Butov.az xəbər verir ki, Prezident yanında Qeyri-Hökumət Təşkilatlarına Dövlət Dəstəyi Şurasının maliyyə vəsaiti ilə Sosial Rifah və Tədqiqatlar İctimai Birliyi “Azərbaycanın ədalətli mövqeyinin dünyaya çatdırılmasında vətəndaş cəmiyyətinin rolunun davamlı olaraq gücləndirilməsi” layihəsini həyata keçirir.



Layihədə müharibə şəraitində medianın davranışı mövzusunda 500 nəfər QHT-media və ictimaiyyət nümayəndələri arasında 3 ay müddətində (aprel-may-iyun) sorğu-araşdırma aparılıb.

Özündə nəticəni ehtiva edən sorğunun təqdimatı iyulun 13 - də BMM - də keçirilib. Təqdimatda Sosial Rifah və Tədqiqatlar İctimai Birliyinin rəhbəri Əkrəm Bəydəmirli layihənin mahiyyəti, əsas hədəfləri barəsində məlumat verib. Giriş nitqindən sonra sorğunun nəticələri auditoriyaya təqdim olunub:

"Müharibə şəraitində KİV-in davranışı sizi qane edirmi" - sualına respondentlərin yalnız 11 faizi "Bəli”, 63 faizi "Xeyr”, qalanı isə cavab verməyə çətinlik çəkdiyini bildirib.

"Döyüş zamanı jurnalistlərin toqquşmalar haqqında bəzən səhv informasiya verməsi nədən qaynaqlanır" - sualına sorğuda iştirak edənlərin 23 faizi "Peşəkarlığın olmamasını”, 17 faizi "Rəsmi mənbələrdən informasiyanın vaxtında alına biməməsini”, 60 faizə yaxını isə "Jurnalistin öz məsuliyyətin dərk etməməsini ” əsas gətirib.

Tədbirdə həmçinin, QHT sədrləri Faiq İsmayılov, Azər Həsrət, Ədalət Məhərrəmov, Təhmasib Novruzov, Lamiyə İsazadə, Rada Abbas, Sultan Əzimzadə, Mehriban Abdullayeva, konflikt jurnalistikası üzrə tanınmış ekspert Əlisəfa Mehdiyev, BDU-nun jurnalistika fakültəsinin professoru Akif Rüstəmov, hərbi jurnalist Ötərxan Eltac, Eldost Bayram, İsveçdə yaşayan diaspora sədri Cavanşir Abdulla Haşımı və digərləri çıxış edib. Onlar müharibə vəziyyətində jurnalistin düzgün davranış qaydaları haqqında danışaraq, eyni zamanda öz təkliflərini veriblər.