Ölkədə həyata keçirilən müxtəlif infrastruktur layihələrin icrasına hər kəs ürəkdən sevinir və alqışlayır. Ancaq bu sevincdən Saatlı rayonunun Musalı, Nərimankənd və Dəllər kəndlərinə nədənsə tam olaraq pay düşmür.
Qeyd edək ki, bir-biri ilə bitişik adı çəkilən bu 3 kəndi rayon mərkəzindən Araz çayı ayırır. Bu kəndlərdən Musalı kəndi (mənim doğma kəndim) rayon mərkəzindən cəmi 3 km, ən uzaqda olan Dəllər kəndinin sonuncu evi isə təxminən 9-10 km aralıda yerləşir.
Doğrudur, ötən illər ərzində bu kəndlərdə yaşayan sakinlərin yol, su problemi öz həllini qismən tapsa da, ancaq yaşayış üçün ən vacib şərtlərdən biri olan mavi yanacaq və ya qaz problemi hələ də öz həllini tapmayıb.
Burada ən acınacaqlı vəziyyət odur ki, insanlar evlərini isitmək üçün artıq həyətlərindəki meyvə ağaclarını kəsirlər. Çünki, bir maşın odunun qiyməti 80-100 manata başa gəlir ki, bunu da almağa kənd sakinlərinin maddi imkanı yoxdur. Nəzərə alaq ki, əgər əvvəlki dövrlərdə sakinlər Araz sahilində bitən yulğun və ya çöl sahələrdəki söksöyül kollarından qırıb gətirib yanacaq kimi istifadə edirdilərsə, indi bu kollar qırmızı kitaba salındığından və cərimə tətbiq edildiyindən bunu edə bilmirlər. Pambıq kollarının isə sahələrdə az olması və tez yanıb qurtarması insanları çıxılmaz vəziyyət salıb.
Sakinlər mətbəxdə yemək hazırlamaq üçün daha çox propan qazdan və elektrik enerjisindən istifadə edirlər ki, bu da maddi imkansızlıqdan heç kimi qane etmir. Bu üzdən də insanlar mucbur qalıb bir vaxtlar sevə-sevə həyətlərində əkdikləri meyvə ağaclarını ürəkağrısı ilə öz əlləri ilə baltalayırlar.

Əslində bu problem barədə hələ 2011-ci ilin mayın 5-də ölkə prezidenti cənab İlham Əliyev yenidən qurulmuş Saatlı-Musalı-Məzrəli avtomobil yolunun açılışından sonra rayon ictimaiyyətinin nümayəndələri ilə görüşü zamanı bildirmiş və lazımi göstərişlərini vermişdir:
“Regionların inkişafı ilə bağlı Proqramda bütün məsələlər nəzərdə tutulub. Növbəti aylarda, xüsusilə bu il və gələn ilin sonuna qədər rayonun qazlaşdırma ilə bağlı problemlərinin tam əksəriyyəti öz həllini tapmalıdır. Mən bilirəm ki, bu məsələyə həmişə olduğu kimi, böyük diqqət yetirilməlidir. Müəyyən işlər görülmüşdür, ancaq əksər yaşayış məntəqələrində qaz xətləri yoxdur. Keçmişdə də olmayıb, olanlar da sıradan çıxıb. Ona görə Dövlət Neft Şirkətinə göstəriş vermişəm ki, 2012-ci ilin sonuna qədər Azərbaycanın bütün yaşayış məntəqələri harada ki, mümkündür qazlaşdırılsın. Beləliklə, ölkə ərazisinin 95 faizi qazlaşdırılacaqdır. O ki qaldı Saatlı rayonuna, burada qazlaşdırma 100 faiz olmalıdır. Çünki burada dağlıq kəndlər yoxdur. Bilirsiniz ki, dağlıq kəndlərə qaz çəkmək daha da çətindir. Burada, kəndlər demək olar ki, bir-birinə yaxındır. İndi yollar da çəkilir. Ona görə, hesab edirəm ki, gələn ilin sonuna qədər Saatlıda qazlaşdırma ilə bağlı bütün problemlər həll olunmalıdır. Bu məsələ daim diqqət mərkəzindədir. Mən məsələ ilə maraqlanıram, soruşuram ki, vaxt itirməyək. İndi bizim texniki imkanlarımız da, maliyyə imkanlarımız da vardır. Dövlət Proqramında da bu məsələlər öz əksini tapıbdır”.

Əlbəttə, ölkə prezidentinin də qeyd etdiyi kimi bu kəndlərdə keçmişdə qaz xətti olmayıb, eyni zamanda, bura dağlıq ərazi də deyil. Bu üzdən də Musalı, Nərimankənd və Dəllər kəndlərində qısa müddətdə qaz probleminin həlli üçün heç bir maneə yoxdur. Ancaq görünür müvafiq qurumlar cənab prezidentin 10 il bundan əvvəl verdiyi tapşırığı bu qədər gecikdirməkdə hansı məsuliyyət daşıdıqlarını lazımınca hələ dərk etmirlər.

Mübariz Azərbaycanlı,
müstəqil jurnalist