24-09-2025, 22:54
Urmiya gölü tamamilə qurudu
İranın şimal-qərbində yerləşən və Asiyanın ən iri duzlu gölü sayılan Urmiya gölü tamamilə quruyub.
Bu barədə Almaniyanın "Bild" nəşri peyk görüntülərinə istinadən məlumat yayıb.
2025-ci ilin yayında göldən geriyə yalnız çatlamış quru torpaq və bir neçə kiçik gölməçə qalıb.
Mütəxəssislər və müxalif media qurumları Urmiyanın yox olmasını ekoloji fəlakət adlandırır və bunun səbəbkarı kimi İran hakimiyyətini göstərirlər.
"Iran News Update" bildirir ki, ölkədə bir milyondan çox qanunsuz artezian quyusu mövcuddur və onlar illərlə yeraltı suları tükədib. Bundan başqa, kənd təsərrüfatı sektoru ölkənin 88% su resursunu istifadə etsə də, ÜDM-də payı cəmi 10% təşkil edir.
İran prezidenti Məsud Pezeşkiyan da böhranı etiraf edərək bildirib ki, artıq Tehranda “su qalmayıb” və hökumət paytaxtın köçürülməsini müzakirə edir.
Urmiyanın quruması bölgədə yüz minlərlə insanın həyatına mənfi təsir göstərib. Əhalisinin əhəmiyyətli hissəsini azərbaycanlıların təşkil etdiyi regionda indi duz fırtınaları baş verir, torpaq məhsuldarlığını itirir və kənd təsərrüfatı faktiki olaraq mümkünsüz hala düşür.
Ekoloqlar xəbərdarlıq edir ki, bu proses davam edərsə, İranın digər bölgələrində də oxşar fəlakətlər qaçılmaz ola bilər.
24-09-2025, 22:45
Sünnət toyunda zəhərlənənlərin sayı 50-ni keçdi - YENİLƏNİB
İmişlidə toyda zəhərlənənlərin sayı artıb.
TƏBİB-dən bildirilib ki, 24.09.2025-ci il tarixində saat 14:10 radələrindən etibarən zəhərlənmə şübhəsi ilə 53 nəfər (4-ü uşaq olmaqla 21-i kişi, 3-ü uşaq olmaqla 32-si qadın cinsli) İmişli Rayon Mərkəzi Xəstəxanasının Təcili tibbi yardım şöbəsinə hospitalizasiya olunub:
“Onlara qeyri-infeksion enterit və kolit diaqnozu təyin olunub və hər birinə zəruri tibbi yardım göstərilib.
Vəziyyəti qənaətbəxş qiymətləndirilən 1 nəfər (kişi cinsli) iltizamnaməsi alınaraq ixtisaslı tibbi xidmətdən imtina edib.
Vəziyyətləri stabil qiymətləndirilən digər şəxslərin müalicələri müvafiq şöbələrdə davam etdirilir”.
***
18:25
İmişli rayonunda baş vermiş hadisənin səbəblərinin müəyyən edilməsi məqsədilə Qida Təhlükəsizliyi Agentliyinin (AQTA) mütəxəssisləri tərəfindən müvafiq qurumların əməkdaşları ilə birlikdə araşdırmalara başlanılıb.
Agentlikdən bildirilib ki, ilkin araşdırma zamanı hadisənin rayonun Muradxanlı kəndində təşkil olunan kiçik toy mərasimi zamanı baş verdiyi məlum olub.
Hadisə yerinə baxış keçirilib, qida nümunələri götürülərək müvafiq müayinələr aparılır.
Hazırda faktla bağlı araşdırmalar davam etdirilir. Nəticələrlə bağlı əlavə məlumat veriləcəyi qeyd olunub.
AQTA bir daha ev şəraitində hazırlanan qidaların istehlaka təqdim edilməsi zamanı saxlama şəraitinə, temperatur rejiminə, gigiyena və düzgün daşıma qaydalarına riayət edilməsinin vacibliyini vurğulayıb.
***
17:30
İmişlidə kütləvi zəhərlənmə hadisəsi baş verib.
15 nəfər zəhərlənmə şübhəsi ilə rayon mərkəzi xəstəxanasına müraciət edib.
Onlara ilkin tibbi yardım göstərilir.
Xəstəxanaya daxil olan şəxslərin eyni toyda iştirak etdiyi bildirilir.
24-09-2025, 22:32
Türkiyədə bələdiyyə sədri saxlanıldı
Türkiyədə hüquq-mühafizə orqanları korrupsiya işi çərçivəsində Kırıkkale vilayətinin Yahşihan bölgəsinin bələdiyyə sədri Ahmet Sunquru həbs edib.
O, hakim Ədalət və İnkişaf Partiyasının (AKP) üzvüdür.
Sunqurla yanaşı onun müavini, keçmiş bələdiyyə sədrinin müavini, şəhərsalma şöbəsinin müdiri, bələdiyyənin sabiq rəhbəri və bir iş adamı da istintaq təcridxanasına yerləşdirilib. Ümumilikdə 5 nəfər saxlanılıb.
Hadisədən sonra AKP Mərkəzi İcraiyyə Komitəsi məsələni partiyanın Mərkəzi İntizam Komissiyasına göndərib və Sunqurun partiyadan xaric edilməsi müzakirəyə çıxarılıb.
Qeyd edək ki, eyni istintaq çərçivəsində bu ilin 27 may və 19 avqust tarixlərində Yahşihanın keçmiş meri Osman Türkyılmaz və digər şəxslər də saxlanılmışdı.
24-09-2025, 21:34
İlham Əliyev Nyu-Yorkda vacib görüş keçirdi
Azərbaycan Respublikasının Prezidenti İlham Əliyev sentyabrın 24-də Nyu-Yorkda “Ares Management” qlobal investisiya şirkətinin həmtəsisçisi və baş icraçı direktoru Maykl Aruqeti ilə görüşüb.
Söhbət zamanı Azərbaycanın maliyyə bazarının dayanıqlı inkişafı və ölkəyə xarici investisiya axınının təşviqi baxımından “Ares Management” şirkəti ilə əməkdaşlığın əhəmiyyətinə toxunuldu.
Prezident İlham Əliyev bu istiqamətdə qurulmuş tərəfdaşlıqların, xüsusilə də alternativ investisiya sahəsində birgə təşəbbüslərin ölkəmizin iqtisadi hədəflərinə töhfə verə biləcəyini qeyd etdi.
Görüşdə Azərbaycan Respublikası Dövlət Neft Fondu ilə “Ares Management” arasında 2017-ci ildən mövcud olan uğurlu əməkdaşlığın genişləndirilməsi imkanları, həmçinin dayanıqlı infrastruktur, logistika, daşınmaz əmlak, təhsil və yaşıl enerji sahələrində gələcək investisiya layihələrinin həyata keçirilməsi ilə bağlı potensial müzakirə olundu.
Maykl Aruqeti Azərbaycanın davamlı inkişaf siyasətini və ölkəmizdə institusional investorlara yaradılmış əlverişli mühiti yüksək qiymətləndirərək, bunun beynəlxalq tərəfdaşlıqlar üçün geniş imkanlar açdığını bildirdi. O, rəhbərlik etdiyi şirkətin xüsusilə yaşıl enerji, logistika və sosial infrastruktur sahələrində Azərbaycanla əməkdaşlığı genişləndirməkdə maraqlı olduğunu diqqətə çatdırdı.
Qeyd edək ki, “Ares Management” kredit, daşınmaz əmlak, özəl səhm və infrastruktur sahələrində fəaliyyət göstərir. Maykl Aruqeti və tərəfdaşlarının 1997-ci ildə təsis etdiyi şirkət hazırda 600 milyard ABŞ dollarına yaxın aktivləri idarə edir. “Ares Management” portfelindəki anbar və logistika investisiya aktivlərinin toplam sahəsinə görə dünyanın ən böyük üç şirkətindən biridir.
24-09-2025, 21:22
1 saat danışıqlar apardılar
Rusiyanın xarici işlər naziri Sergey Lavrov və ABŞ Dövlət katibi Marko Rubio arasında danışıqlar yekunlaşıb.
Bu barədə xarici KİV məlumat yayıb.
BMT Baş Assambleyasının Nyu-Yorkda keçirilən 80-ci sessiyası çərçivəsində keçirilən danışıqlar bağlı qapılar arxasında keçirilib və bir saat davam edib.
24-09-2025, 20:52
Bakı və İrəvan dəvət edildi, Tbilisi çağırılmadı
Gürcüstan Avropa İttifaqının (Aİ) xarici işlər nazirlərinin 20 oktyabrda Lüksemburqda keçiriləcək iclasında iştirak etməyəcək.
Bu barədə Gürcüstanın Xarici İşlər Nazirliyi (XİN) məlumat yayıb.
Məlumata görə, toplantıya Mərkəzi Asiya və Şərq Tərəfdaşlığı ölkələrinin - Azərbaycan, Ermənistan, Türkiyə, Türkmənistan, Özbəkistan, Tacikistan, Qazaxıstan və Qırğızıstanın xarici işlər nazirləri dəvət olunub. Lakin Gürcüstan yalnız səfir səviyyəsində çağırıldığı üçün buna etiraz edərək tədbirdə iştirakdan imtina edib.
XİN bəyan edib ki, Gürcüstanın bu formada dəvət olunması “qeyri-ciddi münasibət” kimi qiymətləndirilir və ölkənin rolunu kiçiltmək cəhdi təsiri bağışlayır:
“Nazirlərin görüşünə Gürcüstan səfir səviyyəsində dəvət olunub. Bu, qəbuledilməzdir və əsasları aydın deyil. Bu addım siyasi manipulyasiya və radikal gündəmin təşviqi kimi görünür”.
Nazirlik əlavə edib ki, Gürcüstanın regional təhlükəsizlik və əməkdaşlıq məsələlərində lazımi səviyyədə iştirakı Aİ üçün vacibdir. Rəsmi Tbilisi ümid edir ki, Aİ-nin əksər üzvləri ölkənin Avropa ilə Asiya arasında körpü rolunu qiymətləndirir və Avropa Xarici Fəaliyyət Xidmətinin mövqeyini bölüşmür.
24-09-2025, 20:35
Rus təyyarələri Almaniya gəmilərini izlədi
Rusiyanın hərbi təyyarələri Baltik dənizində Almaniyanın “Hamburq” freqatının üzərində iki dəfə aşağı hündürlükdə uçaraq müşahidələr aparıb.
Bu barədə Almaniyanın müdafiə naziri Boris Pistorius Bundestaqdakı çıxışı zamanı bildirib.
Nazir bu hadisəni sərt tənqid edərək deyib ki, Moskva NATO ölkələrinin sərhədlərini sınaqdan keçirir. Rusiya dronlarının və hərbi təyyarələrinin Polşa və Estoniya hava məkanına daxil olması, eləcə də Almaniya freqatının üzərində uçuş aparması son bir neçə gündə rəsmi Moskva tərəfindən NATO-ya qarşı təzyiqlərin artdığını göstərir.
Boris Pistorius vurğulayıb ki, Rusiya Prezidenti Vladimir Putin NATO üzvlərini sınağa çəkmək və alyansın zəif tərəflərini müəyyənləşdirib, bundan istifadə etmək niyyətindədir. Lakin alyans bu təxribatlara qətiyyətlə, eyni zamanda, səbir və soyuqqanlılıqla cavab verərək Putinin məqsədlərinə çatmasına imkan verməyəcək.
Qeyd edək ki, “Hamburq” freqatı hazırda NATO-nun “Neptun Strike 25-3” genişmiqyaslı hərbi təlimində iştirak edir. Sentyabrın 26-dək davam edəcək bu çoxmillətli hərbi təlim Aralıq, Adriatik, Şimal və Baltik dənizlərini əhatə edir. Təlimə NATO-nun 13 üzv dövlətindən 10 mindən çox şəxsi heyət cəlb olunub.
24-09-2025, 19:47
İlham Əliyev Çoksi ilə danışıqlar apardı
Sentyabrın 24-də Azərbaycan Respublikasının Prezidenti İlham Əliyevin Nyu-Yorkda ABŞ Ticarət Palatasının baş vitse-prezidenti Kuş Çoksi ilə görüşü olub.
24-09-2025, 19:47
Ermənistanda səs-küylü cinayət: Vardanyanın partiyasında olan müxalifətçini kim öldürüb?
Ermənistanın Armavir vilayətində yerləşən Parakar icmasının rəhbəri Volodiya Qriqoryan silahlı hücum nəticəsində öldürülüb.
Hadisə ötən gecə baş verib və Ermənistan böyük rezonans doğurub. Qriqoryanla birlikdə Abarat vilayətinin kriminal polis idarəsinin zabiti Karen Abramyan da qətlə yetirilib. Daha bir nəfər isə yaralanıb.
Ermənistan Daxili İşlər Nazirliyinin mətbuat katibi Narek Sarkisyan bildirib ki, polisə hadisə barədə məlumat saat 23:50-də daxil olub. Dərhal əməliyyat qrupu əraziyə göndərilib. Hazırda 100-dən çox polis əməkdaşı istintaq tədbirlərinə cəlb olunub. Onların sözlərinə görə, maskalı və əlcəkli şəxs küçədə dayanan üç nəfərə yaxınlaşaraq atəş açıb.
Volodiya Qriqoryan mart ayında keçirilən bələdiyyə seçkilərində hakim “Vətəndaş müqaviləsi” partiyasının namizədini məğlub edərək Parakarın icma rəhbəri seçilib.
O, hazırda Bakıda mühakimə olunan erməni əsilli oliqarx Ruben Vardanyanın sponorluğu ilə yaradılan “Yaşamaq üçün ölkə” partiyasını təmsil edirdi. Qriqoryanın seçkidə qalib gəlməsi digərpartiyaların dəstəyi ilə mümkün olmuşdu.
Hadisə ilə bağlı hələlik konkret versiya irəli sürülməyib. Ermənistan mediasında bunun kriminal “hesablaşma” və ya siyasi motivli sui-qəsd ola biləcəyi ehtimalları müzakirə olunur.
Baş nazir Nikol Paşinyan “Facebook” səhifəsində hücumu qətiyyətlə pisləyib: “Hüquq-mühafizə orqanları qısa zamanda cinayətdə əli olan hər kəsi müəyyən etməlidir. Eyni zamanda, Parakarda baş verən zorakılıq hadisələrinin qarşısını almaq üçün hansı preventiv addımların atılmalı olduğu araşdırılacaq və nəticələrdən zəruri nəticələr çıxarılacaq”.
Son illər Ermənistanda kriminal qruplar arasında silahlı toqquşmalar tez-tez baş verir. Qriqoryanın öldürülməsi isə Ermənistanda siyasi sabitliyi sarsıda biləcək hadisə kimi qiymətləndirilir.
24-09-2025, 19:38
Prezident Nyu-Yorkda daha bir görüş keçirdi
Sentyabrın 24-də Nyu-Yorkda Azərbaycan Respublikasının Prezidenti İlham Əliyev Portuqaliya Respublikasının Prezidenti Marselo Rebelo de Souza ilə görüşüb.
Portuqaliya Prezidenti, ilk növbədə, dövlətimizin başçısına Azərbaycanla Ermənistan arasında münasibətlərin normallaşdırılması və sülh gündəliyinin irəli aparılması ilə bağlı Amerika Birləşmiş Ştatlarının Prezidenti Donald Trampın şahidliyi ilə əldə olunmuş nailiyyətlər münasibətilə təbriklərini çatdırdı.
Prezident İlham Əliyev təbriklərə görə təşəkkürünü bildirdi. Vaşinqtonda keçirilmiş Zirvə toplantısının tarixi əhəmiyyət kəsb etdiyini deyən dövlətimizin başçısı Azərbaycanın regionda sülh gündəliyinin təşəbbüskarı olduğunu bildirərək, ölkəmizin bundan sonra da bölgədə sülhün gücləndirilməsi üçün səylərini davam etdirəcəyini vurğuladı.
Görüşdə Azərbaycanla Portuqaliya arasında müxtəlif sahələrdə əlaqələrin inkişafının, siyasi məsləhətləşmələrin davam etdirilməsinin və nümayəndə heyətlərinin qarşılıqlı səfərlərinin əhəmiyyəti qeyd olundu, beynəlxalq təşkilatlar çərçivəsində əməkdaşlıq məsələlərinə toxunuldu.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!