13-01-2023, 17:43
Bu məqsədlər üçün 750 milyon manat ayrılacaq - Sahil Babayev
Əmək və Əhalinin Sosial Müdafiəsi naziri Sahil Babayev AzTV-yə müsahibə verib. QSC-nin İctimaiyyətlə əlaqələr və sosial media şöbəsindən verilən məlumata görə, nazir S.Babayev açıqlamasında bildirib ki, Prezident İlham Əliyevin sosial müavinətlər, təqaüdlər və əməkhaqlarının artırılması ilə bağlı bugünkü sərəncamları 800 mindən çox insanı əhatə edəcək. Nazir əlavə edib ki, cari il üçün nəzərdə tutulan islahat paketi isə 1 milyon 900 min insanı əhatə edir: “Bu məqsədlər üçün dövlət büdcəsindən əlavə olaraq 750 milyon manat vəsait ayrılacaq”. Sərəncamların icrasına cari aydan başlanılacaq.
13-01-2023, 15:21
Xəzər sahillərində suitilərin kütləvi şəkildə məhvi davam edir
Xəzər dənizinin şimal sahillərində suitilərin ölməsinin səbəblərinin müəyyənləşdirilməsi istiqamətində araşdırmalar davam edir. Bunu Bioloji Müxtəlifliyin Qorunması Xidmətinin rəisi Firuddin Əliyev ötən ilin yekunlarına həsr olunmuş mətbuat konfransında deyib. Onun sözlərinə görə, Azərbaycan Qida Təhlükəsizliyi Agentliyinin götürdüyü laborator nümunələrin cavablarının əldə olunması üçün müəyyən vaxt lazımdır: "Suiti cəsədlərinin bir hissəsi Rusiya tərəfindən axıntılar vasitəsilə gəlmişdi və bir qismi isə Azərbaycan sahillərində aşkar edilib. İlkin qeyd edilən ehtimal suitilərin zəhərlənməsi ilə bağlı idi. Lakin dəqiq cavab analizlərin nəticələrindən sonra bilinəcək. Qeyd etmək istəyirəm ki, burada hər hansı brokonyerlik halı və fiziki zədəyə rast gəlinməyib. Suiti cəsədləri uzun müddət dənizdə qalmışdı və cürümə mərhələsində idi. Rusiya tərəfindən bizə verilən məlumata görə, suitilərin ölümünə zəhərlənmə səbəb olub".
12-01-2023, 17:26
“Minimum 20 xəbər olmalıdır” - Əhməd İsmayılov
Gündəlik 20 xəbər məsələsi çox müzakirə olunub. Bunu Medianın İnkişaf Agentliyinin (MEDİA) icraçı direktoru Əhməd İsmayılov qurumun ötən ilin yekunlarına dair hesabat konfransında jurnalistlərin suallarını cavablandırarkən deyib. "Elə saytlar olur ki, ay ərzində bir məlumat yerləşdirir. Təbii ki, bu, düzgün deyil. Minimum 20 xəbər olmalıdır. Ötən günlərdə müzakirə olunanda gördük ki, Türkiyədə bu tələb daha çoxdur. 20 xəbər tələbinin aşağı salınması gözlənilmir", - deyə MEDİA rəhbəri vurğulayıb.
12-01-2023, 17:19
Reysterdən keçməyən media subyektlərinə güzəşt olmayacaq
Media subyekti sayılmaq üçün Media Reyestrindən keçmək lazımdır. Bunu Medianın İnkişafı Agentliyinin İcraçı direktoru Əhməd İsmayılov 2022-ci il üzrə görülmüş işlərə dair hesabat konfransında bildirib. Onun sözlərinə görə, reyestrdən keçməyən media subyektlərinə güzəşt tətbiq edilməyəcək: "Bunun üçün altı ay müddət müəyyənləşib. Hələ vaxta var. Biz Agentlik olaraq vaxt bitdikdən sonra həmin media subyektlərinə fərdi olaraq hər hansı sanksiya tətbiq edə bilmərik. Belə hal yaşanarsa, “Media haqqında” qanunun tələblərinə uyğun olaraq məhkəmədə iddia qaldıra bilərik. Bundan başqa Media Reyestrində olmayan subyektlərə güzəştlər tətbiq olunmayacaq. Eyni zamanda media subyektinin fəaliyyəti məhkəmənin qərarından asılı olacaq", - deyə agentlik rəhbəri vurğulayıb.
12-01-2023, 17:03
Sabahın havası
Bakıda və Abşeron yarımadasında yanvarın 13-də hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Milli Hidrometeorologiya Xidmətindən verilən məlumata görə, sabah mülayim cənub-şərq küləyi əsəcək. Havanın temperaturu gecə 0-2° isti, gündüz 3-6° isti olacaq. Atmosfer təzyiqi normadan yüksək 781 mm civə sütunundan 777 mm civə sütununa enəcək. Nisbi rütubət 60-70 % olacaq. Gecə şəhərətrafı yolların buz bağlayacağı ehtimalı var. Azərbaycanın rayonlarında sabah hava əsasən yağmursuz olacaq. Lakin gecə və səhər bəzi yerlərdə arabir yağıntılı olacağı, sulu qar, qar yağacağı gözlənilir. Arabir duman olacaq. Şərq küləyi əsasən dağlıq və dağətəyi rayonlarda arabir güclənəcək. Havanın temperaturu gecə 0-5° şaxta, gündüz 2-7° isti, dağlarda gecə 15-20° şaxta, gündüz 3-8° şaxta olacaq. Dağlıq və dağətəyi rayonlarda yollar buz bağlayacaq.
11-01-2023, 23:21
Laçın yolundan qanunsuz fəaliyyətlər üçün istifadə edilir - Ceyhun Bayramov
"Laçın yolundan qeyri-qanuni fəaliyyətlər və mina təhdidlərinin davam etməsi üçün istifadə edilir". Bunu Azərbaycanın xarici işlər naziri Ceyhun Bayramov Səudiyyə Ərəbistanının Şura Məclisində Azərbaycanla parlamentlərarası dostluq qrupunun sədri Faiz Bin Abdulla Əl-Şəhri ilə görüşündə bildirib. Nazir Laçın yolunda azərbaycanlı fəalların etirazlarının səbəblərini qarşı tərəfin diqqətinə çatdırıb. Bundan əlavə, son 2 ildə Ermənistanın çoxsaylı təxribatları, o cümlədən erməni silahlı qüvvələrini ərazilərimizdən tam çıxarılmaması, Laçın yolundan qeyri-qanuni fəaliyyətlər və mina təhdidlərinin davam etməsi üçün istifadə edilməsi barədə məlumat təqdim edilib. C.Bayramov həmçinin, Ermənistanın Azərbaycana qarşı təcavüzkar siyasəti, ölkəmizin ərazilərinin 30 ilə yaxın Ermənistan tərəfindən işğalı barədə qarşı tərəfə məlumat verib. Bu xüsusda, Səudiyyə Ərəbistanının 30 il ərzində ölkəmizə dəstəyi məmnunluqla vurğulanıb. Həmçinin Azərbaycanın Ermənistanla sülh sazişinin imzalanması istiqamətində atdığı addımlar və təşəbbüslər, habelə işğaldan azad olunmuş ərazilərimizdə bərpa-quruculuq işləri və həyata keçirilən layihələr barədə qarşı tərəf məlumatlandırılıb.
11-01-2023, 18:04
İsrailə yeni səfir təyin olundu
Muxtar Məmməd oğlu Məmmədov Azərbaycan Respublikasının İsrail Dövlətində fövqəladə və səlahiyyətli səfiri təyin edilib. Bu barədə Prezident İlham Əliyev sərəncam imzalayıb. M.Məmmədov bu təyinata qədər elm və təhsil nazirinin müavini vəzifəsində çalışıb.
11-01-2023, 17:51
Şəhid atası özünə bıçaq xəsarəti yetirdi
Lənkəranda şəhid atası özünə bıçaq xəsarəti yetirib. Hadisə rayonun Gəgiran kəndində qeydə alınıb. Belə ki, kənd sakini, 1977-ci il təvəllüdlü Şakir Qəni oğlu Əhədov şəhərin Həzi Aslanov küçəsində bıçaqla bir dəfə özünə xəsarət yetirib. Həmin şəxs Mərkəzi rayon xəstəxanasına çatdırılıb və əməliyyat olunub. Qeyd edək ki, Şakir Əhədovun oğlu Baloğlan Əhədli Vətən müharibəsində Şuşa uğrunda gedən döyüşlərdə şəhid olub.
11-01-2023, 17:32
Qiymət artımı olduqda maaş və pensiyalara daxil edilən vəsait hiss olunmur - Deputat
Ötən gün Prezident İlham Əliyev yerli televiziya kanallarına müsahibəsində ölkəmizdə müşahidə olunan bahalaşma və minimum əməkhaqqı artımına da münasibət bildirib. Dövlət başçısı çıxışı zamanı Azərbaycanda kəskin qiymət artımının müşahidə edildiyini söyləyib: “Dünya postpandemiya dövrünə hələ təzə-təzə uyğunlaşır. Bir çox ölkələrdə, o cümlədən Azərbaycanda kəskin qiymət artımı müşahidə olunur. Bizim də iqtisadiyyatımız dünya iqtisadiyyatının bir parçası olduğu üçün əfsuslar olsun ki, biz də bu mənfi təsirə məruz qalmışıq”. Prezident, həmçinin deyib ki, dünya üçün böhranlı vəziyyəti biz xalqımız üçün sosial layihələrlə, sosial proqramlarla yüngülləşdirməyə çalışırıq: “Bu yaxınlarda imzaladığım çox geniş sosial paket bir daha bunu göstərir. Yəni, müharibədən təzə çıxmış ölkə, özü də ərazisinin 20 faizi tamamilə dağılmış vəziyyətdə olan ölkə əgər sosial sahəyə bu qədər vəsait ayırırsa, deməli, bizim sosial siyasətimiz dəyişməz olaraq qalır və əlbəttə ki, bizim iqtisadi gücümüzü göstərir”. Minimum maaş və pensiya artımına gəlincə, Prezident indiki rəqəmlərin qaneedici olmadığı diqqətə çatdırıb: “Bu, bizi qane edir? Əlbəttə ki, yox. Amma biz imkan daxilində öz addımlarımızı atırıq. Çünki bir daha demək istəyirəm, bizim əsas xərclər istiqaməti Qarabağı və Şərqi Zəngəzuru bərpa etmək və ordu potensialımızı gücləndirməkdir. Bu iki əsas prioritet bizim üçün uzun illər prioritet kimi qalacaq”. Mövzu ilə bağlı danışan Milli Məclisin deputatı Vahid Əhmədov bildirib ki, Prezident inflyasiya və qiymət artımı ilə bağlı suallara cavabında bir sıra məsələlərin səbəbini aydınlaşdırıb: “Dünən dövlət başçısı jurnalistlərin bütün sahələr üzrə verdiyi suallarını faktiki olaraq cavablandırdı. Prezident qiymət artımı və inflyasiyanın dünyada gedən proseslərlə bağlı olduğunu diqqətə çatdırdı. Azərbaycanda da kəskin qiymət artımının olduğunu vurğuladı”. Deputatın sözlərinə görə, prezident inflyasiya və qiymət artımlarının təsirlərini azaltmaq üçün müəyyən işlərin görülməsinə dair göstərişlər verib:“Prezident bu yaxınlarda “Əhalinin sosial rifahının yaxşılaşdırılması sahəsində əlavə tədbirlər haqqında” sərəncam imzalayıb. Bununla da maaş və pensiyaların məbləği artırıldı. Cənab Prezidentin bu sərəncamı çox mühümdür. Çünki artım 700 minə yaxın insanın maaşına təsir edəcək. Hazırda müavinətlərin məbləği də aşağıdır. Beləliklə, sosial müavinətlərlə bağlı Nazirlər Kabinetinə göstəriş verilib. Kənardan çoxlu məhsullar idxal etdiyimiz üçün Azərbaycanda güclü inflyasiya və qiymət artımı var. Əlbəttə, bu səbəbdən maaş və pensiyaların məbləğinin artırılması qiymət artımları ilə adekvat deyil. Ancaq gedişat göstərir ki, 2023-cü ildə inflyasiya, qiymət artımı elə də yüksək olmayacaq. Bunun qarşısı müəyyən mənada alınacaq”. “Qeyd edim ki, süni qiymət artımları da ola bilər. Pensiya və maaşlar artdıqdan sonra möhtəkirlər bundan istifadə etməyə başlayacaq. Əmək və Əhalinin Sosial Müdafiəsi Nazirliyi və İqtisadiyyat Nazirliyi problemin qarşısını almaq üçün ciddi işlər görməlidir. Çünki qiymət artımı olduqda insanlar maaş və pensiyalarına daxil edilən əlavə vəsaiti hiss etmirlər”,- deyə V.Əhmədov vurğulayıb. Bəs, bugünkü şəraitlə əlaqədar olaraq minimum əməkhaqqı nə qədər olmalıdır?. V.Əhmədov suala cavabında deyib: “İnsanların normal yaşayıb, fəaliyyət göstərməsi üçün 500-1000 manat arası vəsait lazımdır. Bu qiymət artımlarının təsirini müəyyən qədər azalda bilər. Müavinət məsələsinə də baxılmalı, imkan daxilində onun məbləği 180 manatdan heç olmasa 280 manata qaldırılmalıdır. Müavinət kifayət qədər vacib məsələdir”.
11-01-2023, 16:24
Ceyhun Bayramov ABŞ rəsmisiylə bir sıra məsələləri müzakirə etdi
Yanvarın 10-da Azərbaycan Respublikasının xarici işlər naziri Ceyhun Bayramovun Amerika Birləşmiş Ştatları dövlət katibinin Avropa və Avrasiya məsələləri üzrə köməkçisi Karen Donfrid ilə telefon danışığı baş tutub. Xarici İşlər Nazirliyinin Mətbuat xidməti idarəsindən verilən məlumata görə danışıq zamanı tərəflər, iki ölkə arasında əməkdaşlıq gündəliyini və bölgədə cari vəziyyəti müzakirə ediblər. Nazir Ceyhun Bayramov postmünaqişə dövründə Azərbaycan-Ermənistan münasibətlərinin normallaşması ilə bağlı Azərbaycan tərəfinin bir sıra konstruktiv təşəbbüslərinə baxmayaraq, Ermənistan tərəfindən prosesə davamlı əsasda müxtəlif təxribatlarla maneçilik törədildiyini diqqətə çatdırıb. Bu xüsusda, Ermənistan tərəfindən 2020-ci il 10 noyabr tarixli Üçtərəfli Bəyanat üzrə öhdəliklərin kobud şəkildə pozulmasına, Laçın yolundan hərbi təxribatlar, o cümlədən minaların qanunsuz daşınması və yerləşdirilməsi, qeyri-qanuni iqtisadi fəaliyyət və təbii sərvətlərin talanması, üçüncü ölkə vətəndaşlarının qanunsuz keçidi məqsədilə istifadə olunması kimi faktlara vurğu edilib. Ərazilərimizin 30 ilə yaxın davam etmiş işğalı zamanı və son dövrlər intensivləşmiş qeyri-qanuni fəaliyyətlərə qarşı Azərbaycan vətəndaş cəmiyyətinin Laçın yolunda etiraz aksiyasının haqlı tələblərinin hələ də yerinə yetirilmədiyi qeyd olunub. Nazir Ceyhun Bayramov guya Laçın yolunun Azərbaycan tərəfindən bağlanması nəticəsində erməni sakinlərin “blokada”ya alınması, bölgədə “humanitar fəlakət” yaranması barədə iddiaların tamamilə əsassız olduğunu bildirib. Gündəlik əsasda çox sayda Beynəlxalq Qızıl Xaç Komitəsi, Rusiya sülhməramlı kontingenti və digər humanitar məqsədli nəqliyyat vasitələrinin yoldan istifadə etdiyi barədə məlumat verilib. Erməni sakinlərin yoldan istifadə etməklə sərbəst hərəkətinə heç bir maneə olmadığı, ehtiyac olacağı təqdirdə ermənilərə yardım göstərmək niyyətləri barədə Azərbaycan tərəfinin bəyanatlarına baxmayaraq, yerli ermənilərin rəhbərləri kimi özlərini təqdim edən şəxslərin əhalinin yoldan istifadəsinə qarşı olması faktları diqqətə çatdırılıb. Azərbaycan tərəfinin dialoqa sadiqliyi və bölgədə sülhün bərqərar olması istiqamətində səyləri artırmağa daim hazır olduğu vurğulanıb. Tərəflər habelə qarşılıqlı maraq doğuran digər ikitərəfli və regional məsələlər ətrafında fikir mübadiləsi aparıblar.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!