara təsir göstərməyə yönəlib.

Ordumuzun ən yaxşı snayperi

Müdafiə nazirinin birinci müavini – Azərbaycan Ordusunun Baş Qərargah rəisinin təsdiq etdiyi döyüş hazırlığı planına əsasən, Azərbaycan Ordusunda “Ən yaxşı snayper” adı uğrunda yarış keçirilib. Müdafiə Nazirliyindən məlumatda bildirilib ki, sərrast atıcılıq qabiliyyətinə malik snayper-hərbi qulluqçuların müəyyən edilməsi məqsədilə təşkil olunan yarış xüsusi təlim meydançasında olub.
Hərbi qulluqçuların təchizatı yoxlanıldıqdan sonra onlar əvvəlcədən hazırlanmış atəş mövqelərini tutaraq normativləri icra ediblər.
Bir neçə mərhələdən ibarət olan yarışda iştirakçılar müxtəlif atış çalışmaları üzrə bacarıqlarını nümayiş etdiriblər.
Yarışın sonunda mükafatlandırma mərasimi keçirilib.

Gəncədə yanğın təlimi

Fövqəladə Hallar Nazirliyinin (FHN) Dövlət Yanğın Nəzarəti Xidmətinin təşəbbüsü və Dövlət Yanğından Mühafizə Xidmətinin iştirakı ilə Gəncə şəhəri, Heydər Əliyev prospekti, 210 ünvanında yerləşən çoxmərtəbəli yaşayış kompleksində təlim keçirilib.
Təlim şərti yanğın həyəcan siqnalı ilə yanğın texnikalarının yaşayış binasına, həmçinin su hovuzuna yaxınlaşa bilməsi və ümumilikdə ərazidəki yanğına qarşı əməliyyat şəraitinin qiymətləndirilməsi məqsədilə keçirilib.
Təlim zamanı şəxsi nəqliyyat vasitələrinin bəzi sahələrdə nizamsız park edilməsi səbəbindən yanğın avtomobillərinin yaşayış kompleksinin həyətinin bir hissəsində sərbəst şəkildə hərəkətinin məhdudlaşdırıldığı müəyyən olunub. Bundan əlavə, mövcud olan daxili yanğın kranlarının tam komplekləşdirilmədiyi, binanın ilkin yanğınsöndürmə vasitələri ilə tam təmin edilmədiyi, elektrik təsərrüfatının “Elektrik Qurğularının Quraşdırılması Qaydaları”nın tələblərinə cavab vermədiyi və yanğınxəbərverici siqnalizasiya qurğusunun tam sahəyə quraşdırılmadığı və işlək vəziyyətdə olmadığı müəyyən edilib.
Qeyd olunan nöqsanların aradan qaldırılması barədə binanın yanğın təhlükəsizliyinə məsul şəxslərinə şifahi və yazılı tapşırıqlar verilib, eyni zamanda yaşayış binasının sakinləri ilə yanğın təhlükəsizliyinin təmin olunması barədə maarifləndirici söhbətlər aparılıb. Nəzərə çatdırılıb ki, yanğın və digər fövqəladə hadisələr zamanı xüsusi təyinatlı texnikaların binaların həyətinə maneəsiz daxil olması, çevik şəkildə döyüş vəziyyətinə gətirilməsi və əməliyyatların effektli keçirilməsi, habelə su hovuzları və hidrantlardan rahat istifadə üçün avtomobillər yalnız təyin olunmuş yerlərdə, bir-biri ilə ara məsafəsi gözləməklə, digər avtonəqliyyat vasitələrinin sərbəst keçid imkanı təmin olunmaqla park edilməlidir.

İran limanları

mühasirədə

ABŞ-ın Mərkəzi Komandanlığı “CENTCOM” bildirib ki, 10 mindən çox quru qoşunları, dəniz piyadaları və hava qüvvələri şəxsi heyəti, onlarla hərbi gəmi və təyyarə ilə birlikdə İran limanlarının mühasirəsi əməliyyatında iştirak edir.
CENTCOM daha sonra iddia edib ki, son 24 saat ərzində heç bir gəmi bu mühasirəni keçə bilməyib və altı ticarət gəmisi də Amerika qüvvələrinin əmri ilə marşrutunu dəyişərək Oman dənizindəki İran limanlarından birinə geri dönməyə məcbur olub.
Bu ABŞ hərbi qurumu vurğulayıb ki, bu mühasirə “bitərəf” şəkildə Ərəb körfəzi və Oman dənizində İran limanlarına daxil olan və çıxan bütün gəmilərə qarşı tətbiq olunur; bu isə eyni zamanda İranla bağlı dəniz marşrutlarına tam nəzarət məqsədi daşıyır.
Amerika qüvvələri Hörmüz boğazından qeyri-İran limanlarına doğru hərəkət edən gəmilərin “naviqasiya azadlığını” dəstəkləyir; bu mövqe Vaşinqtonun İranın dəniz çıxışlarını məhdudlaşdırmaq və ona maksimum təzyiq göstərmək cəhdini göstərir.
Bu hadisələr bölgə sularında gərginliyin görünməmiş səviyyədə artdığı bir vaxtda baş verir və İran limanları ətrafında Amerika hərbi qüvvələrinin genişmiqyaslı mövcudluğu böhranın yeni mərhələyə daxil olduğunu göstərən əlamət kimi qiymətləndirilir.