Bu gün Beynəlxalq Mətbuat Mərkəzində Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) “Sərsəng harayı” layihəsi çərçivəsində hazırladığı növbəti 3 dildə (Azərbaycan, ingilis, fransız) olan -"Sərsəng SOS: Humanitar Böhran Təhdidi" adlı kitabının təqdimat mərasimi keçirilib.
Kitab Azərbaycanda Vətəndaş Cəmiyyətinin İnkişafına Yardım Assosiasiyasınının yaratdığı 3 nəfərdən ibarət İşçi Qrupunun işğal olunmuş ərazilər ilə yanaşı ekoloji fəlakətin yaşana biləcəyi qonşuluqda yerləşən 6 rayonda (Ağdam, Ağcabədi, Bərdə, Tərtər, Göranboy, Yevlax) aparılmış araşdırmaları əsasında, real faktlara söykənərək hazırlanıb. Kitabda Ermənistanın işğalı altında olan Sərsəng su anbarının təsir dairəsinə düşən rayonlarda beynəlxalq və milli qanunvericilik aktlarında təsbit edilmiş insan hüquq və azadlıqlarının vəziyyətinə dair hesabat öz əksini tapmışdır. Kitabın üç dildə çap olunmasında məqsəd kitabda qeyd olunan ekoloji fəlakət nəticəsində yaşanacaq faciənin fəsadları ilə bağlı məlumatları dünya ictimaiyyətinə geniş şəkildə çatdırmaqdan ibarətdir.
Məlumat üçün qeyd edək ki, Sərsəng su anbarının işğal olunması nəticəsində Dağlıq Qarabağ və ona bitişik ətraf rayonlar ekoloji təhlükə qarşısında qalmışdır. Ərazi 20 ildən artıqdır ki, Ermənistan Silahlı Qüvvələrinin nəzarəti altında olduğundan cəbhəyanı rayonlarda yaşayan əhali Sərsəng su anbarından istifadə etmək imkanlarından məhrum edilmişdir. Həmçinin sözügedən su anbarına, onun qurğularına və bəndinə texniki xidmət göstərilmədiyi üçün anbar qəzalı vəziyyətə düşmüşdür. Baş verə biləcək qəza işğal olunmuş ərazilər ilə yanaşı 6 qonşu rayonda da hümanitar böhrana səbəb ola bilər. Bu isə insanların həyatına, səhhətinə, əmlakına zərər vurulmasına və digər hüquqlarının pozulmasına, habelə, regionda olan digər canlıların məhvinə gətirib çıxara bilər.

Mətbuat Xidməti