Bu gün Azərbaycan Mətbuat Şurasında İbrahim Məsimoğlunun “İlk briqadanın ibrətli döyüş dərsləri” kitabının təqdimatı olub. Mətbuat Şurasının sədri Əflatun Amaşov Azərbaycan Silahlı Qüvvələrinin təməl daşını qoyan ilk briqadanın işğalçılara qarşı apardığı qanlı-qadalı hərbi əməliyyatlardan, igid əsgər və zabitlərimizin  qəhrəmanlıqlarından bəhs edən kitabın gənclərimizin hərbi vətənpərvərlik ruhunun artırılmasında əhəmiyyətli rol oynayacağını diqqətə çatdırıb.Gərgin zəhmət  hesabına ərsəyə gələn kitabın müəllifini diplomla təltif edib.

     Sabiq hərbi hissə komandiri Əzizağa Qənizadə Kəlbəcərin işğalı zamanı baş verənlərdən söhbət açıb. Mərasimdə çıxış edən digər natiqlər belə kitabların müharibə şəraitində olan ölkəmizin məktəblərində şagirdlərə dərs vəsaiti kimi tədris olunmasının vacibliyini vurğulayıblar. Belə kitabların müstəqilliyini bərpa etmiş ölkəmizin hərb tarixinin yeni salnaməsi kimi də dəyərli olduğunu diqqətə çatdırıblar.

     Kitabın müəllifi İbrahim Məsimoğlu belə möhtəşəm tədbiri təşkil etdiyi üçün Mətbuat Şurasının sədrinə, tədbirdə iştirak edən digər qonaqlara öz minnətdarlığını bildirib.

     Tədbirin əhəmiyyətini nəzərə alaraq hazırlayacağımız xüsusi səhifəni “Bütöv Azərbaycan” qəzetinin növbəti sayında oxuya bilərsiniz.

Butov.az