“Uzun müddət Ermənistanın Sərsəng su anbarını işğalçılıq elementi kimi istifadə etməsi məsələsi ölkəmiz tərəfindən aidiyyatı qurumlar qarşısında dəfələrlə qaldırılıb. Nəhayət ki, bu məsələyə Azərbaycanın maraqları daxilində aşkar reaksiya bildirildi”. Bu fikirləri SİA-ya AŞPA tərəfindən Sərsəng su anbarı ilə bağlı Ermənistana qarşı qəbul edilən sanksiya xarakterli qətnamənin qəbul edilməsinin əhəmiyyəti barədə açıqlamasında politoloq Elşad Mirbəşiroğlu deyib.

Politoloq bildirib ki, bunu Azərbaycan dövlətinin diplomatik səylərinin uğurlu nəticəsi hesab etmək olar. Bizim üçün qətnamənin məqbul yanı budur ki, artıq bu dəfə qəti şəkildə Ermənistan qarşısında tələblər qoyulub. Yəni, işğalçı dövlət öz qoşunlarını həmin ərazilərdən çəkməli, Sərsəng su anbarına mühəndis və hidroloqların baxışı keçirilməli və sonda əhalinin anbar vasitəsilə sudan istifadə məsələsi öz həllini tapmalıdır”.

Elşad Mirbəşiroğlunun fikrincə, qəbul olunmuş qətnaməni bir neçə prizmadan dəyərləndirmək olar: “Birincisi, Azərbaycan bir daha beynəlxalq aləmi inandıra bildi ki, Ermənistan işğalçı dövlətdir, hətta təbii resursları belə işğal elementi kimi istifadə edir. Digər tərəfdən, bu qətnamə göstərdi ki, beynəlxalq aləm Ermənistanın işğalçılıq mövqeyinə obyektiv və ədalətli qiymət verir. Yəni Ermənistanın öz düşüncəsində ona qarşı cəzasızlıq tendensiyası aradan qalxmış oldu”.