Orxan Zeynallı: “Hər kəs öz həyatını süpürsə, Bakı gül - çiçək olar”.

Azərbaycan xalqı qədim olması ilə eyni zamanda öz mədəniyyəti ilə seçilən bir xalq olub. Tarixin müxtəlif dövrlərində müxtəlif dövlətlər bir-birinin əsarəti altına düşüb. Qaynaqlardan məlumdur ki, işğala məruz qalan xalqlar “ağa”larının mədəniyyətini öyrənməklə yanaşı, eyni zamanda müəyyən qədər öz adət-ənənələrini də qorumağa, hətta yaymağa müvəffəq olublar. Bu gün bir çox sahələrdə Avropaya sürətlə inteqrasiya edən Azərbaycan da, xüsusilə, orta əsrlərdə və ondan sonrakı dövrdə daha güclü dövlətlərin vassalına çevrilib (məsələn; ərəblərin, monqolların, rusların). Amma bizim millətin irədəsinin bəhrəsidir ki, heç bir xalqdan mədəniyyətsizlik öyrənməyib, əksinə, mədəniyyət öyrədib.

“Odlar yurdu” daim özünün mədəniyyəti ilə seçilən, yaxşı mənada fərqlənən bir diyar olub. Mentalitetimiz həmişə yüzlərlə ölkənin mentaliteti arasında birinci yerdə olub və digərlərinin diqqətini, marağını çəkib. Hətta utanmadan, çəkinmədən mədəniyyətimizə təcavüz edənlər də olub. Ən bariz nümunə kimi, mənfur ermənilərin musiqimizin ən gözəl nümunələrini oğurlamalarını göstərə bilərik.

Əlbəttə, mədəniyyət geniş anlayışdır və özündə bir çox qolları birləşdirir - görüşmə mədəniyyəti, danışıq mədəniyyəti, yemək mədəniyyəti və başqaları. Bunlardan biri, bəlkə də, ən başda olan zibil atma mədəniyyətidir. Təəssüf hissi ilə bildirmək istəyirəm ki, məhz bu sahədə xeyli dərəcədə axsayırıq.



Əslində demək olar ki, hər gün şəhərin mərkəzində, o cümlədən Ağ şəhərdə, “Tarqovu”da...gördüyüm mənzərələr məni bu yazını yazmağa məcbur etdi. Bir arada çıxın, siz də baxın, yəqin ki, mənə haqq verərsiniz. Sallofanlar göydə uçuşur, hara gəldi butulkalar, kağızlar atılır. Heç yaraşırmı Xəzərin qoynunda yerləşən gözəl bulvarımıza?! Xüsusi nəzərdə tutulmuş qablara yox, onun beş metrliyindəki ağacın ətrafına zibil atmağın mənası nədir ki?! Hələ bu azmış kimi, zibilyığan maşınlar da gec-gec işləyir, sanki qabların dolub-daşmasını gözləyirlər.



Əfsuslar olsun ki, paytaxtın bir çox küçələrinə, dalan yerlərinə zibil qoxusundan girmək olmur. Bunun qarşısını almaq bizim öz əlimizdədir. Həm də həlli çox asandır. Mənə elə gəlir ki, bu cür neqativ hal, nə bizə, nə də Bakıya yaraşır. Gəlin, gözəl, füsunkar şəhərimizi hər il daha çox gəlməkdə olan turistlərin gözü qarşısında məhçub eləməyək.

Kamal Hüseynli (BDU-nun Jurnalistika fakültəsinin ikinci kurs tələbəsi)