29-12-2025, 23:29
İrana qarşı növbəti hüdumu dəstəkləyəcəyik - Tramp
ABŞ Prezidenti Donald Tramp İranın ballistik raket proqramını yenidən qurmağa çalışacağı təqdirdə, ona qarşı başqa bir zərbəni dəstəkləyəcəyini bəyan edib.
Bu barədə o, İsrailin Baş naziri Benyamin Netanyahu ilə görüş zamanı jurnalistlərin suallarına cavabında deyib.
"Eşitdiyimə görə, İran yenidən güclənməyə çalışır və əgər belədirsə, biz onları məhv etməli olacağıq", - deyə Tramp bildirib.
O, İrana ABŞ ilə razılaşma əldə etməyi məsləhət görüb.
29-12-2025, 22:33
Trampdan Putinin iqamətgahına hücum iddialarına reaksiya
Ukraynanın Rusiya prezidentinin iqamətgahına hücumu pis bir hadisə olardı.
Bunu ABŞ Prezidenti Donald Tramp bildirib.
O qeyd edib ki, ABŞ vəziyyəti aydınlaşdırır.
Xatırladaq ki, Rusiya Ukraynanın Putinin iqamətgahına hücum etdiyini bildirib. Kiyev iddiaları təkzib edib.
29-12-2025, 22:26
.
Bakının mərkəzində “Qarabağ atları”
Azərbaycan Prezidenti İlham Əliyev, birinci xanım Mehriban Əliyeva, qızları Leyla Əliyeva və Arzu Əliyeva bu gün “Bakı Ağ Şəhər”də olublar.
Prezident İlham Əliyev, birinci xanım Mehriban Əliyeva və qızları əvvəlcə “Qarabağ atları” heykəltaraşlıq kompleksi ilə tanış olublar.
Vətən müharibəsindəki qələbəmizə həsr edilmiş və milli irsimizin rəmzi olan bu kompleks “Qarabağ atları” meydanında ucaldılıb. Kompleksdə “Soltan”, “Ürək”, “Sereyin”, “Aypara”, “Şöhrət”, “Ötqəm” və “İldırım” adlı ümumilikdə 7 Qarabağ atının heykəli var.
Bu kompleksin təməlini 2022-ci ilin dekabrında Prezident İlham Əliyev qoyub. Kompozisiya amerikalı heykəltaraş Robert Sammers tərəfindən yaradılıb. Onun Dallas şəhərində “Mal-qara sürülməsi”, Kaliforniya hava limanında “Con Ueyn” və digər əsərləri dünyaca məşhurdur.
29-12-2025, 22:23
Ceyhun Bayramov Saidovla danışdı
Azərbaycan xarici işlər naziri Ceyhun Bayramovla özbəkistanlı həmkarı Bəxtiyar Saidov arasında telefon danışığı aparılıb.
Bu barədə Azərbyacan Xarici İşlər Nazirliyi (XİN) məlumat yayıb.
Qeyd olunub ki, tərəflər iki ölkə arasında qardaşlıq, dostluq və müttəfiqlik münasibətlərinin müxtəlif aspektlərinə dair fikir mübadiləsi aparıblar.
Nazirlər cari ildə olduğu kimi, növbəti ildə də ortaq maraq və dəyərlərə əsaslanan iki ölkə arasında mövcud çoxşaxəli əməkdaşlığın daha da inkişafı üçün birgə səylərin davam etdiriləcəyindən əmin olduqlarını bildiriblər.
Bununla yanaşı, digər ikitərəfli və regional məsələlər ətrafında fikir mübadiləsi aparılıb.
Nazirlər qarşıdan gələn Yeni il bayramı münasibətilə səmimi təbriklərini çatdırıblar.
29-12-2025, 21:44
Goranboyda bir ailənin üç üzvü balıqdan zəhərləndi
Goranboyda bir ailənin üç üzvü zəhərlənmə diaqnozu ilə Gəncə şəhərində yerləşən xəstəxanalardan birinə yerləşdirilib.
Belə ki, 1965-ci il təvəllüdlü Nizami kənd sakini Səbirə Həmədova, 1990-cı il təvəllüdlü Mehirban Əhmədova və 2011-ci il təvəllüdlü N. Əhmədova xəstəxanaya çatdırılıb.
İlkin məlumata görə, adıçəkilən şəxslər balıqdan zəhərlənib.
Onlara tibbi yardım göstərilib, vəziyyətləri orta-ağırdı
Faktla bağlı araşdırma başlanılıb.
29-12-2025, 21:10
Xankəndidə bayram - FOTO
Dekabrın 29-da Xankəndi şəhərində Dünya Azərbaycanlılarının Həmrəyliyi Günü və Yeni il münasibətilə bayram konserti təşkil olunub.
Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən məlumata görə, şəhərin Zəfər meydanında keçirilən “Qış nağılı” yarmarkası günlərində baş tutan bayram konserti Xankəndi şəhərində, Ağdərə və Xocalı rayonlarında Azərbaycan Respublikası Prezidentinin Xüsusi Nümayəndəliyinin dəstəyi, Bərpa, Tikinti və İdarəetmə Xidmətinin təşkilatçılığı ilə keçirilib.
Konsertdə tanınmış ifaçılar və musiqiçilər çıxış ediblər. Səslənən ifalar şəhər sakinlərinə və qonaqlara yüksək bayram ovqatı bəxş edib, mərkəzi meydanda coşqun abı-hava yaradıb.
Qeyd edək ki, tədbirin keçirilməsində məqsəd Dünya Azərbaycanlılarının Həmrəyliyi Gününü və Yeni ili birlik, həmrəylik və bayram ruhu ilə qeyd etmək, eyni zamanda Xankəndi şəhərində ictimai-mədəni həyatın canlandırılmasına töhfə vermək olub.
29-12-2025, 21:01
Putin 261 min nəfəri hərbi xidmətə çağırdı
Rusiya Prezidenti Vladimir Putin 2026-cı ildə hərbi xidmətə çağırış haqqında fərman imzalayıb.
Plana əsasən, 18-30 yaş arası 261.000 nəfər orduya çağırılacaq.
Yanvarın 1-dən etibarən Rusiyada yeni hərbi çağırış proseduru tətbiq olunacaq.
İl ərzində tibbi müayinələr, peşəkar psixoloji müayinə və çağırış komissiyasının iclasları keçiriləcək.
29-12-2025, 20:47
Hökumət dövlət müəssisələrinin büdcəsini rüblük izləyəcək - YENİ QAYDALAR
Dekabrın 29-da Azərbaycan Respublikasının Prezidenti İlham Əliyev “Dövlət mülkiyyətində olan və paylarının (səhmlərinin) nəzarət zərfi dövlətə məxsus olan hüquqi şəxslərin və publik hüquqi şəxslərin illik və ortamüddətli dövr üzrə büdcə layihələrinin və proqnozlarının, habelə gəlir və xərc smetalarının icra vəziyyətinin monitorinqi və icra göstəricilərinin təhlili Qaydaları”nın və “Dövlət mülkiyyətində olan və paylarının (səhmlərinin) nəzarət zərfi dövlətə məxsus olan hüquqi şəxslərin və publik hüquqi şəxslərin xalis mənfəətinin bölüşdürülməsinə və dividend siyasətinin ümumi parametrlərinə dair Qaydalar”ın təsdiq edilməsi ilə bağlı Fərman imzalayıb.
“Dövlət maliyyəsinin səmərəli idarə edilməsinin təşkili ilə bağlı əlavə tədbirlər haqqında” 25 avqust 2025-ci il tarixli Fərmanın icrasını təmin etmək məqsədilə təsdiq edilən qaydalar dövlət maliyyəsinin səmərəli idarəedilməsi, dövlət müəssisələrinin büdcə planlaşdırılmasında və fəaliyyətində şəffaflığının artırılması, dövlət müəssisələrində uçot və hesabatlılığın təkmilləşdirilməsi, dövlət büdcəsi qarşısında yarana biləcək öhdəliklərin öncədən müəyyən edilməsi, habelə dövlət müəssisələrinin xalis mənfəətinin bölüşdürülməsi və dividend siyasətinin müəyyən edilməsi məqsədi daşıyır.
Təsdiq edilən qaydalara əsasən, dövlət müəssisələrinin illik və ortamüddətli büdcə layihələri, proqnozları, eləcə də gəlir və xərc smetalarının icra vəziyyəti sistemli şəkildə monitorinq ediləcək, icra göstəriciləri təhlil olunacaqdır. Həmçinin dövlət müəssisələri tərəfindən dövlət büdcəsinə xalis mənfəətindən minimum 30 faiz məbləğində dividend ödəniləcəkdir.
Dövlət müəssisələri 2026-cı il aprelin 1-dən etibarən müəyyən edilmiş forma və müddətlərdə büdcə göstəricilərini və İFRS-ə uyğun maliyyə hesabatlarını Maliyyə Nazirliyinə təqdim edəcək, Nazirlik illik və ortamüddətli büdcə layihələrinin və proqnozlarının, habelə illik gəlir və xərclər smetalarının icra vəziyyətinin monitorinqini həyata keçirəcək və icra göstəricilərini təhlil edəcək, habelə aparılmış təhlillərin nəticələri barədə 2026-cı ildən başlayaraq rübdə bir dəfə olmaqla ölkə başçısına məlumat təqdim edəcək.
Sözügedən Fərmana əsasən dövlət müəssisələri əvvəlki illər üzrə maliyyə hesabatlarını və 2026-cı il üçün təsdiq edilmiş büdcələrini də 2026-cı il aprelin 30-dək Nazirliyə təqdim edəcəklər.
Qaydaların təsdiqi ilə bağlı müddəalar 2026-cı il yanvarın 1-dən qüvvəyə minir.
29-12-2025, 20:40
Tramp Putinin iqamətgahına edilən hücumdan qəzəblənib - UŞAKOV BELƏ DEYİR
Rusiya lideri Vladimir Putinin iqamətgahına hücum ABŞ prezidenti Donald Trampı "qəzəbləndirib".
Bunu Rusiya prezidentinin köməkçisi Yuri Uşakov bildirib.
Uşakovun sözlərinə görə, Putin Trampla telefon danışığı zamanı Valdaydakı iqamətgahına dron hücumu cəhdinə istinad edərək "Kiyevin terrorçu hərəkətlərini" cavabsız qoymayacağını bildirib. Ukrayna hakimiyyəti hadisə ilə hər hansı əlaqəsini inkar edir.
Uşakov Trampın sözlərini sitat gətirib: "Allaha şükür ki, biz (Ukrayna prezidenti Volodimir) Zelenskiyə "Tomahawk" raketlərini vermədik". O əlavə edib ki, ABŞ prezidenti Kiyevin Putinin iqamətgahına hücum cəhdi barədə danışarkən "bu cür dəli hərəkətləri təsəvvür belə edə bilmədiyini" deyib.
Putin Trampa bildirib ki, Rusiyanın mövqeyi "Kiyev tərəfindən həyata keçirilən dövlət terrorizmi" ilə əlaqədar yenidən nəzərdən keçiriləcək.
Qeyd edək ki, telefon danışığı ötən gün baş tutub.
29-12-2025, 20:29
Putinin iqamətgahına hücum etməmişik - ZELENSKİ TƏKZİB ETDİ
Ukrayna Prezidenti Volodimir Zelenski Rusiya Prezidenti Vladimir Putinin iqamətgahına hücum cəhdi ilə bağlı iddiaların yalan olduğunu bildirib.
Zelenski vurğulayıb ki, Rusiya müharibənin sona çatması üçün danışıqlarda irəliləyişi pozmaq istəyir:
"Bu, Kiyevdəki hökumət binalarına hücum üçün bəhanə yaradır", - o qeyd edib.
Xatırladaq ki, Lavrov Ukraynanın dronlarla Putinin iqamətgahına hücuma cəhd etdiyini bildirib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!