30-12-2025, 23:44
İranda etirazlar - minlərlə insan ayağa qalxdı
İranda milli valyutanın (rial) rekord səviyyədə dəyər itirməsindən sonra başlayan etiraz aksiyaları üç gündür davam edir.
Etirazlar paytaxt Tehrandan ölkənin bir çox şəhərinə yayılıb.
Yüksək inflyasiya və milli valyutanın sürətlə dəyərdən düşməsi fonunda başlanan etirazlar ilk olaraq dekabrın 29-da Tehranın qapalı bazarında alqı-satqı ilə məşğul olanların tətilə çıxması ilə gündəmə gəlib.
Etiraz aksiyaları Kərac, Həmədan, Keşm, Malard, İsfahan, Kirmanşah, Şiraz və Yezd şəhərlərində də keçirilib. Görüntülərdə təhlükəsizlik qüvvələrinin nümayişçiləri dağıtmaq üçün gözyaşardıcı qazdan istifadə etdiyi əks olunub.
İran hökuməti etirazlardan xəbərdar olduğunu açıqlayıb, etirazçıları səbrlə dinləyəcəyini bildirib. İran Prezidenti Məsud Pezeşkian dekabrın 29-u axşam saatlarında X sosial şəbəkəsində paylaşım edərək, daxili işlər nazirinə etirazçıların “nümayəndələri” ilə görüşlər keçirməyi, problemlərin həlli və məsuliyyətli davranış üçün addımlar atmağı tapşırdığını bəyan edib.
Eyni gün Pezeşkian İran Mərkəzi Bankının sədri Məhəmmədreza Farzinin istefasını qəbul edib. Onun yerinə keçmiş iqtisadiyyat və maliyyə naziri Əbdülnasir Hemmati təyin olunub.
Etirazlara universitet tələbələrinin də qoşulduğu bildirilir. Aksiyalar zamanı ölkədə ali hakimiyyətə sahib olan dini lider Ayətullah Əli Xameneiyə istinadla “Diktatora ölüm” kimi hökumət əleyhinə şüarların səsləndirildiyi qeyd olunur. Bəzi nümayişçilərin isə 1979-cu il İslam İnqilabı zamanı devrilmiş şah Məhəmməd Rza Pəhləvinin oğlu Rza Pəhləvini dəstəkləyən “Şah yaşasın” şüarları səsləndirdiyi deyilir.
ABŞ-da yaşayan Rza Pəhləvi X hesabında paylaşım edərək etirazçılara dəstək ifadə edib və rejim hakimiyyətdə qaldığı müddətdə İranın iqtisadi vəziyyətinin daha da pisləşəcəyini bildirib.
ABŞ Dövlət Departamenti də Fars dilindəki rəsmi X hesabı vasitəsilə etirazlara dəstək mesajı yayımlayıb. Açıqlamada illərlə davam edən uğursuz siyasət və zəif iqtisadi idarəçilik səbəbindən “ləyaqətli həyat və daha yaxşı gələcək” axtaran insanların yanında olduqları vurğulanıb və etirazçıların cəsarəti yüksək qiymətləndirilib.
Dekabrın 29-da Florida ştatında ABŞ Prezidenti Donald Tramp ilə İsrailin Baş naziri Benyamin Netanyahu arasında keçirilən görüşdə də İrandakı son hadisələrin əsas müzakirə mövzularından biri olduğu bildirilir. Tramp mətbuat konfransında İranda rejim dəyişikliyini dəstəkləyib-dəstəkləmədiyi barədə açıqlama verməkdən yayınıb, lakin ölkədə yüksək inflyasiya və ağır iqtisadi vəziyyətin mövcud olduğunu bildirib. O, həmçinin İranın ballistik raket və ya nüvə proqramını yenidən genişləndirməsi halında İsrailin hava zərbələrinə dəstək verə biləcəyini deyib.
Xatırladaq ki, bu ilin iyununda İsrail və İran arasında 12 gün davam edən münaqişə zamanı ABŞ İranın əsas uranın zənginləşdirilməsi obyektlərinə hava zərbələri endirmişdi. İran isə nüvə proqramının tamamilə dinc məqsədlər daşıdığını israrla bəyan edir.
30-12-2025, 22:42
Zəngəzur dəhlizi dünyanın ən yüksək tutumlu ticarət yolu olacaq
"Dünyada artıq heç bir ölkə xammal baxımından özünü tam təmin edə bilmir. Buna görə də hər kəsin bir-birinə ehtiyacı var, hər kəsin əlçatan olması lazımdır. Bu baxımdan Türkiyə tarixi İpək Yolundan müasir İpək Yoluna qədər Şərq-Qərb dəhlizində körpü rolunu oynayır".
Bunu "Haber Global"a açıqlamasında Türkiyənin nəqliyyat və infrastruktur naziri Abdulkadir Uraloğlu bildirib.
O, Orta Dəhliz və onun bir parçası olan Zəngəzur dəhlizinin əhəmiyyətinə toxunub.
"Həm yük tutumu baxımından, həm də fövqəladə hallar baxımından alternativlərə ehtiyacımız var. Bakı-Tbilisi-Qars xətti təmir işləri səbəbindən 1,5 il bağlı qalıb. Bu mənada Orta Dəhlizi dəstəkləməyə davam edəcəyik. Zəngəzur dəhlizi sayəsində türk dünyası və türk dövlətlərinə birbaşa çıxış yolu təqdim olunacaq. Bu, dünyanın ən yüksəktutumlu ticarət yolu olacaq", - deyə nazir qeyd edib.
30-12-2025, 22:27
ABŞ Ukraynaya qoşun yeridəcək? - Zelenskidən cavab
ABŞ-ın təklif etdiyi təhlükəsizlik zəmanətlərinin bir hissəsi olaraq Amerika qoşunlarının Ukraynada olması ehtimalı müzakirə edilir.
Ukrayna Prezidenti Volodimir Zelenski həmkarı Donald Trampla bu məsələni müzakirə etdiyini bildirib.
“Əlbəttə ki, biz bunu Prezident Tramp və [həlledici] koalisiyanın nümayəndələri ilə müzakirə edirik; biz bunu istərdik. Bu, təhlükəsizlik zəmanətləri baxımından güclü bir mövqe olardı”, - o deyib.
Zelenski jurnalistlərlə onlayn söhbəti zamanı Kiyevin müharibəyə son qoymaq üçün danışıqları davam etdirməyə sadiq olduğunu bildirib və əlavə edib ki, Rusiya Prezidenti Vladimir Putinlə istənilən formatda görüşməyə hazırdır.
30-12-2025, 22:06
Ərəb ölkəsi Yəməndə əməliyyatı dayandırır
Birləşmiş Ərəb Əmirlikləri (BƏƏ) 2015-ci ildən bəri Yəməndə legitimliyi dəstəkləmək, terror təşkilatları ilə mübarizədə beynəlxalq səylərə yardım etmək, eləcə də qardaş Yəməndə təhlükəsizlik və sabitliyə nail olmaq üçün Ərəb Koalisiyasında iştirak edir. BƏƏ bu məqsədlərə çatmaq üçün böyük qurbanlar verib.
Bu, BƏƏ Müdafiə Nazirliyinin bəyanatında əks olunub.
Bəyanatda vurğulanır ki, BƏƏ Silahlı Qüvvələri razılaşdırılmış rəsmi çərçivələrdə verilən tapşırıqları yerinə yetirdikdən sonra 2019-cu ildə Yəmən Respublikasındakı hərbi iştirakını yekunlaşdırıb. BƏƏ ordusu Yəməndə terrorizmə qarşı mübarizədə iştirakını müvafiq beynəlxalq tərəfdaşlarla əlaqələndirilməklə fəaliyyət göstərən ixtisaslaşmış qruplarla məhdudlaşdırıb.
BƏƏ Müdafiə Nazirliyi son hadisələr və onların antiterror əməliyyatlarının təhlükəsizliyinə və effektivliyinə potensial təsirini nəzərə alaraq, Yəməndə antiterror qruplarının fəaliyyətinin dayandırıldığını bildirib. Bu addımın qrupların şəxsi heyətinin təhlükəsizliyinin təmin edilməsinə yönəldiyini qeyd edib və bunun müvafiq tərəfdaşlarla koordinasiyada həyata keçiriləcəyini vurğulayıb.
Bəyanatda qeyd olunur ki, bu tədbir mövcud şəraitin hərtərəfli qiymətləndirilməsi nəticəsində baş tutur, eləcə də BƏƏ-nin öhdəliklərinə və regionun təhlükəsizliyini və sabitliyini dəstəkləməkdə roluna uyğundur.
30-12-2025, 21:48
Bəşər Əsədin fotosu silindi
Suriyada milli pul əsginaslarından 2024-cü ilin dekabr ayından devrilmiş prezident Bəşər Əsədin ailəsinin təsviri yığışdırılıb.
Bunun əvəzində Suriya funtunun yeni əsginaslarında ölkənin kənd təsərrüfatını tərənnüm edən - zeytun, qızıl gül, portağal və buğda təsvirləri əksini tapır.
Yeni dizaynlı əsginasın təqdimatında Suriya Mərkəzi Bankının rəhbəri Əbd Əl Kadr Husriyə qeyd edib ki, ölkədə hazırda pul islahatı aparılır. İslahatda başlıca olaraq hazırkı 100 funta bərabər olan yeni valyuta vahidinin tətbiqi nəzərdə tutulur.
10-dan 500-ə qədər nominalda olan yeni funtlar yanvarın 1-dən etibarən tədavülə buraxılacaq.
30-12-2025, 21:08
İlham Əliyevdən bayram paylaşımı
Prezident İlham Əliyev 31 dekabr – Dünya Azərbaycanlılarının Həmrəyliyi Günü və Yeni illə bağlı paylaşım edib.
Butov.az həmin paylaşımı təqdim edir:
30-12-2025, 20:43
Şeyma Subaşı saxlanıldı
Türkiyədə məşhurların narkotik istintaqı çərçivəsində sosial media fenomeni Şeyma Subaşı saxlanılıb.
Subaşı İstanbul hava limanında polis əməkdaşları tərəfindən saxlanılıb.
30-12-2025, 19:57
40 özəl təhsil müəssisəsi lisenziyalaşdırılıb
Bu il ərzində TKTA tərəfindən 40 özəl təhsil müəsissəsi lisenziyalaşdırılıb.
Bu barədə Elm və Təhsil Nazirliyinin 2025-ci il üzrə hesabatında qeyd olunub.
Bildirilib ki, TKTA 6 məktəbəqədər, 6 ümumi təhsil, 8 əlavə təhsil müəssisəsi təhsil fəaliyyətinin lisenziyalaşdırılması ilə əlaqədar sahə baxışlarında və rəylərin formalaşdırılmasında iştirak edib.
30-12-2025, 19:19
Liderlərin görüşəcəyi tarix açıqlandı
“İstəklilər koalisiyası”nın milli təhlükəsizlik müşavirləri səviyyəsində görüşü yanvarın 3-də Ukraynada baş tutacaq.
Bu barədə Ukrayna Prezidenti Volodimir Zelenski “Telegram”da bildirib.
Onun sözlərinə görə, “İstəklilər koalisiyası”nın üzv ölkələrinin liderlərinin görüşü isə yanvarın 6-da Fransada keçiriləcək.
30-12-2025, 18:40
Milli həmrəylik Azərbaycan
xalqının ən böyük gücüdür
Dünya Azərbaycanlılarının Həmrəyliyi Günü Azərbaycan xalqının milli birlik ideyasını, dövlətçilik şüurunu və azərbaycançılıq məfkurəsini təcəssüm etdirən ən mühüm bayramlardan biri kimi tarixə düşüb. Bu günün dövlət bayramı kimi qeyd olunması xalqımızın milli azadlıq mübarizəsinin məntiqi nəticəsi olmaqla yanaşı, müstəqil Azərbaycanın bütün dünya azərbaycanlıları üçün vahid Vətən olduğunu təsdiqləyən mühüm siyasi və ideoloji hadisədir. Qədim və zəngin tarixə malik Azərbaycan xalqının dirçəlişini, tərəqqisini və milli birliyini ifadə edən bu əlamətdar gün hər bir azərbaycanlı üçün inam, ümid və qürur mənbəyidir.
Ümummilli Lider Heydər Əliyev Dünya Azərbaycanlılarının Həmrəyliyi Gününü milli şüurun yüksəlişi və xalqın ideoloji birliyinin rəmzi kimi dəyərləndirərək vurğulayırdı ki, dünyanın müxtəlif ölkələrində milyonlarla azərbaycanlı yaşasa da, onların milli-mənəvi varlığını qoruyan və yaşadan yeganə dövlət müstəqil, suveren Azərbaycan Respublikasıdır. Məhz Azərbaycan dövlətçiliyinə sədaqət, ana dilinə, milli-mənəvi dəyərlərə və ümumbəşəri prinsiplərə hörmət dünya azərbaycanlılarının birliyi və həmrəyliyi ideyasının əsasını təşkil edir.
31 dekabrın Dünya Azərbaycanlılarının Həmrəyliyi Günü kimi təsis edilməsi Ulu Öndər Heydər Əliyevin adı ilə bağlıdır. 1991-ci il dekabrın 16-da onun sədrliyi ilə Naxçıvan Muxtar Respublikası Ali Məclisinin iclasında bu tarixin bayram günü kimi qeyd olunması barədə qərar qəbul edilib. Daha sonra Azərbaycan Respublikasının Ali Soveti bu təşəbbüsü dəstəkləyərək 31 dekabrı rəsmi bayram günü elan edib. Beləliklə, bu tarix təkcə təqvim bayramı deyil, bütün dünya azərbaycanlılarını bir amal ətrafında birləşdirən milli ideya gününə çevrilib.
Həmrəylik Gününün tarixi kökləri Sovet imperiyasının süqutu dövrünə təsadüf edir. Araz çayının hər iki sahilində yaşayan azərbaycanlıların sərhədlərə doğru yürüşü, süni maneələrin aradan qaldırılması cəhdləri xalqımızın bir millət olduğunu bütün dünyaya nümayiş etdirdi. Uzun illər bir-birindən ayrı düşmüş soydaşlarımızın birləşmək arzusu milli şüurun oyanışının parlaq nümunəsi idi. Bu hadisələr həmrəylik ideyasını real tarixi fakt kimi möhkəmləndirdi və Azərbaycan xalqının bütövlüyə can atdığını bir daha sübut etdi.
Dünya azərbaycanlılarının milli birliyinin ideoloqu və təşkilatçısı olan Ulu Öndər Heydər Əliyev bu prosesi daim diqqət mərkəzində saxlayıb. Xarici ölkələrə səfərləri zamanı soydaşlarımızla görüşlər keçirərək onların problem və qayğıları ilə yaxından maraqlanıb, diaspor təşkilatlarının daha sıx və məqsədyönlü fəaliyyət göstərməsi üçün dəyərli tövsiyələr verib. Onun “Mən həmişə fəxr etmişəm, bu gün də fəxr edirəm ki, mən azərbaycanlıyam!” kəlamı milli qürur rəmzinə çevrilərək bu gün də hər bir azərbaycanlının mənəvi dayağıdır.
Prezident İlham Əliyev Ulu Öndərin müəyyənləşdirdiyi bu siyasi xətti uğurla davam etdirərək diaspor quruculuğunu dövlət siyasətinin prioritet istiqamətlərindən birinə çevirib. Dövlət başçısı dəfələrlə vurğulayıb ki, müstəqil Azərbaycan bütün azərbaycanlıların Vətənidir və harada yaşamalarından asılı olmayaraq hər bir soydaşımız güclü Azərbaycan dövlətinə arxalana bilər. Prezident İlham Əliyevin xarici səfərləri zamanı diaspor nümayəndələri ilə keçirdiyi görüşlər, onların fəaliyyətinə verdiyi dəstək dünya azərbaycanlılarının milli ruhunun yüksəlməsində mühüm rol oynayır.
Bu gün dünya üzrə on milyonlarla azərbaycanlı yaşadıqları ölkələrin ictimai-siyasi və mədəni həyatında fəal iştirak edir, Azərbaycan həqiqətlərinin beynəlxalq ictimaiyyətə çatdırılmasında mühüm rol oynayır. Diaspor təşkilatları erməni lobbi dairələrinin ideoloji təxribatlarına qarşı mübarizədə, eləcə də Azərbaycan mədəniyyətinin, tarixinin və milli dəyərlərinin tanıdılmasında qətiyyət nümayiş etdirirlər. Diaspor quruculuğu sahəsində həyata keçirilən dövlət siyasəti nəticəsində dünyanın müxtəlif ölkələrində yüzlərlə Azərbaycan icması, koordinasiya şuraları və Azərbaycan evləri fəaliyyət göstərir.
Xüsusilə Vətən müharibəsi dövründə dünya azərbaycanlılarının nümayiş etdirdiyi misilsiz birlik və həmrəylik bu bayramın mahiyyətini daha da gücləndirdi. Xaricdə yaşayan soydaşlarımız Azərbaycanın haqq səsini dünyaya çatdırmaq üçün səylərini birləşdirdilər, müxtəlif ölkələrdə etiraz aksiyaları və informasiya kampaniyaları keçirdilər. Prezident İlham Əliyevin qeyd etdiyi kimi, “Dəmir yumruq” təkcə hərbi Qələbənin deyil, eyni zamanda Azərbaycan xalqının və dünya azərbaycanlılarının sarsılmaz birliyinin rəmzinə çevrildi.
2022-ci ildə Şuşada keçirilən Dünya Azərbaycanlılarının V Qurultayı – Zəfər Qurultayı isə bu həmrəyliyin tarixi zirvəsi oldu. Azad Qarabağda, azad Şuşada təşkil olunan qurultay müstəqil Azərbaycanın qalib dövlət kimi dünya azərbaycanlıları üçün əsas cazibə mərkəzinə çevrildiyini bir daha nümayiş etdirdi. Qurultayda qəbul olunan müraciət və qətnamələr dünya azərbaycanlılarının vahid mövqeyini və milli iradəsini ifadə etdi.
Dünya Azərbaycanlılarının Həmrəyliyi Günü təkcə qlobal miqyasda deyil, ölkə daxilində də milli birliyin, sosial həmrəyliyin və vətənpərvərliyin təcəssümü kimi qeyd olunur. Ölkəmizin hər yerində olduğu kimi, Abşeron rayonunda da şəhid ailələrinə, Vətən uğrunda canından keçmiş qəhrəmanlarımızın bizə əmanət qoyub getdiyi övladlara xüsusi diqqət və qayğı göstərilir. Dövlətin sosial siyasətinin əsas istiqamətlərindən biri kimi şəhid ailələri və qazilərin rifahının yaxşılaşdırılması rayonumuzda daim diqqət mərkəzində saxlanılır.
Bu gün Dünya Azərbaycanlılarının Həmrəyliyi Günü milli birlik, vətənə bağlılıq, dövlətçilik iradəsi və gələcəyə inam ideyalarını özündə birləşdirərək həm ölkə daxilində, həm də dünyanın müxtəlif guşələrində yaşayan soydaşlarımız üçün ümummilli mənəvi dəyər kimi qeyd olunur. Bu bayram Azərbaycan xalqının keçmişini, bu gününü və gələcəyini birləşdirən, milli kimliyimizi və müstəqil dövlətçilik iradəmizi bütün dünyaya nümayiş etdirən əlamətdar gündür.
Malik Məmmədov
Abşeron Rayon İcra Hakimiyyəti başçısının Xırdalan şəhər İƏD üzrə nümayəndəsi
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!