2-02-2023, 19:49
Zelenski Avropa Komissiyasının prezidentiylə olan görüşündən yazdı
Ukrayna prezidenti Volodimir Zelenski Avropa Komissiyasının prezidenti Ursula fon der Leyenlə görüşüb. Zelenski bu barədə facebook səhifəsində məlumat verib. "Ukraynada çox önəmli iki Avrointeqrasiya gününə başlayırıq. Kiyevdəki ortaq razılaşmalarımızın və qərarlarımızın bütün Avropanın güclənməsi mənasına gələcəyi vaxtlardan söhbət gedir", - deyə Zelenski yazıb.
2-02-2023, 19:26
Fransa konsulluğu İstanbuldakı fəaliyyətini dayandırdı
Fransanın İstanbuldakı Baş Konsulluğu işləri dayandırıb. Bu, oxşar addım atan beşinci ölkədir. Türkiyənin daxili işlər naziri Süleyman Soylu cümə axşamı ABŞ-ın terror aktları təhlükəsi ilə bağlı bəyanatları fonunda bir sıra Avropa ölkələrinin İstanbuldakı konsulluqlarını bağlamasını ölkəyə qarşı “psixoloji müharibə” adlandırıb. "Fransanın İstanbuldakı Baş Konsulluğu 2 fevral və 3 fevral tarixlərində ictimaiyyət üçün bağlıdır. İnzibati məsələlərlə bağlı bizimlə elektron poçtla əlaqə saxlaya bilərsiniz", - konsulluq bəyan edib. Bundan əvvəl İsveç, Niderland, Böyük Britaniya və Almaniyanın İstanbuldakı baş konsulluqları şəhərin mərkəzində terror aktları təhlükəsi səbəbindən ziyarətçilərin qəbulunu dayandırdıqlarını bildirib. ABŞ səfirliyi bazar ertəsi öz vətəndaşlarına İstanbulun mərkəzində terror aktları təhlükəsi barədə xəbərdarlıq edib. Hədəflərin İstanbuldakı kilsələr, sinaqoqlar, diplomatik nümayəndəliklər və ya əcnəbilər arasında məşhur olan digər yerlər, xüsusən də İstanbulun Beyoğlu, Qalata, Taksim, İstiqlal küçəsi olduğu bildirilib.
2-02-2023, 19:21
Hulusi Akar Zəngəzur dəhlizindən danışdı
Türkiyənin milli müdafiə naziri Hulusi Akar Zəngəzur dəhlizi haqqında danışıb. O, Qarsda keçirilən "Qış-2023" təlimlərinin son günündə çıxış edərkən bu mövzuya toxunub. "Zəngəzur dəhlizinin açılması hamıya faydalı olacaq. Dəhlizin açılması bölgədə stabilliyin və sülhün təmin olunmasına kömək edər", - deyə Akar söyləyib. Nazir, həmçinin Ukraynadakı müharibədən danışıb və Türkiyənin savaşın başa çatması üçün əlindən gələni etdiyini, böhranın qarşısını almağa çalışdığını qeyd edib: "Bu günə qədər taxıl dəhlizi vasitəsilə 19 milyon tondan artıq taxıl nəql olunub".
2-02-2023, 19:13
Kadırova “Xalqın atası” titulunun verilməsi təklif edildi
Çeçenistan parlamenti respublikanın konstitusiyasına dəyişiklik edilməsini nəzərdə tutan qanun layihəsi hazırlayıb. Qanun layihəsində Çeçenistanın başçısı Ramzan Kadırova “Xalqın atası” titulunun verilməsi təklif edilib. Qanun layihəsinin təşəbbüskarları 20 deputat, o cümlədən respublika parlamentinin sədri Maqomed Daudovdur. Ramzan Kadırov 2010-cu ildə “prezident” titulundan imtina etmiş və Rusiya subyektlərindəki həmkarlarını ondan nümunə götürməyə çağırmışdı.
2-02-2023, 16:58
Ukraynayla yanaşı Moldova da Saakaşvilinin müdafiəsinə qalxdı
Ukrayna və Moldova Gürcüstanın həbsdə olan sabiq prezidenti Mixail Saakaşvili ilə bağlı tələb irəli sürüb. Ukrayna XİN-in feysbuk səhifəsində, habelə Moldova prezidenti Maya Sandunun tviter səhifəsində tələblə bağlı paylaşım edilib. "Ukrayna Xarici İşlər Nazirliyi Gürcüstanda dəmir barmaqlıqlar arxasında saxlanılan Ukrayna vətəndaşı Mixail Saakaşviliyə qarşı qeyri-insani rəftara kəskin etirazını bildirir. Biz Gürcüstan hakimiyyətini Mixail Saakaşviliyə qarşı sui-istifadəni dərhal dayandırmağa və onu Ukraynaya təhvil verməyə çağırırıq. Siyasi qisas üçün insanın həyatı ilə oynamayın. Biz həmçinin xarici ölkələrə və beynəlxalq təşkilatlara müraciət edirik ki, Gürcüstan hakimiyyətinin siyasi repressiyaları nəticəsində həyatı təhlükədə olan Ukrayna vətəndaşını, Gürcüstanın keçmiş prezidentini açıq şəkildə müdafiə etsinlər", - Ukrayna XİN-in paylaşımında deyilir. "Mixail Saakaşvilinin fiziki vəziyyəti son dərəcə narahatedici və kritikdir. Müxalifət liderinin işgəncə ilə öldürülməsi Avropa Birliyinə üzv olmaq istəyən bir ölkə üçün qəbuledilməzdir. Saakaşvili dərhal buraxılmalı və müalicə üçün xaricə göndərilməlidir", - deyə Maya Sandu tviter səhifəsində yazıb. Qeyd edək ki, 2021-ci ilin oktyabrından bəri həbsdə olan Saakaşvili dəfələrlə aclıq aksiyası keçirib. Onun səhhətində ağır problemlər var.
2-02-2023, 16:43
Ermənistan Azərbaycan ərazilərini işğal etmişdi - Lavrov
"Ermənistan Azərbaycan ərazilərini işğal etmişdi". Bunu Rusiyanın xarici işlər naziri Sergey Lavrov "Rossiya - 24" kanalına müsahibəsində deyib. "Azərbaycan öz ərazilərini işğaldan azad etdi", - deyə Rusiya XİN başçısı Qarabağdan danışıb. "KTMT Qafqazda vəziyyəti sabitləşdirmək yollarını tapmaqda Ermənistan və Azərbaycana kömək etməyə hazırdır. Ötən ilin sentyabrında baş verənlərdən sonra orada hər iki tərəfdən ümumilikdə 300-ə yaxın insan həlak oldu, biz dərhal qrup göndərdik. Biz Ermənistandan sorğu aldıq, KTMT-nin baş katibinin xüsusi ekspert missiyası Ermənistanın Azərbaycanla sərhəddə olan hissəsində yerləşdirilməsi barədə plan təqdim etdik", - Lavrov vurğulayıb. "Plan çoxdan hazırlanmışdı, amma Ermənistan tərəfi bizi tələsdirmədi. Nəticədə İrəvanda keçirilən sammitdə müvafiq qərarın mətni hazırlandı. Lakin İrəvan bildirdi ki, Azərbaycanın hərəkətləri qəti şəkildə pislənərsə, buna razı ola bilər. Heç də bütün ölkələr buna hazır deyildilər. Qarabağ müharibəsinin tarixi onilliklərə gedib çıxır", - deyə nazir əlavə edib.
2-02-2023, 14:40
Qərb Rusiyaya illərlə özünə gəlməyən zərbəni vurmağa çalışır - Lavrov
"Qərb Ukraynadakı vəziyyətlə bağlı inkişaf etməkdə olan ölkələrin neytrallığına hörmət etməlidir". Bunu Rusiyanın xarici işlər naziri Sergey Lavrov "Rossiya - 24" kanalına müsahibəsində deyib. "Fevralın 24-də Ukraynanın təşəbbüsü ilə hazırlanan "sülh sammiti" anti-Rusiya xarakteri daşıyır. Biz ildönümü üçün "hesabat" hazırlayırıq. Burada, o cümlədən Ukraynadakı ABŞ laboratoriyalarının fəaliyyəti haqqında məlumatlar olacaq. ABŞ-ın dünyada hegemonluğunu necə əldə etdiyini izah etməliyik. Onlar "sövdələşmə" edəndə əvəzində heç nə təklif etmirlər. Deyirlər ki, ya bizim istədiyimizi edərsən, ya da səni cəzalandırarıq. Qərb Rusiyaya elə bir məğlubiyyət yaşatmağa çalışır ki, o, onilliklər ərzində özünə gəlməsin", - nazir söyləyib. "Moldova Ukraynanın roluna göz dikib. Sandu Moldova və Rumıniyanın birləşməsinə hazırdır və o, həm də NATO-ya üzv olmaq arzusundadır. Gürcüstanı da Qərbdə yeni anti-Rusiya hesab edirdilər, ölkəni Saakaşvilinin aqressiv dövrünə qaytarmaq istəyirdilər, amma alınmadı", - deyə Lavrov bəyan edib.
2-02-2023, 14:34
Qərbin addımları bizim daha da irəli getməyimizə səbəb verir - Lavrov
"Rusiyada hər kəs Ukraynadakı vəziyyətin bitməsini istəyir, amma bizim üçün vacib olan vaxt deyil, rus xalqı üçün yaranacaq nəticələrdir". Bunu Rusiyanın xarici işlər naziri Sergey Lavrov "Rossiya - 24" kanalına müsahibəsində deyib. "Hərbçilər hər şeyin bitməsini deyil, öz işini necə yerinə yetirmək və itkiləri minimuma endirmək barədə düşünür. İndi biz çalışırıq ki, sərhədlərimizə təhlükə olmasın, amma Qərb uzaqmənzilli silahlar tədarük etməyə hazırlaşır, bu o deməkdir ki, biz daha irəli getməli olacağıq", - deyə Lavrov bildirib. "Şolts Ukraynaya təyyarə göndərməyəcəyinə söz verdi, amma onun mövqeyini necə tez dəyişdiyini bilirik. ABŞ xalqları öz tarixlərini xatırlamaq hüququndan məhrum edir, onların vəzifəsi hamını assimilyasiya etməkdir", nazir əlavə edib.
2-02-2023, 14:31
Ermənistan və Türkiyə işçi qruplarının görüşü keçirilib
Ermənistan və Türkiyə nümayəndələrindən ibarət işçi qrupları Ermənistan-Türkiyə sərhədi yaxınlığındakı Ararat bölgəsində görüşüb və Marqara körpüsünə baxış keçiriblər. Bu barədə “Joğovurd” qəzeti yazıb. “İşçi qrupunun üzvləri dekabr ayında əvvəllər əldə edilmiş razılaşmaların həyata keçirilməsi üçün iki görüş keçirib. Ermənistan Xarici İşlər Nazirliyindən verilən məlumatına görə, Ermənistan və Türkiyə arasında işçi qrupları səviyyəsində iyulun 1-də keçirilmiş görüşlər nəticəsində əldə edilmiş razılaşmaların həyata keçirilməsi prosesi davam etdirilib. Bu kontekstdə Marqara körpüsünə də baxış keçirlib", - qəzet yazıb. Söhbət 2022-ci il iyulun 1-də Türkiyə və Ermənistanın xüsusi elçiləri Serdar Kılıç və Ruben Rubinyanın görüşündə əldə olunan razılaşmalardan gedir. Həmin razılaşmada Ermənistan və Türkiyəyə səfər edən üçüncü ölkə vətəndaşlarının Ermənistan-Türkiyə sərhədini mümkün qədər tez keçməsi nəzərdə tutulur. Ölkələr arasında birbaşa hava daşımalarının tezliklə başlanması barədə də razılıq əldə olunub. “Ermənistan və Türkiyənin xüsusi nümayəndələrinin növbəti görüşünün nə vaxt keçiriləcəyi hələlik məlum deyil, çünki əvvəllər əldə edilmiş razılaşmaların həyata keçirilməsi istiqamətində iş gedir və yalnız bundan sonra yeni görüşlə bağlı razılıq əldə olunacaq”, - qəzet qeyd edib.
2-02-2023, 14:25
Edilən hücuma görə məhsuliyyət İsrailin üzərinə düşür - Rəsmi Tehran
İranın İsfahan şəhərindəki hərbi zavoda dron zərbələri endirilməsi ilə bağlı rəsmi Tehrandan hadisəni kimin törətməsi barədə ilk dəfə açıqlama verilib. Bu barədə İranın Birləşmiş Millətlər Təşkilatındakı daimi nümayəndəsi danışıb. O, zərbələrə görə İsraili ittiham edib. Daimi nümayəndənin iddiasına görə, hərbi zavoda dron hücumlarını İsrail təşkil edib. "İsfahanda İran Müdafiə Nazirliyinin zavoduna edilən hücuma görə məsuliyyət İsrailin üzərinə düşür", - deyə İran rəsmisi bildirib. Qeyd edək ki, bir neçə gün öncə İranın İsfahan şəhərində yerləşən hərbi zavoda, o cümlədən digər regionlarda yerləşən bir sıra hərbi obyektlərə PUA-lar vasitəsilə zərbələr endirilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!