AZƏRBAYCANDA DƏNİZÇİLƏRİN HAZIRLANMASI VƏ SERTİFİKATLAŞDIRILMASI PROSESİ BEYNƏLXALQ DƏNİZ TƏŞKİLATININ YOXLAMASINDAN UĞURLA KEÇMİŞDİR. BU BARƏDƏ BEYNƏLXALQ DƏNIZ TƏŞKİLATI DƏNİZ TƏHLÜKƏSIZLİYİ KOMİTƏSİNİN CARİ İLİN 11-20 MAY TARİXLƏRİNDƏ LONDON ŞƏHƏRİNDƏ KEÇİRİLMİŞ 96-CI SESSİYASINDA MÜVAFİQ QƏRAR QƏBUL ETMİŞDİR.

Ölkəmizin Birləşmiş Millətlər Təşkilatının ixtisaslaşmış agentliyi olan Beynəlxalq Dəniz Təşkilatına üzv olduğu 1995-ci il tarixindən etibarən dəniz nəqliyyatı sahəsində qoşulduğu 20-dən çox beynəlxalq konvensiya və protokollardan irəli gələrək bu sahəyə dair tələblərin təmin olunması qanunvericiliklə müəyyən olunmuş səlahiyyətlər çərçivəsində Azərbaycan Respublikasının Dövlət Dəniz Administrasiyası tərəfindən həyata keçirilir.
“Azərbaycan Respublikasının Dövlət Dəniz Administrasiyasının yaradılması haqqında” Azərbaycan Respublikası Prezidentinin 6 fevral 2006-cı il tarixli 1271 nömrəli Sərəncamında Azərbaycan Respublikasında dəniz gəmiçiliyi sahəsində aparılan siyasətin, habelə Birləşmiş Millətlər Təşkilatının Beynəlxalq Dəniz Təşkilatı və digər dəniz təşkilatları ilə əməkdaşlığın, Azərbaycan Respublikasının tərəfdar çıxdığı beynəlxalq dəniz konvensiyalarının icrasına nəzarətin həyata keçirilməsi səlahiyyətlərinin Azərbaycan Respublikasının Dövlət Dəniz Administrasiyasına tapşırılması məsələsi öz əksini tapmışdır.
Azərbaycan Respublikasının 22 aprel 1997-ci il tarixli, 276-IQ nömrəli Qanunla qoşulduğu “Dənizçilərin hazırlanmasına, onlara diplom verilməsinə və növbə çəkməyə dair 1978-ci il tarixli Beynəlxalq Konvensiya”nın tələblərinin tətbiqi məqsədi ilə Dövlət Dəniz Administrasiyası tərəfindən məqsədyönlü işlər görülmüşdür və bu proses ciddi nəzarətdə saxlanılır.
Dövlət Dəniz Administrasiyası gəmiçilik sahəsində fəaliyyət göstərən müəssisələr, təşkilatlar və Azərbaycanın Dövlət bayrağı altında üzən gəmilər tərəfindən bu Konvensiyanın tələblərinin yerinə yetirilməsinə nəzarət işini həyata keçirərək müvafiq sahədə böyük uğurların qazanılmasını təmin etmişdir.
Belə ki, Dövlət Dəniz Administrasiyası tərəfindən məhz bu məqsədlə dəniz nəqliyyatı sahəsi üzrə tədris proqramları təsdiq edilmiş, Təlim-Tədris Mərkəzlərinin maddi-texniki bazası əhəmiyyətli dərəcədə gücləndirilmiş, yeni Təlim-Tədris Mərkəzlərinin yaradılması üçün münbit şərait formalaşdırılmış, eləcə də Konvensiyanın əhatə etdiyi məsələlər üzrə qəbul edilmiş normativ hüquqi aktlar Beynəlxalq Dəniz Təşkilatına təqdim edilmişdir.


Məlumat üçün qeyd edilməlidir ki, “Dənizçilərin hazırlanmasına, onlara diplom verilməsinə və növbə çəkməyə dair 1978-ci il tarixli Beynəlxalq Konvensiya”nın qüvvəyə mindiyi hər bir üzv dövlət ən azı beş ildə bir dəfə adıçəkilən Konvensiyanın tələblərinin tətbiqi üzrə müstəqil qiymətləndirmədən keçməlidir.
Bununla əlaqədar olaraq dənizçilərin hazırlanması, onların bilik, bacarıq və səriştəliliyinin qiymətləndirilməsi, eləcə də sertifikatlaşdırılması sisteminin tətbiqi üzrə Dövlət Dəniz Administrasiyasının fəaliyyəti Beynəlxalq Dəniz Təşkilatının mütəxəssisləri tərəfindən yoxlanılmışdır.
Keçirilmiş yoxlamanın nəticəsi, eləcə də Beynəlxalq Dəniz Təşkilatına təqdim edilmiş sənədlər ətraflı şəkildə təhlil edildikdən sonra ölkəmizdə dənizçilərin hazırlanması sahəsində həyata keçirilən fəaliyyətin qeyd edilən Konvensiyanın tələblərinə uyğun olması barədə Beynəlxalq Dəniz Təşkilatının Dəniz Təhlükəsizliyi Komitəsinin cari ilin 11-20 may tarixlərində London şəhərində keçirilmiş 96-cı sessiyasında adıçəkilən Təşkilat tərəfindən qərar qəbul edilmişdir.
Məhz bu səmərəli və effektiv fəaliyyətin göstəricisi olaraq Azərbaycan Respublikasının Beynəlxalq Dəniz Təşkilatının “Ağ siyahısı”nda olması kimi sevindirici və qürurverici hal Dövlət Dəniz Administrasiyası tərəfindən verilmiş diplom və sertifikatların bütün dəniz dövlətləri tərəfindən tanınması deməkdir.

Azərbaycan Respublikası Dövlət Dəniz Administrasiyasının mətbuat xidməti