Ruhaninin köməkçisi: “Bəluc dili gücləndirilməlidir, urdu dilinə də xüsusi diqqət ayırmaq lazımdır”
Butov.az GünAztv-yə istinadla xəbər verir ki, Noyabrın 3-də Sistan-Bəlucistan əyalətinin Zahidan şəhərinə səfər edən İran prezidentinin milli və dini azlıqların işi üzrə özəl köməkçisi Əli Yunisi Sistan-Bəlucistan ostandarı ilə görüşərək bəluc dilinin qorunub saxlanmasının vacibliyindən danışıb.
Əli Yunisi deyib ki, bəluc dili əsil İran dillərindən biri olduğuna görə qorunub saxlanılmalıdır: “Bəluc dili qədim İran dilinin yadigarıdır. Elə buna görə də bu dil gücləndirilməlidir. Baxmayaraq ki, İran İslam Respublikasında urdu dilində danışanların sayı çox azdır, lakin bu dildə işlənən sözlərin 50 faizi fars dilində işlənən sözlərlə eyni olduğunu nəzərə alaraq hesab edirik ki, bu dilə də xüsusi diqqət ayırmaq lazımdır.

Hazırda İranın müxtəlif etniklərinin dilində bir ensiklopediyanın hazırlanması məsələsi gündəmə gəlib. Bəluc dilinin də bu ensiklopediyaya salınması və ona əlavə olunması üçün tədbir görmək lazımdır”.

Görüşdə, Sistan-Bəlucistan ostandarı Əli Osət Haşimi deyib ki, bəluc dili hazırda Sistan-Bəlucistan universitetində iki semestr həddində könüllü olaraq tədris edilir və bu dillə maraqlanan tələbələr könüllü olaraq həmin dərslərdən faydalana bilərlər.

Qeyd edək ki, Əli Yunisi qonşu Pakistanın milli dili sayılan urdu dilinin qayğısına qaldığı bir vaxtda, ölkədə 35 milyondan çox Azərbaycan türklərinin dili tapdanır, ana dilində təhsil hüququ tələb edən dinc fəallar kütləvi şəkildə tutulub əsassız ittihamlarla həbsə salınırlar.