Bu gün Beynəlxalq Mətbuat Mərkəzində (BMM)  ermənilərin əsassız soyqırımı iddialarının ifşa olunması və dünya ictimaiyyətinə çatdırılması məqsədilə  hazırlanan “Erməni problemi” adlı kitabın təqdimatı keçirilib. Kitab 4 dildə - ingilis, rus, alman, fransız dillərində nəşr olunub. Kitabda ermənilərin Azərbaycana qarşı törətdikləri vəhşiliklər xarici mənbələrə istinadən təhlil edilib. 

Tədbirdə çıxış edən “Azərnəşr”in direktoru Azər Mustafazadə kitabın əhəmiyyəti barədə geniş məlumat verib. Millətlərarası, multikulturalizm və dini məsələlər üzrə dövlət müşaviri Kamal Abdullanın belə kitabların dünya ictimaiyyətinə təqdim olunmasının vacibliyini vurğuladı.

Azərbaycan Milli Elmlər Akademiyasının vitse-prezidenti  İsa Həbibbəyli 120 sənəd əsasında hazırlanan kitabın ilk dəfə ictimaiyyətə təqdim edildiyini bildirib: “Bizim ermənilərin yalanlarını ifşa etmək istiqamətində  fəaliyyətimiz müstəqillik illərindən sonra daha da genişlənib. Akademiyanın daxilində “Azərbaycana qarşı soyqırımı” komissiyası yaradılıb. Məqsəd ermənilərin yalanlarını, məkrli siyasətlərini ifşa etməkdən ibarətdir. Bu kitabdakı faktlar beynəlxalq hüquq və reallıqlar baxımından təqdim edilir”.

Deputat Elmira Axundova  ermənilərin öz təbliğat taktikasından danışıb: “ Onlar bilirlər ki, iddia etdikləri faktlar yanlışdır, səs salmadan gizlin iş görürlər. Düzdür, demirəm biz iş görmürük, amma onlar öz siyasətlərini tam açıq həyata keçirmirlər. Qapalı və yavaş-yavaş dünyaya təqdim edirlər”.

Deputat Sahibə Qafarovanın fikrincə, bu kitab Azərbaycanın xarici siyasətindəki uğurlu addımlardan biri olacaq.

Türkiyənin Azərbaycandakı səfirliyinin müşaviri Öncü Keçəli isə  artıq  ermənilərin məkrli siyasətlərinin üstünün açılmasının vacib olduğunu qeyd edib.