1-04-2023, 14:32
ABŞ-da fövqəladə vəziyyət elan olundu
ABŞ-ın beş ştatında tornado qeydə alınıb. Arkanzas ştatında tornado nəticəsində 600 nəfər yaralanıb, üç nəfər ölüb. Martın 31-i axşam saatlarına olan məlumata görə, 300 minə yaxın abonentin elektrik enerjisində fasilələr yaşayıb. İllinoys, Ayova, Viskonsin, Tennessi, Missisipi ştatlarında da tornado baş verib. Arkanzas ştatının qubernatoru Sara Sanders fövqəladə vəziyyət elan edib.
1-04-2023, 14:28
Putinin təsdiqlədiyi xarici siyasət Qərbə qarşı yönəlib
Rusiya Prezidenti Vladimir Putinin martın 31-də təsdiq etdiyi xarici siyasət konsepsiyası Kremlin Qərbə qarşı yeni blok yaratmaq cəhdlərini dəstəkləməyə yönəlib. Bu barədə Amerikanın Müharibə Araşdırmaları İnstitutunun (ISW) hesabatında qeyd olunub. Bildirilir ki, yeni konsepsiya Rusiyanın çoxqütblü dünya nizamı yaratmaq, o cümlədən ABŞ-ın hökmranlığına son qoymaq məqsədi daşıyır. Sənəddə bəşəriyyətin əksəriyyətinin Rusiya ilə konstruktiv münasibətdə maraqlı olduğu və arzulanan çoxqütblü dünyanın Qərbdə olmayan dünya gücləri və regional liderlər üçün imkanlar açacağı iddia edilir. ABŞ İnstitutu yazır ki, yeni sənəd çox güman ki, Kremlin bloka daxil olmayan ölkələrə daha vahid anti-Qərb bloku yaratmaq cəhdlərini dəstəkləyəcək. Lakin Rusiyanın iqtisadi qüdrətinin azalması və Ukraynada hərbi potensialının zəifləməsi səbəbindən Moskvanın təklifinə ciddi maraq göstərilməyəcək. İnstitut hesab edir ki, Si Cinpinin Moskvaya səfəri zamanı Putinin anti-Qərb bloku yaratmaq təklifi birmənalı qarşılanmayıb.
31-03-2023, 16:36
İsrail Suriyaya aviazərbələr endirdi
İsrail bu gün səhər saatlarında Suriyanın paytaxtı Dəməşq şəhəri yaxınlığına aviazərbələr endirib. Bu barədə Suriya rəsmiləri məlumat yayıb. Qeyd edilib ki, raketlərdən bəziləri havada vurulub, digərləri Dəməşq yaxınlığındakı əraziyə düşüb. Suriya rəsmiləri zərbələr nəticəsində itkilərin olub-olmaması barədə məlumat verməyib. İran İslam İnqilabı Keşikçiləri Korpusuna (SEPAH) bağlı "Tasnim" xəbər agentliyinin məlumatına görə, zərbələr nəticəsində iranlı zabit və hərbi məsləhətçi Milad Heydəri ölüb. Qeyd edək ki, bu, İsrailin son iki gün ərzində Suriya ərazisinə endirdiyi ikinci, mart ayında isə altıncı zərbədir. İsrail mətbuatı hücumların İranın Suriyada güclənmə cəhdlərinə qarşı həyata keçirildiyini yazıb.
31-03-2023, 16:25
Finlandiya yaxın günlərdə NATO-ya qoşulacaq
Finlandiya yaxın günlərdə Şimali Atlantika Blokunun tam hüquqlu üzvü olacaq. Bu barədə NATO-nun Baş katibi Yens Stoltenberq bildirib. Onun sözlərinə görə, NATO üzvlüyü Finlandiyanı və alyansı daha da gücləndirəcək: “Finlandiya qüdrətli orduya, geniş imkanlara və güclü demokratik institutlara malikdir. Buna görə də Helsinki alyansa böyük töhfə vermiş olacaq”. NATO-nun baş katibi, həmçinin İsveçin də mümkün qədər tez bir zamanda hərbi bloka qoşulmasını səbirsizliklə gözlədiyini vurğulayıb.
31-03-2023, 16:16
ABŞ 2 il müddətində İrana təzminat ödəyəcək
BMT-nin ali ədliyyə orqanı olan Beynəlxalq Ədalət Məhkəməsi ABŞ-ın İranın aktivlərini dondurmaqla beynəlxalq hüququ pozduğuna qərar verib. Qərara əsasən, Vaşinqton tehrana təzminat ödəməli olacaq. Bununla bağlı qərarı məhkəmənin sədr müavini, erməni əsilli Kiril Gevorqyan elan edib. "Hakimlər ABŞ-ın İranla “Dostluq, iqtisadi əlaqələr və konsulluq hüquqları” haqqında 1955-ci il müqaviləsinin bir sıra bəndlərinin üzərinə götürdüyü öhdəlikləri pozduğu qənaətinə gəliblər. Bunu nəzərə alaraq, Birləşmiş Ştatlar qərarın dərc edildiyi tarixdən etibarən 24 ay ərzində İrana təzminat ödəməyə borcludur”, - Gevorqyan vurğulayıb. Təzminat İran Mərkəzi Bankının 1,57 milyard dollardan çox məbləğdə dondurulmuş vəsaitlərini əhatə edir. İran Beynəlxalq Ədalət Məhkəməsinin qərarını alqışlayıb. Diqqətə çatdırılıb ki, ABŞ İranın aktivlərinin bir hissəsinin qeyri-qanuni dondurulmasına görə Tehrana təzminat ödəməlidir. Dövlət Departamentinin mətbuat katibinin birinci müavini Vedant Patel yazılı açıqlamasında qeyd edib ki, Beynəlxalq Ədalət Məhkəməsinin qərarı ABŞ rəsmilərini məyus edib.
31-03-2023, 16:12
Rusiya üçün heç nə dəyişmir, əməliyyatlar davam edir - Peskov
"Kreml Belarus prezidenti Aleksandr Lukaşenkonun
Ukraynada atəşkəs elan etmək təklifi ilə bağlı bəyanatından xəbərdardır, lakin Rusiya Federasiyası üçün heç nə dəyişmir, əməliyyatlar davam edir". Bunu Kremlin sözçüsü Dmitri Peskov deyib. "Avropa İttifaqında müzakirə olunan Ukraynaya “sülhməramlı qoşunların” göndərilməsi ideyası ciddi yanaşılsa, son dərəcə təhlükəlidir. Bu gün hərbi əməliyyatlar Rusiya Federasiyasının qarşısında duran məqsədlərə çatmaq üçün yeganə vasitədir. "The Wall Street Journal"ın jurnalistinin saxlanma şəraiti ilə bağlı ətraflı məlumat məxfidir, bununla FTX məşğul olur. Ukraynada nüvə silahının yerləşdirilməsinə çağırışlar Rusiyanın gözardı edə bilməyəcəyi hipotetik təhlükə yaradır. Trampın ittihamı Kremlin şərh verməyəcəyi prosesidir, ABŞ-ın daxili məsələsidir", - deyə o bildirib. "Putin bu gün Moskva vaxtı ilə saat 14.00-dan sonra Rusiya Federasiyası Təhlükəsizlik Şurasında yeni xarici siyasət konsepsiyasını müzakirə edəcək. XİN başçısı Sergey Lavrov isə hesabat verəcək. Rusiya Federasiyasının BMT Təhlükəsizlik Şurasında sədrliyi statusunun verdiyi bütün hüquqlardan istifadə ediləcək", - sözçü əlavə edib.
31-03-2023, 12:59
Rusiya Krımı ölkəyə birləşdirməyə məcbur oldu - Lukaşenko
"Ukraynada qoşunları yenidən toplamaq hüququ olmadan atəşkəs elan etmək lazımdır. Ukraynada nizamlanma üzrə danışıqlar bu gün başlamalıdır".
Belarusun rəsmi "BelTA" agentliyi xəbər verir ki, bunu ölkə prezidenti Aleksandr Lukaşenko deyib. "Qərb ölkəni məhv etmək üçün Belarus ərazisini işğal etməyə hazırlaşır. Son onilliklərin qaynar münaqişələri Qərbin bütün dünyanı özünə tabe etmək üçün yorulmaz istəyi ilə başlayıb. Müstəqil Belarusun tarixində suverenliyin saxlanması məsələsi heç vaxt bu qədər kəskin olmamışdı. Ukrayna xalqına sülh lazımdır, lakin bu istək Qərbdə heç kimi maraqlandırmır. ABŞ icazə verməyincə Ukraynadakı qırğın bitməyəcək. Qərb Minsk danışıqlarında əldə etdiyi vaxtdan Ukraynanı hərbiləşdirmək üçün istifadə etdi. Haradasa yeni münaqişə başlasa, dünya Ukraynanı unudacaq", - deyə Lukaşenko söyləyib. "Rusiya Krımı ölkəyə birləşdirməyə məcbur oldu", - o əlavə edib.
31-03-2023, 12:55
Erməni deputatlar arasında dava düşdü
Ermənistan parlamentinin deputatları arasında dava düşüb. Hadisə parlamentin Dövlət hüququ daimi komissiyasının qapalı iclasında “Beynəlxalq hüquqi məsələlər üzrə nümayəndə haqqında” qanuna dəyişiklik layihəsinin müzakirəsi baş verib. "Hraprak" nəşrinin məlumatına görə, iclasda iştirak edən müxalifət və iqtidar təmsilçiləri arasında dava olub. İnsident müxalif deputat Artsvik Minasyan və komitə rəhbəri Vladimir Vardanyan arasında yaşanıb. Deputat Aqnesa Xamoyan yerli mətbuata açıqlamasında məlumatı təsdiqləyib, lakin detalları açıqlamayıb. İnsidentlə bağlı polisə məlumat verilib. Deputat Artsvik Minasyan iş üzrə polis idarəsinə çağırılıb. Erməni KİV-ləri yazıb ki, dava zamanı Vladimir Vardanyan xəsarət alıb. Şahidlərin sözlərinə görə, üz nahiyəsi qan içində olan Vardanyan xəstəxanaya aparılıb.
31-03-2023, 12:36
Ukrayna hava qüvvələri İran “PUA”larını məhv etdi
Gecə saatlarında Ukraynanın hava hücumundan müdafiə qüvvələri Rusiya tərəfindən buraxılan İranın 10 “Shahed” zərbə PUA-sından 9-nu məhv edib. Bu barədə Ukrayna Silahlı Qüvvələrinin Hərbi Hava Qüvvələrinin komandanlığı məlumat yayıb. Bildirilib ki, Rusiya şimal istiqamətindən - Bryansk vilayətindən kamikadze dronlarla hücuma keçiblər. Səmada 5-ə qədər digər hava hədəfləri də qeydə alınıb.
30-03-2023, 23:32
ABŞ vətəndaşlarını Rusiyanı tərk etməyə çağırdı
Dövlət Departamenti ABŞ vətəndaşlarını Rusiyanı tərk etməyə çağırıb. Bu barədə Departamentin açıqlamasında qeyd olunub. Buna səbəb ABŞ vətəndaşı olan jurnalistin Rusiyada saxlanılmasıdır. “Rusiyada olan və ya bu ölkəyə gedən ABŞ vətəndaşları dərhal ölkəni tərk etməlidirlər”, - Dövlət Departamentinin bəyanatında deyilir. Qeyd edək ki, bu gün "Wall Street Journal" qəzetinin jurnalisti Evan Qerşkoviçi Rusiyada casusluq ittihamı ilə həbs olunub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!