“Həyata yenidən başlasaydım,
Saniyələrin də nəbzini tutardım”.
Dostayevski

Daxilən gözəl, mənəvi cəhətdən zəngin olan insanlar hörmət və ehtirama layiqdirlər. Mənəvi zənginlik insanın ən ümdə xasiyyətidir. Səfər müəllimin özü də mənəvi cəhətdən zəngin, daxilən xeyirxah insanlardan biridir. Bu da onun şəxsiyyətini, böyüklüyünü müəyyənləşdirməyə imkan verir. Məhz buna görə də o ən təmiz hiss və arzularıyla, əməllərilə tanınır, əsl insan kimi sevilir.

Bilirik ki, ictimai həyatın aparıcı qüvvəsi insandır. O insan ki, bir-birindən müəyyən mənada tale müxtəlifliyi ilə fərqlənir. Zəhmətkeş, çöhrəsi daim təbəssüm işığına qərq olan nurlu şəxsiyyət, bacarıqlı ictimaiyyətçi, dəyərli alim Səfər Əhli oğlu Hüseynov da öz zəkasını zamana uyğun əks etdirməyə müvəffəq olub. Onun ömür, həyat və seçdiyi peşə yolu hazırki gənclərimiz üçün,sözün əsl mənasında bir örnəkdir.

Səfər müəllim sağlam düşüncə və pak əməllə Azərbaycanın milli dövlətçilik işinə və elmi quruculuğa xidmət edir, çalışdığı bütün illərdə və bu gün də cəmiyyətin inkişaf prioritetinə təkan verib, yüksək ad daşıyır - şərəfli alim adı. Elə bir ad ki, onun şəxsiyyətinə də, soy-kökünə də, elmi fəaliyyətinə də yaraşıqdır. Bu gün də onun timsalında onu tanıyanların xoş xatirələrində bir Azərbaycan oğlunun, çöhrəsi nurlu vətəndaşın, dəyərli bir alimin əlli beş illik həyat yolu canlanır.
Səfər Hüseynovun zəngin, çoxlarının həsəd apardığı bir ömür yolu var. 1965-ci il avqust ayının 1-də İmişli rayonunun Muradxanlı kəndində anadan olub. 1982-ci ildə Muradxanlı kənd orta məktəbini bitirib. Elə həmin ildə Azərbaycan Mühəndis İnşaat İnstitutunun inşaat fakültəsinə daxil olub, 1989-cu ildə ali məktəbi qurtarıb Bakı şəhər Sovetinin “Bakı Baş Tikinti İdarəsi”nin Sənayeləşdirilmiş Evtikmə İstehsalat Birliyində mühəndis vəzifəsində işləyib. 1983-1985-ci illərdə hərbi xidmətdə olub.
Səfər Hüseynovun keçdiyi mənalı həyat yolu qürurvericidir. Ləyaqətli, şərəfli ömür yoludur. Tərcümeyi-halındakı tarixlər, tutduğu vəzifələr onun işıqlı yolun yolçusu olduğundan xəbər verir. Bakı şəhər Sovetinin “Əsaslı tikinti idarəsi”ndə şöbə rəisi, Dövlət Layihə Mənzil Tikinti Birliyinin 5 saylı İxtisaslaşdırılmış, Təmir-Tikinti İdarəsinin rəisi vəzifələrində vicdanla, ləyaqətlə çalışıb. 2001-ci ildə Bakı Dövlət Universitetinin hüquq fakültəsini bitirib. Nazirlər Kabinetinin “Təsərrüfatlararası Dövlət Layihə Mənzil Tikinti Birliyi”nin mərkəzi aparatında əvəzçilik üzrə hüquqşünas vəzifəsində çalışıb. 2001-2005-ci illərdə Sumqayıt Dövlət Universitetində “Hüquq və sosiologiya” kafedrasında müəllim işləyib.
Haqqı nahaqqa qurban verməyən, qaranlığı aydınlaşdıran, ürəyi insanlara sevgi ilə döyünən Səfər Hüseynov 2000-ci ildən 2006-cı ilədək “İnşaatçı-2000” şirkətinin direktoru olub. Yeni Azərbaycan Partiyasına üzv qəbul edilib. O, həm də ziyalıdır, elm adamıdır. Onun iç dünyasında Avropa alimlərini üç yüz il qabaqlayan Əl Fərabinin, Bəhmənyarın, Uluq bəyin, Nəsirəddin Tusinin, Şeyx Cəmaləddin Əfqaninin ruhu dolaşır. Bu qüdrətli şəxsiyyətlərin, müdrikliyin, məğrurluğun zirvəsində dayanan bu dahilərin işığından işıq alan, nur alan Səfər Hüseynov həmin o şəxsiyyətlərdən güc alaraq ziyalılıq, mərdlik alimlik zirvəsinə ucalıb.
2009-cu ildə “İkilaylı qeyri-bircins lövhələrin həndəsi qeyri-xəttililiyi nəzərə almaqla dayanıqlığı və rəqsləri” mövzusunda dissertasiya müdafiə edib. Ali Attestasiya Komissiyası tərəfindən texnika üzrə fəlsəfə doktoru elmi dərəcəsi, 2017-ci ildə isə dosent elmi adı alıb.
Doktorluq işi hazırdır, müzakirə ərəfəsindədir.
Azərbaycan Respublikası Prezidentinin 18.04.2012-ci il tarixli sərəncamı ilə “Əməkdar mühəndis” fəxri adına layiq görülüb.
2006-cı ildən 2017-ci ilədək Azərbaycan Dövlət Pedaqoji Universitetində inzibati-təsərrüfat işləri üzrə prorektor işləyən Səfər müəllim 2018-2019-cu ilə kimi “Azərbaycan Sənaye Korporasiyası” ASC-nin “Tikinti və tikinti məhsulları”nın istehsalı şöbəsində aparıcı mühəndis işləmişdir.
Səfər Hüseynov 2019-cu ilin may ayından Kənd Təsərrüfatı Nazirliyinin Aqrar Elm və İnnnovasiya Mərkəzinin maliyyə və təsərrüfat şöbəsinin müdiri vəzifəsində çalışır.
Səfər müəllimi başqalarının gözündə ucaldan onun sadəliyi və diqqətciliyidir. O, sadə, səmimi və uşaqdan böyüyə hər kəsə diqqətlə yanaşan insan olduğu üçün xalq arasında da, işdə də, ailədə də böyük hörmət və ehtirama layiqdir. Onun sadəliyi həm də daxili saflığından irəli gəlir. Onun mənfi keyfiyyətlərdən uzaq olması da sadəliyi ilə bağlıdır. O, vəzifədən vəzifəyə yüksələndə də dəyişməyib, olduğu kimi görünüb, göründüyü kimi olub.
Haşiyə: Halal ruzisi ilə dolanan bir kişi varmış. Bir gün şər qarışan vaxt qapısı döyülür. Kişi qapını açır və görür ki, eşikdə üç nəfər nabələd adam durub. İndi bunlara nə desin, nə təhər içəri dəvət etsin? Axı, daxma çox darısqaldır. Üç nəfər buraya necə sığışacaq? Qardaşlardan biri deyir:
- Əmi, biz üç qardaşıq! Mənim adım Hörmətdi, ortancıl qardaşım Dövlətdi, kiçik qardaşımın adı Şöhrətdi. Vəziyyəti belə gördük, heç olmasa birimizə yer elə!
Kişi də qayıdıb deyir ki, Hörmət buyursun içəri. Qardaşların hər üçü qabağa yeriyir. Kişinin çaşıb qaldığını görən qardaşlar deyirlər ki, ağsaqqal, hörmətin mərtəbəsini uca tutmaqla elə hər üçümüzə bir gözlə baxdın, çünki hörmət olan yerdə şöhrət də var, dövlət də.
Səfər müəllim də belə hörmətli, şöhrətli kişilərdən biridir və bütün bunlar onun tale, qisməti, bəxti deyil, öz böyük, geniş qəlbinin, el-oba üçün döyünən ürəyinin, gecəsini gündüzə qatdığı günlərinin hesabı olan halal payıdır.
Səfər müəllim yaxşı ailə başçısıdır. Ömrü-gün yoldaşı Nazilə xanım Azərbaycan Milli Konservatoriyasının nəzdində olan İncəsənət Gimnaziyasında direktor müavini işləyir.
Oğlu Sənan İqtisad Universitetini bitirib. Azərbaycan Milli Konservatoriyasında aparıcı mühasib işləyir.
Səfər müəllimin qızı ADPU-nu qurtarıb. Azərbaycan Dillər Universitetində müəllim işləyir.
Övladlarından söhbət düşəndə Səfər müəllimin üz-gözündə sanki çıraq yanır. Onları əsl insan kimi böyütməsindən fərəhlənir, qəlbinə, ürəyinə sərinlik gəlir. Bu ailədə böyüyən, tərbiyə alan övladlar Səfər müəllimin, Nazilə xanımın böyük dünyalarıdır. Onlar valideynlərinin etimadını doğruldub xeyirxahlıq zirvəsinə ucalıblar…
Səfər müəllimin ömür yolu bir kitaba sığmaz. Bu da o deməkdir ki, həyat hər bir insanın tale çalarları ilə özünə rəng qatır. Uzun illərin təcrübəsi göstərir ki, Səfər müəllim həyatının ən çətin anlarını səbr və təmkinlə mühafizə edə bilib. Bu mənada “Hər ömür bir kitabdır” deyənlər yanılmayıblar. Çünki hərə öz ömrünü bir kitab kimi oxuyur. Səfər müəllim də öz ömrünü səhifə-səhifə yaşayıb və kitab ömrü qədər möhtəşəm bir ömür qazanıb. Onun ömür salnaməsində yüz illərin möhtəşəm fəvvarələri çırpınmaqdadır. O vaxtın, zamanın uca tutduğu ziyalıdır. Xeyirxahlıq, zəhmətə bağlılıq çalışdığı sahəyə sevgisində açıq-aşkar görünür. Bununla da ucalıq qazanır.
Unudulmaz xalq şairi Bəxtiyat Vahabzadə demişkən:

Yalnız başqasını düşünən zaman,
Qalxır insanlığın fövqünə insan.

Bəli, insan doğulur, yaxşı əməlləri ilə ad qoyur, sonra da hər kəsin sevimlisi olur. Bizim haqqında yazdığımız Səfər müəllim kimi.
Səfər müəllim bir insan ömrü yaşayır, əsl insan kimi həyatda özünü təsdiq eləyib. Təsdiq eləyib ki, mən varam və mən həmişə də var olacağam.

Sabir Hüseynov,
“Kənd həyatı” qəzetinin baş redaktoru, yazıçı,
Prezident mükafatçısı