Rusiya Müdafiə Nazirliyi, Aralıq dənizinin Suriya sahillərində radarlar vasitəsi ilə iki ədəd naməlum obyektin aşkar olunduğunu bildirib.
ANS PRESS-in "Ria-Novosti"yə istinadən verdiyi xəbərə görə, Rusiyanın Suriyadakı səfirliyi, obyektlərin ballistik raketlər olduğunu, onların bu gün səhər saatlarında atıldığını və Rusiyanın cənubundakı Armavir şəhərində yerləşən xəbərdarlıq sistemləri tərəfindən qeydə alındığını bildirib. Dəməşqdəki mənbələr atılan raketlərin dənizə düşməsi barədə məlumat verilib.
Rusiya müdafiə naziri Sergey Şoyqunun, bununla bağlı prezident Vladimir Putinə məlumat verdiyi bildirilir.

Qeyd edək ki, bu məlumat, Rusiya Müdafiə Nazirliyinin ABŞ-ı Aralıq dənizinin Suriya sahillərinə döyüş gəmilərini göndərdiyi üçün tənqid etməsindən az sonra yayılıb.
Rusiyanın Suriya səfirliyi, Şam şəhərində heç bir raket hücumunun və partlayışların olmadığını bildirib.
Artıq İsrail və ABŞ bununla bağlı açıqlama yayaraq, bu raketlərin onlara məxsus olmadığını bildiriblər.

Lakin daha sonra İsrail mediası Müdafiə Nazirliyinə istinadla bu gün raketlərin sınaqdan çıxarıldığını yazıb. Rusiyanın qeydə aldığı obyektlərin məhz bu raketlər olduğu bildirilir. "Reuters"in məlumatına görə, İsrail sınağı ABŞ-la birgə həyata keçirib.