Ümumdünya Qida Təhlükəsizliyi Günü münasibətilə Qida Təhlükəsizliyi Agentliyinin könüllüləri maarifləndirmə və təbliğat-təşviqat işləri aparıblar. Könüllü Qida Nəzarətçiləri Bakı şəhəri və regionlarda yerləşən market şəbəkələrində “5 addımda qida təhlükəsizliyi”, “Konservləşdirilmiş qidalar”, “Bakteriya mənşəli qida zəhərlənmələri”, “Qida məhsullarının etiket məlumatları” mövzularında çap materialları paylayıblar.

Butov.az xəbər verir ki, Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, “Təhlükəsiz qida ilə sağlam gələcəyə” şüarını əks etdirən bröşürlərdə qida məhsullarının etiketlərində yer almalı olan məlumatlar, etiket üzərində simvol və işarələrin izahı, bakteriya mənşəli qida zəhərlənmələrinin təsviri, qida vasitəsilə yayılan xəstəliklərin insana keçməsinin qarşısını almaq üçün tövsiyələr, konservləşdirilmiş qidalar və s. məlumatlar əksini tapıb. Bu məlumatlara əsasən, düzgün istifadə olunmamış konservlərdə yaranmış bakteriyalar qida zəhərlənmələrinə səbəb ola bilər. Keyfiyyətsiz konservlərin istehlakı insan sağlamlığı üçün ciddi təhlükə mənbəyidir. Konserv istehsalı zamanı hazırlanma texnologiyasına ciddi riayət olunmalıdır.

Bundan başqa, broşürlərdə məhsul alarkən etiket məlumatları ilə bağlı vacib məqamlar diqqətə çatdırılır. İstənilən qida məhsulunun etiketində adı, tərkibi, miqdarı (kütlə, həcm), istehsal tarixi, son istifadə tarixi, saxlanılma şərtləri, istehsalçının adı və ünvanı, istifadəçiyə dair tövsiyələr və ya məhdudiyyətlər, qida dəyəri göstəriciləri əksini tapmalıdır. Qida məhsullarını seçərkən etiket məlumatlarını oxumaq və üzərindəki işarələrə diqqət yetirmək vacibdir. Bu, istehlakçının məlumatlı olması ilə yanaşı, qida sahəsində fəaliyyət göstərən sahibkarlıq subyektlərinin öz işinə daha məsuliyyətlə yanaşmasına səbəb olur.