Butov.az GunAz TV-yə istinadən xəbər veri ki, uzun müddətdir Güney Azərbaycan mediası o cümlədən Güney Azərbaycan Televiziyası, müxtəlif dərgilər, qəzetlər və saytlar, həmçinin sosial şəbəkələr istifadəçiləri “Azəri” sözü işlədən mətbu orqanlara kəskin reaksiya verir. Bu təpki zaman-zaman öz təsirini göstərir.
Güneydəki kütləvi aksiyalardan sonra "Azəri" sözünü işlədən mediaya qarşı təpkilər daha da artıb.

BBC Fars Televiziyası noyabrın 14-də yayımladığı “Dideban” proqramında izləyicilərinin güneydəki kütləvi aksiyalara dair xəbərlərdə “azəri” sözünün işlədilməsinə etirazlarını gündəmə gətirib. Fars xidmətinin direktoru Sadıq Saba BBC Farscanın bundan sonra “türk” sözündən istifadə edəcəyini ifadə edib.

“İndi bizim gördüyümüz budur ki, həm türk xalqı özünə türk deyir, həm də başqaları onları türk tanıyır. Buna görə də, BBC-də [fars xidməti] bizim İrandakı bu etnik qrupu adlandırmaq üçün işlədəcəyimiz birinci söz türk sözüdür və başqa söz yoxdur,” deyə BBC Fars xidmətinin direktoru Sadıq Saba canlı proqramda dilə gətirib.

Qeyd edək ki, noyabrın 9-dan sonra Azərbaycan vilayətləri və İranın digər bölgələrində türklərin başladığı kütləvi aksiyalarda “Haray haray mən türkəm”, “Türkəm, Azəri deyiləm”, “Türklərə qarşı irqçiliyə son qoyun” və “Türk dili rəsmi olsun” kimi şüarların səsləndirilməsinin ardından mediada “Azəri” sözünün işlədilməsinə qarşı etirazlar da çoxalıb.