Yaponiyanın Müdafiə Nazirliyi 2022-ci maliyyə ili üçün 5,4 trilyon yen (49,1 milyard dollar) məbləğdə büdcə planlaşdırır.

Butov.az Kyodo agentliyinə istinadla bildirir ki, bu, rekord məbləğdir. Bildirilir ki, nazirlik həmin vəsaitlə Okinava prefekturasına daxil olan və Cənub Şərqi Çin dənizində yerləşən adaların müdafiəsini gücləndirməyi nəzərdə tutur. Vəsaitin 300 milyard yen (2,7 milyon) məbləğində hissəsinin müdafiə texnologiyalarının inkişafına, xüsusən pilotsuz uçan aparatlara qarşı texnologiyaların hazırlanmasına sərf olunacağı gözlənilir. Bununla yanaşı, vəsaitin bir hissəsinin yeni texnikanın, o cümlədən F-35 qırıcılarının, nəqliyyat gəmilərinin, pilotsuz sualtı aparatların alınması üçün sərf ediləcəyi bildirilir.

Müdafiə xərclərini artırmaq üçün Yaponiya hökuməti 2023-cü ilədək nəzərdə tutulan beşillik müdafiə planına yenidən baxmalı olacaq. 2018-ci ildə təsdiq edilən həmin plana görə, Yaponiya müdafiə xərclərinə 27,47 trilyon yen (250 milyard dollar) ayırmağı nəzərdə tutur. Yaponiya qanunvericiliyinə əsasən, belə plana təhlükəsizliklə əlaqədar vəziyyət dəyişdiyi halda yalnız 3 ildən sonra baxmağa icazə verilir. Baş nazir Yoşihide Suqanın hökuməti də bu imkandan faydalanmağa çalışır.

Əlavə olaraq qeyd edək ki, Yaponiya hökuməti müdafiə xərclərini ümumi daxili məhsulun (ÜDM) 1 faizi həcmində saxlamağa çalışır. Son doqquz ildə Yaponiya üzrə ÜDM artdığına görə, həmin rəqəm də artmaqda davam edib.