Beynəlxalq Mətbuat Mərkəzində 15 sentyabr - Bakının erməni-bolşevik birləşmələrindən azad olunmasının 97-ci ildönümünə həsr olunmuş "Qafqaz İslam Ordusu-97" mövzusunda tədbir keçirilib.

Azərbaycan Mətbuat Şurasının sədri Əflatun Amaşov həmin dövrdə baş verən tarixi proseslərdən danışıb: "Nuru paşanın rəhbərliyi ilə Qafqaz İslam Ordusunun Azərbaycana gəlişi ərəfəsində ermənilər Azərbaycan xalqına olmazın zülmlərini edirdilər, kütləvi şəkildə insanları qətlə yetirir, evləri yandırırdılar. Belə bir ağır vəziyyətdə Qafqaz İslam Ordusu köməyimizə gəldi. Ağır döyüşlərdən sonra Bakı erməni-bolşevik əsarətindən qurtuldu. Bakı azad olunmasaydı, Azərbaycan Xalq Cümhuriyyəti mövcud olmayacaqdı, ölkə işğalçılar tərəfindən bölüşdürüləcəkdi. Bu baxımdan 15 sentyabr Azərbaycanın bir dövlət kimi yaşamasında müstəsna rola malikdir.”.

Azərbaycan və digər Türkdilli Xalqların Əməkdaşlıq Mərkəzinin (ATXƏM) sədri İlham İsmayılov çıxışında 15 sentyabr tarixinin Azərbaycan xalqı üçün ictimai-siyasi əhəmiyyətini xüsusi vurğulayıb. O, bu gün türk dünyasına qarşı olan təzyiqlərin XX əsrin əvvəllərində baş verənlərlə eyni mahiyyət daşıdığını diqqətə çatdırıb. İ. İsmayılov deyib ki, Bakının azad olunması ilə bağlı hadisələr dərsliklərdə öz mükəmməl əksini tapmalıdır.

"Azəri-Türk" Qadınlar Birliyinin sədri Tənzilə Rüstəmxanlı isə ermənilərin əsas məqsədinin Qafqazı türk-müsəlman birliyindən təmizləmək olduğunu bildirib: "Eyni zamanda iqtisadi maraqları var idi. Bu dövr bizim yaxın tariximizdir və həmin dövrü araşdıranda görürük ki, ermənilər bizə qarşı hansı vəhşilikləri törədiblər. Buna görə biz Osmanlını köməyə çağırmışıq. Ancaq təəssüflər olsun ki, bəzi qələm sahibləri tariximizi saxtalaşdırırlar. Bu günün əhəmiyyətini dərk etmirik. Bu tarix bizim qurtuluşumuzdur".
Tənzilə xanım özünün ailə üzvlərinin indi Ermənistan adlanan qədim torpaqlarımızdan dəfələrlə qovulduqlarını mətbuat nümayəndələrinin diqqətinə çatdıraraq xahiş etdi ki, bu məsələyə həssaslıqla yanaşsınlar, bir daha tariximizin saxtalaşmasına imkan verməsinlər.
Məruzəçilərin çıxışları dinlənildikdən sonra tədbir mövzu ilə bağlı çıxışlarla davam edib.