Dekabrın 25-də Beynəlxalq Muğam Mərkəzində Bakı Şəhər Mədəniyyət və Turizm İdarəsinin təşkilatçılığı ilə “2015-ci ilin ən fəal mədəni-maarif müəssisəsi və mədəni-maarif işçisi” müsabiqəsi qaliblərinin təqdimat mərasimi keçirildi.

Bakı Şəhər Mədəniyyət və Turizm İdarəsinin rəisi Əlikram Əliyev, Azərbaycan Mədəniyyət Işçiləri Müstəqil Həmkarlar İttifaqı Respublika Komitəsinin sədri Cəmilə Səttarova, Bakı Şəhər Mədəniyyət və Turizm İdarəsinin rəis müavini Gülnarə Seyidova müxtəlif nominasiyalar üzrə fərqlənən mədəni-maarif işçilərinə və mədəni-maarif müəssisələrinə idarənin diplomlarını, pul mükafatlarını və hədiyyələri təqdim etdi. Tədbirdə “31 Dekabr - Dünya Azərbaycanlılarının Həmrəyliyi Günü” nə həsr olunmuş Bakı Şəhər Musiqi kollektivləri festivalının qalibləri də elan edildi. Həmin gün Bakı Şəhər Mədəniyyət və Turizm İdarəsi Azərbaycan Milli Mətbuatının 140 illiyi ilə əlaqədar “Milli mədəniyyətimizin təməli” adlı Kütləvi İnformasiya Vasitələrinin təmsilçiləri arasında keçirilən müsabiqənin nəticələrini də elan etdi. Təqdimatda mətbuat işçiləri tarixi abidələr, folklor və milli adət-ənənələr, görkəmli və tarixi şəxsiyyətlər nominasiyaları üzrə I, II, III dərəcəli diplom və hədiyyələrə layiq görüldü. Həmin gün “Bütöv Azərbaycan” qəzetinin jurnalisti Təranə Cəbiyeva tarixi abidələr nominasiyası üzrə III dərəcəli, görkəmli və tarixi şəxsiyyətlər nominasiyası üzrə I dərəcəli diplom və hədiyyə ilə mükafatlandırıldı. Daha sonra tədbirdə çıxış edən mədəniyyət və turizm naziri Əbülfəs Qarayev Bakı Şəhər Mədəniyyət və Turizm İdarəsinin yeni rəisi Vüqar Zeynalovu idarənin kollektivinə təqdim etdi.

Rəsmi hissədən sonra tədbir maraqlı konsert proqramı ilə davam etdi. Konsertdə müğənnilərdən Aynur İsgəndərli, Aytac Şıxalizadə, Leyla Ramazanlı, Səidə Dadaşova, İzzət Bağırov və gənc bəstəkar Səfər Məmmədov gözəl mahnı çələngini ifa etdilər.