10-10-2025, 16:38
Azərbaycan və Ermənistan deputatları İstanbulda görüşəcək? - AÇIQLAMA
16-20 noyabr tarixlərində ATƏT Parlament Assambleyasının (PA) Payız Sessiyası keçiriləcək. Toplantı Türkiyənin İstanbul şəhərində baş tutacaq.
İclasda üzv ölkələrin parlament nümayəndələri iştirak edəcək.
Ermənistan parlamentinin “Mülki müqavilə” fraksiyasının Xarici Əlaqələr Daimi Komitəsinin sədri Sarqis Xandanyan, nümayəndə heyətinin üzvləri, deputatlar Mariya Karapetyan, Lilit Minasyan, Artur Hovhannisyan və digərlərinin də tədbirdə iştirak edəcəyi gözlənilir.
Azərbaycan parlamentinin deputatları də sessiyanın işində iştirak etmək üçün İstanbula səfər edəcək.
Bu barədə Milli Məclisin deputatı, ATƏT PA nümayəndə heyətinin üzvü Azay Quliyev bildirib.
O vurğulayıb ki, heyətin üzvləri hələlik məlum deyil.
Azay Quliyev bildirib ki, tədbirdə iştirak edəcək erməni nümayəndələri ilə görüş nəzərdə tutulmur.
Qeyd edək ki, Milli Məclisdə ATƏT PA-nın nümayəndə heyətinə Qaya Məmmədov rəhbərlik edir. Üzvləri Sevinc Fətəliyeva, Tural Gəncəliyev, Pərvin Kərimzadə, Azay Quliyev və Gülşən Paşayevadır.
10-10-2025, 16:29
Azərbaycan Kubokunda I təsnifat mərhələsinə yekun vuruldu
Futbol üzrə Azərbaycan Kubokunda I təsnifat mərhələsi başa çatıb.
İkinci oyun günündə iki görüş təşkil olunub.
“Göygöl” evdə “Şəmkir”i 1:0 hesabı ilə məğlub edib. “Quba” isə doğma meydanda “Xankəndi”yə uduzub – 1:2.
Bununla II təsnifat mərhələsinin cütlükləri bəlli olub.
"Səbail" - "Şamaxı"
"Göygöl" - "Baku Sportinq"
"Karvan-Yevlax" - "Səki Siti"
"Qaradağ Lökbatan" - "İmişli"
"Qəbələ" - "Mingəçevir"
"Cəbrayıl" - "Şəfa"
"Zaqatala" – "Sumqayıt"
"Neftçi" - MOİK
"Xankəndi" - "Difai"
"Dinamo" - "Turan-Tovuz"
"Ağstafa Gəncləri" – "Kəpəz"
"Şimal" - "Şahdağ-Qusar"
10-10-2025, 16:19
Abşeronda qətl - 60 yaşlı kişi öldürüldü
Abşeronda qəsdən adam öldürməkdə şübhəli bilinən şəxs tutulub.
Rayon prokurorluğundan verilən məlumata görə, oktyabrın 9-da Abşeron rayonu ərazisində 1965-ci il təvəllüdlü Maşallah Cəfərovun öldürülməsi barədə məlumat daxil olub. Araşdırma zamanı 1968-ci il təvəllüdlü Eldar Məmmədovun bıçaqla xəsarət yetirərək Maşallah Cəfərovu qəsdən öldürməsinə əsaslı şübhələr müəyyən edilib.
Faktla bağlı Abşeron rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.
Eldar Məmmədov rayon prokurorluğu tərəfindən şübhəli şəxs qismində tutulub.
İbtidai istintaq davam edir.
10-10-2025, 16:07
Marketdə satıcıya qarşı soyğunçuluq edənlər saxlanıldı
Paytaxtın Nərimanov rayonunda soyğunçuluq hadisəsi və avtomobillərdən silsilə oğurluqlar edilib. İki nəfər rayon ərazisində yerləşən marketlərin birində kassada olan pul vəsaitini açıq talama yolu ilə ələ keçirib.
Nərimanov Rayon Polis İdarəsinin əməkdaşları tərəfindən keçirilən tədbirlə soyğunçuluq əməlini törətməkdə şübhəli bilinən, əvvəllər məhkum olunmuş - 35 yaşlı Şirməmməd Məmmədov və 21 yaşlı Rəcəb Qulamov saxlanılıblar. Araşdırmalarla Ş.Məmmədov və R.Qulamovun əlavə olaraq rayon ərazisində 3 avtomobilin şüşəsini qıraraq nəqliyyat vasitələrindən qiymətli əşyalar oğurladıqları da məlum olub.
Faktlarla bağlı Cinayət Məcəlləsinin müvafiq maddələri ilə cinayət işi başlanılıb. Məhkəmənin qərarı ilə saxlanılan şəxslər barəsində həbs qətimkan tədbiri seçilib. Araşdırmalar davam etdirilir.
10-10-2025, 16:02
Bakıda 32 yaşlı qadın itkin düşdü - FOTO
Xəzər rayon sakini 32 yaşlı Aygün Həsənova yaşadığı ünvandan çıxıb naməlum istiqamətə gedərək bir daha geri qayıtmayıb.
Bu barədə DİN-in Mətbuat xidmətindən məlumat verilib.
"A.Həsənovanın əlamətləri: boyu 160 sm, arıq bədən quruluşludur. Evdən çıxan zaman əynində qara rəngli şalvar və qara rəngli jaket olub. Onun ruhi-əsəb xəstəliklərindən əziyyət çəkdiyi bildirilir.
Şəkildəki şəxsi görənlərdən və haqqında məlumatı olanlardan DİN-in "102” Xidməti Zəng Mərkəzi və sosial şəbəkələrdəki rəsmi səhifələrinə, həmçinin Xəzər Rayon Polis İdarəsinin (012) 590-22-39, (012) 453-02-02 şəhər nömrələri və (050) 222-82-80, (070) 529-26-23 mobil nömrələrinə zəng edərək məlumat vermələri xahiş olunur", - məlumatda qeyd olunub.
10-10-2025, 15:56
Cinayət Məcəlləsinə dəyişikliklər edilir
Cinayət yolu ilə əldə edilmiş əmlakı leqallaşdırma ilə bağlı sanksiyalar sərtləşdirilir.
Məsələ Milli Məclisin bugünkü plenar iclasında müzakirə olunan Cinayət Məcəlləsində dəyişiklik edilməsi haqqında qanun layihəsində öz əksini tapıb.
Mövcud qanunvericiliyə əsasən, cinayət yolu ilə əldə edildiyini bilə-bilə əmlakın həqiqi xarakterinin, mənbəyinin, yerinin, onlara sərəncam verilməsinin, onların yerdəyişməsinin, belə əmlaka olan hüquqların və ya onların kimə məxsus olmasımn ört-basdır edilməsi və ya gizlədilməsi 4 min manatdan 8 min manatadək miqdarda cərimə və ya 3 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə 2 ildən 5 ilədək müddətə azadlıqdan məhrum etmə ilə cəzalandırılır.
Təklif edilən dəyişikliyə əsasən, bu cinayət cinayətin predmetinin dəyərinin 50 faizindən 70 faizinədək miqdarında cərimə və ya 5 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə 2 ildən 5 ilədək müddətə azadlıqdan məhrum etmə ilə cəzalandırılacaq.
Qanun layihəsi səsverməyə qoyularaq birinci oxunuşda qəbul edilib.
10-10-2025, 15:50
Prezident rəsmi qəbulda iştirak etdi - FOTO
Bu gün Düşənbədə Tacikistan Prezidenti Emoməli Rəhmonun adından MDB dövlət başçılarının şərəfinə rəsmi qəbul təşkil olunub.
Azərbaycan Prezidenti İlham Əliyev tədbirdə iştirak edib.
9-10-2025, 23:01
Ələtdəki hava limanına yeni rəhbər təyin edildi
Ələt Azad İqtisadi Zonasında yaradılan yeni hava limanı idarəsinin idarə heyətinin sədri bəlli olub.
Bu vəzifə 2025-ci ilin sentyabrından etibarən Cavad Dbilaya həvalə edilib.
C.Dbila hazırda paralel olaraq "Silk Way Alat Free Economic Zone” şirkətinin baş direktorudur. O, şirkətə yarandığı 2023-cü ildən bu tərəfə ona rəhbərlik edir.
Cavad Dbila 2000-ci ildən Azərbaycanın hava nəqliyyatı sektorunda çalışır. O 2011-2014-cü illərdə AZAL-da yüksək vəzifələrdə çalışsa da, sonradan, 2017-ci ildən "Silk Way Holding”ə vitse-prezident kimi transfer olunub.
"Silk Way AFEZ” Ələt Azad İqtisadi Zonasında fəaliyyət göstərən şirkətdir və o "Silk Way Group”a daxildir. Şirkətin ƏAİZ-dəki yeni hava limanı 18 təyyarə dayanacağı, 4000 metrlik uçuş-enmə zolağı, taksi yolları, hava hərəkəti idarəetmə mərkəzi, yanacaq və yanğınsöndürmə xidmətləri və digər əlaqəli obyektləri əhatə edəcək.
Eyni zamanda hava limanı layihəsində fərdi ekspeditor anbarlarının, tez xarab olan yüklər üçün terminalların və müasir ofis binalarının inşasını nəzərdə tutur.
9-10-2025, 21:49
Qəzzaya yardım aparan gəmidə azərbaycanlılar da var imiş - RƏSMİ
Oktabrın 8-də Qəzzaya humanitar yardım aparan gəmidə saxlanılan Azərbaycan vətəndaşlarının Türkiyəyə geri qayıtması nəzərdə tutulur.
Bu barədə Azərbaycan Xarici İşlər Nazirliyinin mətbuat katibi Ayxan Hacızadə deyib.
O qeyd edib ki, saxlanılan şəxslər arasında olan 2 nəfər Azərbaycan vətəndaşı - Pərvin Əzimov və Orxan Səmədzadə ekipaj üzvləridir və onlar Türkiyədə çalışırlar.
"İsraildəki səfirliyimiz tərəfindən görülən tədbirlər nəticəsində onların azad edilərək öz istəkləri əsasında Türkiyəyə grri qayıtması nəzərdə tutulur", - XİN rəsmisi bildirib.
9-10-2025, 21:20
MDB nazirləri Düşənbədə görüşdülər
Tacikistanın paytaxtı Düşənbədə Müstəqil Dövlətlər Birliyinin (MDB) Xarici İşlər Nazirləri Şurasının iclası başlayıb.
Bu barədə Azərbaycan Xarici İşlər Nazirliyinin "X" səhifəsində paylaşım edilib.
Xarici işlər nazirləri MDB dövlət başçılarının qarşıdan gələn Zirvə Toplantısının gündəliyinə baxacaq, açıq dialoq platforması kimi mühüm beynəlxalq və regional problemlər, o cümlədən MDB çərçivəsində ikitərəfli və çoxtərəfli əməkdaşlıq barədə fikir mübadiləsi aparacaqlar.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!