16-01-2025, 14:36
Rəşad Nəbiyev baş katiblə görüşüb
Rəqəmsal inkişaf və nəqliyyat naziri Rəşad Nəbiyev ölkəmizdə səfərdə olan Asiyada Qarşılıqlı Fəaliyyət və Etimad Tədbirləri üzrə Müşavirənin baş katibi Kayrat Sarıbay ilə görüşüb.
Görüşdə Azərbaycanın təşkilata sədrliyi çərçivəsində nəqliyyat və İKT sahəsində görüləcək işlər müzakirə edilib.
Qeyd edilib ki, görüşdə müvafiq tədbirlərin keçirilməsi və layihələrin icrası ilə bağlı əməkdaşlıq məsələlərinə dair fikir mübadiləsi aparılıb.
16-01-2025, 14:27
Britaniyanın baş naziri Kiyevə gəlib
Böyük Britaniyanın baş naziri Keir Starmer Ukraynaya səfər edib.
“The Guardian”ın məlumatına görə, Kiyev və London müdafiə sektorunda əlaqələrin dərinləşdirilməsinə yönəlmiş “yüz illik tərəfdaşlıq” haqqında saziş imzalayacaqlar.
Sənəddə elm, ticarət və iqtisadiyyat sahələrində də əməkdaşlıq nəzərdə tutulub.
Keir Starmer və Vladimir Zelenskinin Ukrayna üçün mümkün təhlükəsizlik təminatlarını, o cümlədən Rusiya ilə atəşkəs əldə edildikdən sonra Britaniya sülhməramlılarının yerləşdirilməsi imkanlarını da müzakirə edəcəyi gözlənilir.
Bu səfər Böyük Britaniyanın baş naziri kimi Starmerin Ukraynaya ilk səfəridir. O, bundan əvvəl 2023-cü ilin iyulunda müxalifət lideri kimi Kiyevə səfər edib, həmçinin Londonda danışıqlar zamanı Vladimir Zelenski ilə iki dəfə görüşüb.
16-01-2025, 14:10
Vəziyyət ağırdır - Zelenski
Ukrayna prezidenti Vladimir Zelenski ordunun cəbhə xəttindəki ağır vəziyyətindən danışıb.
Zelenski Polşa mətbuatına müsahibəsində deyib:
"Ukrayna Silahlı Qüvvələri bölmələrinin yalnız 60%-i tam təchiz olunub".
O, həmçinin etiraf edib ki, cəbhə xəttində Ukrayna silahlı qüvvələri üçün vəziyyət ağırdır.
"Elə olur ki, təşəbbüs bir tərəfdən digər tərəfə keçir. Kəndlər və şəhərlər beləcə düşmənin əlinə keçir və ən çox bu, son vaxtlar, ölkəmizin şərqində baş verir", - Zelenski əlavə edib.
16-01-2025, 13:43
Pensiya artımı neçə faizlə indeksləşdiriləcək? - Deputat AÇIQLADI
Dövlət Statistika Komitəsinin bu gün yaydığı məlumata görə, 2024-cü ilin ilk 11 ayında ölkə üzrə orta aylıq əmək haqqı 8.0 faiz artaraq 996.8 manata çatıb. Bu isə o deməkdir ki, ötən ilin yekun əmək haqqı artımının təxminən 8.0 faiz olacağı gözlənilir.
“Əmək pensiyaları haqqına” Qanuna əsasən, bütün növ əmək pensiyaları əvvəlki ildə orta aylıq maaşdakı artım faizinə indeksasiya olunaraq artırılır.
Mövzunu şərh edən iqtisadçı deputat Vüqar Bayramov bildirib ki, indeksləşdirmə nəticəsində 1 milyon 100 min vətəndaşın pensiyasında artımlar olacaq.
“Bu artımların ödənilməsi məqsədlə əlavə təxminən yarım milyard manat vəsait nəzərdə tutulub.
İndeksləşdirmə bütün növ əmək pensiyalarına şamil olunur. “Əmək pensiyaları haqqında” Qanunun 4-cü maddəsinə əsasən, əmək pensiyalarının 3 növü təsbit olunub. Bunlar yaşa görə əmək pensiyası, əlilliyə görə əmək pensiyası və ailə başçısını itirməyə görə əmək pensiyasıdır. Deməli, vətəndaşımız növündən asılı olmayaraq əmək pensiyası alırsa, onun pensiya məbləğinə artım hesablanacaq”.
V.Bayramov deyib ki, qanunvericiliyə əsasən, indeksləşdirmə əvvəlki ilin göstəricisinə uyğunlaşdırıldığına görə 2024-cü ilin dekabrın 31-i daxil olmaqla ötən il pensiya hüququ qazanan bütün vətəndaşların pensiyaları artırılacaq.
“Belə ki, orta aylıq nominal əməkhaqqının illik artım tempinə uyğun olaraq, 2024-cü il yanvarın 1-dək təyin edilmiş əmək pensiyalarının sığorta hissəsi, qulluq stajına görə əmək pensiyasına əlavələr təyin edilmiş əmək pensiyaçılarına münasibətdə həmin əlavələrlə birlikdə müəyyən edilmiş məbləğ artırlır.
Qeyd edək ki, 2024-cü ildə orta aylıq əmək haqqında artımla bağlı rəsmi statistika fevral ayının ilk 10 günündə bəlli olduğu üçün indeksasiya da məhz o zaman aparılacaq. Pensiya artımları yanvarın 1-dən hesablanır, amma artımlar fevral ayında ikisi birlikdə ödəniləcək. Deməli, pensiyaçılar artımları gələn aydan etibarən alacaqlar. Amma yanvar ayı üçün hesablanmış artım da fevral ayının pensiya məbləğinə əlavə olunacaq”.
16-01-2025, 13:39
Qardaşının ölüm xəbərini eşitdi, özü vəfat etdi
Ucarda 2 qardaş eyni gündə vəfat edib.
Alpout kənd sakini, 1964-cü il təvəllüdlü Suliddin Cəfər oğlu Həsənov xəstəliyi ilə əlaqədar olaraq Ucar Rayon Mərkəzi Xəstəxanasına yerləşdirilib. O, xəstəxanada dünyasını dəyişib. Mərhumun qardaşı, 1958-ci il təvəllüdlü Suliddin Cəfər oğlu Həsənov bunu eşidəndə yaşadığı evdə dünyasını dəyişib.
Hər iki qardaş kənd qəbiristanlığında dəfn edilib.
16-01-2025, 13:35
Cəbrayıla çatan ailələrə mənzillərin açarları təqdim olundu
Bu gün növbəti köç karvanı ilə Cəbrayıl şəhərinə çatan ailələrə evlərinin açarları təqdim olunub.
Cəbrayıla qədəm qoyan ailələr qarşılandıqdan sonra onlara ANAMA əməkdaşları tərəfindən mina və partlamamış silah sursatların təhlükəsi barədə ətraflı məlumat verilib. Tanımadıqları naməlum əşyalar və cisimlərdən uzaq durmaları və belə hallarla qarşılaşdıqları zaman aidiyyəti qurumlara xəbər vermələri tövsiyə olunub.
Açarların təqdim edilməsi mərasimində, Cəbrayıl, Qubadlı və Zəngilan rayonlarında Azərbaycan Respublikası Prezidentinin Xüsusi nümayəndəliyinin, Qaçqınların və Məcburi Köçkünlərin İşləri üzrə Dövlət Komitəsinin rəsmiləri və digər şəxslər iştirak ediblər. Ailələr sevinc hissi ilə açarları təhvil alıb və öz evlərində məskunlaşıblar. Köçürülən ailələrin, Cəbrayıl şəhərində dövlətimizin başçısının göstərişi əsasında yenidən tikilən evlərdə məskunlaşması üçün bütün şərait yaradılıb.
Qeyd edək ki, hazırda Qarabağda və Şərqi Zəngəzurda, ora köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən, ümumilikdə, 30 minə yaxın insan yaşayır.
16-01-2025, 13:23
Prezident "Rəqəmsal İnkişaf Konsepsiyası”nı TƏSDİQLƏDİ
Prezident İlham Əliyev "Rəqəmsal İnkişaf Konsepsiyası”nı təsdiqləyib.
Bununla bağlı dövlət başçısı yeni fərman imzalayıb.
Fərmana əsasən, Konsepsiyada nəzərdə tutulmuş tədbirlərin əlaqələndirilməsini və icrasına nəzarəti Nazirlər Kabineti, Rəqəmsal İnkişaf Operatorunun funksiyalarını Rəqəmsal İnkişaf və Nəqliyyat Nazirliyi həyata keçirir.
Ali kateqoriya dövlət orqanları, habelə mühafizə olunan şəxslərin, qorunan və strateji obyektlərin təhlükəsizliyini təmin edən dövlət orqanları, kəşfiyyat və əks-kəşfiyyat fəaliyyətinin subyektləri istisna olmaqla, digər dövlət orqanları (qurumları) tərəfindən dövlət informasiya sistemlərinin və ehtiyatlarının formalaşdırılması və təkmilləşdirilməsi, eləcə də elektron xidmətlərin təşkili və təkmilləşdirilməsi üzrə layihələrin (büdcədənkənar dövlət fondlarının vəsaitləri hesabına həyata keçirilən layihələr istisna olmaqla) maliyyələşdirilməsi Rəqəmsal İnkişaf və Nəqliyyat Nazirliyinin rəyi (Maliyyə Nazirliyi ilə razılaşdırmaqla) əsasında təmin edilir.
16-01-2025, 13:09
Azərbaycan və Ermənistan generalları eyni toplantıda - FOTO
Brüssel şəhərində NATO-nun Hərbi Komitəsinin Baş Qərargah rəisləri formatında görüşü keçirilir.
İclasda Azərbaycan və Ermənistan da təmsil olunur.
Azərbaycandan müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev, Ermənistandan Baş Qərargah rəisi, general-leytenant Edvard Asryan iştirak edir.
Görüşdə cari qlobal və regional təhlükələr, çağırışlar barədə məlumatlılığın artırılması və onların təsirinin azaldılması üçün kollektiv həll yollarının axtarışı, iqlim dəyişikliyi, qeyri-sabitlik, yeni yaranan və pozucu texnologiyalar, hibrid və kiber təhdidlər dövründə kritik həyatı dəstəkləyən infrastrukturların dayanıqlılığı, həmçinin NATO-nun rəhbərlik etdiyi əməliyyat və missiyalarda tərəfdaş dövlətlərin iştirakı ilə bağlı məsələlər müzakirə olunur.
16-01-2025, 12:54
Gənc əsgərlərlə görüş dayandırıldı
Ölkəmizdə qış mövsümündə havaların soyuq keçməsi ilə əlaqədar mövsümi xarakter daşıyan respirator virus infeksiyalarına yoluxma hallarının artması müşahidə olunur. Bununla əlaqədar adaptasiya dövründə olan gənc əsgərlərin sağlamlığının qorunması məqsədilə hərbi hissələrdə onlarla görüşə müvəqqəti məhdudiyyət qoyulub.
Bu barədə Müdafiə Nazirliyi məlumat yayıb.
Məlumatda bildirilib ki, hərbi hissələrin qapalı və ictimaiyyətlə məhdud ünsiyyət şəraitində olması komandir-rəis heyəti və hərbi tibb personalı tərəfindən hərbi qulluqçuların sağlamlığının qorunması məqsədilə effektiv qabaqlayıcı tədbirlərin keçirilməsinə imkan yaradır:
"Şəxsi heyətlə maarifləndirici söhbətlərin aparılması, onlara düzgün qidalanma və fərdi gigiyena qaydalarının, gündəlik fəaliyyətlər zamanı kompleks profilaktik tədbirlərin vacibliyinin çatdırılması sayəsində yoluxma hallarının qarşısının alınması təmin edilir.
Respirator virus infeksiyalarına yoluxma hallarının qarşısının alınması məqsədilə görülən tədbirlərin effektivliyinin təmin edilməsini nəzərə alaraq ictimaiyyətdən hərbi qulluqçularımızın sağlamlığına həssaslıqla yanaşmağı, qeyd olunan məhdudiyyəti anlayışla qarşılamağı və hərbi hissələrə gəlməməyi xahiş edirik".
16-01-2025, 12:27
Sabahın hava proqnozu
Yanvarın 17-ə gözlənilən hava şəraiti açıqlanıb.
Milli Hidrometeorologiya Xidmətindən verilən xəbərə görə, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Lakin səhər və axşam bəzi yerlərdə çiskinli yağış yağacağı ehtimalı var. Şimal-qərb küləyi gündüz cənub-şərq küləyi ilə əvəz olunacaq.
Havanın temperaturu gecə 4-6° isti, gündüz 6-9° isti olacaq.
Atmosfer təzyiqi 770 mm civə sütunu təşkil edəcək.
Nisbi rütubət 70-80 % olacaq.
Azərbaycanın rayonlarında hava şəraiti əksər rayonlarda əsasən yağmursuz keçəcək. Lakin bəzi dağlıq və dağətəyi rayonlarda arabir yağıntılı olacağı, qar yağacağı gözlənilir. Bəzi yerlərdə arabir duman olacaq. Qərb küləyi ayrı-ayrı yerlərdə arabir güclənəcək. Havanın temperaturu gecə 1-5° isti, gündüz 6-11° isti, dağlarda gecə 5-10° şaxta, gündüz 2° şaxtadan 3°-dək isti olacaq.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!