16-05-2023, 23:01
Ermənistanla ABŞ arasında memorandum imzalandı
Ermənistanın İstintaq Komitəsi və ABŞ Federal Təhqiqatlar Bürosu (FTB) arasında memorandum imzalanıb. Bu barədə "Armenpress" agentliyi məlumat yayıb. Memorandum transmilli cinayətkarlıqla mübarizə üzrə birgə iş üçün nəzərdə tutulub. Ermənistan İstintaq Komitəsinin məlumatına görə, müqavilə əsasında əməkdaşlıq yeni səviyyəyə qalxacaq. “Sənəd kibercinayətkarlığa, adam oğurluğuna, mütəşəkkil cinayətkarlığa, iqtisadi, maliyyə və bank sektorunda qeyri-qanuni beynəlxalq fəaliyyətə, o cümlədən çirkli pulların yuyulmasına, qeyri-qanuni miqrasiyanın bütün formalarına, insan alverinə, eləcə də digər cinayət növlərinə qarşı mübarizəyə aiddir”, - açıqlamada bildirilir. Memorandumu Ermənistan İstintaq Komitəsinin sədr müavini Arsen Ayvazyan və ABŞ FTB-nin Ermənistan və Gürcüstandakı hüquq attaşesi Heder Berq imzalayıblar.
16-05-2023, 22:34
Baxçalı təklifi qəbul edib - Ərdoğan
MHP sədri Dövlət Baxçalı Türkiyə Böyük Millət Məclisinin müvəqqəti sədri olacaq. Bunu Türkiyə Prezidenti Rəcəb Tayyib Ərdoğan “CNN Türk” və “Kanal D” telekanallarına müsahibəsində bildirib. O qeyd edib ki, Baxçalı təklifi qəbul edib.
16-05-2023, 21:57
İkinci tur seçkiləri üçün böyük mitinqlər keçirməyəcəyik - Ərdoğan
Türkiyə Prezidenti Rəcəb Tayyib Ərdoğan 14 may seçkilərindən sonra ilk dəfə müsahibə verib. Dövlət başçısı "CNN Türk" və "Kanal D" telekanallarına müsahibəsində seçki prosesi, eləcə də seçkidən sonrakı hadisələrlə bağlı sualları cavablandırıb. Ərdoğan ikinci tur seçkiləri üçün böyük mitinqlər keçirməyəcəyini bildirib. O, həftəsonu zəlzələ bölgəsinə gedəcəyini bildirib. "Bu həftənin sonunda zəlzələ bölgəsinin müəyyən bir hissəsini ziyarət edəcəyəm. Mitinq planlaşdırmıram, zəlzələ bölgəsində mitinq xarakterli toplantılar keçirə bilərik", - o qeyd edib. Türkiyə lideri onu da deyib ki, qarşıdakı 12 günü diqqələ qiymətləndirəcəklər və qətiyyən rahat davranmayacaqlar: "Artıq 28 may üçün işə başlamışıq. Bu gün bütün liderlərlə görüşlərim oldu. Qarşıdakı 12 gündən yaxşı istifadə edəcəyik".
16-05-2023, 20:14
Ərdoğan “Cumhur İttifaqı”na daxil olan partiya liderləriylə görüşdü
Türkiyə Prezidenti Rəcəb Tayyib Ərdoğan "Cumhur İttifaqı"na daxil olan siyasi partiyaların liderləri ilə görüşüb. Bu barədə "TRT Haber" məlumat yayıb. Bildirilib ki, o, əvvəlcə MHP sədri Dövlət Baxçalı ilə görüşüb. Sonra Ərdoğan Demokratik Sol Partiyasının sədri Önder Aksakalı qəbul edib. AKP lideri daha sonra Yenidən Rifah Partiyasının sədri Fatih Erbakan, ardınca HÜDA PAR partiyasının sədri Zekeriya Yapıcıoğlu ilə görüş keçirib. Prezidentin ofisində baş tutan görüş mətbuata qapalı keçirilib. Detallar mətbuata açıqlanmayıb.
16-05-2023, 17:32
ABŞ rəsmisi Ermənistana səfər etdi
ABŞ Dövlət Departamentinin Narkotiklərlə Mübarizə və Hüquq Mühafizəsi üzrə Əməkdaşlıq İdarəsinin icraçı katibinin müavini vəzifəsini icra edən Ceyms Aplqeytin başçılıq etdiyi nümayəndə heyəti Ermənistana səfər edib. Ceyms Aplqeyt səfər çərçivəsində Ermənistanın baş prokuroru Anna Vardapetyanla görüş keçirib. Məlumata görə, Vardapetyan ABŞ-dan olan həmsöhbəti ilə qarşılıqlı əlaqələrin hazırkı səviyyəsini, prokurorluğun ehtiyacları üzrə davam edən dialoqu dəyərləndirib. "Tərəflər əməkdaşlıq və tərəfdaşlığın genişləndirilməsi perspektivlərinə toxunublar", - deyə qeyd olunub.
16-05-2023, 15:04
Türkiyədə seçilən deputatların 20 faizini qadınlar təşkil edir
Türkiyədə 14 mayda keçirilmiş seçkilər nəticəsində 28-ci çağırış parlamentin tərkibində 121 qadın deputat mandatı qazanıb. Bununla da parlamentdə qadın deputatların nisbəti 1/5 təşkil edib. Cümhuriyyət tarixində qadın deputatların qanunverici orqanda təmsil olunması 28-ci çağırışda ən yüksək səviyyəyə çatıb. Qeyri-müəyyən nəticələrə görə, parlamentə daxil olan 600 deputatdan 121-i qadındır. Parlamentin ən gənc üzvləri də qadınlardan ibarətdir. Belə ki, AKP-nin Ankaradan seçilmiş namizədi Zehranur Aydemirin 25, İstanbulu təmsil edən Rümeysa Kadakın isə 27 yaşı var. Qeyd edək ki, 14 mayda Türkiyədə həm parlament, həm də prezident seçkiləri keçirilib. Prezident seçkilərində heç bir namizəd 50%+1 səs toplaya bilmədiyi üçün mayın 28-də ikinci turun keçirilməsi qərara alınıb.
16-05-2023, 14:41
Ehtiyatda olan erməni hərbiçilər orduya çağırıldı
Ermənistanda ehtiyatda olan hərbçilərin təlim-məşq toplanışları keçiriləcək. Bu barədə "Hayeli" nəşri məlumat yayıb. Bildirilir ki, toplanış 2023 avqustun 1-dən oktyabrın 13-dək davam edəcək. Məlumata görə, ehtiyatda olan zabit və gizirlərin hərbi vərdişlərinin təkmilləşdirilməsi, təlim-tərbiyə və hazırlıq səviyyəsinin yüksəldilməsi, ehtiyatda olan zabitlərin ehtiyac olduqda döyüş növbətçiliyinə cəlb edilməsi həyata keçiriləcək.
16-05-2023, 12:53
KTMT-dən çıxmaq gündəlikdə olan məsələ deyil - Ermənistan XİN
"KTMT-dən çıxmaq mümkünlüyü müzakirə olunub, amma indi İrəvanın gündəliyində belə bir məsələ yoxdur". Bu barədə Ermənistan XİN rəhbərinin müavini Mnatsakan Safaryan jurnalistlərə açıqlamasında bildirib. Onun sözlərinə görə, məsələ 2022-ci ilin sentyabrında Təhlükəsizlik Şurasının iclasında qaldırılıb, amma belə bir addım atmamaq, İrəvanda keçiriləcək sammit ərəfəsində blokla işi davam etdirmək qərara alınıb. "Daha sonra İrəvan görüşündə bəzi məsələlər müzakirə olundu, hazırda iş davam edir. Yaxın vaxtlarda təşkilatın Cənubi Qafqazdakı vəziyyətlə bağlı bəyanatı ilə bağlı müzakirələr davam etdiriləcək", - o əlavə edib. Diplomat qeyd edib ki, regionda vəziyyət ağırdır və Ermənistan KTMT-nin üzvü olmaqla üzərinə öhdəliklər götürərək müəyyən nəticələrə ümid etməkdə davam edir. "Ermənistanla Azərbaycan arasında dialoq üçün eyni vaxtda bir neçə platformadan, o cümlədən Rusiya platformasından istifadə olunur", - Mirzoyanın müavini deyib.
16-05-2023, 12:11
Ermənistanın silahlanmasına kömək etməliyik - Fransız rəhbər
Ukrayna Müdafiə Nazirliyinin Baş Kəşfiyyat İdarəsindəki (GUR) mənbələr bildiriblər ki, Fransa Ermənistanı öldürücü silahlarla təchiz etmək qərarına gəlib. Bu barədə İsrailin "İ24NEWS" nəşri məlumat yayıb. İddiaya görə Fransa yaxın vaxtlarda Ermənistana 50 zirehli transportyor təhvil verəcək. Həmçinin, gələcəkdə Fransa istehsalı olan "Minstrel" hava hücumundan müdafiə raketlərinin İrəvana tədarükü nəzərdən keçirilir. Nəşr qeyd edir ki, Paris Ermənistana silah ixracı üçün sistem qurmağa hazırlaşmağa başlayıb. Fransa-Ermənistan Dostluq Qrupunun rəhbəri Gilbert-Luc Devinaz qarşıdan gələn silah tədarükü barədə açıqlama verib. “Biz Ermənistana imkan verməliyik ki, öz sərhədlərinin təhlükəsizliyini təmin etsin, yəni onun silahlanmasına kömək etməliyik", - o bildirib.
16-05-2023, 11:07
Akar seçkilərlə bağlı sualları cavablandırdı
Türkiyənin milli müdafiə naziri Hulusi Akar AKP Kayseri vilayət təşkilatında keçirilən mətbuat konfransında jurnalistlərin suallarını cavablandırıb. O, "ATA İttifaqı"nın namizədi Sinan Oğanın ikinci turda "Cümhur İttifaqı" ilə əməkdaşlıq edib-etməyəcəyi ilə bağlı da danışıb. "Bunlar siyasətin aktor və faktorlarıdır. Bütün bu məsələlər siyasi tənlikdə hansısa şəkildə müzakirə edilər. Hər kəs öz yerini alar. Ağlabatan və məntiqli şəkildə. Bu mövzuda həm prezidentimiz, həm partiyamız lazımi təmasları və əlaqələri qurar, danışar, müzakirələr aparar, tədbirlər görər", - deyə o bildirib. Qeyd edək ki, Akar AKP-dən Kayseri üzrə deputat seçilib. Türkiyədəki seçkilərdə heç bir namizəd 50%+1 səs toplaya bilmədiyi üçün prezident seçkiləri ikinci tura qalıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!